Apoclipsis 8 - Mixteco del suroeste de Tlaxiaco Oaxaca

Seyúꞌ uxáꞌ

¹ Jee maáréꞌ ya̱ kúvi Lanchi Lúlí jee sáá nsine re̱ꞌ seyúꞌ uxáꞌ ya̱ nnasɨꞌ yuꞌú tutuꞌ vá, jee níín nkuvi antivɨ́ súkún yatin sava hora.

² Saájee nuꞌuꞌ, Juan, niniꞌ ni̱ꞌ u̱xa̱ꞌ rá najiáꞌáꞌ ííꞌ íñɨ́ ráa ichinúúnꞌ Ndiosíꞌ. Jee nni̱ꞌi̱nꞌ ráa u̱xa̱ꞌ trompeta.

³ Saájee nkenta inka ka̱ꞌ najiáꞌáꞌ ííꞌ, ña̱kui̱ñɨ̱ꞌ‑ɨ nu̱u̱nꞌ altar, jee ínaꞌá‑a ɨɨn ku̱u ka̱a oro nu̱u̱nꞌ káyúꞌ su̱jie ííꞌ. Jee nni̱ꞌi̱nꞌ víꞌí‑i su̱jie ííꞌ sáva so̱ko̱ꞌ‑o vá sikétáꞌán‑a vá jín rá tu̱ꞌun káꞌánꞌ rá ñɨvɨ Ndiosíꞌ jín re̱ꞌ, jee kúvi ráa ñɨvɨ ya̱ nsa̱ꞌá sɨ́ɨ́n re̱ꞌ sáva kɨꞌɨ ráa nu̱u̱nꞌ re̱ꞌ. Teñuꞌunꞌ‑u so̱ko̱ꞌ‑o vá nu̱u̱nꞌ nantíñú naní altar, ya̱ íñɨ́‑ɨ ichinúúnꞌ teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ.

⁴ Jee nu̱u̱nꞌ ku̱u ínaꞌá najiáꞌáꞌ ííꞌ vá kéne ñu̱ꞌma̱ꞌ su̱jie ííꞌ vá, nkaa‑a jín rá tu̱ꞌun rá ñɨvɨ yɨ́ꞌɨ́ nu̱u̱nꞌ Ndiosíꞌ ya̱ káꞌánꞌ ráa jín re̱ꞌ jee kua̱ꞌa̱nꞌ‑a nu̱u̱nꞌ nééꞌ Ndiosíꞌ, jee kúvi ráa ñɨvɨ ya̱ nsa̱ꞌá sɨ́ɨ́n re̱ꞌ sáva kɨꞌɨ ráa nu̱u̱nꞌ re̱ꞌ.

⁵ Saájee nkeꞌen najiáꞌáꞌ ííꞌ vá ku̱u vá, jee nchu̱chítú‑u vá ti̱ka̱yɨ ya̱ káyúꞌ nu̱u̱nꞌ altar vá. Jee nsi̱kéne‑e vá ne̱ iniꞌ ñɨ̱vɨ́. Jee nsa̱ꞌá‑a ya̱ nkana tajia, jee nɨ́ꞌɨn xá jiáku, jee jiánu̱te̱ꞌ xá, jee nta̱an.

Tu̱ꞌun jie̱ꞌe̱ꞌ rá trompeta

⁶ Saájee ni uxáꞌ rá najiáꞌáꞌ ííꞌ ya̱ ínaꞌá ráa ni uxáꞌ rá trompeta, jee ya̱ nsa̱ꞌá túꞌva ráa tivɨꞌ ráa maa.

⁷ Jee najiáꞌáꞌ ííꞌ xíꞌnañúꞌún nti̱vɨ̱ꞌ‑ɨ trompeta‑a. Saájee nkuun ñɨ́ñɨ́ jín ñuꞌunꞌ iniꞌ ñɨ̱vɨ́, jee sákánuun jín ni̱ñɨ̱ꞌ. Jee nka̱yu̱ꞌ ɨɨn ya̱ uníꞌ parte ñɨ̱vɨ́, jín ya̱ uníꞌ parte rá yutun, jín nɨꞌɨ rá ku̱ꞌu̱ꞌ kuíí.

⁸ Jee najiáꞌáꞌ ííꞌ uvíꞌ nti̱vɨ̱ꞌ‑ɨ trompeta‑a. Jee ɨɨn ya̱ íyó kuéntáꞌ ɨɨn yuku máá káꞌnú tɨ́ɨn ñuꞌunꞌ itaꞌ maa káyúꞌ‑u, jee nsi̱kéne maa nkininkava‑a nu̱u̱nꞌ nteñúꞌún. Jee ɨɨn ya̱ uníꞌ parte nteñúꞌún nnuvi maa ni̱ñɨ̱ꞌ nsa̱ꞌá‑a.

⁹ Jee ni̱ꞌi̱ꞌ ya̱ uníꞌ parte ntáká nu̱u̱nꞌ rá kitɨ tékúꞌ ya̱ jiáꞌnu nu̱u̱nꞌ nteñúꞌún. Jee suni nnaanꞌ ya̱ uníꞌ parte ntáká rá barkúꞌ.

¹⁰ Jee najiáꞌáꞌ ííꞌ uníꞌ nti̱vɨ̱ꞌ‑ɨ trompeta‑a. Jee ne̱ antivɨ́ súkún nkene ɨɨn tiu̱u̱nꞌ maa káꞌnú víꞌí nkininkava‑a va̱ji‑i tɨ́ɨn ñuꞌunꞌ itaꞌ maa káyúꞌ‑u, kuéntáꞌ kua̱ꞌ tɨ́ɨn ñuꞌun itɨ sújié. Jee ñe̱te̱ꞌ‑e nu̱u̱nꞌ ɨɨn ya̱ uníꞌ parte rá ntekáꞌnú jín nu̱u̱nꞌ kéne rá nute.

¹¹ Jee tiu̱u̱nꞌ vá naní‑i Tiu̱u̱nꞌ U̱va̱ꞌ. Chi nkuu̱va̱ꞌ víꞌí rá ni uníꞌ parte rá nute vá nsa̱ꞌá‑a. Jee kue̱ꞌe̱ꞌ víꞌí rá ñɨvɨ ni̱ꞌi̱ꞌ ráa nsa̱ꞌá nute vá, chi nkuu̱va̱ꞌ‑a.

¹² Jee najiáꞌáꞌ ííꞌ kúmíꞌ nti̱vɨ̱ꞌ‑ɨ trompeta‑a. Jee ɨɨn ya̱ uníꞌ parte nka̱niiꞌ, jín suni ɨɨn ya̱ uníꞌ parte yo̱o̱ꞌ, jín suni ɨɨn ya̱ uníꞌ parte rá tiu̱u̱nꞌ nti̱vɨ́ ráa. Jee nnu̱neenꞌ rá parte vá, jee ntu ka̱ꞌ túúnꞌ ñuꞌunꞌ ráa ya̱ uníꞌ parte nuví ya̱ uníꞌ parte yakuááꞌ.

¹³ Saájee niniꞌ ni̱ꞌ ɨɨn ta̱su̱nꞌ jíkó‑o nu̱u̱nꞌ ta̱chi̱ꞌ víjin sava súkún jee nteso̱ꞌo ni̱ꞌ ya̱ ne̱ laxín kánajíín ti̱ꞌ jee káchíꞌ ti̱ꞌ: ―¡Na̱ ka̱ꞌ náꞌví náꞌví náꞌví ka̱ꞌ rá ñɨvɨ ya̱ nééꞌ iniꞌ ñɨ̱vɨ́!, chi ya̱ nku̱yatin sa̱néꞌ vá íyó tivɨꞌ u̱ni̱ꞌ ka̱ꞌ rá trompeta kúmániꞌ ya̱ íyó tivɨꞌ u̱ni̱ꞌ ka̱ꞌ rá najiáꞌáꞌ ííꞌ maa ―nkachiꞌ ta̱su̱nꞌ vá.