Apoclipsis 13 - Mixteco del suroeste de Tlaxiaco Oaxaca

Tu̱ꞌun yaꞌá káꞌánꞌ jie̱ꞌe̱ꞌ u̱vi̱ꞌ rá kitɨ xéénꞌ

¹ Jee nuꞌuꞌ, Juan, ni̱ñɨ ni̱ꞌ nu̱u̱nꞌ ñuítɨ́ yúnteñúꞌún. Saájee niniꞌ ni̱ꞌ ɨɨn kitɨ xéénꞌ kákini ya̱ va̱nkaa ti̱ꞌ kéne ti̱ꞌ nu̱u̱nꞌ nteñúꞌún, jee u̱xa̱ꞌ xi̱ni̱ꞌ ti̱ꞌ jee u̱ji̱ꞌ nikɨ ti̱ꞌ. Jee u̱ji̱ꞌ corona ti̱ꞌ jee ɨɨn corona ñúꞌún ta nikɨ ti̱ꞌ ya̱ stúvi ya̱ kúñáꞌnú ti̱ꞌ. Jee nu̱u̱nꞌ ni uxáꞌ xi̱ni̱ꞌ ti̱ꞌ vá níso ɨɨn súví níváꞌa jie̱ꞌe̱ꞌ Ndiosíꞌ.

² Jee kitɨ xéénꞌ kákini vá ya̱ niniꞌ ni̱ꞌ yukuán kúnkunuún íyó ti̱ꞌ jín kui̱ñɨ̱ꞌ leopardo, jee rá jie̱ꞌe̱ꞌ ti̱ꞌ íyó‑o kuéntáꞌ jie̱ꞌe̱ꞌ oso, jee yuꞌú ti̱ꞌ íyó‑o kuéntáꞌ yuꞌú nikaꞌa. Jee nu̱u̱nꞌ ti̱ꞌ njia̱ꞌa ko̱o̱ꞌ mánasɨ́ vá fesáꞌ níꞌin‑i sáva kuniso ti̱ꞌ maa, jee njia̱ꞌa ko̱o̱ꞌ mánasɨ́ vá nu̱u̱nꞌ ti̱ꞌ nu̱u̱nꞌ nééꞌ‑e sáva tátúníꞌ ti̱ꞌ jín‑i, jee njia̱ꞌa‑a ya̱ kunisotíñú nasɨ́kuitɨꞌ ti̱ꞌ.

³ Jee niniꞌ ni̱ꞌ ya̱ ɨɨn rá xi̱ni̱ꞌ kitɨ xéénꞌ kákini vá túvi‑i kuéntáꞌ ñaꞌniꞌ maa chi ntu̱fi̱ꞌ xe̱e̱nꞌ xi̱ni̱ꞌ ti̱ꞌ ya̱ íyó kuviꞌ ti̱ꞌ, soo nnuvi nu̱u̱nꞌ ntu̱fi̱ꞌ xi̱ni̱ꞌ vá ya̱ íyó kuviꞌ ti̱ꞌ. Jee kua̱íyó kuitɨꞌ rá ñɨvɨ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Cristo jee nti̱vɨ́ xá xi̱ni̱ꞌ ráa ya̱ nnuvi ti̱ꞌ, jee nchi̱nikɨnꞌ ráa ti̱ꞌ.

⁴ Jee nneñu̱ꞌun ráa ko̱o̱ꞌ mánasɨ́ vá, chi jie̱ꞌe̱ꞌ nika̱ꞌ ya̱ njia̱ꞌa ti̱ꞌ tiñu kúñáꞌnú kuniso kitɨ xéénꞌ kákini vá, jee suni nneñu̱ꞌun ráa kitɨ xéénꞌ kákini vá, jee nkachiꞌ ráa: ―¿Né ɨɨn íyó kuéntáꞌ kitɨ xéénꞌ kákini yaꞌá rúja?, jee, ¿né ɨɨn kuneí kantáꞌán jín ti̱ꞌ rúja? ¡Ntu̱né íyó! ―nkachiꞌ ráa.

⁵ Jee suni njia̱ꞌa nu̱u̱nꞌ kitɨ xéénꞌ kákini vá ya̱ káꞌánꞌ ti̱ꞌ tu̱ꞌun téyɨ́ɨ́ jín tu̱ꞌun niva̱ꞌa si̱kɨ̱ꞌ Ndiosíꞌ, jee njia̱ꞌa nu̱u̱nꞌ ti̱ꞌ ya̱ kunisotíñú ti̱ꞌ sáva saꞌá ti̱ꞌ tiñu u̱vi̱xiko u̱vi̱ꞌ (42) yo̱o̱ꞌ.

⁶ Jee nkaꞌanꞌ niva̱ꞌa ti̱ꞌ si̱kɨ̱ꞌ Ndiosíꞌ, jee ntenu̱u̱nꞌ ti̱ꞌ súví re̱ꞌ jín nu̱u̱nꞌ nééꞌ re̱ꞌ jín maáráa ya̱ nééꞌ ráa antivɨ́ súkún.

⁷ Jee njia̱ꞌa nu̱u̱nꞌ ti̱ꞌ ya̱ kantáꞌán ti̱ꞌ jín rá ñɨvɨ ya̱ nsa̱ꞌá sɨ́ɨ́n Ndiosíꞌ ya̱ yɨ́ꞌɨ́ ráa nu̱u̱nꞌ re̱ꞌ, jee kuneí ti̱ꞌ jín ráa. Jee suni njia̱ꞌa tiñu ya̱ nísotíñú ti̱ꞌ tátúníꞌ ti̱ꞌ nu̱u̱nꞌ kua̱íyó rá ñɨvɨ ntáká tataꞌ, jín nu̱u̱nꞌ ntáká ñuunꞌ, jín nu̱u̱nꞌ ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, jín nu̱u̱nꞌ ntáká nu̱u̱nꞌ rá ñɨvɨ.

⁸ Jee kuneñu̱ꞌun kua̱íyó rá ñɨvɨ ti̱ꞌ ya̱ kúvi ráa rá ñɨvɨ nééꞌ ráa ñɨ̱vɨ́ ya̱ ntu níso súví ráa nu̱u̱nꞌ tutuꞌ ya̱ níso‑o rá súví rá ñɨvɨ ya̱ kutekuꞌ ráa jín Ndiosíꞌ nɨ́ɨ́nkání. Tutuꞌ vá kúvi tutuꞌ maáréꞌ ya̱ kúvi Lanchi Lúlí ya̱ ñaꞌniꞌ rá ñɨvɨ re̱ꞌ sáni nsa̱náaꞌ Ndiosíꞌ ne̱ ntiáꞌan kiko̱o ñɨ̱vɨ́.

⁹ Néni ɨɨn ránoꞌó ya̱ íyó so̱ꞌo, jee chuso̱ꞌo va̱ꞌa rán maa.

¹⁰ Retú néni ɨɨn ñɨvɨ ya̱ yɨ́netuꞌ Ndiosíꞌ ya̱ kɨꞌɨ‑ɨ veka̱a, jee sáá íyó kɨ̱ꞌɨ̱nꞌ‑ɨ kɨꞌɨ‑ɨ veka̱a. Jee retú néni ɨɨn ñɨvɨ ya̱ yɨ́netuꞌ Ndiosíꞌ ya̱ kaꞌniꞌ inka ñɨvɨ maa jín yuchiꞌ, jee sáá íyó kuviꞌ‑i jín yuchiꞌ. Jee jie̱ꞌe̱ꞌ yaꞌá rá ñɨvɨ ya̱ nsa̱ꞌá sɨ́ɨ́n Ndiosíꞌ kɨꞌɨ ráa nu̱u̱nꞌ re̱ꞌ íyó koo káꞌnú iniꞌ ráa kuni̱ꞌin ráa nu̱u̱nꞌ re̱ꞌ jee íyó kuneí iniꞌ ráa re̱ꞌ.

Inka kitɨ xéénꞌ kákini ya̱ nkene chi̱ji ñuꞌun

¹¹ Jee kuíre niniꞌ ni̱ꞌ inka ka̱ꞌ kitɨ xéénꞌ kákini, va̱nkaa ti̱ꞌ kéne ti̱ꞌ chi̱ji ñuꞌun, jee yósóꞌ u̱vi̱ꞌ nikɨ ti̱ꞌ, kua̱ꞌ íyó kuéntáꞌ nikɨ lanchi súchí, soo káꞌánꞌ ti̱ꞌ kuéntáꞌ kua̱ꞌ káꞌánꞌ ko̱o̱ꞌ mánasɨ́.

¹² Jee nísotíñú ti̱ꞌ nɨꞌɨ tiñu níso kitɨ xéénꞌ kákini xíꞌnañúꞌún sáva saꞌá ti̱ꞌ maa nu̱u̱nꞌ‑u, jee sáꞌá‑a ya̱ kua̱íyó kuitɨꞌ rá ñɨvɨ ya̱ nééꞌ ráa iniꞌ ñɨ̱vɨ́ kuneñu̱ꞌun ráa kitɨ xéénꞌ kákini xíꞌnañúꞌún ya̱ nnuvi nu̱u̱nꞌ ntúfiꞌ xe̱e̱nꞌ‑e ya̱ íyó kuviꞌ‑i.

¹³ Jee suni sáꞌá ti̱ꞌ seña a̱nasɨ́, chi ne̱ sáꞌá ti̱ꞌ ya̱ kúun ñuꞌunꞌ káyúꞌ va̱ji ne̱ súkún ne̱ nu̱u̱nꞌ ñu̱ꞌún ichinúúnꞌ rá ñɨvɨ.

¹⁴ Jee xínáꞌví ti̱ꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Cristo, jie̱ꞌe̱ꞌ rá seña a̱nasɨ́ sáꞌá ti̱ꞌ, ya̱ níꞌinꞌ ti̱ꞌ ya̱ kuvi saꞌá ti̱ꞌ maa ichinúúnꞌ kitɨ xéénꞌ kákini xíꞌnañúꞌún vá. Jee nta̱túníꞌ ti̱ꞌ nu̱u̱nꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ saꞌá ráa ɨɨn santúꞌ ñunéꞌyúꞌ máá maá kitɨ xéénꞌ xíꞌnañúꞌún ya̱ ntu̱fi̱ꞌ‑i nsa̱ꞌá yuchiꞌ, jee nna̱tekuꞌ‑u.

¹⁵ Jee nni̱ꞌi̱nꞌ ti̱ꞌ nísotíñú ti̱ꞌ ya̱ ku̱ꞌva ti̱ꞌ ta̱chi̱ꞌ káꞌánꞌ santúꞌ ñunéꞌyúꞌ máá maá kitɨ xéénꞌ kákini xíꞌnañúꞌún, sáva kuvi kaꞌanꞌ‑a, jee kuvi saꞌá‑a ya̱ kaꞌniꞌ rá ñɨvɨ ntáká rá ñɨvɨ ya̱ ntu néñu̱ꞌun ráa maa.

¹⁶ Jee kitɨ ya̱ nkene chi̱ji ñuꞌun vá, tétuvi ti̱ꞌ ya̱ ntáká rá ñɨvɨ ni̱ꞌi̱nꞌ ráa ɨɨn seña kuneeꞌ naꞌá kuáꞌá ráa áxí te̱e̱nꞌ ráa ya̱ ntu kúñáꞌnú ráa jín ya̱ kúñáꞌnú ráa, va̱ni ñɨvɨ kúká, va̱ni ñɨvɨ láꞌví, va̱ni ñɨvɨ ya̱ sátíñú‑u tiñu maáa, va̱ni musúꞌ nkuya̱ꞌvi.

¹⁷ Jee sáꞌá ti̱ꞌ ya̱ ni nkuvi keꞌen ráa, jee ni nkuvi xi̱kó ráa, retú ntu níso ráa seña vá. Kua̱chi rá ñɨvɨ níso seña vá ya̱ kúvi súví kitɨ xéénꞌ kákini xíꞌnañúꞌún áxí numero ya̱ kúvi súví‑i.

¹⁸ Íyó koo níchí xi̱ni̱ꞌ ñɨvɨ jie̱ꞌe̱ꞌ tu̱ꞌun yaꞌá jee ñɨvɨ ya̱ jiáku̱ꞌun va̱ꞌa iniꞌ jee íyó natavaꞌ‑a kuéntáꞌ numero kitɨ xéénꞌ kákini xíꞌnañúꞌún, chi numero vá kúvi numero káꞌánꞌ jie̱ꞌe̱ꞌ ɨɨn ñɨvɨ. Jee numero vá kúvi i̱ñu̱ꞌ sientúꞌ u̱ni̱xiko i̱ñu̱ꞌ (666).