2 Tesalonicenses 1 - Mixteco del suroeste de Tlaxiaco Oaxaca

Pablo jín rá te̱e kútáꞌán jín re̱ꞌ tée ráa nu̱u̱nꞌ ñɨvɨ ñuunꞌ Tesalónica ya̱ kúneí iniꞌ ráa Jesús

¹ Nuꞌuꞌ Pablo, jín Silvano jín Timoteo, tée ránꞌ nu̱u̱nꞌ tutuꞌ yaꞌá nu̱u̱nꞌ ránoꞌó, ya̱ kúneí iniꞌ rán Jesús, ya̱ nééꞌ rán ñuunꞌ Tesalónica, jín ya̱ kútútú rán yukuán. Suvirán yɨ́ꞌɨ́ rán nu̱u̱nꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo [ya̱ ñani Ndiosíꞌ sáva tatúníꞌ re̱ꞌ nu̱u̱nꞌ nɨꞌɨ].

² Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Jesucristo kune̱ꞌyá ráa ránoꞌó, jee kuneeꞌ ñunkúún ránoꞌó saꞌá ráa.

Ndiosíꞌ keꞌneꞌ re̱ꞌ kua̱chi ñɨvɨ sáá niji Cristo

³ Sukuáni íyó ku̱ꞌva ráníꞌ ya̱ kútaꞌviꞌ ránꞌ nu̱u̱nꞌ Ndiosíꞌ jie̱ꞌe̱ꞌ ránoꞌó, ñaniꞌ jín ku̱ꞌva. Íyó va̱ꞌa sáꞌá ránꞌ suꞌva, chi jiáꞌnu víꞌí ka̱ꞌ ya̱ kúneí iniꞌ rán Jesús, jee kúkueꞌeꞌ ka̱ꞌ ñúnúunꞌ nɨꞌɨ rán ɨɨn inka ñanitáꞌán rán.

⁴ Saáva ránuꞌuꞌ kúsɨ́ɨꞌ téyɨ́ɨ́ iniꞌ ráníꞌ káꞌánꞌ téyɨ́ɨ́ ránꞌ jie̱ꞌe̱ꞌ ránoꞌó nu̱u̱nꞌ rá grupo ñɨvɨ ya̱ kúneí iniꞌ ráa Ndiosíꞌ, chi kúníꞌin rán íñɨ́ ni̱ꞌin rán jee kúneí iniꞌ rán Jesús, sú jíto u̱ꞌvi̱ꞌ ñɨvɨ ránoꞌó jee nóꞌo rán tu̱nóꞌó ya̱ jiéꞌnéꞌ iniꞌ rán ya̱ nóꞌo rán.

⁵ Yaꞌá stúvi kájí ya̱ na̱a̱ꞌ sánáaꞌ Ndiosíꞌ, jee saáva nakuayuꞌú re̱ꞌ ya̱ íyó ni̱ꞌi̱nꞌ rán ki̱vɨ rán naꞌá re̱ꞌ nu̱u̱nꞌ tátúníꞌ re̱ꞌ. Jee jie̱ꞌe̱ꞌ yɨ́ꞌɨ́ rán naꞌá re̱ꞌ, nóꞌo nijia rán, chi jíto u̱ꞌvi̱ꞌ ñɨvɨ ránoꞌó jie̱ꞌe̱ꞌ vá.

⁶ Saájee na̱a̱ꞌ sáꞌá Ndiosíꞌ, nu̱u̱nꞌ nachunáán re̱ꞌ tu̱nóꞌó nu̱u̱nꞌ rá ñɨvɨ xínóꞌo ráa ránoꞌó.

⁷ Jee suni ránoꞌó, ya̱ nóꞌo rán, íyó na̱a̱ꞌ ya̱ sáꞌá re̱ꞌ ya̱ najia̱ví rán jín ránuꞌuꞌ nu̱u̱nꞌ ya̱ nkúnoꞌo‑ó ka̱ꞌ, sáá kene I̱toꞌoꞌ‑ó Jesús súkún nu̱u̱nꞌ nééꞌ Ndiosíꞌ. Jee kenta nijinꞌ re̱ꞌ yaꞌá jín rá najiáꞌáꞌ ííꞌ re̱ꞌ, ya̱ níso ráa fesáꞌ ííꞌ re̱ꞌ.

⁸ Jee kenta re̱ꞌ jín ñuꞌunꞌ itaꞌ, jee nachunáán re̱ꞌ xinóꞌo re̱ꞌ rá ñɨvɨ ntu mániꞌ ráa jín Ndiosíꞌ jee ntu íyó mániꞌ ráa tu̱ꞌun váꞌa jie̱ꞌe̱ꞌ I̱toꞌoꞌ‑ó Jesús.

⁹ Jee rá ñɨvɨ vá kunoꞌo nkáꞌnú ráa tu̱nóꞌó ya̱ ji̱ta ráa nɨ́ɨ́nkání, chi kusɨ́ɨ́n ráa nu̱u̱nꞌ I̱toꞌoꞌ‑ó, jín nu̱u̱nꞌ fuersáꞌ ííꞌ re̱ꞌ ya̱ viiꞌ kúñáꞌnú re̱ꞌ.

¹⁰ Suꞌva kuvi sáá nenta Jesús, sáva nakuetúꞌún rá ñɨvɨ re̱ꞌ, ya̱ nsa̱ꞌá sɨ́ɨ́n Ndiosíꞌ ráa sáva kɨꞌɨ ráa nu̱u̱nꞌ Jesús. Jee ti̱vɨ́ xíniꞌ nɨꞌɨ ráa kune̱ꞌyá ráa re̱ꞌ, ya̱ jínúꞌ iniꞌ ráa tu̱ꞌun váꞌa jie̱ꞌe̱ꞌ re̱ꞌ. Jee suni ránoꞌó, chi ni̱nu̱ꞌ iniꞌ rán tu̱ꞌun nkachitu̱ꞌún ráníꞌ nu̱u̱nꞌ ránoꞌó jie̱ꞌe̱ꞌ re̱ꞌ.

¹¹ Saáva suni sukuáni káꞌánꞌ ráníꞌ jín Ndiosíꞌ‑ó jie̱ꞌe̱ꞌ ránoꞌó. Jíkánꞌ táꞌvíꞌ ránꞌ nu̱u̱nꞌ re̱ꞌ ya̱ saꞌá re̱ꞌ ya̱ kueꞌnu na̱a̱ꞌ rán sáni kuíni re̱ꞌ, jee nakuayuꞌú re̱ꞌ ya̱ íyó ni̱ꞌi̱nꞌ rán ya̱ nkana Ndiosíꞌ‑ó ránoꞌó. Jee jíkánꞌ ránꞌ nu̱u̱nꞌ re̱ꞌ ya̱ sikúnkuvi re̱ꞌ jín fesáꞌ ííꞌ re̱ꞌ nta̱ká tiñu váꞌa ñúꞌún iniꞌ rán saꞌá rán, jín nta̱ká tiñu sáꞌá rán ya̱ va̱ji nu̱u̱nꞌ kúneí iniꞌ rán Jesús.

¹² Saáva sukuán túvi ya̱ viiꞌ kúñáꞌnú I̱toꞌoꞌ‑ó Jesús, jie̱ꞌe̱ꞌ jiáꞌnu na̱a̱ꞌ rán. Jee suni sukuán túvi viiꞌ ránoꞌó sáꞌá re̱ꞌ, sánikua̱ꞌ íyó mániꞌ iniꞌ Ndiosíꞌ‑ó jín I̱toꞌoꞌ‑ó Jesús ya̱ kúvi Cristo néꞌyá ráa yó.