Apoclipsis 10 - Mixteco del suroeste de Tlaxiaco Oaxaca

Tu̱ꞌun jie̱ꞌe̱ꞌ najiáꞌáꞌ ííꞌ ya̱ ínaꞌá tutuꞌ lúlí nna̱tuviꞌ

¹ Jee niniꞌ ni̱ꞌ inka ka̱ꞌ najiáꞌáꞌ ííꞌ Ndiosíꞌ váji nkuun ne̱ súkún, jee níso‑o fesáꞌ ííꞌ, jee yɨ́sukunꞌ vi̱ko̱ꞌ maa, jee yósóꞌ ko̱ye̱ꞌlé xi̱ni̱ꞌ‑i. Jee nu̱u̱nꞌ‑u jiánu̱te̱ꞌ kuéntáꞌ nka̱niiꞌ, jee rá jie̱ꞌe̱ꞌ‑e íyó kuéntáꞌ rá nekaꞌ ya̱ íyó kuéntáꞌ ñuꞌunꞌ.

² Jee ínaꞌá néꞌín‑i ɨɨn tutuꞌ lúlí núne nu̱u̱nꞌ vá. Jee ñani‑i jie̱ꞌe̱ꞌ kuáꞌá‑a nu̱u̱nꞌ nteñúꞌún, jee inka jie̱ꞌe̱ꞌ sátín‑i íñɨ́ nu̱u̱nꞌ ñuꞌun íchí.

³ Saájee nka̱najíín ni̱ꞌin‑i kua̱ꞌ káyu yuꞌú ɨɨn nikaꞌa. Jee sáá nka̱najíín‑i, jee nkana ni u̱xa̱ꞌ rá tajia jee káꞌánꞌ ráa.

⁴ Jee sáá nkana ni u̱xa̱ꞌ rá tajia vá, jee ya̱ íyó tu̱ꞌva nuꞌuꞌ ya̱ tee ni̱ꞌ rá tu̱ꞌun vá nékúvi, soo nteso̱ꞌo ni̱ꞌ ta̱chi̱yuꞌú ya̱ va̱ji‑i ne̱ súkún káꞌánꞌ‑á jín nuꞌuꞌ, jee nkachiꞌ‑i: ―Kuꞌun yuꞌuꞌ iniꞌ nú rá tu̱ꞌun ya̱ nkachiꞌ ni u̱xa̱ꞌ rá tajia vá, jee koto tée nú maa ―nkachiꞌ‑i.

⁵ Saájee najiáꞌáꞌ ííꞌ ya̱ niniꞌ ni̱ꞌ ya̱ íñɨ́ jie̱ꞌe̱ꞌ‑e nu̱u̱nꞌ nteñúꞌún jín nu̱u̱nꞌ ñuíchí, nkaneꞌen‑e naꞌá kuáꞌá‑a súkún.

⁶ Jee nsa̱ꞌá náaꞌ‑a nu̱u̱nꞌ tu̱ꞌun kaꞌanꞌ‑a jie̱ꞌe̱ꞌ súví maáréꞌ ya̱ tékúꞌ re̱ꞌ nɨ́ɨ́nkání, jee maáréꞌ ví ya̱ nsa̱ꞌá re̱ꞌ súkún jín kua̱íyó kuitɨꞌ ya̱ íyó nu̱u̱nꞌ‑u, jín ñuꞌun jín kua̱íyó kuitɨꞌ ya̱ íyó nu̱u̱nꞌ‑u, jín nteñúꞌún jín kua̱íyó kuitɨꞌ ya̱ íyó nu̱u̱nꞌ‑u. Jee nkachiꞌ najiáꞌáꞌ ííꞌ vá: ―Ntu ne̱ íyó kukuéé ka̱ꞌ

⁷ chi sáá kenta kajiéꞌé tivɨꞌ najiáꞌáꞌ ííꞌ uxáꞌ trompeta re̱ꞌ, saájee sikúnkuvi Ndiosíꞌ rá tu̱ꞌun re̱ꞌ níyo yuꞌuꞌ ya̱ nkachitu̱ꞌún re̱ꞌ nu̱u̱nꞌ rá musúꞌ re̱ꞌ rá nkuvi rá te̱e ya̱ nna̱kani ráa tu̱ꞌun nkene yuꞌú re̱ꞌ, ne̱ yanaꞌán ―nkachiꞌ najiáꞌáꞌ ííꞌ vá.

⁸ Saájee ta̱chi̱yuꞌú ya̱ nteso̱ꞌo ni̱ꞌ ne̱ súkún, jee tukuni nkaꞌanꞌ‑a jín nuꞌuꞌ, jee nkachiꞌ‑i: ―Kuáꞌán jee keꞌen nú tutuꞌ ya̱ núne nu̱u̱nꞌ ya̱ ínaꞌá néꞌín najiáꞌáꞌ ííꞌ ya̱ íñɨ́ ɨɨn jie̱ꞌe̱ꞌ‑e nu̱u̱nꞌ nteñúꞌún jee inka jie̱ꞌe̱ꞌ‑e íñɨ́ nu̱u̱nꞌ ñuꞌunꞌ íchí ―nkachiꞌ‑i nu̱u̱nꞌ ni̱ꞌ.

⁹ Saájee ña̱ꞌa̱nꞌ ni̱ꞌ nu̱u̱nꞌ najiáꞌáꞌ ííꞌ vá, jee nkachiꞌ ni̱ꞌ nu̱u̱nꞌ re̱ꞌ: ―Taji nú tutuꞌ lúlí nu̱u̱nꞌ ni̱ꞌ ―nkachiꞌ ni̱ꞌ. Jee nkachiꞌ re̱ꞌ nu̱u̱nꞌ ni̱ꞌ: ―Yaꞌá maa kajiꞌ maa. Jee kuu̱va̱ꞌ iniꞌ nú saꞌá‑a, soo yuꞌú nú, chi kuvi̱xi̱ꞌ saꞌá‑a kuéntáꞌ nu̱xi ñu̱ñu̱ꞌ ―nkachiꞌ najiáꞌáꞌ ííꞌ vá.

¹⁰ Saájee nkeꞌen ni̱ꞌ tutuꞌ lúlí xi̱ntíín najiáꞌáꞌ ííꞌ vá, jee nyajiꞌ ni̱ꞌ maa. Jee nku̱vi̱xi̱ꞌ iniꞌ yuꞌú ni̱ꞌ kuéntáꞌ nu̱xi. Jee sáá nkuvi nyajiꞌ ni̱ꞌ maa, jee nkuu̱va̱ꞌ iniꞌ ni̱ꞌ nsa̱ꞌá‑a.

¹¹ Jee nkachiꞌ rá najiáꞌáꞌ ííꞌ vá nu̱u̱nꞌ ni̱ꞌ: ―Íyó kachitu̱ꞌún ya̱chi̱ꞌ tuku nú tu̱ꞌun kene yuꞌú Ndiosíꞌ, jie̱ꞌe̱ꞌ na̱sa koo jín kue̱ꞌe̱ꞌ ñuunꞌ, jín kue̱ꞌe̱ꞌ nu̱u̱nꞌ rá ñɨvɨ, jín kue̱ꞌe̱ꞌ ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, jín kue̱ꞌe̱ꞌ rá ñɨvɨ nísotíñú ya̱ tátúníꞌ ráa ―nkachiꞌ rá najiáꞌáꞌ ííꞌ vá.