MATEO 25 - Wanaadi A'deddu

Amoojado’como ajei’choto’ja’como wei’jocoomo

¹ “Edääje na Wanaadi töcaajichaanaije weiñä. Ajei’choto’ja’como cönä’ja’to amoojadä. Tönwanno cöntonto jötaanä ene tödhaawadööcomo dha’me. Yäätä töjöötaamö cönwomo’ca’to.

² Ijaatoodea cönä’ja’to aneene’jutu’jöncomo, ijaatoodea ’quene tösejjequeiñe.

³ Ñanno aneene’jutu’jöncomo tödhaawadööcomo mma ñaadädööcomo cönä’jaacä, queedusén mmaane anaadä’da cöneiya’to, yaatameea’jäcä tadö’täämö.

⁴ Ñanno tösejjeca’como mmaane iiñejöödöcoomo cönä’jaacä tödhaawadööcomo, queedusén mmaja, chääwötö’cä aca.

⁵ Numa töjöötaamö eejö’da yeijäcä cönquinchajäätöicho ñanno ajei’choto’ja’como; cönnö’jätöicho yaawä.

⁶ Yo’tawääne yaawa cä’tönnä cönäätaacä: “Töjöötaamö nä’döi. Ma’da’cä adheeja’catääcä, ma’dejjatäiye;” quee cönäätaacä.

⁷ Yaawä tameedä ñanno ajei’choto’ja’como cönä’jäicho. Tödhaawadööcomo cönconeeca’to yaawä.

⁸ Yääje mma yaawä ñanno aneene’jutu’jöncomo cönä’döa’to ñanno tösejjeca’como wwäiñe: “Queedusén änne’täcä; ñaa dhawaadö nunque’jä’a.”

⁹ Yaawä tösejjeca’como cöneccujä’a’to; cönä’döa’to: “Ng’jn, u’jai’cha ñaa na. Äwwäiñe u’a’jäcä ñaa wwä mäntä dea mma ñaa dhawaadö unque’jä’jai ña, änwanno adhaawadööcomo mmaja. Täjeemaane aneejemaatantäcä töwäätätöijaamo döiñaiñe;” quee cönä’döa’to ñanno tösejjeca’como.

¹⁰ Tödhaawadööcomo ejeemataame ñanno aneene’jutu’jöncomo wwäiñe töjöötaamö cönä’döi yaawä. Ñanno chäänönga’como’jödö cönoomomöicho yaawä chääjadä jötaatojo taca. Mönaatata cönaata’dui yaawä.

¹¹ Yää ’jeje cöneejoto yaawä ñanno ijimmä. Tönwanno cönä’döa’to: “Cajiichaana, mönaatata a’ducaacä, ñaa omoomöiye;” quee.

¹² Ñäädä töjöötaamö cöneccujä’a’to; cönä’döaacä: “Chäänönge yääje wä’döa äwwäiñe, yoowanääcä’da maato;” quee cönä’döaacä ñäädä töjöötaamö ñanno ajei’choto’ja’como aneene’jutu’jöncomo wwäiñe; quee cönä’döaacä Jesuuquidiito.

¹³ Edääje mmaja Jesuuquidiito cönä’döa’dea yaawä: —Yääje yeijäcä äädai’chätääcä, odhoowanääcäiñe’da yeijäcä Soto nnedö we’tojo anooto cu’nädö.

Jödaata edaí’chojo’jödö dö’senno

¹⁴ “Edääje mmaja na dea Wanaadi töcaajichaanaije weiñä. Dhanwa cönä’jaacä aneiñaja töötäämö. Töötääje tösootoi cöna’dejjaicho, töjöödatai utuudu wetä chääwaadäiñe, chäwwäiñe edai’chojoodöje.

¹⁵ Awa’deeto wwä cuntui ijaatoodea miide jödaata. Yeichacoono wwä cuntui aacä miide jödaata. Anejja wwä cuntui tooni miide jödaata, chääwaadäiñe towaanojo’ne yeichöcoomo woije dea. Aneiñaja cöntämä yaawä.

¹⁶ Yaawä ñäädä ijaatoodea miide jödaata eiñei’jödö töwäätätöijadö que cöncana’cai ijaatoodea miide jödaata mmaja.

¹⁷ Mädääje dea ñäädä aacä miide jödaata eiñei’jödö; aacä miide jödaata mmaja cöncana’cai chea.

¹⁸ Ñäädä tooni miide jödaata eiñei’jödö mmaane tädhaajä jödaatai cöneetone’täi nono töncadö aca.

¹⁹ “Numa yä’döa’jäcä chäädhajootoncomo cöneejä dea yaawä. Töwö cöneecamma’joicho töjöödatai jäcä.

²⁰ Ñäädä ijaatoodea miide jödaata eiñei’jödö cöneejä chäwwadäädä, töncana’ca’jödö dha’me, ijaatoodea miide jödaata mmaja; cönä’döaacä. “Cajiichaana, öwwä mu’ne ijaatoodea miide jödaata. Edä na yää öncana’ca’jödö, ijaatoodea miide jödaata mmaja;” quee cönä’döaacä.

²¹ Chäädhajä cönä’döaacä yaawä: “Chäänönge na, amäädä yaanonö aashichaato, chäänöngato mmaja. Aashicha mödööne ataadawaajui she’coto’cä. Eduuwa ataadawaajui wecamma adai’joto jaiñoone. Ta’cwaiñe eijai ma eduuwa öwö jaadä;” quee cönä’döaacä chäädhajä.

²² Yää ’jeje ñäädä aacä miide jödaata eiñei’jödö cöneejä dea yaawä; cönä’döaacä: “Cajiichaana öwwä mu’ne aacä miide jödaata. Edä na yää öncana’ca’jödö, aacä miide jödaata mmaja;” quee cönä’döaacä.

²³ Chäädhajä cönä’döaacä yaawä: “Chäänönge na, amäädä yaanonö aashichaato, chaanöngato mmaja. Aashicha mödööne ataadawaajui she’coto’cä. Eduuwa ataadawaajui wecamma’de adai’joto jaiñoone. Ta’cwaiñe eijai ma eduuwa öwö jaadä;” quee cönä’döaacä chäädhajä.

²⁴ Ñäädä tooni miide jödaata eiñei’jödö cöneejä dea yaawä; tädhaajä wwä cönä’döaacä: “Cajiichaana, yoowanääcä cönä’jaacä tönoiñatooje aweichö. Anaatödööjönö tömjä’e amäädä, ännödööjönö töneiye mmaja.

²⁵ Yääje yeijäcä monnontaaquene; ajöödatai wetoone’täne yaawä nono aca. Edä na yää ajöödatai;” quee cönä’döaacä.

²⁶ Yaawä chäädhajä cönä’döaacä chäwwä: “Sootoi conemjönö amäädä, töquiiñato mmaja. Odhoowanääcä cönä’jaacä tönoiñe weichö, naatödööjönö tömjä’e weichö mmaja, önnödööjönö töneiye weichö mmaja.

²⁷ Yääje yeijäcä jöödatai u’jai awei’jödö na tönwacaamaamöje jödaata u’nnamo wwäiñe. Adöiña wä’döa’jäcä jöödatai eichö weiya yaawä, töwwäiñe jöödatai tödö’jödö eje’jödö jadä;” quee cönä’döaacä ñäädä chäädhajä tösootoi wwä.

²⁸ Edääje cönä’döa’dea ñanno yäätoncomo wwäiñe: “Enwajiiñatääcä määdhä tooni miide jödaata chäwwä naadö que. Mä’dä wwä u’täcä, amoojadä miide jödaata chäwwä naadö wwä.

²⁹ Ñäädä töweiyato wwä jooje’cä nä’tua’de; jooje töweiye na’de chäwwä yaawä. Ñäädä a’cato mmaane nätänwajiiñaja’de yää she’caasa töwwä naadö que.

³⁰ Mä’dä dhanwa conemjönö ija’canö’jotääcä jödo’na, tööjano’taca. Iiña naamoa’de; jooje cone’da töwö na’de;” quee cönä’döaacä chäädhajä.

Wätämmencajootoojo anootoi’chädö

³¹ “Cajiichaanaje töweichö wetä Soto nnedö we’a’jäcä, tamoodedö aashicha’como töjaadä, yaawä töwö nataajima’de tumuudei ye’wä, tawaanato töjääcä.

³² Yaawä tameedäädä soto ne’jummaato’de; töwö Cajiichaana nimencaato’de yaawä, oweeja edai’chännamo oweeja tömmencaiñe töweiye naichöje, chiiwo jadäiñe yeichöcoomo jonno.

³³ Töwö oweejacoomo nödööaato’de tönnäcä, ämu’demjönö dö’se, chiiwocoomo mmaane ämu’dato dö’se.

³⁴ Yaawä Cajiichaana nä’döa’de ämu’demjönö dö’sencomo wwä: “Ä’täcä änwanno, Jaaja nijummadö, ijaatawä meichäiye, yää edä nono wamoodeta’jödö jonnoto’jödöödä äwwoncomooje choonecaajä naadö.

³⁵ Öwö ämiije weichawä änwanno cäwanshinchätääne. Emjätö’se weichawä mmaja woocödö mu’täne dea öwwä. Tömmaiche’da weichawä änwanno wääwa’totoojo mecammatääne yaawä.

³⁶ Töwonque’da wéichawä änwanno woomö mu’täne. Cädäije weichawä, jedeesoje weichawä mmaja, änwanno yeenetä mä’ja’quene;” quee nä’döa’de Cajiichaana.

³⁷ Yääje mma yaawä ñanno aashicha’como neccujä’aato’de: “Cajiichaana, ¿ächännauwä ca ämiije aweichö ñaa adheewashinchäne? ¿Ächännauwä emjätö’se aweichö ñaa owo’jane?

³⁸ ¿Ächännauwä ca äwääwa’totoojo ñaa cöneecammai ämmai ’je’da yeichawä? ¿Ächännauwä ca owoomö ñaa cuntui töwonque’da aweichawä?

³⁹ ¿Ächännauwä ca adheenetä ñaa cönä’jaacä cädäije aweichö, jedeesoje aweichö mmaja?” quee nä’döaato’de chäwwä ñanno aashicha’como.

⁴⁰ Yaawä Cajiichaana chäwwäiñe nä’döa’de: “Chäänönge yääje wä’döa äwwäiñe, tameedä sootoi jäcä mödöötäneedö, mäccö mmädä yeichaame töwö, öwwonooje dea yää mödöötäne;” quee nä’döa’de.

⁴¹ “Yaawä töwö Cajiichaana nä’döa’de ämu’dato dö’sencomo wwä: “Ojoncomo jonno änwanno töwännanö’aamö; wa’to töwaatamemjönö aca ojoncomo, yää odo’shancomo weicho’comooje choonecaajä naadö.

⁴² Ämiije weichawä änwanno yeewashinchä’da mä’ja’quene. Emjätö’se weichawä mmaja änwanno woocödö äntu’da mä’ja’quennea.

⁴³ Tömmaiche’da weichawä mmaja änwanno wääwa’totoojo aneecamma’da mä’ja’quene. Töwonque’da weichawä woomö äntu’da mä’ja’quennea. Cädäije weichawä, jedeesoje weichawä mmaja, yeenejäätö’da mä’ja’quene;” quee nä’döa’de Cajiichaana ñanno ämu’dato dö’sencomo wwä.

⁴⁴ Yaawä tönwanno neccujä’aato’de: “Cajiichaana, ¿ächännauwä ca ä’wa’tä’da ñaa cönä’jaacä ämiije aweichawä, emjäto’se aweichawä mmaja, tömmaiche’da aweichawä mmaja, töwonque’da aweichawä mmaja, cädäije aweichö mmaja, jedeesoje aweichö mmaja?” quee nä’döaato’de Cajiichaana wwä.

⁴⁵ Töwö Cajiichaana chäwwäiñe nä’döa’de yaawä: “Chäänönge yääje wä’döa äwwäiñe, tameedä canno sootoi jäcäiñe ännö’da mä’ja’quennö, mäccö mmädä yeichaame töwö, öwwonooje mmaja yää ännö’da mä’ja’quennea;” quee nä’döa’de.

⁴⁶ Ñanno conemjöncomo nötaato’de yaawä töwäntunaanö’to’como töwaatamemjönö aca. Chäänönga’como mmaane nötaato’de aashicha töweicho’como aca daja; quee cönä’döaacä Jesuuquidiito.