ᓂᔓ ᐱᑕᕐ 3 - ᐅᔅᑭ ᑎᔅᑌᒥᓐᑦ

ᐊᓂᒪ ᐊᔓᑕᒫᑫᐎᓐ ᐅᑎᐯᓕᒋᑫᐤ ᒋ ᑕᑯᔑᒃ

¹ ᐅᒪ ᓂᔓ ᒪᓯᓇᐊᒫᑫᐎᓐ, ᓯᐋᑭᐃᑕᑾᒃ, ᐊᓄᒡ ᑭ ᒪᓯᓇᐊᒫᑎᓇᐗᐤ; ᐁᑯᑕ ᐁ ᔑᑭᑕᒫᓐ ᑭ ᐹᓓᑭ ᒥᑐᓀᓕᒋᑲᓂᐗᐗ ᑭᒋ ᐅᒋ ᑭᔅᑭᓯᔦᒃ:

² ᑭᒋ ᒥᑐᓀᓕᑕᒣᒃ ᐊᓂᐃ ᐋᔭᒥᐎᓇ ᐌᔅᑳᒡ ᑳ ᑮ ᐃᑗᒋᒃ ᐊᓂᑭ ᐸᓓᑭ ᐅᑭᔅᑭᐙᐃᑫᐗᒃ, ᓀᔥᑕ ᐊᓂᐃ ᑳ ᑮ ᐃᑕᔓᐌᔮᒃ ᓂᓚᓈᓐ ᐅᑦ ᐊᐸᔅᑕᓕᒪ ᐅᑎᐯᓕᒋᑫᐤ ᐯᒫᒋᐃᐌᑦ;

³ ᐅᒪ ᓃᔥᑕᒻ ᐁ ᑭᔅᑫᓕᑕᒣᒃ, ᑭᒋ ᑕᑯᔑᑭᒃ ᐁ ᐊᑎ ᑳᒋᒡ ᑭᔑᑳᑭ ᐅᐹᐱᓄᑕᑫᔅᑲᒃ, ᐁ ᐱᒧᑖᑕᑭᒃ ᑎᐱᓚᐌ ᐅ ᒪᒋ ᓇᑕᐌᓕᑕᒧᐎᓂᐙᐗ,

⁴ ᐁ ᐃᑗᒋᒃ ᒫᑲ, ᑖᓐᑌ ᐊᓂᒪ ᐊᔓᑕᒫᑫᐎᓐ ᑭᒋ ᑕᑯᔑᒃ? ᐌᓴ ᐊᔅᐱᓐ ᐅᑖᐎᒪᐗᒃ ᑳ ᑮ ᓂᐹᒋᒃ, ᒥᓯᐌ ᑫᒀᓇ ᐃᑕᑾᓋ ᑳ ᐃᔑ ᐃᑕᑾᑭᐸᓐ ᐊᔅᐱᓐ ᑳ ᒫᒋ ᐅᔑᑖᓂᐗᒃ ᐅᒋ᙮

⁵ ᐌᓴ ᐅᒣᓕᐤ ᐅᒋᑕᐤ ᓇᒪᐎᓚ ᐎ ᑭᔅᑫᓕᑕᒶᒃ, ᑭᒋᒪᓂᑐ ᐅᑦ ᐋᔭᒥᐎᓐ ᐁ ᑮ ᐅᒋ ᐃᑕᑾᑭ ᑭᔑᑾ ᐌᔅᑲᒡ, ᓀᔥᑕ ᐊᔅᑭ ᐗᑭᑎᐯᒃ ᐁ ᓂᐸᐎᒪᑲᒃ ᓀᔥᑕ ᓂᐲᒃ:

⁶ ᐁᐗᑯ ᐅᒋ ᐊᔅᑭ ᐁᑯᔅᐱ ᑳ ᑮ ᐃᑕᑾᒃ, ᓂᐱ ᐁ ᑮ ᐅᒋ ᓕᔅᑭᐯᒃ ᑮ ᓂᔑᐗᓈᑕᓐ:

⁷ ᒫᑲ ᐊᓂᐃ ᑭᔑᑾ ᓀᔥᑕ ᐊᔅᑭ ᐊᓄᒡ ᑳ ᐃᑕᑾᑭ, ᐁᐗᑯ ᑫᔮᐸᒡ ᐋᔭᒥᐎᓐ ᐅᒋ ᑲᓇᐌᓕᒋᑳᑌᐗ ᑭᒋ ᐃᔅᒀᓯᑳᑌᑭ, ᐹᑎᒫ ᑎᐹᔅᑯᓂᑫᐎ ᑭᔑᑳᑫ, ᓀᔥᑕ ᓂᔑᐗᓈᑎᓯᑡᐌ ᑳ ᒪᒑᑎᓯᒋᒃ ᐃᓕᓕᐗᒃ᙮

⁸ ᒫᑲ, ᓯᐋᑭᐃᑕᑾᒃ, ᑭᔅᑫᓕᑕᒧᒃ ᐅᒪ ᐯᔭᒃ ᑫᒀᓐ, ᐯᔭᑾᐤ ᐁ ᑭᔑᑳᓕᒃ ᐃᑕᑭᑕᒻ ᐅᑎᐯᓕᒋᑫᐤ ᑖᐱᔅᑯᒡ ᑭᒋᒥᑖᑐᒥᑕᓇᐤ ᐱᐴᓋ, ᓀᔥᑕ ᑭᒋᒥᑖᑐᒥᑕᓇᐤ ᐱᐴᓋ ᑖᐱᔅᑯᒡ ᐯᔭᑯ ᑭᔑᑲᐤ᙮

⁹ ᐅᑎᐯᓕᒋᑫᐤ ᓇᒪᐎᓚ ᑆᔅᑕᐎᐤ ᑭᒋ ᑐᑕᒃ ᐅᑦ ᐊᔓᑕᒫᑫᐎᓐ, ᑖᐱᔅᑯᒡ ᐋᑎᑦ ᐃᓕᓕᐗᒃ ᑆᔅᑕᐎᐎᓐ ᑳ ᐃᑕᑭᒃ; ᒫᑲ ᑭ ᔑᐱᓚᐌᓯᔅᑖᑯᓇᐤ, ᐁᑳ ᐁ ᓇᑕᐌᓕᑕᒃ ᐊᐌᓕᐗ ᑭᒋ ᓂᔑᐗᓈᑎᓯᓕᒋ, ᒫᑲ ᒥᓯᐌ ᑭᒋ ᐊᑎ ᒥᒋᓚᐌᔦᓕᑕᒥᓕᒋ᙮

¹⁰ ᒫᑲ ᐅᑎᐯᓕᒋᑫᐤ ᐅ ᑭᔑᑳᒻ ᑲᑕ ᐹᐸᓕᓕᐤ ᑖᐱᔅᑯᒡ ᑭᒧᑎᔉ ᐁ ᑎᐱᔅᑳᓕᒃ; ᐁᑯᔅᐱ ᑭᔑᑾ ᑫ ᐌᐱᐸᓕᑭ ᐁ ᑭᒋ ᓄᑖᑾᒃ, ᓀᔥᑕ ᑭᔑᑯᒃ ᑳ ᐊᑯᑎᑭ ᑲᑕ ᑎᑭᑌᐗ ᐁ ᐃᔅᐱᒋ ᑭᔑᑌᒃ; ᐊᔅᑭ ᓀᔥᑕ ᓀᔥᑕ ᒥᓯᐌ ᐊᑐᔅᑫᐎᓇ ᐁᑯᑕ ᑳ ᐃᑕᑾᑭ ᑲᑕ ᒑᑳᔅᑭᑌᐗ᙮

¹¹ ᐁ ᐙᐸᑕᒪᒃ ᒫᑲ ᒥᓯᐌ ᐅᐅ ᑭᒋ ᓂᔑᐗᓈᑕᑭ, ᑫᑯ ᑐᐎ ᐃᓕᓕᐗᒃ ᑫ ᐃᔑᓈᑯᓯᔦᑯᐸᓐ ᒥᓯᐌ ᐸᓓᑭ ᐃᔑᐱᒫᑎᓯᐎᓂᒃ ᓀᔥᑕ ᒪᓂᑐᐙᑎᓯᐎᓂᒃ,

¹² ᐁ ᐊᔕᐙᐸᑕᒬᒃ ᓀᔥᑕ ᐁ ᐯᒋ ᑭᔑᐸᓕᑕᐌᒃ ᑭᒋᒪᓂᑐ ᐅ ᑭᔑᑳᒻ, ᐁᑯᔅᐱ ᑭᔑᑾ ᐁ ᐃᔅᒀᓯᑳᑌᑭ ᑲᑕ ᓂᔑᐗᓇᑕᓋ, ᓀᔥᑕ ᑭᔑᑯᒃ ᑳ ᐊᑯᑎᑭ ᑲᑕ ᑎᑭᑌᐗ ᑫ ᐃᔅᐱᑭ ᑭᔑᑌᒃ᙮

¹³ ᐁᓕᐌᒃ ᒫᑲ ᑭᓚᓈᓇᐤ, ᑳ ᐃᑕᔅᑌᓕᒃ ᐅᑦ ᐊᔓᑕᒫᑫᐎᓐ, ᑭᑦ ᐊᔕᐙᐸᑌᓈᓇᐤ ᐅᔥᑭ ᑭᔑᑾ ᓀᔥᑕ ᐅᔥᑭ ᐊᔅᑭ, ᐁᑯᑕ ᑫ ᐃᔑ ᐎᑭᒪᑲᒃ ᒀᔭᔅᑭᑖᑎᓯᐎᓐ᙮

¹⁴ ᐁᐗᑯ ᐅᒋ, ᓯᐋᑭᐃᑕᑾᒃ, ᐁ ᓄᑾᒃ ᐁ ᐊᔕᐙᐸᑕᒣᒃ ᐅᐅ ᑫᒀᓇ, ᑭᓯᓴᐎᓯᒃ ᑳᔮᒣᓕᑕᒧᐎᓂᒃ ᑭᒋ ᒥᔅᑳᑖᒃ, ᐁᑳ ᐁ ᒪᓯᓈᓱᔦᒃ ᓀᔥᑕ ᐁ ᒥᓗᐃᑌᓕᑖᑯᓯᔦᒃ:

¹⁵ ᓀᔥᑕ ᐃᑕᑭᑕᒸᒃ ᐅ ᔑᐱᓚᐌᓯᐎᓐ ᑭ ᑎᐯᓕᒋᑫᒥᓇᐤ ᐁ ᐱᒫᒋᐃᐌᐎᓂᐗᒃ: ᑖᐱᔅᑯᒡ ᓀᔥᑕ ᓯᐊᑭᐋᑲᓂᐎᑦ ᑭᒋᔖᓂᓇᐤ ᐹᓪ, ᐃᔥᐱᔥ ᑲᑫᑕᐌᓕᑕᒧᐎᓂᓕᐤ ᐁ ᑮ ᒥᓛᑲᓂᐎᑦ, ᐁ ᑮ ᒪᓯᓇᐊᒫᑖᒃ:

¹⁶ ᑖᐱᔅᑯᒡ ᓀᔥᑕ ᒥᓯᐌ ᐅ ᒪᓯᓇᐊᒫᑫᐎᓂᒃ, ᐁᑯᑕ ᐁ ᐋᓕᒧᑕᒃ ᐅᐅ ᑫᒀᓇ; ᐁᑯᑕ ᐁᑕᑾᑭ ᐋᑎᑦ ᑫᒀᓇ ᑳ ᐋᓕᒪᑭ ᑭᒋ ᓂᓯᑐᒋᑳᑌᑭ, ᐊᓂᑭ ᐁᑳ ᑳ ᐅ ᑭᔅᑫᓕᑕᒧᐎᓂᒋᒃ ᓀᔥᑕ ᐁᑳ ᑳ ᐋᔨᒋᑳᐸᐎᒋᒃ ᑳ ᐙᑭᓇᑭᒃ, ᑖᐱᔅᑯᒡ ᓀᔥᑕ ᐁ ᐃᑐᑕᑭᒃ ᑯᑕᑭᔭ ᑭᒋ ᒪᓯᓇᐃᑫᐎᓇ ᑎᐱᓚᐌ ᐅ ᓂᔑᐗᓈᑎᓯᐎᓂᐙᒃ ᐃᔑ᙮

¹⁷ ᑭᓚᐗᐤ ᒫᑲ, ᓯᐋᑭᐃᑕᑾᒃ, ᓂᑳᓐ ᐁ ᑭᔅᑫᓕᑕᒣᒃ ᐅᐅ ᑫᒀᓇ, ᔮᒀᒡ ᑭᓚᐗᐤ ᓀᔥᑕ, ᐁᑳ ᑭᒋ ᑭᒋᐎᓕᑲᐎᔦᒃ ᐅᒪᒋᑖᐗᒃ ᐅ ᐗᓀᓕᑕᒧᐎᓂᐗᐤ ᐅᒋ, ᑭᒋ ᐸᑭᔑᓂᔦᒃ ᑎᐱᓚᐌ ᑭ ᒪᔥᑲᐌᓕᑕᒧᐎᓂᐙᒃ ᐅᒋ᙮

¹⁸ ᒫᑲ ᓂᑕᐎᑭᒃ ᔕᐌᓕᒋᑫᐎᓂᒃ, ᓀᔥᑕ ᐅ ᑭᔅᑫᓕᒥᑯᓯᐎᓂᒃ ᑭ ᑎᐯᓕᒋᑫᒥᓇᐤ ᓀᔥᑕ ᑭ ᐱᒫᒋᐃᐌᒥᓇᐤ ᒋᓴ ᙭᙮ ᐎᓚ ᒫᑲ ᑲᑕ ᐎ ᒫᒥᒋᒫᑲᓂᐎᐤ ᐊᓄᒡ ᓀᔥᑕ ᑳᑭᑫ᙮ ᐁᒣᓐ᙮