Santiago 4 - Mixteco del suroeste de Tlaxiaco Oaxaca

Koto íyó mániꞌ táꞌán jín ya̱ níyo iniꞌ ñɨvɨ ñɨ̱vɨ́

¹ ¿Né nú va̱ji rá tuntíxín jín rá kántátúꞌun rán nteñu rán? ¿Á nsáꞌ va̱ji rá tuntíxín ne̱ ya̱ níyo iniꞌ rán ví ya̱ súkúnꞌ ta̱ꞌán iniꞌ ánímaꞌ rán rúja?

² Níyo iniꞌ rán rá nantíñú, jee ntu kúmí rán maa. Jee jiáꞌníꞌ rán, jee sáꞌá uꞌvi iniꞌ rán jie̱ꞌe̱ꞌ nantíñú, jee ntu kúvi ni̱ꞌi̱nꞌ rán maa. Saáva kántátúꞌun rán jee sáꞌá rán tu̱ntíxín. Ntu kúmí rán maa, chi ntu jíkánꞌ rán maa nu̱u̱nꞌ Ndiosíꞌ.

³ Jee sáá jíkánꞌ rán maa nu̱u̱nꞌ re̱ꞌ, ntu níꞌínꞌ rán maa, chi jie̱ꞌe̱ꞌ ya̱ niváꞌa jiáni iniꞌ rán jíkánꞌ rán maa, chi jíkánꞌ rán maa sáva kuatíñú rán maa nu̱u̱nꞌ ya̱ sɨ́ɨ́ꞌ níyo iniꞌ rán.

⁴ ¡Ñɨvɨ ya̱ ntu jiáꞌnu na̱a̱ꞌ nu̱u̱nꞌ Ndiosíꞌ! Retú íyó mániꞌ táꞌán rán jín ya̱ níyo iniꞌ rá ñɨvɨ ñɨ̱vɨ́ yaꞌá, ¿á ntu jíníꞌ rán, ya̱ suvivá kúvi ya̱ túfíꞌ ta̱ꞌán rán néꞌyá rán Ndiosíꞌ? Saáva néni ɨɨn ñɨvɨ ya̱ nkuna̱a̱ꞌ iniꞌ‑i koo mániꞌ táꞌán‑a jín ya̱ níyo iniꞌ rá ñɨvɨ ñɨ̱vɨ́ yaꞌá, jee nkenta‑a kúvi‑i ñɨvɨ ya̱ túfíꞌ ta̱ꞌán‑a néꞌyá‑a Ndiosíꞌ.

⁵ Áxí, ¿á káꞌvi iniꞌ rán ya̱ ka̱ꞌá káchíꞌ Tu̱ꞌun Ndiosíꞌ níso nu̱u̱nꞌ Tutuꞌ Ííꞌ: “Ta̱chi̱ꞌ Ííꞌ ya̱ nchuꞌun Ndiosíꞌ iniꞌ yó sáva kuꞌun‑u iniꞌ yó, suvivá nééꞌ nu̱u̱nꞌ‑u yó ne̱ ñúꞌún kuíñɨ́ iniꞌ‑i yó”?

⁶ Soo saꞌ víꞌí káꞌ chíneí Ndiosíꞌ yó jie̱ꞌe̱ꞌ ya̱ íyó ma̱ni̱ꞌ iniꞌ re̱ꞌ néꞌyá re̱ꞌ yó, saáva káchíꞌ Tu̱ꞌun Ndiosíꞌ níso nu̱u̱nꞌ Tutuꞌ: “Ndiosíꞌ, núníꞌin re̱ꞌ si̱kɨ̱ꞌ rá ñɨvɨ kútéyɨ́ɨ́, soo íyó mániꞌ iniꞌ re̱ꞌ néꞌyá re̱ꞌ rá ñɨvɨ jiáni láꞌví iniꞌ ya̱ chíneí chituvi re̱ꞌ ráa.”

⁷ Saáva íyó chiꞌi rán maárán xi̱ntíín Ndiosíꞌ. Jee nuni̱ꞌin rán nu̱u̱nꞌ kui̱ꞌna̱ꞌ, jee kunu kui̱ꞌna̱ꞌ nu̱u̱nꞌ rán.

⁸ Natuꞌva rán nu̱u̱nꞌ Ndiosíꞌ, jee natuꞌva re̱ꞌ nu̱u̱nꞌ rán. ¡Ñɨvɨ kua̱chi! ¡Íyó saꞌá noo rán maárán nu̱u̱nꞌ kua̱chi sáꞌá rán! ¡Ñɨvɨ ya̱ ɨɨn u̱vi̱ꞌ ñúꞌún iniꞌ ánímaꞌ rán! ¡Jee íyó saꞌá ninuꞌun rán ánímaꞌ rán!

⁹ ¡Nukuíꞌyáꞌ iniꞌ rán, jee jiaku iniꞌ rán, jee kunaꞌyuꞌ uúꞌ rán jie̱ꞌe̱ꞌ kua̱chi rán! Jee sama ya̱ jiákúꞌ katá rán nu̱u̱nꞌ ya̱ jiáku iniꞌ rán. Jee sama rán ya̱ kúsɨ́ɨꞌ iniꞌ rán nu̱u̱nꞌ ya̱ nukuíꞌyáꞌ iniꞌ rán.

¹⁰ Íyó saꞌá núun rán maárán ichinúúnꞌ I̱toꞌoꞌ‑ó, jee xináa re̱ꞌ ránoꞌó nasaꞌá re̱ꞌ ya̱ kuñáꞌnú rán.

Koto káꞌánꞌ niva̱ꞌa rán jie̱ꞌe̱ꞌ ñanitáꞌán‑ó

¹¹ Ránoꞌó ñaniꞌ jín ku̱ꞌva, koto kákuíyuꞌú rán si̱kɨ̱ꞌ ɨɨn inka rán. Chi ɨɨn ñɨvɨ ya̱ káꞌánꞌ niva̱ꞌa si̱kɨ̱ꞌ ñaniꞌ‑i, áxí sánáaꞌ‑a si̱kɨ̱ꞌ ñaniꞌ‑i, jee suni káꞌánꞌ niva̱ꞌa ñɨvɨ vá si̱kɨ̱ꞌ tu̱ꞌun ley nta̱túníꞌ Ndiosíꞌ, jee káchíꞌ‑i ya̱ ntu íyó na̱a̱ꞌ tu̱ꞌun ley vá, [chi káchíꞌ tu̱ꞌun ley vá ya̱ íyó kunu̱u̱nꞌ‑ó ñanitáꞌán‑ó]. Jee retú sáꞌá nú si̱kɨ̱ꞌ tu̱ꞌun ley, jee ntu síkúnkuvi nú ya̱ káchíꞌ tu̱ꞌun vá, chisaꞌ sáꞌá nú maánú te̱e jiéꞌnéꞌ kua̱chi.

¹² Kua̱chi métúꞌún Ndiosíꞌ ni ví ya̱ njia̱ꞌa tu̱ꞌun ley jín ya̱ jiéꞌnéꞌ kua̱chi. Jee maáréꞌ vá kúvi sikáku jee kúvi xináánꞌ re̱ꞌ. ¡Soo noꞌó!, ¿né ɨɨn kúvi nú sáva keꞌneꞌ nú kua̱chi si̱kɨ̱ꞌ táꞌán nú rúja?

Koto jiáni téyɨ́ɨ́ ya̱chi̱ꞌ iniꞌ rán ya̱ saꞌá rán ki̱vɨ̱ꞌ steñu̱ꞌún

¹³ ¡Ntañúꞌún teso̱ꞌo!, ránoꞌó ya̱ káchíꞌ: “Vitan áxí steñu̱ꞌún kɨ̱ꞌɨ̱nꞌ ráníꞌ nu̱u̱nꞌ ɨɨn ñuunꞌ yukuán, jee yukuán kukuéé ránꞌ ɨɨn kui̱ya̱ꞌ, jee nakeꞌen ránꞌ ya̱ naxi̱kó ránꞌ jee ni̱ꞌi̱nꞌ ránꞌ si̱kɨ̱ꞌ xu̱ꞌún ránꞌ.”

¹⁴ Soo suvirán ni ntu jíníꞌ rán ná kuvi ki̱vɨ̱ꞌ steñu̱ꞌún. ¿Ná kúvi ya̱ kunoꞌo jín rán ichinúúnꞌ? Chi kúvi rán kuéntáꞌ vi̱ko̱ꞌ ya̱ kítúvi ɨɨnúún ni jee kuíre núñúꞌún‑u.

¹⁵ Nsú káꞌ kachiꞌ rán sukuán, íyó kachiꞌ rán suꞌva: “Retú I̱toꞌoꞌ‑ó Ndiosíꞌ kuíni, jee kutekuꞌ ráníꞌ jee saꞌá ránꞌ tiñu yaꞌá áxí tiñu yukuán.”

¹⁶ Soo vitan sáꞌá víxiꞌ rán jee káꞌánꞌ téyɨ́ɨ́ rán, jee nɨꞌɨ ya̱ káꞌánꞌ téyɨ́ɨ́ suꞌva kúvi ya̱ niváꞌa.

¹⁷ Saáva ñɨvɨ ya̱ jíníꞌ ya̱ váꞌa saꞌá‑a, jee ntu sáꞌá‑a vá, saájee sáꞌá‑a kua̱chi.