1 Kɔrèn 15 - Meta’

Ənû ɨmbə̀ʼ ɨchî nɨ Kristo nyaʼa zwemə

¹ Mbɨ bɔŋgɔb, mə wɨə kə̀b nɔɔrɨ mbə ɨtu ɨmbə̀ʼ ɨkə̂n chɔ̀m we nɨ mə̀ nyaʼa gha ɨ nən, mbə zu benɨ, əne fə təm ɨgun kàànɨ̀.

² Mbə bɨrɨ jwɨ̀ rəŋgəʼ ənjìm ɨkə̂n chɔ̀m wɔ̂ əwù ze nɨ mbə̀ yim ɨŋgam Ŋwiə̀ we nɨ mə̀ gha ɨ nən wɨ kàànɨ̀. Mbə mɨ ton ghɨ ə əne, njɨ ɨnû mbe nɨ mbə̀ benɨ yɨ ətu ə̀kǒ.

³ Ənû ə kyeŋ rɨtu ze nɨ mbɨ nyaʼa gha ɨ num, mə̀ nyaʼa bə̀ ghà ɨ nən. Ənû ze yɨ ni Kristo nyaʼa kwɨ ɨmbə̀ʼ mba ɨnû rɨbɔ̀ŋ, ɨchî nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀.

⁴ Mbɨ nyaʼa tweŋ əməd, əne Ŋwìə̀ nyaʼa zwemnɨ əməd ənɨ ɨni nyaʼa che ɨtad, ɨchî nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀.

⁵ Wɨ̀ nyaʼa jwɨ̀ ɨfě Pità, bə̀ jwɨ̀ ɨfě bə̂d tom mbe wum chɔ̀b rɨbe.

⁶ À nyaʼa ənɨ ə nyùmə̀ cherə, wɨ̀ nyaʼa jwɨ̀ ɨghəm we mɔʼ ɨfě bə̂d mbe nɨ nyaʼə beenɨ əbɔʼ məd. Bə̂d mbe nyaʼa chè rɨ ənɨ əkɨ ətân. Mɨ̀mə̌d mɨ̀nɔnɔʼ mbɨə kɨrɨ ɨkǎ, ka à bè yeʼi ni mbɨ mɔʼɔ fə kwɨ.

⁷ Wɨ̀ nyaʼa bə̀ yì jwɨ ɨfě Jems. Ənɨ əgha ə nyaʼa saarɨ, wɨ̀ nyaʼa bə̀ jwɨ̀ ɨfě bə̂d tom mɨ̀jìm.

⁸ Wɨ̀ nyaʼa sɨ nwìə̀ jwɨ̀ ənɨ mɨ ɨfě. Mɔ̌ yɨ ɨghabɨ ə wə̀d nɨ mbɨ nyaʼa gywɨ nɨ chəi nyùmə̀ nyaʼa kɨrɨ kuʼ.

⁹ À yɨ əne ɨmbə̀ʼ ɨghəm nɨ rəbɔʼ bə̂d tom Kristo mɨ̀jìm, mɔ̌ yɨə we nɨ kə chè. Chəi mə̀ kuʼ nɨ tɨ̀ mbɨ tɔŋ əmɨ ənɨ ə wə̀d tom, ɨmbə̀ʼ ɨghəm nɨ mə wɨə nyaʼə nwèndɨ̀ rɨkyerɨ-ɨwu bə̂d mbe nɨ nyaʼa ɨŋga ɨfetɨ bə̂d Ŋwiə̀.

¹⁰ Mə yɨə wə̀d we nɨ mə yeʼ wɨwən ənjìm ɨ̀chɔ̀m Ŋwiə̀. Chəi ɨ̀chɔ̀m we nɨ Ŋwìə̀ nyaʼa ghɨ̌ ənɨ ə num nyaʼa che ətu ə̀kǒ. Àyɨə mə nyaʼa fàʼ rɨkǎ chè mɨ̀mə̌d mɨjìm. Ka à bè yeʼi ni kaʼi mɔ̌ nyaʼa fàʼi, àyɨə Ŋwiə̀ nyaʼa che ənjìm ɨ̀chɔ̀m məd ghɨ̀ mə fàʼ.

¹¹ Əne yɨ ni kɨ̀ à kɨ ɨŋgam Ŋwiə̀ we nɨ mə̀ nyaʼə ghàə̀, kɨ̀ we nɨ mɨ̀mə̌d nyaʼa ghàə̀, ənû nɨ yeʼ əŋgu yɨ ni mbə nyaʼa zu benɨ.

Ənû ɨmbə̀ʼ ɨchî nɨ ɨvɨ bə̂d bɨrɨ zwemə

¹² Mbɨ mɨ yeʼə ghàə̀ ni Ŋwìə̀ nyaʼa zwemnɨ ə Kristo, njɨ zɨə sɨ wɨrɨ chè rɨ yè nɨ bə̂d mɔʼɔ rəbɔʼ nən ə ghà ni chəi bə̂d bɨrɨ zwemə ə?

¹³ À mɨ yeʼ ni chəi bə̂d bɨrɨ zwemə, əne chəi Ŋwìə̀ nyaʼa bə̀ zwemnɨ ə Kristo.

¹⁴ À mɨ bə̀ yeʼ nɨ chəi Ŋwìə̀ nyaʼa zwemnɨ ə Kristo, njɨ ɨŋgam Ŋwiə̀ we nɨ tɨə ghàə̀ yɨ ətu ə̀kǒ. Ə ɨbenɨ yɨə bə̀ ətu ə̀kǒ.

¹⁵ Zɨə mɨ nɨə yeʼ əne, njɨ zɨə chwi ni tɨ̀ wɨə ghà ɨnû nɨ chəi Ŋwìə̀ nyaʼa ghɨ̌, ɨmbə̀ʼ ɨghəm nɨ tɨ̀ nyaʼa gha ɨmbə̀ʼ əməd ni wɨ̀ nyaʼa zwemnɨ ə Kristo. Əne chəi wɨ̀ nyaʼa zwemnɨ əməd, əwù ze nɨ à yɨ rəsìʼ ni chəi ɨvɨ bə̂d bɨrɨ nɔ zwemə.

¹⁶ À mɨ yeʼ nɨ chəi ɨvɨ bə̂d bɨrɨ nɔ zwemə, əne chəi Ŋwìə̀ nyaʼa bə̀ zwemnɨ ə Kristo.

¹⁷ À mɨ yeʼ nɨ chəi Ŋwìə̀ nyaʼa kaŋ zwemnɨ ə Kristo, njɨ ɨchî nɨ mbə̀ nuŋ fîŋ ɨgun ə Kristo yɨ ətu ə̀kǒ, njɨ mbə mbɨə bə̀ kɨrɨ ghɨ̀ ɨnû rɨbɔ̀ŋ.

¹⁸ Əne yɨ ni bə̂d mbe nɨ nyaʼa be ben ə Kristo bɔŋ kwɨ fə nim.

¹⁹ Ənû ze nɨ tɨə nùŋə̀ fîŋ ɨgun ə Kristo wòmə̀ mɨ yeʼə nwìə̀ àmei ənɨ ɨ̀tènɨ̀ wɔ̂, njɨ bə̂d bɨrɨ kə̀n ənɨ ə na chè ɨchî nɨ mbɨ bɨrɨ kən ənɨ ə bə̂d cherə.

²⁰ À yɨ rəsìʼ ni Ŋwìə̀ nyaʼa zwemnɨ ə Kristo. À yɨə bə̀ rəsìʼ ni Kristo yɨə wə̀d rɨtu nɨ Ŋwìə̀ zwemnɨ rəbɔʼ bə̂d mbe nɨ nyaʼa fə kwɨ.

²¹ Ɨchî nɨ ɨvɨ nyaʼa yeʼe ɨŋga ɨsɨg ɨmbə̀ʼ ənû ze nɨ wə̀d mɔʼ nyaʼa ghɨ̌, əne bə̂ ənû nɨ zwemə fə bə̀ yeʼe ɨmbə̀ʼ ɨchî nɨ wə̀d cherə nyaʼa zwemə.

²² Bə̂d mɨ̀jìm berɨ kwɨ ɨchî nɨ mbɨ yeʼ ənɨ ɨfɔtɨ mbɨ Adàm, əne bə̂ bə̂d mɨ̀jìm bɨrɨ chub ɨkǎ ɨchî nɨ mbɨ yeʼ ənɨ ɨfɔtɨ mbɨ Kristo.

²³ Ŋwìə̀ bɨrɨ zwemnɨ wə̀d mɔʼ mɔʼ ɨwaŋ ɨwaŋ. Wə̀d rɨtu we nɨ wɨ̀ zwemnɨ yɨə Kristo. Ənɨ Kristo wɨrɨ yeʼe, wɨ̀ bɨrɨ beenɨ zwemnɨ bə̂d mbe nɨ yeʼ mbɨ Kristo.

²⁴ Ənɨ wɨ̀ ghɨ̀ əne ɨnwǐ bɨrɨ sɨ yeʼe. Ənɨ ə nyùmə̀ we, Kristo bɨrɨ nimnɨ ɨzwî jìm mbe nɨ yeʼ ɨkaŋ, nimnɨ ɨzwî jìm mbe nɨ yeʼ ɨŋga ɨfə bə̀ nimnɨ ɨzwî jìm mbe nɨ yeʼ ɨŋga ɨsɨg, sɨ nàʼ ənû ɨfɔ̀n əmbɨ ə Ŋwìə̀ Mbǎʼ.

²⁵ Kristo berɨ tumbɨ ɨsɨg pè ənɨ wɨ̀ fə nuŋ mbi bə̂d pə̀n mɨjìm əton mbi ɨwu.

²⁶ Wə̀d pə̀n we nɨ wɨ̀ bɨrɨ sɨ nwìə̀ nimnɨ yɨ ɨvɨ.

²⁷ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ŋwìə̀ fə nùŋ ɨghɨjìm əton ɨwu ɨməd.” Zɨə mɨ yeʼ ɨŋga Ə̀ŋwàʼnɨ̀ ə Ŋwiə̀ ni, “Ŋwìə̀ fə nùŋ ɨghɨjìm əton ɨwu ɨməd,” əne zɨə zeŋ ni chəi Ŋwìə̀ əbɔʼ ɨghɨ mbe. À yɨə məd ziə nuŋ ɨghɨjìm əton ə Kristo.

²⁸ Ənɨ Ŋwìə̀ fə nuŋ ɨghɨjìm əton məd, Wan ziə bɨrɨ chub əton ə Ŋwìə̀ we nɨ nyaʼa nuŋ ɨghɨjìm əton məd, ɨmbə̀ʼ Ŋwìə̀ yeʼ ɨgwɨ ɨghɨjìm bə̀ tùmbɨ̀ ɨghɨjìm.

²⁹ À mɨ yeʼ nɨ chəi Ŋwìə̀ bɨrɨ zwemnɨ bə̂d, njɨ əton nɨ bə̂d ə nɨŋə mɨnib ənɨ ɨkum bə̂d nɨ fə kwɨ kɨ ɨmbə̀ʼ ə yè ə? À mɨ yeʼ nɨ chəi Ŋwìə̀ bɨrɨ nɔ zwemnɨ bə̂d, njɨ bə̂d kɨə nɨŋə mɨnib ənɨ ɨkum mɨ̀mə̌d ɨmbə̀ʼ ə yè ə?

³⁰ Ŋgəʼ kɨə beenɨ əbɔʼ na ənɨ mɨ̀nyùmə̀ jìm ɨmbə̀ʼ ə yè ə?

³¹ Mbɨ bɔŋgɔb, mə wɨ ɨchû ɨvɨ ɨni jìm! Əne yɨ ɨmbə̀ʼ ɨghəm nɨ mə wɨə goŋ ɨgɔ̂ ɨmbə̀ʼ əwən ɨchî nɨ tɨ̀ yeʼ ənɨ ɨfɔtɨ mbɨ Kristo Yeso a Ə̀nùŋɨ̀sɨg.

³² À mɨ yeʼ ni mə kaŋ kə̀ʼ zɔ̀ŋ mbɨ ə “nyam rɨ tɔtɔ” ə Efesùs, ɨchî nɨ bə̂d mɨ̀sɔŋɨchù ə kɔndɨə, njɨ njìm nɨ mə̀ bɨrɨ jɨg kɨ ə ye ə? À mɨ yeʼ nɨ chəi Ŋwìə̀ bɨrɨ zwemnɨ bə̂d, njɨ tɨ̀ ghɨ ənû ze nɨ mbɨ ŋwaʼnɨ ni, “Tɨ̀ jɨg bə̀ nɔ, ɨmbə̀ʼ ɨghəm nɨ ɨsɔ tɨ̀ bɨrɨ kwɨ.”

³³ Tɨ wə̀d mɔʼɔ tambɨ i əwən, àyɨə mbə̀ kyerɨ ni: “Mɨsə̀ʼ rɨbɔ̀ŋ mbɨə chə̀kɨ̀ə̀ bə̂d chɔ̀m.”

³⁴ Mbə̀ wɨrɨ kɔndɨ mbə ɨtu kwàʼ ɨchî chɔ̀m. Tɨ mbə̀ wɨrɨ ghɨ ə ɨnû rɨbɔ̀ŋ. Chəi bə̂d mɔʼɔ rəbɔʼ nən kyerɨ ə Ŋwiə̀. Mə wɨə ghà ənû zɔ̂ ɨmbə̀ʼ naʼ tɨ̀nìd ɨtu ɨ nən.

Nyamnyod nɨ bə̂d bɨrɨ zwemə mbɨ zɨwən.

³⁵ Wə̀d mɔʼɔ bɨrɨ biirɨ ni, “Ŋwìə̀ kɨə wo zwemnɨ ɨvɨ bə̂d rɨ ye ə? Mbɨ bɨrɨ berɨ ɨkwɨ nyamnyod wi ə?”

³⁶ Àwɔ̀ yɨ əneŋ! À mɨ kon fɨtam, ka fɨ bɨrɨ gwed i kɨrɨ ənɨ fɨ fə bè kwɨ.

³⁷ Ka əghɨ ze nɨ à konɨ bɨrɨ yeʼ àmei əzɨ əwən əwù ze nɨ zɨə fə kwi. À kon àmei fɨtam, ɨghə̀m à yɨ fɨtam kywɨ kɨ̀ fɨtam əghɨ ə cherə.

³⁸ Ŋwìə̀ wɨə nàʼ ɨnyod əmbɨ fɨtam ɨchî nɨ wɨ̀ nyaʼa nuŋɨ. Ɨ wɨə nàʼ ɨnyod əmbɨ fɨtam ɨgwɨ ɨchî nɨ zɨə kuʼ əmbɨ fɨtam fe.

³⁹ Ka nyamnyod jìm yɨ i ɨkwɨ mɔʼ. Ɨkwɨ mɔʼɔ yɨ əmbɨ ə bə̂d, ɨkwɨ cherə yɨ əmbɨ ə nyam, ɨkwɨ cherə yɨ əmbɨ rɨnən, ɨkwɨ cherə yɨ əmbɨ əgwi.

⁴⁰ Ɨghɨ mbe nɨ yeʼ ɨkaŋ mbɨ əŋgu, ɨghɨ mbe nɨ yeʼ ɨgwɨ ə si mbɨə bə̀ əŋgu. Àyɨə ɨghɨ mbe nɨ yeʼ ɨkaŋ mbɨə teenɨə ənɨ ə ɨkwɨ ɨchî, mbe nɨ yeʼ ə si mbɨə bə̀ teenɨə ənɨ ə ɨkwɨ ɨchî.

⁴¹ Nyùmə̀ wɨə te ənɨ i ɨkwɨ ɨchî, ɨmɨg wɨə te ənɨ i ɨkwɨ ɨchî, tɨtəmɨ bə̀ te ənɨ ə ɨkwɨ ɨchî. Ɨchî nɨ fɨtəmɨ fibɨ̀ ə teə ə kwepɨ rɨ ənɨ ɨchî nɨ fɨ cherə ə bə̀ teə.

⁴² À yɨ ɨchî nɨ zɨə bɨrɨ yeʼ we ənɨ ə nyùmə̀ we nɨ bə̂d bɨrɨ zwemə. Əghɨ ze nɨ mbɨ kon ə zɨə kwɨə. Ka əze nɨ mbɨ nɔ ɨkaŋ ə zɨə nɔ̀ kwɨ i.

⁴³ Ənɨ mbɨ konɨ, chəi əghɨ ze ə bɔŋɨ, àyɨə ənɨ mbɨ nɔ ɨkaŋ, əghɨ ze ə bɨrɨ te. Ənɨ mbɨ konɨ, əghɨ ze ə bɔd, àyɨə ənɨ mbɨ nɔ ɨkaŋ, əghɨ ze ə bɨrɨ kà.

⁴⁴ Ənɨ mbɨ konɨ, əghɨ ze ə berɨ nyamnyod əgɔ̂, àyɨə ənɨ mbɨ nɔ ɨkaŋ, Əzwî ə bɨrɨ yeʼ ɨŋga nyamnyod ze.

⁴⁵ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ɨ̀tènɨ̀ wɨə nyaʼa ɨŋga Adàm nɨ nyaʼə wə̀d rɨtu.” Adàm we nɨ sɨ nwìə̀ yɨ Əzwî nɨə nàʼ ɨ̀tènɨ̀.

⁴⁶ Kaʼi nyamnyod ze nɨ Əzwî ə yeʼ ɨŋga nɨ Ŋwìə̀ nyaʼa be tekɨ. Ŋwìə̀ nyaʼa bè tekɨ nyamnyod əgɔ̂, beenɨ tekɨ ze nɨ Əzwî ə yeʼ ɨŋga.

⁴⁷ Ŋwìə̀ nyaʼa tekɨ mbaŋə̀ rɨtu ənɨ rɨchaʼ. Məd yɨə si. Mbaŋə̀ ze nɨ beenɨ yɨ rɨkaŋ.

⁴⁸ Bə̂d mbe nɨ mbɨ tekɨ ənɨ rɨchaʼ, yɨ ɨghabɨ ə mbaŋə̀ ze nɨ mbɨ nyaʼa tekɨ ənɨ rɨchaʼ. Mbe nɨ yeʼ bə̂d rɨkaŋ, yɨ ɨghabɨ ə mbaŋə̀ ze nɨ yeʼ ɨkaŋ.

⁴⁹ Ɨchî nɨ tɨ̀ yeʼ ɨghabɨ ə mbaŋə̀ ze nɨ mbɨ nyaʼa tekɨ ənɨ rɨchaʼ, əne bə̂ tɨ̀ bɨrɨ bɨ yeʼ ɨghabɨ əməd we nɨ yeʼe rɨkaŋ.

⁵⁰ Bɔŋgɔb, ənû ze nɨ mɨə ghà ɨ nən yɨ ni, chəi əghɨ ze nɨ berɨ nyamnyod bə̀ berɨ ənəm ə ze tɨ̀ zɨə jɨg ənû ɨfɔ̀n ə Ŋwìə̀. Chə bəi əghɨ ze nɨə kwɨə ə ze tɨ̀ zɨə jɨg ɨghɨ mbe nɨ chəi mbɨə kwɨə.

⁵¹ Mbə̀ zwetɨ mə̀ gha ənû nɨ yeʼ ənə̀mə ɨ nən. Ka mba mɨjìm bɨrɨ kwɨ a, àyɨə Ŋwìə̀ bɨrɨ kwepɨ mbà mɨjìm

⁵² ənɨ ɨkə nyumə̀. Zɨə bɨrɨ ghɨ̀ ɨghabɨ ɨchî nɨ wə̀d ə gwìpə̀ əghə. Ənû zɔ̂ ə bɨrɨ ghɨ̀ ənɨ ə nyùmə̀ we nɨ tàŋ ze nɨ sɨ nwìə̀ bɨrɨ ghàm, ɨmbə̀ʼ ɨghəm nɨ tàŋ bɨrɨ ghàm, Ŋwìə̀ nɔ̀ ɨvɨ bə̂d əne chəi mbɨ bɨrɨ nɔ wɨrɨ kwɨ. Wɨ̀ bɨrɨ bɨ kwepɨ əwa.

⁵³ Əghɨ ze nɨə kwɨə ə bɨrɨ beŋ ənɨ əze nɨ chəi zɨə kwɨə. Nyamnyod zɔ̂ nɨə kwɨə bɨrɨ beŋ ənɨ ze nɨ chəi zɨə kwɨə.

⁵⁴ Ənɨ əghɨ ze nɨə kwɨə ə fə beŋ ənɨ əze nɨ chəi zɨə kwɨə, nyamnyod ze nɨə kwɨə bə̀ beŋ ənɨ ze nɨ chəi zɨə kwɨə, ɨŋgam Ŋwiə̀ we nɨ mbɨ ŋwaʼnɨ bɨrɨ jwɨ̀ ənɨ rəsìʼ ni, “Ŋwìə̀ fə baŋ ɨvɨ nimnɨ.”

⁵⁵ “Ɨvɨ, chəi à bɨrɨ wɨrɨ baŋ bə̂d ə? Ɨvɨ, mbe mɨ̀tɨ̀g mbi ə?”

⁵⁶ Mɨtɨg mbe nɨ ɨvɨ ə nɨŋə zwiirɨə bə̂d yɨ ɨnû rɨbɔ̀ŋ. Ɨnû rɨbɔ̀ŋ mbɨə nɨŋ ɨka rɨ ənɨ tɨkə rɨ Mose.

⁵⁷ Àyɨə tɨ̀ nàʼ məben-əwe əmbɨ ə Ŋwiə̀ nɨ ghɨ ni tɨ̀ baŋ ɨnû rɨbɔ̀ŋ ənjìm à Ə̀nùŋɨ̀sɨg Yeso Kristo!

⁵⁸ Əne mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ təm kàànɨ̀. Tɨ mbə̀ ben ə ni əghɨ ə mɔʼɔ chiʼ əwən. Mbə̀ faʼ ə̀fàʼì ze nɨ Ə̀nùŋɨ̀sɨg zɨ ɨŋga tə rɨkyerɨ-ɨbɔ. Mbə̀ faʼ əne wò ɨmbì. Mbə mɨ yeʼe ghɨ̀ əne, mbə̀ kyerɨ ni chəi ənû ə mɔʼɔ ze nɨ mbə̀ ghɨ əmbɨ Ə̀nùŋɨ̀sɨg ə bɨrɨ che ətu ə̀kǒ.