MATEO 23 - Wanaadi A'deddu

Judhío owaanomannamo ijiiyemeecö’jödö Jesuuquidiito wwä

¹ Yääje mma yaawä Jesuuquidiito cönä’döaacä soto wwäiñe, tönoowanoomadö wwäiñe mmaja:

² —Adheedhajootoncomo ñanno owaanomannamo, jaadiseeo mmaja, Moisé wei’jödö nönge dea.

³ Yääje yeijäcä yoijeiñe eichäcä, chäwwäiñe adhaanontädööcomo tönnöe eichäcä. Iiñödööcomo nönge mmaane männötäi’che. Tönwanno aashicha töwa’deutaameiñe ännö’daane.

⁴ Tönwanno soto wwäiñe ä’döque’jönööto tönnöjo weneeneto, tamiiñato adoojodö töweiye naichöje, i’wa’tädööcomo jäcä chö’tajäätö’da töweiyancädäiñe.

⁵ Tameedä tönnöe weneeneto soto wwäiñe töwäänejooto’comooje mma. Tönwanno yaacö’comje Wanaadi a’deddu imennaajä adäädö töjeecaichöcoomo de’cäcä immödööcomo, tajäädöcoomo jäcä mmaja. Yaacö’comje dea anejjacoomo soto womööcomo a’sadö e’jodhe’cä töwoomöcoomo a’sadö tödöödö.

⁶ Tönwanno täneejuca’como a’täi ye’wä töwei’sheiñe weneeneto wääwashinchänaawä, we’jummanaawä mmaja.

⁷ Tönwanno yaacö’comje tönoiñe täne’madööcomo que soto wwäiñe ta’dejjadööcomo jata antawä; owaanomaaneije tä’tädööcomo yaacö’comje mmaja.

⁸ “Änwanno mmaane owaanomaaneije äwäätä’täjo’se’da eichäcä, äänönge mma aweiya’como. Tooni töweiye na odhoowanoomaneichomo, ñäädä Quidiito.

⁹ Edä nono de’wono oomotoncomo neeneje mane’tätäi’che. Caju ñanoone Oomotoncomooje na, ñäädä mma.

¹⁰ Cajiichaanaje mätä’täi’chede. Ñäädä mma ñäädä cajiichaana, Quidiito mma.

¹¹ Ñäädä tameedä anooje naadö ñäädä ñäädä cajiichaanajaato.

¹² Ñäädä o’jodhaato tö’tajäätödö dho’noncomooje nä’döja’de. Ñäädä dho’noncomo tö’tajäätödö mmaane o’jodhe nä’döja’de.

¹³ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno Wanaadi sotoije ä’döjai’chomo’jödö töncone’ma määnetääne. Änwanno dea Wanaadi sotoije ei’cha maato, shootoije töwei’sha’como wwä ännöjo’da mmaja.

¹⁴ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno töneijä’e määnetääne iiño wääma’jödö nödöödö. Yää encwanno’jodööje nuwe Wanaadi wwä töwa’deuwe yaawä. Yääje yeijäcä jooje’cä mätä’maminchajaato’de.

¹⁵ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno töötä määnetääne tameedä nono weichö wa’cä, äwäätunnäichomo nönge soto owaanomaiñe. Äwwäiñe owaanoma’jäcä wa’to nwaca töötäämöje mödööato yaawä, änöngeiñe mmaja, cone’da’cä jeene.

¹⁶ “Wentumje maato’de änwanno soto e’se’tännamo tänuuquemjöncomo. Edääje töwä’döe määnetääne: “Anejja wääcamma’jäcä Wanaadi weichojo joi, täje’da na yääcammadö. Yaawääne’ Wanaadi weichojo tacaano oodo joi yääcamma’jäcääne’, ta’deddu ija’do’jojai’cha na;” quee äwä’dödööcomo.

¹⁷ Aneene’jutu’jöncomo änwanno, tänuuquemjöncomo mmaja. ¿Äshono o’jodhe’cä nai, oodo ’ja, Wanaadi weichojoone’, yää oodo tönoiñe tödööneiñe?

¹⁸ Edääje mmaja töwä’döe määnetääne dea: “Anejja wääcamma’jäcä saaquidiijiisiyo tödöötojo joi, täje’da na yääcammadö. Yaawääne’ saaquidiijiisiyooje tödööajä joi yääcamma’jäcääne’, ta’deddu ija’do’jojai’cha na;” quee äwä’dödööcomo.

¹⁹ Aneene’jutu’jöncomo änwanno, tänuuquemjöncomo mmaja. ¿Äshono o’jodhe’cä nai, saaquidiijiisiyo ’ja, saaquidiijiisiyo tödöötojoone’, yää saaquidiijiisiyo tönoiñe tödööneiñe?

²⁰ Ñäädä saaquidiijiisiyo dötoojo joiño wääcammadö, yää jäcä mma’da nääcamma; ñäädä nääcamma saaquidiijiisiyo joi’jödöödä.

²¹ Ñäädä Wanaadi weichojo joiño wääcammadö, yää jäcä mma’da nääcamma, Wanaadi joi’jödöödä nääcamma, ñäädä tömmaichemö.

²² Ñäädä caju ñano joiño wääcammadö, Wanaadi a’täi joi nääcamma, Wanaadi joi mmaja, ñäädä caju ña naadö.

²³ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno Wanaadi wwonooje tunu’e määnetääne anaatödööcomo ejeedödö, yää jomi, wishu mmaja, anejja’cä mmädä mmaja, waanontänä tujunnato jaiñoone choojodha’cäcä ija’dä’taame äwwäiñe, yää chäänönge weiñä, wentumje äneetä weiñä mmaja, chäänönge Wanaadi töneecanö’e weiñä mmaja. Mädääne tödööjai maato, mänööcomo tödööancädä yeichaame.

²⁴ Soto e’se’tännamo tänuuquemjöncomo änwanno. Änwanno maato töcaataadö acanno majiidi emaanei töweiye naichöje, yä’jödöödä wa’shadi ena’taame töwwä.

²⁵ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Ye’wä mma aashicha maato, incha’cäcä mma jadaaji atööajä töweiye naichöje, aweichöcoomo mmaane tämeeneiñe, chäänönge’da mmaja.

²⁶ Etaacä amäädä, jaadiseeo tänuuquemjönö. Aweichööne choonecaacä, aashicha määnejoiye yaawä, cancudu aashicha atööajä töweiye naichöje.

²⁷ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno maato äwa tajääde’dato que emangajä nönge. Ye’wä mma aashichaato wa’cä yäänedö; dhaca mmaane cone’da, töcääta jooje, soto de’jomjocoomo ’je mmaja.

²⁸ Mädääje maato änwanno, soto wwäiñe äwäänedööcomo aashichaato wa’cä; odo’tadööcomo mmaane chäänönge’da na, ätö’tajäätödööcomo mmaja nossaje.

²⁹ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno tönnöe määnetääne äwa, Wanaadi wa’deuwödö ecammannamo’jödö ewaadöcoomo. Aashicha’como’jödö eetöcoomo imennaajä a’täi tönnataama määnetääne dea.

³⁰ Edääje töwä’döe määnetääne: “Jenaadä ñaa adaichö jadä ñaa ei’jo mmaane, ani’wa’tä’daiñe eichö ñaa cöneiyacä Wanaadi wa’deuwödö ecammannamo töjaajodööcomo jäcä;” quee töwä’döe määnetääne.

³¹ Mädääje äwä’dödööcomo que mä’ne’ju’jaato Wanaadi wa’deuwödö ecammannamo töja’nnamo’jödö atöödöje aweichöcoomo.

³² Tacoichajoone acoichajootäcä eduuwa adhaadai’choncomo tönnöe cönä’ja’todö.

³³ Äcääyu nönga’como änwanno. ¿Aaquene wa’to nwaca äätädööcomo maneemaichatäädö deeade’ ?

³⁴ Yääje yeijäcä adöiñaiñe wene’jaato’de ya’deddu ecammannamo, töseedujä’na’como mmaja, odhoowanoomannamo mmaja. Dhantai möja’ato’de; dhantai cuduusa jäcä majoijaato’de. Anejjacoomo maiju’jä’ato’de awe’jummato’como taca; yäänejeedööcomo waadäi maje’caato’de, imaaminchadööcomo wetä.

³⁵ Yääje yeijäcä änwanno mätä’maminchajaato’de tameedä aashicha’como töjaajo’jocoomo jo’tadööje, Aweede jonno Saacadía jona tödööene, ñäädä Weedequía nne’jödö. Aweede cönä’jaacä dhanwa aashichaato, conemjönö ännöjöönö. Saacadía mmaja memaatäne dea Wanaadi weichojo taca, saaquidiijiisiyo dötoojo ncadheedä.

³⁶ Chäänönge yääje wä’döa äwwäiñe, tameedä ñanno töjaajo’jocoomo jo’tadööje mätä’maminchajaato’de änwanno soto eduuwa maatoodö.

Jesuuquidiito waamo’jödö Jeduusadén ñancomo junnei

³⁷ “Änwanno Jeduusadén ñancomo, Wanaadi wa’deuwödö ecammannamo töja’nnamo, äwwadäädäiñe anonta’como täju que töwääjä’nnamo; wameedi tönnacoomo tajä’sai o’nä tönnöe naichöje dea öwwadäädä adheenejö’seiñe wääneneedö’je, yääje awei’sheiñe’daane’ änwanno.

³⁸ Eneetäcä’ma anaamädööcomo to’nomja naadö.

³⁹ Änwanno yeene’da maato’de yääje äwä’dödööcomo wa’cä: “Aashichaato mä’dä Cajiichaana eetö joiño we’ajä,” quee äwä’dödööcomo wa’cä; quee cönä’döaacä Jesuuquidiito.