1 Kɔrèn 2 - Meta’

Ənû ɨmbə̀ʼ ə Kristo we nɨ mbɨ nyaʼa kombɨ əzed ə baʼnɨ

¹ Mbɨ bɔŋgɔb, ənɨ mə̀ nyaʼa yeʼe əsɨ nən, chəi mə̀ nyaʼa gha ɨnû mbe nɨ yeʼ ənə̀mə ɨmbə̀ʼ ə Ŋwìə̀ ɨ nən ənɨ mɨŋgam kyeŋ kɨ̀ mbɨ ɨwe kyeŋ,

² ɨmbə̀ʼ ɨghəm nɨ ənɨ mə̀ nyaʼa mbɨ nən, mə nyaʼa nùŋ ɨŋga mɨ fîŋ ni chəi mə bɨrɨ gha ənû ə cherə chè rɨ ənɨ ənû ɨmbə̀ʼ ə Yeso Kristo fɔrɨ ənû ɨmbə̀ʼ ɨchî nɨ mbɨ nyaʼa kombɨ əməd əzed ə baʼnɨ.

³ Ənɨ mə̀ nyaʼa yeʼe əsɨ nən, mə nyaʼa bɔd, əne ɨbɔɔ nyaʼa ghɨ̀ mə bindɨ ni chəi mə̀ bɨrɨ faʼ ɨchî chɔ̀m.

⁴ Ənɨ mə̀ nyaʼə ghà ɨŋgam Ŋwiə̀ ɨ nən, chəi mə̀ nyaʼa nɨŋ ɨwe mbɨ ɨŋgam nəmɨ nəmɨ bɔŋ ghàm. Mə wɨə nyaʼə ghàə̀ yeʼ ɨchî nɨ Əzwî ə nyaʼə chwi ɨnə̂njɨ̀ ɨ num bə̀ nàʼ ɨka ɨ num.

⁵ Mə wɨə nyaʼə ghɨ̀ əne ɨmbə̀ʼ mbə̀ nuŋ fîŋ yeʼ ɨgun ɨka we nɨ Ŋwìə̀ ə nàʼə̀, kaʼi ɨgun ɨwe bə̂d mɨ̀sɔŋɨchù.

Ɨwe we nɨ Ŋwìə̀ ə nàʼə̀

⁶ Ənɨ tɨ̀ yeʼ əkaʼ bə̂d Kristo mbe nɨ fə kaanɨ, tɨ̀ wɨə ghàm ɨŋgam ɨwe. Ka ɨwe we yɨ i rɨ əmbɨ ə bə̂d mbe rɨŋga ɨsɨg wɔ̂, kɨ̀ rɨ əmbɨ ɨzwî mbe nɨə tùmbɨ̀ ɨsɨg wɔ̂, nɨ ɨka mɨ̀mə̌d bɨrɨ mì.

⁷ Tɨ̀ wɨə ghàmə̀ yeʼ ɨmbə̀ʼ ɨwe we nɨ Ŋwiə̀ ə nàʼə̀. Ɨwe we wɨ ənə̀mə, nɨ chəi bə̂d kyerɨ, nɨ bɔŋ Ŋwìə̀ nyaʼa sɨə tekɨ ɨsɨg, wɨ̀ nyaʼa fə ghà ni tə bɨrɨ che ənjìm ɨwe we nàʼ ɨwumnɨ ɨ na.

⁸ Chəi wə̀d mɔʼɔ rəbɔʼ mbe nɨə tùmbɨ̀ ɨsɨg wɔ̂ nyaʼa kyerɨ ənû zɔ̂. À kɨ nɨ mbɨ nyaʼa kyerɨ, njɨ chəi mbɨ nyaʼa kombɨ Ə̀nùŋɨ̀sɨg we nɨ mbɨə naʼ ɨwumnɨ ɨ bɔ.

⁹ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ənû ze nɨ chəi ɨghə kweʼ zə, kɨ̀ ə̀tǒŋ ə kweʼ zu, kɨ̀ nɨ wə̀d kweʼ kɔndɨ ɨŋga i fîŋ, yɨ əze nɨ Ŋwìə̀ fə tekɨ nùŋ əmbɨ ə bə̂d mbe nɨ ghaʼ əməd.”

¹⁰ Àyɨə Ŋwìə̀ fə chwi ɨnû mbe ɨ na ənjìm Əzwî əməd. Əzwî ze ə zɨə kyèʼ ɨnû jìm, ka àbei ɨnû mbe nɨ yeʼ ənə̀mə ɨmbə̀ʼ ə Ŋwiə̀.

¹¹ À kɨə we nɨ kyerɨ tɨkɔndɨ bə̂d mɨ̀sɔŋɨchù chè rɨ ənɨ əzwî ze nɨ yeʼ ɨŋga məd ə? Əne bə̂, chəi ənɨ tɨ wə̀d kyerɨ tɨkɔndɨ Ŋwiə̀ chè rɨ ənɨ Əzwî ə Ŋwiə̀.

¹² Tɨ̀nîn Əzwî ze nɨ Ŋwìə̀ ə nàʼ ə fə sɨ i ɨŋga na. Chəi əzwî ze nɨ yeʼ ɨŋga ɨsɨg ɨŋga na. Əzwî ze nɨ Ŋwìə̀ ə nàʼ ə zɨ ɨŋga na ɨmbə̀ʼ tɨ̀ kyerɨ mɨneʼe mbe nɨ Ŋwìə̀ naʼ ɨ na.

¹³ Chəi tɨə ghà ɨnû mbɔ̂ ənɨ mɨŋgam nɨ tɨ̀ nɨŋ tɨ ənɨ ɨwe bə̂d mɨ̀sɔŋɨchù. Tɨ̀ wɨə ghàə̀ yeʼ ənɨ mɨŋgam nɨ Əzwî ə Ŋwiə̀ ə naʼ ɨ na. Tɨ̀ wɨə nɨŋə mɨŋgam mbe toʼrɨ ɨnû rəsìʼ ɨmbə̀ʼ Əzwî ə Ŋwiə̀ əmbɨ ə bə̂d mbe nɨ Əzwî ə Ŋwiə̀ ə yeʼ ɨŋga mɨ̀mə̌d.

¹⁴ Ka wə̀d we nɨ chəi Əzwî ə Ŋwiə̀ ɨŋga məd we tɨ wɨ̀ ben ɨnû rəsìʼ mbe nɨ Əzwî ə Ŋwìə̀ ə nàʼə̀, ɨmbə̀ʼ ɨghəm nɨ mbɨ yɨ ənû əneŋ ɨ bɔ. Chəi ənɨ tɨ̀ wɨ̀ kyerɨ ɨnû mbe ɨmbə̀ʼ ɨghəm nɨ àmei Əzwî ə Ŋwiə̀ ze tɨ̀ zɨə ghɨ̀ ni wɨ̀ kyerɨ.

¹⁵ Wə̀d we nɨ Əzwî ə Ŋwiə̀ ə yeʼ ɨŋga məd we tɨ̀ wɨ̀ zə ɨnû jìm, ətu əməd ə zeŋ ɨmbə̀ʼ mbɨwən, àyɨə chəi ənɨ tɨ ətu ə wə̀d cherə zeŋ ɨmbə̀ʼ ɨnû mbe nɨ wɨə ghàə̀.

¹⁶ Ə zɨ ɨŋga Ə̀ŋwàʼnɨ̀ ə Ŋwiə̀ ni, “À kɨə we nɨ kyerɨ ɨnû mbe nɨ Ŋwìə̀ ə kɔndɨə ɨmbə̀ʼ kəərɨ əməd ə?” Àyɨə tɨ̀ we tɨ̀ rɨ̀ kyerɨ ɨnû mbɔ̂ ɨmbə̀ʼ ɨghəm nɨ ənû ze nɨ Kristo ə kɔndɨə ə zɨ ɨŋga ta fîŋ.