MAADOCO 8 - Wanaadi A'deddu

Aacäichea miide soto ewanshincho’jocoomo

¹ Yääje mma yaawä jooje soto cöne’jummaicho Jesuuquidiito döiña. Tönwanno chääwanshiñööcomo ’je’da cönä’jaacä. Yääje yeijäcä Jesuuquidiito tönoowanoomadö cöna’dejjaicho; cönä’döaacä:

² —Wentumje canno soto wene’maato. Aaduwaawä anooto nä’döi eduuwa jaadä yeichöcoomo; chääwanshiñööcomo ’je’da na.

³ Täwanshinchä’daiñe ijaatacäiñe enno’ja’comjäcä öwwä, ääma taawä a’su’tajai nichö’taato; amoincha’como we’a’como canno dhantai; quee cönä’döaacä Jesuuquidiito.

⁴ Yaawä ñoowanoomadö cönä’döa’to chäwwä: —¿Aaquene mmaja maneewashinchädööto deeade’ sadä, jata ’jemjönö aca mmädä; quee cönä’döa’to.

⁵ Jesuuquidiito cöneecamma’joicho yaawä: —¿Ä’waasa uu nai äwwäiñe? quee cönä’döaacä. Tönwanno cönä’döa’to: —Aacä amoojato i’yaca’jödö; quee.

⁶ Yaawä Jesuuquidiito soto cönaajimaajoicho nono jo. Töwö uu cönannäjöi yaawä, yää aacä amoojato i’yaca’jödö cönä’ja’dö. Chääjäcä töwa’deuwödö’jo cöni’yajäätöi. Tönoowanoomadö wwäiñe cuntui yaawä. Tönwanno cöneecamoicho soto wwäiñe.

⁷ Chäwwäiñe töweiye cönä’ja’dea aacä’cä na’cwacancomo’cä. Ñanno jäcäiñe mmaja Jesuuquidiito cöna’deuwöi chea. Tönoowanoomadö wwäiñe cöneecamoojoi chea yaawä soto waadäiñe.

⁸ Tameedä cönääwashinchoicho yaawä töwensu’tädööcomo wa’cä. Yäädetö’jödö cönancuicho yaawä aacä amoojato wöwa.

⁹ Ñanno töwääwashinchaamo cönä’ja’to aacäichea miide soto. Yaawä Jesuuquidiito soto cönenno’jaicho.

¹⁰ Yää ’jeje cudiiyada aca cönä’täi yaawä tönoowanoomadö jadäiñe; cöntonto yaawä Daamanuuta ña.

Jaadiseeo wwäiñe ene’ju’tojo tödööjo’jödö

¹¹ Yääje mma yaawä jaadiseeo cöneejoto Jesuuquidiito döiña. Cönaajäntoicho yaawä chääjadä töwäätäccujäätödööcomo. Tönwanno oneejadööje mmädä ene’ju’tojo cönnöja’to chäwwä, caju ñanooje yäänejootojooje.

¹² Jesuuquidiito cone’da cönä’döjoi yaawä; cönä’döaacä: —¿Ane’cotoojo canno soto ene’ju’tojo tödööjo’se naicho? Chäänönge yääje wä’döa äwwäiñe, canno neneedöcoomoje ene’ju’tojo ännö’da wa; quee cönä’döaacä Jesuuquidiito.

¹³ Töwö cönnämoicho yaawä; cönä’täi chea cudiiyada aca. Chu’jä mänsemjona cöne’dätäi yaawä.

Jaadiseeo nummannä’cato’como

¹⁴ Jesuuquidiito nowaanomaadö tuduucomo adäädö jäcä cöntö’taqueejöicho. Tooni i’yaca’jödö’cä iiñejöödöcoomo cönä’jaacä cudiiyada aca.

¹⁵ Yaawä Jesuuquidiito cönä’döaacä chäwwäiñe: —Odhoowadäädäiñe eichäcä, äädai’chätääcä jaadiseeo nummannä’cato’como jäcä, Edoodhe nummannä’catoojo jäcä mmaja; quee cönä’döaacä.

¹⁶ Yaawä ñoowanoomadö tönwannoje dea cönä’döa’to: —Töwö mädääje nä’döa cuduucomo ännejö’da cöwei’jocoomo weijäcä; quee.

¹⁷ Jesuuquidiito dhowaanäcä cönä’jaacä ya’deuwödööcomo. Töwö cönä’döaacä chäwwäiñe: —¿Ane’que’nei adha’deuwato tuque’da aweichöcoomo jäcä? ¿Äntö’tammecö’da dea ca maato? ¿Aneeta’da ca maato? ¿Chäänönge’da dea ätö’tajäätödööcomo nai?

¹⁸ Tänuuqueiñe aweichaameiñe ¿aneene’da maato? Töjaanaqueiñe aweichaameiñe mmaja ¿aneeta’da maato? ¿Chö’ta’da ca maato?

¹⁹ Yaawä ijaatoodeaato uu i’yaca’jödö öwwä ecaamoa’jäcä ijaatoodea miide soto wwäiñe, ¿ä’waasa wöwa mamu’täne yaawä yäädetö’jödö? quee cönä’döaacä Jesuuquidiito. Ñoowanoomadö cönä’döa’to: —Amoojadooto de’wä aacä; quee.

²⁰ Yaawä Jesuuquidiito cönä’döaacä: —¿Yaawä ’na, aacä amoojato uu i’yaca’jödö wecaamoneedawä ñanno aacäichea miide soto wwäiñe daja, ä’waasa wöwa mamu’täne yaawä? Tönwanno cönä’döa’to: —Aacä amoojato; quee.

²¹ Yaawä Jesuuquidiito cönä’döaacä chäwwäiñe: —Yääje yeiya’jäcä ¿aaquene äntö’tammecö’da dea maato? quee cönä’döaacä.

Tänuuquemjönö ejiichö’tä’jödö Wesaada ña

²² Yää ’jeje Jesuuquidiito cönä’döicho Wesaada ña. Yaawä chäwwadäädä soto cönnejooto dhanwa tänuuquemjönö. Tönwanno cönaajojooja’to Jesuuquidiito wwä, ejiichö’tädö wetä.

²³ Yaawä dhamäädö jäcä Jesuuquidiito cönaadäi ñäädä tänuuquemjönö jata tö’cäi. Tätaacudu que chäänudu cönaajojoi. Tamäädö cönnöi ye’wä; cöneecamma’joi yaawä: —¿Nääneaanä äwwä? quee.

²⁴ Ñäädä cöneene’maacä yaawä; cönä’döaacä: —Soto wene’maatoodö’je, dee ju’jä nönge mma nääneaato öwwä yäämannäjöödöcoomo; quee cönä’döaacä.

²⁵ Yaawä Jesuuquidiito tamäädö cönnöi chea chäänudu de’wä, ääjato. Yaawääne aashicha ñäädä dhanwa enuudu cöna’döi; tameedä aashicha täne chäwwä cönä’jaacä.

²⁶ Jesuuquidiito cönenno’jai yaawä immai chaca; cönä’döaacä chäwwä: —Jataaca mma mötäi’che; anejja wwä maneecammajäätöi’che mädä; quee cönä’döaacä Jesuuquidiito.

Peedhodo wwä Äwaanacaaneije Jesuuquidiito weichö ecamma’jödö

²⁷ Yää ’jeje Jesuuquidiito tönoowanoomadö jadäiñe cöntonto tameedä Seesadeea Jidiipo ñano jata weichö wa’cä. Yaawä ääma tai töötädaawäiñe Jesuuquidiito cöneecamma’joicho tönoowanoomadö: —¿Änääcöje soto ye’tätä weneeneto? quee cönä’döaacä.

²⁸ Tönwanno cöneccujä’a’to: —Anejjacoomo Juan Wautiitaje adhe’tätä weneeneto; anejjacoomo ’quene Edíaje. Anejjacoomo mmaane Wanaadi wa’deuwödö ecammannamo jimmäje adhe’tätä weneeneto; quee cönä’döa’to Jesuuquidiito wwä.

²⁹ Yaawä töwö cönä’döaacä chäwwäiñe: —¿Änwanno ’na, änääcöje ye’tätä määnetääne? Yaawä Peedhodo cönä’döaacä chäwwä: —Quidiito amäädä, Äwaanacaanei; quee.

³⁰ Yaawä Jesuuquidiito tönoowanoomadö wwäiñe Äwaanacaaneije töweichö aneecammajo’da cöneiyacä anejjacoomo soto wwäiñe.

Jesuuquidiito necamma’jödö töwäämatoojo

³¹ Yaawä Jesuuquidiito cönaajäntäi tönoowanoomadö wwäiñe ecammajäätödö Soto nnedö wäntunaanö’tojo jäcä. Töwö cöneecamma’dea inchoncomo wwä chiiñeme’tojo, Wanaadi wwä töwa’deuwaamo edhaajotoncomo wwäiñe mmaja, judhío owaanomannamo wwä mmaja. Soto nnedö wäämatoojo mmaja cöneecamma’dea, aaduwaawä anoototo ai yaadoncatoojo mmaja.

³² Chäwwäiñe täta mädä cöneecammajäätöi. Yaawä Peedhodo cönaadäi Jesuuquidiito töudäje; cömjiiyemeecöi yaawä.

³³ Jesuuquidiito cönä’jedennacai yaawä tönoowanoomadö wwadäädäiñe. Peedhodo cömjiiyemeecöi yaawä; cönä’döaacä chäwwä: —Ääsecaacä yoowajonno amäädä Caajushawa. Soto tö’tajäätödö nönge mma ätö’tajä’a, Wanaadi tö’tajäätödö nönge’da mma; quee Jesuuquidiito cönä’döaacä Peedhodo wwä.

³⁴ Yaawä Jesuuquidiito cöna’dejjaicho soto, tönoowanoomadö mmaja. Töwö cönä’döaacä chäwwäiñe: —Ñäädä jaadä töwei’shato tötö’tajäätödö woije mma eijai’cha na. Töwö cone’da tödööjai’cha na jääcäinchädä töwäntunamjödö, cuduusa jäcä tajoijodö jadä’jödöödä. Öwö umjummadö woije eijai ña.

³⁵ Ñäädä töweichö ewontänei, töweichö nennanö’ca’de. Ñäädä öwö jääcäinchädä, aashichaato wätunnä jäcäinchädä mmaja, töweichö u’nei mmaane, töweichö neneea’de.

³⁶ ¿Aaquene mmaja aashicha eichö deeade’ tameedä edä nono de’wono chaana’ca’jäcä soto wwä, töweichö ennanö’cataame?

³⁷ ¿Ane’cäämö soto äntuduude’ töweichö ejeetöje?

³⁸ Canno soto masuuduija’como, conemjöncomo antawäiñe öwö Soto nnedö jöichänei yeiya’jäcä, ya’deddu jöichänei mmaja, öwö mmaja wijöicha’dede Jaaja nnataadö ’je we’a’jäcä Jaaja amoodedö aashicha’como jadäiñe; quee cönä’döaacä Jesuuquidiito.