MAADOCO 13 - Wanaadi A'deddu

Wanaadi weichojo emajjotoojo jäcä Jesuuquidiito necammajäätö’jödö

¹ Yääje mma yaawä Wanaadi weichojo tacanno töweeja’cadaawäiñe Jesuuquidiito nowaanomaadö cönä’döaacä chäwwä: —Owaanomaanei, eneecä’ma mädä täju adai’jä naadö. Mädä wa’cä iiñataaje nai mädä Wanaadi weichojo amääajä; quee cönä’döaacä.

² Jesuuquidiito cönä’döaacä chäwwä: —Edä täju mene’maadö tooni’chä äädetö’da na’de töweichacoono de’wäädä. Tameedä tämajjojoomöje na; quee cönä’döaacä Jesuuquidiito.

Anooto wataamedö cu’nädö ene’ju’tojo

³ Yaawä Odiiwo ’jödö ña cöntonto, yää Wanaadi weichojo je’taca naichö. Yäätä Jesuuquidiito wataajima’jäcä, töjääcäjeeneiñe töweichawäiñe ñoowanoomadö cöneecamma’joicho, ñanno Peedhodo, Jacoowo mmaja, Juan mmaja, Antedé mmaja. Tönwanno cönä’döa’to:

⁴ —Ñaa wwä ecammajä’cä. ¿Ächännauwä’cä yää nai’che? ¿Ane’cäämö nai’che tameedä mädä mecammaichö weja’do’tojo cu’nädö ene’ju’tojooje?

⁵ Jesuuquidiito cöneccujä’a’to; cönä’döaacä: —Odhoowoinchadäiñe’da eichäcä, anejja wwä mätäncu’tojooto’no.

⁶ Jooje soto naato’de öwö yeetö joi töwäätä’tancädäiñe, “Äwaanacaanei öwö;” quee töwä’döancädäiñe. Jooje soto nätäncu’täjaato’de chäwwäiñe.

⁷ “Yaawä wänä wäätadö eta’jäcä äwwäiñe, wänä ecaadö mmaja, määcatoncatäi’che. Mädääje yeeja’do’tojo na, wataametoojojöönö mma yeichaame.

⁸ Yaawä sotoocomo newäänä’taato’de, acu’shänääcomo mmaja. Nono wätu’medö na’de aneetaja’cäcäiñene’jödöödä. Ämi mmaja na’dede, watansu’dänä mmaja. Mädoocomo na’de yeetunu waajäntädö mma.

⁹ “Odhoowoinchadäiñe’da eichäcä’de änwanno. Yaawä soto ayu’ato’de äcamma’jonnamo wwäiñe. Töwe’jummato’como taca adhaiju’jä’ato’de. Sootoije aweichöcoomo jo’tädööje acu’shänä wwadäädä adhaadäaato’de, cajiichaanacoomo wwadäädä mmaja. Yää na’de äwwäiñe ya’deddu ecammajo’tojo ñeetadööcomooje.

¹⁰ Wataamenä owaajodä aashichaato wätunnä nätääcammajä’a’de tameedä sotoocomo wwäiñe.

¹¹ Yaawä äcamma’jonnamo wwäiñe ayuutuduucomo wetä adhaadäa’comjäcä awa’deuto’como jäcä mäntö’tamme’jä’täi’che. Täncanoode’da mmaane eichäcä’de. Epíiditu Santo nutuudu woije ecammajä’täcä’de yaawä. Änwannojöönööne adha’deuwaato’de, Epíiditu Santoone.

¹² Yaawä anejjacoomo soto tacontoncomo nu’aato’de emaajodö wetä. Yuumötoncomo mmaja tönnacontoncomo nu’aato’dede. Mudeeshi tumöötoncomo nichu’de’taato’de, senöötoncomo mmaja, emaadö jona tödööene.

¹³ Tameedä soto aquiiñeme’cato’de sootoije aweichöcoomo jo’tädööje. Yaawä ñäädä yaatameedö jonaane shinchänei nääwanaaca’de.

¹⁴ “Ñäädä Dañeede, Wanaadi wa’deuwödö ecammanei’jödö, cöneecammajäätöi ñäädä cone’manei tönoiñato jäcä. Ñäädä tönoiñato meneeato’de yaawä yeicho’jönö tawä yaanöngajä. A’de’tänei nichö’tammecö’ñojo. Yaawä Judheea ñancomo nääneje’ña’to’de jöö de’cäi.

¹⁵ Ñäädä tömmai ye’wono, tömmai chaca omoomöi’che töwä’ta’jäcä, ane’cä’cä ija’cadö wetä.

¹⁶ Ñäädä audaajä acaano töwoomö wetä mma ennacai’chede.

¹⁷ Wentumje naato’de yaawä ñanno töwensu’da’como, ñanno tänwasa’como mmaja.

¹⁸ Wanaadi wwä adha’deutäcä cämöi awä’da määnejeetäiye’de.

¹⁹ Yää wa’coto wäntunaanö’nä a’que na Wanaadi wwä edä nono tödö’jödö jonnoto’jödöödä; eduuwa naadö jonno mmaja a’que na’dede.

²⁰ Yää wäntunaanö’nä Wanaadi aneedennanö’jo’da yeiya’jäcä tameedä soto nataameaato’de. Töwö Wanaadi nedennanö’ja’de tösootoi jäcäinchädäiñe, ñanno tönei’jödö jäcäinchädäiñe.

²¹ “Yaawä edääje äwwäiñe soto wä’döa’jäcä: “Eneetäcä’ma, määdhä ñäädä Äwaanacaanei;” ca’jäcä, “Mäntä nai;” quee jeiñe mma maneecanö’täi’che;

²² joojeene yeiya’como äwaanacaaneija’como wätä’tädö, jooje mmaja Wanaadi wa’deuwödö ecammannamooja’como wätä’tädö. Tönwanno ene’ju’tojo nödööaato’de, täneemö mmaja, Wanaadi sotoi jadä’jödöödä encu’täto’comoojato’jödö.

²³ Odhoowoinchadäiñe’da eichäcä’de änwanno; tameedä äwwäiñe wecammajäätöi dhowaajodä.

Soto nnedö we’tojo

²⁴ “Yaawä yää wäntunaanö’nä ’jeje shii nichööjänga’de; nuunä änweijo’da na’dede.

²⁵ Shidiichä nä’meaato’de caju ñanno. Tameedä caju ña naadö nätu’mea’de.

²⁶ Yaawä Soto nnedö neneeaato’de ca’dutu de’wä yeejödö, jäduuje, tawaanato töjääcä.

²⁷ Töwö tamoodedö nanontaato’de yaawä tönei’jödö i’jummaiñe, tameedä yeichö wa’cä edä nono de’wä, caju o’wadö jona tödööene.

²⁸ “Etaatäcä eduuwa waju’nä dö’seeno neecammajäätödö. Yaade’jutaadö waajänta’jäcä, yaadetaadö mmaja, odhoowanääcäiñe yaawä wedu amoinche’da yeichö.

²⁹ Mädääje mmaja änwanno, yää wecammaichö eneea’jäcä äwwäiñe, chö’tamme’täcä’de Soto nnedö we’tojo amoinche’da yeichö.

³⁰ Chäänönge yääje wä’döa äwwäiñe, tameedä mädä neja’dä’a’de canno soto eduuwa naatoodö ä’jajo’dadooto.

³¹ Caju mmaja, nono mmaja, nataamea’de; öwö ya’deddu mmaane ataamejai’cha na.

³² “Yaawääne’, yää anooto owaanäcä’da na, chu’nädö owaanäcä’da mmaja. Wanaadi amoodedö caju ñancomo dhowaanäcäiñe’da mmaja. Wanaadi nnedö jadä’jödöödä dhowaanäcä’da na. Yuumö mmaane dhowaanäcä.

³³ “Yääje yeijäcä odhoowoinchadäiñe’da eichäcä; äädai’chätääcä; Wanaadi wwä adha’deutäcä, odhoowanääcäiñe’da yeijäcä yää cu’nädö.

³⁴ Dhanwa aneiñaja töötäämö töweiye naichö naane’. Töötääje tömmai necamma tösootoi wwäiñe; chääwaadäiñe chaadawaajuichomo necamma dea. Mönaatata edai’chänei wwä nedai’chaja.

³⁵ Mädääje mmaja änwanno äädai’chäjai maato, odhoowanääcäiñe’da yeijäcä maa edhaajä we’tojo. Cho’momöödawä töwö e’jai ña, yo’tawääne jeiñe mma, wameedi wetöömödaawä jeiñe mma, tööjanaacadä jeiñe mma.

³⁶ Äädai’chätääcä, jadheedä ye’a’jäcä wönö’näje mma moojodööjoto’no.

³⁷ Mädä äwwäiñe wecammaadö tameedä soto wwäiñe wecamma dea, äädai’chätääcä; quee cönä’döaacä Jesuuquidiito.