2 Tesalonicenses 2 - Mixteco del suroeste de Tlaxiaco Oaxaca

Máá maá te̱e ya̱ ntu íyó ley nu̱u̱nꞌ‑u

¹ Ntañúꞌún káꞌánꞌ ránꞌ jie̱ꞌe̱ꞌ ya̱ niji I̱toꞌoꞌ‑ó Jesús ya̱ kúvi Cristo jín jie̱ꞌe̱ꞌ ya̱ nastútú re̱ꞌ yó jín re̱ꞌ. Ránoꞌó, ñanitáꞌán, jíkánꞌ ránꞌ ya̱

² koto jiáꞌa rán sisákánuun ñamaꞌ ñɨvɨ antúníꞌ ránoꞌó, jee koto kuníní iniꞌ rán jie̱ꞌe̱ꞌ tu̱ꞌun káchíꞌ ñɨvɨ yukuán nu̱u̱nꞌ rán, ya̱ ya nkenta ki̱vɨ̱ꞌ ya̱ niji tuku I̱toꞌoꞌ‑ó, sáva tatúníꞌ re̱ꞌ nu̱u̱nꞌ nɨꞌɨ jee keꞌneꞌ re̱ꞌ kua̱chi. Jee koto sáꞌá rán kuéntáꞌ nu̱u̱nꞌ tu̱ꞌun vá, sú káchíꞌ ráa ya̱ tu̱ꞌun vá va̱ji‑i nu̱u̱nꞌ Ta̱chi̱ꞌ Ííꞌ, áxí ya̱ va̱ji‑i nu̱u̱nꞌ tu̱ꞌun yuꞌuꞌ ránuꞌuꞌ, áxí nu̱u̱nꞌ tutuꞌ ntee ránꞌ níso tu̱ꞌun vá ya̱ nkene nu̱u̱nꞌ ránuꞌuꞌ.

³ Jee koto jiáꞌa rán ni ɨɨn ñɨvɨ xináꞌví ráa ránoꞌó sú na̱sa ka̱ꞌ. Chi ne̱ ntiáꞌan kenta ki̱vɨ̱ꞌ vá jee xíꞌna ka̱ꞌ nuni̱ꞌin iniꞌ kue̱ꞌe̱ꞌ víꞌí ñɨvɨ nu̱u̱nꞌ Ndiosíꞌ, jee kenta nijinꞌ máá maá te̱e ya̱ ntu íyó ley nu̱u̱nꞌ‑u. Jee saá yósóꞌ ni̱nu re̱ꞌ ya̱ sijíta Ndiosíꞌ re̱ꞌ nu̱u̱nꞌ ñúꞌúnꞌ xéénꞌ.

⁴ Te̱e vá ví ya̱ nakui̱ñɨ̱ꞌ si̱kɨ̱ꞌ nta̱ká ya̱ káchíꞌ ñɨvɨ ya̱ kúvi ndiosíꞌ, jín si̱kɨ̱ꞌ nta̱ká ya̱ néñu̱ꞌun ñɨvɨ. Jee kachiꞌ re̱ꞌ ya̱ kúñáꞌnú re̱ꞌ ka̱ꞌ nsú káꞌ nta̱ká rává. Saáva kuneeꞌ re̱ꞌ iniꞌ veñu̱ꞌun káꞌnú Ndiosíꞌ, jee sanáaꞌ re̱ꞌ ya̱ ndiosíꞌ ví re̱ꞌ.

⁵ ¿Á ntu náꞌán rán, ya̱ nkachiꞌ ni̱ꞌ rá tu̱ꞌun yaꞌá, sáá nneeꞌ i̱i̱ꞌ ni̱ꞌ ka̱ꞌ jín ránoꞌó, réja?

⁶ Jee ntañúꞌún jíníꞌ rán né ɨɨn ví ya̱ chúsává‑a ya̱ kenta te̱e vá, sáva ntu kenta nijinꞌ te̱e vá ne̱ ki̱vɨ̱ꞌ ñani Ndiosíꞌ.

⁷ Chi ya kúvi yuꞌuꞌ ya̱ níváꞌa iniꞌ ñɨvɨ sáva ntu íyó ley nu̱u̱nꞌ ráa kuéntáꞌ te̱e vá. Soo ntañúꞌún chúsává ɨɨn maa ne̱ kuiyo re̱ꞌ, jee nka̱sɨ́ꞌ re̱ꞌ ka̱ꞌ.

⁸ Jee kuíre stúvi nijinꞌ máá maá te̱e vá maáa ya̱ ntu íyó ley nu̱u̱nꞌ re̱ꞌ. Jee I̱toꞌoꞌ‑ó Jesús tiɨta̱chi̱ꞌ re̱ꞌ maa jee xináa re̱ꞌ maa, jee sijíta re̱ꞌ maa jín nuva jiánu̱te̱ꞌ re̱ꞌ, sáá nenta re̱ꞌ.

⁹ Jee te̱e vá kiji re̱ꞌ saꞌá Satanás. Jee kuniso te̱e vá kua̱íyó fuersáꞌ Satanás ya̱ saꞌá re̱ꞌ rá milagrúꞌ, jín seña, jín tiñu a̱nasɨ́ ya̱ ti̱vɨ́ xíniꞌ rá ñɨvɨ kune̱ꞌyá ráa maa, jee xináꞌví‑i ráa.

¹⁰ Jee kuatíñú re̱ꞌ nɨꞌɨ nu̱u̱nꞌ rá kánéꞌén sáva xináꞌví re̱ꞌ rá ñɨvɨ ya̱ ji̱ta ráa nu̱u̱nꞌ ñúꞌúnꞌ xéénꞌ. Ntu nánitáꞌvíꞌ ráa chi kúíchi iniꞌ ráa kunu̱u̱nꞌ ráa tu̱ꞌun na̱a̱ꞌ Jesús, jee ntu ntɨɨn ráa tu̱ꞌun vá ya̱ sáꞌá‑a ya̱ nanitáꞌvíꞌ ráa, nékúvi.

¹¹ Saáva saꞌá Ndiosíꞌ ya̱ kuneí tu̱ꞌun xínáꞌví jín ráa, sáva ji̱nu iniꞌ ráa tu̱ntúꞌún.

¹² Sáꞌá re̱ꞌ suꞌva sáva sijíta re̱ꞌ nta̱ká ráa ya̱ ntu ni̱nu̱ꞌ iniꞌ ráa tu̱ꞌun na̱a̱ꞌ jie̱ꞌe̱ꞌ Jesús, chi sɨ̱ɨ̱ꞌ iniꞌ ráa yɨ́ꞌɨ́ ráa ichi kánéꞌén.

Nka̱ji Ndiosíꞌ ñɨvɨ vá sáva nanitáꞌvíꞌ ráa

¹³ Soo sukuáni íyó ku̱ꞌva ráníꞌ ya̱ kútaꞌviꞌ ránꞌ nu̱u̱nꞌ Ndiosíꞌ jie̱ꞌe̱ꞌ ránoꞌó, ñaniꞌ jín ku̱ꞌva. Ñúnúunꞌ I̱toꞌoꞌ‑ó ránoꞌó. Chi nka̱ji Ndiosíꞌ ránoꞌó, ne̱ ntiáꞌan kiko̱o ñɨ̱vɨ́, sáva natavaꞌ re̱ꞌ ránoꞌó nu̱u̱nꞌ kua̱chi rán nanitáꞌvíꞌ rán. Nanitáꞌvíꞌ rán jie̱ꞌe̱ꞌ ya̱ nsa̱ꞌá sɨ́ɨ́n Ta̱chi̱ꞌ Ííꞌ re̱ꞌ ránoꞌó, sáva kɨꞌɨ rán nu̱u̱nꞌ re̱ꞌ, jín jie̱ꞌe̱ꞌ ya̱ kúneí iniꞌ rán tu̱ꞌun na̱a̱ꞌ jie̱ꞌe̱ꞌ Jesús.

¹⁴ Jee tu̱ꞌun váꞌa vá jie̱ꞌe̱ꞌ Cristo ví ya̱ nkachitu̱ꞌún ráníꞌ. Jee suni jie̱ꞌe̱ꞌ tu̱ꞌun váꞌa vá nkana re̱ꞌ ránoꞌó sáva nanitáꞌvíꞌ rán, sáva ni̱ꞌi̱nꞌ rán ya̱ kuñáꞌnú nkáá rán jín I̱toꞌoꞌ‑ó Jesús ya̱ kúvi Cristo.

¹⁵ Saáva, ránoꞌó ñanitáꞌán, kuiñɨ ni̱ꞌin rán jín tu̱ꞌun nxi̱néꞌénꞌ ránꞌ ránoꞌó, jee tɨɨn ni̱ꞌin rán maa, va̱ni tu̱ꞌun yuꞌú ránꞌ nkachiꞌ ránꞌ nu̱u̱nꞌ ránoꞌó áxí va̱ni ntee ránꞌ maa nu̱u̱nꞌ tutuꞌ nta̱jí ránꞌ nu̱u̱nꞌ ránoꞌó.

¹⁶ I̱ña̱jée, máá maá I̱toꞌoꞌ‑ó, Jesucristo, jín Tátáꞌ‑ó, Ndiosíꞌ, suviráa ñúnúunꞌ ráa yó. Saáva násaváꞌa ráa iniꞌ‑ó nɨ́ɨ́nkání, jee nsa̱ꞌá ráa ya̱ íyó tu̱neí iniꞌ‑ó ya̱ váꞌa saꞌá ráa nu̱u̱nꞌ‑ó, jie̱ꞌe̱ꞌ íyó mániꞌ iniꞌ ráa néꞌyá ráa yó.

¹⁷ Na̱ ka̱ꞌ nasáneí ráa iniꞌ ánímaꞌ rán. Jee suni na̱ ka̱ꞌ saꞌá ráa ka̱ꞌ, ya̱ kuiñɨ ni̱ꞌin rán, sáva saꞌá rán nɨꞌɨ tiñu váꞌa jín nɨꞌɨ tu̱ꞌun váꞌa káꞌánꞌ rán.