MAADOCO 14 - Wanaadi A'deddu

Jesuuquidiito emaadö a’de’tä’jödö

¹ Aacä anooto mmädä a’que cönä’jaacä yaawä Weja’dätä’jä anootoi’chädö aca yä’dötoojo, yää judhío we’jummato’como cu’nädö. Yää cönä’jaacä uu ummannä’cajootojo ’jemjönö täu’tojo anootoi’chädö. Yaawä Wanaadi wwä töwa’deuwaamo edhaajotoncomo, judhío owaanomannamo mmaja, tacaade’da Jesuuquidiito ajäichö cöna’de’ta’to, emaadö wetä.

² Tönwanno cönä’döa’to: —Tanööcö dö’täiñe mmaane ajäijai’cha caato, soto mma ewoodoicha’noto; que cönä’döa’to.

Juu shimi’jotoojo que Jesuuquidiito töjö’jödö

³ Yääje mma yaawä Jesuuquidiito cönä’jaacä Wetaaniya ña, Simón mmai chaca, ñäädä woi ’jano’jödö. Yaawä yääwashinchädaawä wodi cöneejä jeteiya tajääde’dato dha’me, juu shimi’jotoojo täjeeto dhaca. Yää jeteiya cöni’moi; juu shimi’jotoojo cönaccai yaawä Jesuuquidiito ju’jä de’cäcä.

⁴ Anejjacoomo yäätoncomo cone’da cönä’döjoicho yaawä; tönwannoje dea cönä’döa’to: —¿Ane’cotoojo mädä juu shimi’jotoojo nimaacudäi chea mä’dä?

⁵ Mädä täjeemajomje nä’jaanä juujatonno sotooto ’cäwa’cä jödaata, chääje’jödö utuudu wetä yaawä wentumja’como wwä; quee cönä’döa’to. Tönwanno cone’da cönä’ja’to yaawä ñäädä wodi jäcä.

⁶ Jesuuquidiito cönä’döaacä yaawä: —Na’ñojo. ¿Ane’cotoojo määdhä maquiimaato? Aashichaato dajaane töwö nödöi jääcä.

⁷ Wentumja’como ajaadäiñe naato’de yeichöje. Chääjäcäiñe aashichaato tödö’se aweichöcoomo woije weiñäje tödööjai maato. Öwö mmaane yeichöje’da ajaadäiñe weichojo na.

⁸ Mä’dä wodi nödöi tödööjai töweichö woije. Töwö juu shimi’jotoojo que jöi nono aca yeewaacadö owaajo.

⁹ Chäänönge yääje wä’döa äwwäiñe, tameedä yeichö wa’cä edä nono de’wä aashichaato wätunnä ecammajäätödaawä, määdhä wodi nödö’jödö mmaja necammaato’dede, töwö chääjäcä soto chö’tajä’to’comooje; quee cönä’döaacä Jesuuquidiito.

Jesuuquidiito utuudu ecamma’jödö Juudha wwä

¹⁰ Yääje mma yaawä Juudha Icaadiyoote, ñäädä amoojadooto de’wä aaco’como jimmä, cöntämä Wanaadi wwä töwa’deuwaamo edhaajotoncomo döiñaiñe, chäwwäiñe Jesuuquidiito u’jai töweichö ecamma.

¹¹ Yää eta’jäcä töwwäiñe ta’cwaiñe cönä’ja’to; jödaata cöneecammaicho yaawä Juudha wwä. Yää ’jeje töwö Juudha töntö’tamme’que cönä’jaacä Jesuuquidiito u’tojo.

Awa’deene Santa Seena tödö’jödö

¹² Yaawä cönä’jaacä uu ummannä’cajootojo ’jemjönö täu’tojo waajäntotoojo anooto, yää judhío we’jummato’como cu’nädö. Yää cönä’jaacä Weja’dätä’jä anooto jäcä chö’tajä’to’comooje, oweeja nnedö’cä saaquidiijiisiyooje amiiñä’catoojo cu’nädö. Yaawä Jesuuquidiito nowaanomaadö cöneecamma’joicho: —¿Äsha äwääwashinchotoojo choonecaajo’se manä, ñäädä Weja’dätä’jä anootoi’chädö awoono amiiñä’caajä mänäiye? quee cönä’döa’to.

¹³ Aacä tönoowanoomadö Jesuuquidiito cönaanontoicho yaawä; cönä’döaacä chäwwäiñe: —Jataaca ojoncomo. Yäätä dhanwa mejoodöaato’de tuna dha’me tucuudi aca. Chääjadä ojoncomo’de.

¹⁴ Yää maa chaaca nomonga’dedö edhaajä wwä yääje caichäcä’de: “Yääje Owaanomaanei nä’döaanä: ¿Äsha ä’sa nai noowanoomadö jadäiñe Weja’dätä’jä anootoi’chädö awä wääwashinchotoojo?” quee caichäcä’de chäwwä.

¹⁵ Yaawä töwö necamma’de äwwäiñe ä’sa adai’joto, cawä, töcoonecaajä’e. Yäätä cöwääwashinchoto’como choonecaatäcä’de; quee cönä’döaacä Jesuuquidiito.

¹⁶ Ñoowanoomadö cöntonto yaawä jataaca. Tameedä cöneedantoicho Jesuuquidiito necamma’jödö nönge. Yäätä Weja’dätä’jä anootoi’chädö awoono wääwashinchotoojo cönconeecaicho.

¹⁷ Yaawä cho’monga’jäcä Jesuuquidiito cönä’döi amoojadooto de’wä aaco’como tönoowanoomadö jadäiñe.

¹⁸ Meesa de’wä töwääwashinchädaawäiñe Jesuuquidiito cönä’döaacä: —Chäänönge yääje wä’döa äwwäiñe, tooni adhantawäiñe naadö, jaadä nääwashinchaadö dea, yu’a’de; quee cönä’döaacä Jesuuquidiito tönoowanoomadö wwäiñe.

¹⁹ Tönwanno wentumje cönä’döjoicho yaawä. Töwaadäiñe Jesuuquidiito cöneecamma’ja’to: —¿Öwööjönö ’quene? quee cönä’döa’to.

²⁰ Jesuuquidiito cöneccujä’a’to; cönä’döaacä chäwwäiñe: —Ñäädä na amoojadooto de’wä aaco’como jimmäje, jadaaji aca yaacoodaane tudu ni’jiyaadö.

²¹ Soto nnedö nä’döja’de töjääcä imennaajä naadöje dea. Yaawääne’, wentumje na’de ñäädä Soto nnedö u’nei’jödö. Ennu’da mmaane eijai yei’jödö; quee cönä’döaacä Jesuuquidiito.

²² Yaawä töwääwashinchädaawäiñe Jesuuquidiito uu cönannäjöi. Chääjäcä töwa’deuwö’jeje cöni’yajäätöi. Chäwwäiñe cuntui yaawä; cönä’döaacä: —Edä; täu’täcä. Edä yää yeejö; quee.

²³ Wocö daja cönannäjöi chea yaawä. Chääjäcä töwa’deuwö’jeje chääwaadäiñe cöneecamoi. Tameedä tönwanno cöneenöicho.

²⁴ Yaawä töwö cönä’döaacä chäwwäiñe: —Edä yää yaaquiyö, chäänönge Wanaadi necamma’jödö yeichö ene’ju’tojo, jooja’como soto jäcäinchädäiñe töja’emö.

²⁵ Chäänönge yääje wä’döa äwwäiñe, chääjedöödö eccudu aneenö’da wa’de eduuwa Wanaadi cajiichaanaje yäänejoodawä chääjedöödö eccudu tödööenö enöödö jonaane; quee cönä’döaacä Jesuuquidiito tönoowanoomadö wwäiñe.

Peedhodo wwä töjoome’dotoojo Jesuuquidiito necamma’jödö

²⁶ Yaawä tooniye töweecanta’ñä’jejeiñe tönwanno cöntonto Odiiwo ’jödö ña.

²⁷ Töötädaawäiñe Jesuuquidiito cönä’döaacä tönoowanoomadö wwäiñe: —Tameedä änwanno co’nomjaato’de edä coijaichawä, imennaajä nä’döaadöje: “Oweeja edai’chäneichomo waiju’ja’de; oweeja näämecantaato’de yaawä;” quee imennaajä nä’döa.

²⁸ Yaawä wäämaajo jonno waadonca’jäcä odhoowajoiñe wöta’de Caadideea ña; quee cönä’döaacä Jesuuquidiito chäwwäiñe.

²⁹ Yaawä Peedhodo cönä’döaacä chäwwä: —Tameedä anejjacoomo wwä adhe’nomjataame adhe’nomja’da dea eijai wa öwö.

³⁰ Yaawä Jesuuquidiito cönä’döaacä chäwwä: —Chäänönge yääje wä’döa äwwä, edä coijaichawä dea, aacädeeto wameedi wetöömödö owaajodä, aaduwaawäde cöjoome’da’de; quee cönä’döaacä Jesuuquidiito.

³¹ Jäduuje’cä mma Peedhodo cöna’deuwöi yaawä; cönä’döaacä: —Ajaadä wäämadö jonaane ojoome’däjai’cha wa; quee cönä’döaacä. Mädääje mmaja tameedä ijimmä cönä’döa’to dea.

Jeseemaní ña Jesuuquidiito Wanaadi wwä ya’deuwö’jödö

³² Yaawä tönwanno cöntonto Jeseemaní ña. Iiña töwä’döa’comjäcä Jesuuquidiito cönä’döaacä tönoowanoomadö wwäiñe: —Eetä ataajimaatäcä, mänseedä’cä Wanaadi wwä ya’deutaame; quee.

³³ Töjaadä cönaadäi Peedhodo, Jacoowo mmaja, Juan mmaja. Cone’da cönä’döjoi yaawä; wentumje cönä’jaacä jooje.

³⁴ Töwö cönä’döaacä chäwwäiñe: —Wentumje tö’tajä’a, äämajaicho wa’cä. Eetä cöwoomo’täcä; äädai’chätääcä; quee cönä’döaacä.

³⁵ Mänseedä’cä cöntämä yaawä; tu’dhe cöneemo’täi nono jo. Wanaadi wwä cöna’deuwacä; cöne’ca’acä töjääcä töweeja’dä’emö weja’do’tojo.

³⁶ Töwö cönä’döaacä töwa’deuwödaawä: —Jaaja, tameedä tödööjai ma amäädä. Mädä wäntunaanö’tojo mäiñetuncajoi’che öwwä. Yaawääne’ amäädä ätö’tajäätödö woijeene cödööcä, öwö woije’daane; quee cönä’döaacä.

³⁷ Töwö cönennacai yaawä tönoowanoomadö döiñaiñe; wönö’näje cöneedantoicho. Peedhodo wwä cönä’döaacä: —¿Ännö’canä ca Simón? ¿A’dhe’cä mmädä äädai’chäjai’cha mä’jaanä?

³⁸ Äädai’chätääcä; Wanaadi wwä adha’deutäcä, mä’yunaacajooto’no. Jäduuje awei’she aweichaameiñe, ajuunucoomo mmaane jäduuje’da na; quee cönä’döaacä Jesuuquidiito.

³⁹ Cöntännea yaawä. Wanaadi wwä cöna’deuwöi chea, awa’de cöna’deuwöichöje mmaja.

⁴⁰ Yää ’jeje cönennacai chea yaawä tönoowanoomadö döiñaiñe mmaja. Wönö’näje mmaja cönä’ja’to dea, jooje wetuujeiñe töweijäcäiñe. Chäwwä ya’deuto’como ’je’da cönä’jaacä.

⁴¹ Yääje mma yaawä aaduwaawädeeto ai Jesuuquidiito yöiñaiñe cöneejä dea; cönä’döaacä chäwwäiñe: —¿Wönö’näje deaane ca maato? Na’ñojo eduuwa; chu’nädö aca yä’döaajä mädä eduuwa. Soto nnedö nä’tuja eduuwa conemjönö dönnamo wwäiñe.

⁴² Ääma’tätääcä; cöötätäiye eduuwa. Eneetäcä’ma, yu’nei ne’aadö; quee cönä’döaacä Jesuuquidiito tönoowanoomadö wwäiñe.

Jesuuquidiito ajäi’jödö

⁴³ Yääje Jesuuquidiito wa’deutaame dea Juudha cöneejä yaawä, ñäädä amoojadooto de’wä aaco’como jimmä. Chääjadä cönä’ja’to jooje soto, sauda dha’meiñe, dee dha’meiñe mmaja. Tönwanno cönä’ja’to Wanaadi wwä töwa’deuwaamo edhaajotoncomo nanontädööcomo, judhío owaanomannamo nanontädööcomo mmaja, inchoncomo nanontädööcomo mmaja.

⁴⁴ Edääje cönä’jaacä ñäädä Jesuuquidiito u’nei nene’ju’jo’jödö chäwwäiñe: —Ñäädä wishuuma’dedö, ñäädä ñäädä. Ajäichäcä’de; odhoowadäädäiñe adäätäcä’de yaawä; quee cönä’jaacä Juudha nene’ju’jo’jödö.

⁴⁵ Ñäädä Juudha wä’döa’jäcä, Jesuuquidiito döiña cöntämä; cönä’döaacä: —Owaanomaanei; quee. Cunsummai yaawä.

⁴⁶ Yaawä ñanno soto Jesuuquidiito cönaajoicho; jedeesoje cönaadoicho yaawä.

⁴⁷ Yaawä tooni yäätono tösaudai cunu’cai. Wanaadi wwä töwa’deuwaamo edhaajotoncomo anoonö cömjanaacätäi.

⁴⁸ Yaawä Jesuuquidiito cönä’döaacä soto wwäiñe: —¿Aaquene tämeenato wwadäädä’da mmädä töwaichaqueiñe öwwadäädä me’ato?

⁴⁹ Anooto waadäi ajaadäiñe töweiye wä’jaaquene Wanaadi weichojo taca, soto owaanomaadöcoomoje; yaajäi’cha töweiye mä’ja’quene yaawä. Mädä neja’dä’a jääcä Wanaadi a’deddu imennaajä naadö nönge yeichö wetä; quee cönä’döaacä Jesuuquidiito tajäiñamo wwäiñe.

⁵⁰ Yaawä tameedä ñoowanoomadö cönäänejeicho, e’nomjadööje mma.

Ääjömaanö wääneje’jödö

⁵¹ Tooni ääjömaanö inchäcä cöntaacä, saawana que taiñanque. Töwö cönaatajoijoi ñanno soto wwäiñe.

⁵² Töwö cönaataiñancai yaawä; cönäänejei yaawä töwaayucuiche’da.

Äcamma’jonnamo je’tacaiñe Jesuuquidiito wei’jödö

⁵³ Ñanno Jesuuquidiito ajäiñamo’jödö Jesuuquidiito cönaadoicho yaawä Wanaadi wwä töwa’deuwaamo edhaajotoncomo döiña. Tameedä täneejuca’como cöne’jummaicho yaawä, inchoncomo mmaja, judhío owaanomannamo mmaja.

⁵⁴ Inchäcäiñe Peedhodo cöntaacä amoinche, Wanaadi wwä töwa’deuwaamo edhaajotoncomo ’dodoi aca tödööene. Yäätä töwö cönaatajiimai yaawä suddau jadäiñe, wa’to o’wawä töwääsunuudu wetä.

⁵⁵ Ñanno Wanaadi wwä töwa’deuwaamo edhaajotoncomo, tameedä anejjacoomo äcamma’jonnamo mmaja, jönaawä Jesuuquidiito ementädö cunuujiya’to, emaajodö wetä yaawä; aneedantä’daane cöneiya’to.

⁵⁶ Jooje cönä’ja’todö’je ementännamo; yaawääne’, äänönge’da cöneecammajä’a’to.

⁵⁷ Yaawä anejjacoomo cönammöicho. Tönwanno Jesuuquidiito cönemmenta’to; cönä’döa’to:

⁵⁸ —Edääje määdhä wä’dödö ñaa cöneetaacä: “Edä Wanaadi weichojo, soto namo’jocoomo, wemajja’de. Aaduwaawä anooto anejja wödööa’dede, soto namäädöjöönööne;” quee yä’dödö ñaa cöneetaacä; quee cönä’döa’to ñanno Jesuuquidiito ementännamo.

⁵⁹ Mädääje ya’deutaameiñe äänönge’da dea cönä’jaacä ñeecammajäätödööcomo.

⁶⁰ Yaawä Wanaadi wwä töwa’deuwaamo edhaajotoncomo dhantawäiñe cönammöi. Töwö Jesuuquidiito cöneecamma’joi: —¿Aneccujäätö’da ca manä? ¿Aaqueneeto mädä äjääcä na’deuwaatoodö? quee cönä’döaacä.

⁶¹ Äucwätä’da cönä’jaacä Jesuuquidiito yaawä; aneccujäätö’da cöneiyacä. Yaawä ñäädä Wanaadi wwä töwa’deuwaamo edhaajotoncomo cöneecamma’joi chea: —¿Ñäädä ca amäädä Äwaanacaanei, Wanaadi Aashichaato nnedö? quee cönä’döaacä.

⁶² Jesuuquidiito cönä’döaacä chäwwä: —Ee, ñäädä öwö. Äcuude änwanno meneeato’de Soto nnedö weejödö ca’dutu de’wä, Jäduujato nnäcä yaatajiimaajä, ämu’demjönö dö’se; quee cönä’döaacä Jesuuquidiito.

⁶³ Yaawä Wanaadi wwä töwa’deuwaamo edhaajotoncomo töwoomö cönshiichai; cönä’döaacä: —¿Ane’cäämöne mma määtonno wa’deunä cämjummatäädö deeade’ ?

⁶⁴ ¿Metaato jönca Wanaadi wa’cotooje yäätä’tädö? ¿Aaquene tödööemje nichö’taanä äwwäiñe? quee cönä’döaacä. Tameedä tönwanno tämaamöje Jesuuquidiito cöne’toicho yaawä.

⁶⁵ Yaawä anejjacoomo cönaajäntoicho eta’däjäätödö. Ije’dudu’jo cönaiju’jä’a’to edääje töwä’döancädäiñe: —Adhaiju’nei’jödö ene’ju’cä; quee töwä’döancädäiñe. Ñanno suddau cömjojeeta’mojo’a’to.

Peedhodo wwä Jesuuquidiito jome’dä’jödö

⁶⁶ Yaawä jödoodo nnawä Peedhodo weichö wodi cöneejä yöiña. Ñäädä cönä’jaacä Wanaadi wwä töwa’deuwaamo edhaajotoncomo anoonö.

⁶⁷ Peedhodo wääsunuudu edanta’jäcä töwwä, yäätäädä cöneene’maacä; cönä’döaacä chäwwä: —Amäädä mmaja Jesuuquidiito Naasade ñano jadä mä’jaaquennea; quee cönä’döaacä.

⁶⁸ Yaawä Peedhodo cöneejome’däi; cönä’döaacä: —Yoowanoojönö ñäädä. Aneeta’da wa mädä mecammaadö; quee cönä’döaacä Peedhodo. Yaawä cöneeja’cai jödo’na; mönaatajo cönä’jaacä. Yääje mma yaawä wameedi cöneetömöi.

⁶⁹ Yaawä ñäädä wodi Peedhodo cöneenea’dea. Töwö cönä’döaacä yäätoncomo wwä: —Ijimmotoncomo mmaja määdhä dea; quee cönä’döaacä ñäädä wodi Peedhodo jäcä.

⁷⁰ Yaawä Peedhodo cöneejome’däi chea. Äcuude’cä yäätoncomo soto cönä’döa’to dea Peedhodo wwä: —Chääjadoncomo dajaane amäädä; Caadideea ñano dea amäädä, chäänöngeiñe adha’deddu naane’; quee cönä’döa’to.

⁷¹ Yaawä Peedhodo cönä’döaacä: —Yoowanoojönö ñäädä mecammaatoodö. Wanaadi dhowaanäcä yääje yeichö. Töwö maaminchajai ña wäätäncu’tädö yeiya’jäcä; quee cönä’döaacä.

⁷² Yääje mma yaawä wameedi cöneetömöi chea. Yaawä Peedhodo cöntö’tai töwwä Jesuuquidiito wa’deuwö’jödö jäcä: “Amäädä aaduwaawäde cöjoome’da’de aacädeeto wameedi wetöömödö owaajo;” quee yä’dö’jödö jäcä. Yää jäcä tötö’tajä’a’jäcä cönaamoaacä yaawä.