1 Kɔrèn 14 - Meta’

Mɨneʼe nɨ gha ɨkə̂n Ŋwiə̀ mbɨ mɨneʼe nɨ gham mɨŋgam rɨsɔ̀ʼɔ̀

¹ Mbə̀ kywɨ ənywɨ zə ni ɨghaʼi yeʼ əghɨ ze nɨə tin əwən wò ɨmbì. Mbə̀ jeŋgɨ kə̀b yeʼ mɨneʼe mbe nɨ Əzwî ə Zeŋɨ ə nàʼə̀, màànɨ̀ ɨneʼe nɨ gha ɨkə̂n Ŋwiə̀.

² Chəi wə̀d mɔʼɔ we nɨə ghàm ɨŋgam rɨsɔ̀ʼɔ̀ ə ghàm əmbɨ ə bə̂d. Ɨ wɨə ghàmə̀ yeʼ əmbɨ ə Ŋwiə̀, ɨmbə̀ʼ ɨghəm nɨ chəi wə̀d cherə kyerɨ ənû ze nɨ wɨə ghàə̀. À yɨ Əzwî ə Zeŋɨ ə ghɨ ni wɨ̀ gha ɨnû mbe nɨ yeʼ ənə̀mə.

³ Wə̀d we nɨə ghà ɨkə̂n Ŋwiə̀ wɨə ghàə̀ yeʼ əmbɨ ə bə̂d, ɨmbə̀ʼ mbɨ təm kàànɨ̀. Ɨkə̂n we wɨə tìmbɨ̀ mɨ̀mə̌d bə̀ nəərɨə mɨ̀mə̌d.

⁴ Wə̀d we nɨə ghàm mɨŋgam rɨsɔ̀ʼɔ̀ wɨə ghɨ̀ ni məd ziə təm kàànɨ̀. We nɨə ghà ɨkə̂n Ŋwiə̀ wɨə ghɨ̀ yeʼ ni ɨfetɨ bə̂d Kristo təm kàànɨ̀.

⁵ Mə kə̀b ni mbə̀n mɨ̀jìm gham mɨŋgam rɨsɔ̀ʼɔ̀, àyɨə ənû nɨ mə jeŋgɨ kə̀b yɨ ni mbə̀ gha ɨkə̂n Ŋwiə̀. Wə̀d we nɨə ghà ɨkə̂n Ŋwiə̀ ə chè we nɨə ghà ɨŋgam rɨsɔ̀ʼɔ̀, kɨrɨ ənɨ wə̀d mɔʼɔ yeʼ əŋgu nɨə tòʼrɨ̀ ɨŋgam we. Wɨ̀ berɨ toʼrɨ ɨmbə̀ʼ ɨfetɨ bə̂d Kristo jìm təm kàànɨ̀.

⁶ Mbɨ bɔŋgɔb, mə mɨ yeʼe əsɨ nən tɨ̀nîn pè kɔ ghàm ɨ nən ənɨ ɨŋgam rɨsɔ̀ʼɔ̀, ə ze ə kɨə wo weerɨ əwən ənɨ ə ye ə? Chəi zɨə bɨrɨ weerɨ əwən, kɨrɨ ənɨ mə̀ yeʼe mbɨ ənû nɨ Ŋwìə̀ chwi ɨ num, kɨ̀ mbɨ ənû nɨ Ŋwìə̀ kə̀bɨ ni mbə̀ kyerɨ, kɨ̀ mbɨ ɨkə̂n Ŋwiə̀, kɨ̀ mbɨ ənû nɨ kəərɨ əwən.

⁷ Mbə̀ nɨŋ ka àbei ɨghɨ mbe nɨ mbɨə buʼ əbin əŋgu nɨ chəi ɨ̀tènɨ̀ ɨŋga ɨghɨ mbe, əne yɨ ɨghabɨ əmbarɨ kɨ̀ ɨghabɨ ɨnoŋɨ ŋgyi, wə̀d kɨə wo chè rɨ yè kyerɨ ɨkyî we nɨ mbɨə bèrə̀, kɨrɨ ənɨ gɨ̂ mɔʼ mɔʼ jwɨ əsaŋ ə?

⁸ Tàŋ mɨ nàʼ gɨ̂ nɨ chəi bə̂d jeŋgɨ kyerɨ, à kɨə we nɨ bɨrɨ tekɨ ɨnyod ɨ wo maʼ bid ə?

⁹ À yɨ əndəŋ əndəŋ mbɨ nən. Mbə mɨ ghàm ɨŋgam nɨ chəi wɨ zeŋɨ, wə̀d kɨə wo chè rɨ yè kyerɨ ənû ze nɨ mbə̀ə ghà ə? Mbə mɨ yeʼə ghà əne, njɨ mbə mbɨə ghàmə̀ yeʼ əmbɨ ɨfə.

¹⁰ Kaʼi ənû ə birɨ ni tɨkwɨrɨ ɨŋgam əbeŋ nɔnɔʼ tɨ ɨŋga ɨsɨg, àyɨə chəi wɨ mɔʼ əbɔʼ nɨ chəi bə̂d ə zu ɨnû nɨ mbɨə ghàə̀.

¹¹ Mə mɨ ton kyerɨ əmɨ ɨŋgam əbeŋ we nɨ wə̀d mɔʼɔ ə ghàmə̀, əne mɔ̌ yɨə wə̀d rɨ̀sɔ̀ʼɔ̀ ɨ bɔ, məd yɨə bə̀ ə wə̀d rɨ̀sɔ̀ʼɔ̀ ɨ num.

¹² À yɨ bə̀ əndəŋ əndəŋ mbɨ nən. Ɨchî nɨ mbə̀ə kàŋə̀ kə̀b nɨ berɨ mɨneʼe mbe nɨ Əzwî ə Zeŋɨ ə nàʼə̀, əne mbə̀ kywɨ ənywɨ zə ni mbə̀ berɨ mɨneʼe mbe nɨə ghɨ̀ ni ɨfetɨ bə̂d Kristo təm kàànɨ̀.

¹³ Əne, wə̀d we nɨə ghàm ɨŋgam rɨsɔ̀ʼɔ̀ berɨ kɔŋgɨ ə Ŋwìə̀ ni wɨ̀ naʼ ɨka ɨ bɔ ni wɨ̀ toʼrɨ ɨnû mbe nɨ wɨə ghàə̀,

¹⁴ ɨmbə̀ʼ ɨghəm nɨ mə mɨ kɔ̀ŋgɨ̀ ə Ŋwiə̀ ənɨ ɨŋgam rɨsɔ̀ʼɔ̀, mɨ əzwî ə zɨə kɔ̀ŋgɨ̀ ə Ŋwiə̀, àyɨə chəi mɨ fîŋ ənɨ ənû ze nɨ mɨə ghàə̀.

¹⁵ Əne, mə̀ kɨə wò ghɨ ye ə? Mə bɨrɨ kɔŋgɨ ə Ŋwiə̀ ənɨ mɨ əzwî bə̀ kɔ̀ŋgɨ̀ əməd ɨŋga mɨ fîŋ. Mə bɨrɨ kwerɨ mɨkyî nɨ yiirɨ ə Ŋwiə̀ ənɨ mɨ əzwî bə̀ kwerɨ mɨkyî nɨ yiirɨ əməd ɨŋga mɨ fîŋ.

¹⁶ À bə̀ kàŋ kɔndɨ ni ənɨ àwɔ̀ ə yiirɨ ə Ŋwiə̀ ənɨ e əzwî, tɨ̀ wə̀d mɔʼɔ we nɨ yeʼe əkaʼ nən, nɨ chəi ətu əməd ə zeŋ ɨmbə̀ʼ ənû ze nɨ àwɔ̀ ə ghàə̀, ghà ni “À yɨ əne” ɨchî nɨ àwɔ̀ ə kɔ̀ŋgɨ̀ ə Ŋwiə̀ nàʼə̀ məben-əwe ɨ bɔ ə? Tɨ̀ wɨ̀ yiirɨ ə Ŋwiə̀ mbɨ ne nɨ chəi wɨ̀ kyerɨ ənû ze nɨ àwɔ̀ ə ghàə̀ ə?

¹⁷ À we tɨ̀ à nàʼ məben-əwe ɨchî nɨ kuʼnɨ, àyɨə chəi əze ə weerɨ wə̀d cherə we nɨ yeʼ əŋgu ni wɨ̀ təm kàànɨ̀.

¹⁸ Mə wɨə nàʼə̀ məben-əwe əmbɨ ə Ŋwiə̀ ni mə wɨə ghàm mɨŋgam rɨsɔ̀ʼɔ̀ chè mbə̀n mɨjìm.

¹⁹ Àyɨə ɨŋga ɨfetɨ bə̂d Kristo, mə bɨrɨ ghaʼ nɨ gham ɨnû tân ɨmbə̀ʼ kəərɨ bə̂d, nɨ mbɨ bɨrɨ zu ɨtu mɨ̀mə̌d zeŋ, chè ɨchî nɨ mə̀ bɨrɨ gham ɨnû chuʼ wum ənɨ ɨŋgam rɨsɔ̀ʼɔ̀.

²⁰ Mbɨ bɔŋgɔb, tɨ tə rɨkɔndɨ yeʼi ɨghabɨ tɨ bɔn kwa. Mbə̀ yeʼ ɨghabɨ ə bɔn bɔd ənɨ zɨə de ɨnû rɨbɔ̀ŋ, àyɨə mbə̀ berɨ tɨkɔndɨ bə̂d kyeŋ.

²¹ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ə̀nùŋɨ̀sɨg ə ghà ni, mə bɨrɨ chè ənjìm bə̂d mbe nɨə ghàm mɨŋgam rɨsɔ̀ʼɔ̀, bə̀ chè ənjìm mɨchû bə̂d rɨsɔ̀ʼɔ̀ ghàm əmbɨ ə bə̂d mbɔ̂. Ka à bè yeʼi əne, chəi mbɨ bɨrɨ zwetɨ ənû ze nɨ mɨə ghàə̀.”

²² Əne, ənû nɨ gham mɨŋgam rɨsɔ̀ʼɔ̀ yɨ ənweenɨ əmbɨ ə bə̂d mbe nɨ chəi mbɨ ben ə Kristo, kaʼi əmbɨ mbe nɨ ben əməd. Àyɨə ənû nɨ gha ɨkə̂n Ŋwiə̀ yɨ əmbɨ ə bə̂d mbe nɨ ben ə Kristo, kaʼi əmbɨ mbe nɨ chəi mbɨ ben əməd.

²³ Ənɨ bə̂d mɨ̀jìm rɨŋga ɨfetɨ bə̂d Kristo yeʼe bòmnɨ̀, əne wə̀d jìm kɔ gham ɨŋgam rɨsɔ̀ʼɔ̀, ka bə̂d mbe nɨ chəi əbɔʼ ɨfetɨ we, kɨ̀ mbe nɨ chəi mbɨ ben ə Kristo nɨ yeʼe nyɨ, wa bɨrɨ gha ə ni mbə fə be ə?

²⁴ Àyɨə bə̂d mɨjìm mɨ yeʼə ghà ɨkə̂n Ŋwiə̀, əne we nɨ chəi wɨ̀ ben ə Kristo, kɨ̀ we nɨ chəi əməd əbɔʼ ɨfetɨ bə̂d Kristo yeʼe nyɨ, wə̀d jìm bɨrɨ ghɨ wɨ̀ kyerɨ ni tə wɨə ghɨ̀ ɨnû rɨbɔ̀ŋ, əne ɨnû jìm mbe nɨ mbə̀ə ghàə̀ bɨrɨ saʼ əməd.

²⁵ Ɨnû mbe nɨ yeʼ ənə̀mə ɨŋga fîŋ məd bɨrɨ jwɨ əsaŋ. Əne wɨ̀ bɨrɨ gundɨ ə si wumnɨ ə Ŋwiə̀ ghà ni, “À yɨ rəsìʼ ni Ŋwìə̀ wɨ mbɨ nən.”

Ɨchî nɨ ɨnû berɨ yèn ɨŋga ɨfetɨ bə̂d Kristo

²⁶ Mbɨ bɔŋgɔb, tɨ̀ gha ni yè ə? Ənɨ mbə̀ bomnɨ, wə̀d mɔʼɔ naʼ ɨkyî, wɨ cherə chwi ənû, wɨ cherə gha ənû ze nɨ Ŋwìə̀ gha ɨ bɔ, wɨ cherə gham ɨŋgam rɨsɔ̀ʼɔ̀, wɨ cherə toʼrɨ ɨŋgam we. Mbə̀ sɨə ghɨ̀ ɨnû jìm ɨmbə̀ʼ mbə̀n mɨjìm təm kàànɨ̀.

²⁷ Wə̀d mɔʼɔ mɨ kə̀b gham ɨŋgam rɨsɔ̀ʼɔ̀, mbɨ yeʼ àmei mɨbe, kɨ̀ mbɨ mɨ nɔʼ, mbɨ yeʼ mɨtad. Wə̀d mɔʼ mɔʼ ghamə nàʼ əpan əmbɨ wɨ cherə. Wə̀d cherə toʼrɨ mɨŋgam mbe.

²⁸ À mɨ yeʼ nɨ chəi wə̀d nɨ tòʼrɨ̀, wə̀d mɔʼ mɔʼ rəbɔʼ bə̂d mbɔ̂ kəm rəziə ɨŋga ɨfetɨ. Wɨ̀ sɨə ghàm àmei əmbɨ i ɨnyod fɔrɨ əmbɨ ə Ŋwiə̀.

²⁹ Bə̂d ɨkə̂n mɨbe kɨ̀ mɨtad ghamə. Ə̀bùʼ ə bə̂d ə jeŋgɨ kɔndɨ mbə ɨtu ɨmbə̀ʼ ɨnû mbe nɨ mbɨə ghàə̀.

³⁰ Ŋwìə̀ mɨ ghà ənû əmbɨ wə̀d mɔʼɔ we nɨ chub ə si, we nɨ kəʼ təm rətiə kəm rəziə.

³¹ Mbə̀n mɨjìm mbe tɨ̀ mbə ghà ɨkə̂n Ŋwiə̀ ɨ mɔʼ mɔʼ, ɨmbə̀ʼ wə̀d jìm kwembɨ ənû. Əze ə bɨrɨ ghɨ̀ mbə̀ tìmbɨ̀ mbə bɔŋgɔb.

³² Bə̂d mbe nɨə ghà ɨkə̂n Ŋwiə̀ mbe tɨ̀ mbɨ ghɨ ni mbə ɨzwî zuunɨ əwən,

³³ ɨmbə̀ʼ ɨghəm nɨ ka Ŋwìə̀ yɨ i Ŋwìə̀ nɨə bùùrɨ̀ ɨsɨ. Məd yɨə Ŋwìə̀ nɨə kə̀b əbɔrəbɔd. Ɨchî nɨ zɨə yeʼ ɨŋga tɨfetɨ bə̂d Ŋwiə̀ mɨ̀jìm,

³⁴ məyi kəm rəziə ɨŋga rɨfetɨ. Chəi mbɨ ben ni mbɨ ghamə, àyɨə mbɨ berɨ zuunɨ mbə mɨnom ɨchî nɨ zɨə yeʼ ɨŋga tɨkə rɨ Mose.

³⁵ Mbɨ mɨ kəb kyerɨ ənû ə mɔʼɔ, mbɨ biirɨ əmbɨ mbə mɨnom ɨŋga nəb, ɨmbə̀ʼ ɨghəm nɨ à yɨ tɨ̀nìd ətu əmbɨ əyi nɨ ghàm ɨŋga ɨfetɨ bə̂d Kristo.

³⁶ Ɨŋgam Ŋwiə̀ wa nyaʼa kɔ rɨ nən ə? Kɨ̀ à wa kɨ àmei ɨ nən nɨ wɨ̀ fə pe ə?

³⁷ Wə̀d mɔʼɔ mɨ kɔndɨ ni tə yɨə wə̀d ɨ̀kə̀n, kɨ̀ ni mɨneʼe mbe nɨ Əzwî ə Zeŋɨ ə nàʼ ɨ mbɨ ɨŋga məd, wɨ̀ kyerɨ ni ənû zɔ̂ nɨ mɨə ŋwàʼnɨ̀ ɨ nən yɨ ɨkə Ə̀nùŋɨ̀sɨg.

³⁸ Wə̀d mɔʼɔ mɨ tə̀ə̀nɨ̀ ənû zɔ̂, Ŋwìə̀ bɨrɨ bɨ təənɨ əməd.

³⁹ Əne, kyɨə bɔŋgɔb, mbə̀ kaŋ zɨ̀ ətu nɨ zə ni mbə̀ ghà ɨkə̂n Ŋwiə̀, àyɨə tɨ mbə̀ təmnɨ ə ənû nɨ gham mɨŋgam rɨsɔ̀ʼɔ̀.

⁴⁰ Mbə̀ ghɨ ɨnû jìm ɨchî nɨ kuʼnɨ bə̀ beenɨ əbɔʼ ɨwaŋ ɨnû.