1 Tesalonicenses 3 - Mixteco del suroeste de Tlaxiaco Oaxaca

¹ Saáva, sáá ntu nkúvi kuneí ka̱ꞌ iniꞌ ránꞌ kunetu ránꞌ ne̱ ni̱ꞌi̱nꞌ ránꞌ tu̱ꞌun jie̱ꞌe̱ꞌ na̱sa íyó ránoꞌó, jee ñani iniꞌ ránꞌ ya̱ níyo va̱ꞌa ya̱ kino̱o ránuꞌuꞌ ñuunꞌ Atenas.

² Jee nchu̱ichí ránꞌ Timoteo nu̱u̱nꞌ ránoꞌó. Ñaniꞌ‑ó ví re̱ꞌ. Jee táꞌán sátíñú jín‑ó ví re̱ꞌ, ya̱ sáꞌá re̱ꞌ tiñu Ndiosíꞌ, sáva sikúténuun re̱ꞌ tu̱ꞌun jie̱ꞌe̱ꞌ Cristo. Sáꞌá re̱ꞌ tiñu vá, sáva kuiñɨ ni̱ꞌin ránú kúneí iniꞌ rán Cristo jee nasáneí re̱ꞌ iniꞌ ránoꞌó.

³ Sáva ntu̱ví nániꞌvɨꞌ iniꞌ ránú jie̱ꞌe̱ꞌ tu̱nóꞌó nóꞌo ránú. Chi ránoꞌó jíníꞌ ya̱ sukuán níní kunoꞌo yó.

⁴ Chi ni nééꞌ ráníꞌ jín ránoꞌó, ya̱ nstúꞌva ránꞌ nu̱u̱nꞌ ránoꞌó, ya̱ sukuán kunoꞌo‑ó. Jee sukuán nkuvi, sáni jíníꞌ ránú.

⁵ Saájee, sáá ntu nkúvi kuneí ka̱ꞌ iniꞌ ni̱ꞌ kunetu ni̱ꞌ, jee nchu̱ichí ni̱ꞌ Timoteo, sáva kukáꞌnú iniꞌ ni̱ꞌ jie̱ꞌe̱ꞌ na̱ja jiáꞌnu rán ichi ya̱ kúneí iniꞌ rán Cristo. Chi Satanás ya̱ kúñáꞌnú nu̱u̱nꞌ rá ta̱chi̱ꞌ kíni, síkúvi re̱ꞌ iniꞌ ñɨvɨ. Jee nániꞌvɨꞌ iniꞌ ni̱ꞌ ya̱ sa̱naanꞌ nsi̱kúvi re̱ꞌ iniꞌ ránoꞌó. Jee suꞌva nkenta kúvi tiñu ka̱ꞌá, nékúvi, tiñu nsa̱ꞌá ránꞌ nteñu ránoꞌó, ya̱ nkachitu̱ꞌún ráníꞌ tu̱ꞌun Cristo.

⁶ Soo ntañúꞌún jee, nnene Timoteo nu̱u̱nꞌ nééꞌ ránú nni̱kó re̱ꞌ nu̱u̱nꞌ ránuꞌuꞌ. Jee nna̱kani re̱ꞌ tu̱ꞌun váꞌa jie̱ꞌe̱ꞌ ya̱ kúneí i̱i̱ꞌ iniꞌ ránú Cristo, jee ñúnúunꞌ ɨɨn inka rán táꞌán rán. Jee nkachiꞌ re̱ꞌ ya̱ sukuáni jiáni ñunkúún iniꞌ rán jie̱ꞌe̱ꞌ ránuꞌuꞌ. Jee níyo iniꞌ rán ya̱ kune̱ꞌyá rán ránuꞌuꞌ, sáni níyo iniꞌ ránꞌ ya̱ kune̱ꞌyá ránꞌ ránoꞌó.

⁷ Saáva sáá íyó yɨ́ɨ́ tu̱nóꞌó si̱kɨ̱ꞌ ránuꞌuꞌ jee nóꞌo víꞌí ránꞌ, jee nnusɨ̱ɨ̱ꞌ iniꞌ ránꞌ jie̱ꞌe̱ꞌ ránoꞌó, ñanitáꞌán. Chi íñɨ́ ni̱ꞌin ránú kúneí iniꞌ rán Cristo.

⁸ Chi ntañúꞌún kuéntáꞌ retánꞌ nátekuꞌ ráníꞌ kúníꞌ ránꞌ, nu̱u̱nꞌ íñɨ́ ni̱ꞌin ránoꞌó jín I̱toꞌoꞌ‑ó.

⁹ Ntu ñúkúꞌvá iniꞌ ráníꞌ ya̱ íyó ku̱ꞌva ránꞌ ya̱ kútaꞌviꞌ ránꞌ nu̱u̱nꞌ Ndiosíꞌ jie̱ꞌe̱ꞌ ránoꞌó, jie̱ꞌe̱ꞌ nɨꞌɨ ya̱ sɨɨ́ꞌ ntaji re̱ꞌ jie̱ꞌe̱ꞌ ránoꞌó. ¿Na̱ja kúvi ku̱ꞌva ránꞌ kua̱ꞌ nɨꞌɨ ya̱ kútaꞌviꞌ ránꞌ nu̱u̱nꞌ re̱ꞌ, rúsa?

¹⁰ Nuví jín yakuááꞌ jíkánꞌ táꞌvíꞌ nasɨ́kuitɨꞌ ráníꞌ nu̱u̱nꞌ Ndiosíꞌ ya̱ kua̱jiane̱ꞌyá ránꞌ ránoꞌó. Sáva xinéꞌénꞌ ráníꞌ ka̱ꞌ tu̱ꞌun kúmániꞌ rán, jie̱ꞌe̱ꞌ tu̱ꞌun váꞌa Jesús ya̱ jínúꞌ iniꞌ rán.

¹¹ Jíkánꞌ táꞌvíꞌ ránꞌ nu̱u̱nꞌ maá Tátáꞌ‑ó Ndiosíꞌ jín nu̱u̱nꞌ I̱toꞌoꞌ‑ó Jesús ya̱ chuꞌun ráa ránuꞌuꞌ ichi ya̱ kua̱jiane̱ꞌyá ránꞌ ránoꞌó.

¹² Jee suni jíkánꞌ táꞌvíꞌ ránꞌ ya̱ saꞌá I̱toꞌoꞌ‑ó, ya̱ kukueꞌeꞌ ka̱ꞌ kunu̱u̱nꞌ víꞌí rán ka̱ꞌ ɨɨn inka táꞌán rán jín nɨꞌɨ rá inka ka̱ꞌ ñɨvɨ, sánikua̱ꞌ suni ñúnúunꞌ ránꞌ ránoꞌó.

¹³ Jee jíkánꞌ táꞌvíꞌ ráníꞌ suꞌva, sáva saꞌá re̱ꞌ ya̱ kuiñɨ kutú ránú ne̱ jín ánímaꞌ rán, ya̱ kusɨ́ɨ́n rán ya̱ nkɨ́ꞌɨ rán nu̱u̱nꞌ ya̱ níváꞌa. Sáva ni ɨɨn ñɨvɨ nchikua̱chi ráa si̱kɨ̱ꞌ ránoꞌó ichinúúnꞌ Tátáꞌ‑ó Ndiosíꞌ, sáá niji tuku I̱toꞌoꞌ‑ó Jesús jín nɨꞌɨ rá ñɨvɨ ya̱ nsa̱ꞌá sɨ́ɨ́n re̱ꞌ ráa yɨ́ꞌɨ́ ráa nu̱u̱nꞌ re̱ꞌ.