JIDIIPENSE 4 - Wanaadi A'deddu

Quidiito nutuudu que ta’cwaiñe eijai cöweichöcoomo

¹ Änwanno jimmä umjummadö, adheene’seiñe wa jooje. Änwanno ya’cwaniiyöje maato, yeeje’jödööje mmaja. Jäduuje eichäcä Cajiichaana nutuudu que, änwanno umjummadö.

² Edääje wä’dö’se wa Ewoodia wwä, Síntique wwä mmaja: Äänöngeene ätö’tajä’täcä, quedeiyente weichö nöngeene.

³ Äwwä mmaja yääje wä’döa dea, amäädä weetadaawa’cajoodö weichacoono chäänöngato: I’wa’täcooto ñanno wodiiñamo, we’toichodö. Tönwanno ö’wa’täneeto aashichaato wätunnä ecammajäätödö jäcä. Quedeemente mmaja i’wa’täcä’dede, anejjacoomo ö’wa’tännamo’jödö mmaja, chäätöcoomo naadö weichojo jajeedai’chädö jäcä.

⁴ Cajiichaana nutuudu que ta’cwaiñe eichäcä yeichöje. Yääje mmaja wä’döa dea, ta’cwaiñe eichäcä.

⁵ Ta’cwaiñe aweichöcoomo äänejootäcä tameedä soto wwäiñe. Amoinche’da Cajiichaana na.

⁶ Ane’cä’cä jäcäinchädä mma maaquiñu’tätäi; töwa’deuwe mmaane adha’deutäcä Wanaadi wwä, tameedä ännödööcomo jäcä. Ämjummadööcomo ane’ca’täcä chäwwä, aashicha awa’deuwancädäiñe chäwwä.

⁷ Yaawä Wanaadi nu’a’de äwwäiñe täncanoode’da aweicho’como, yää soto owaanojöönö. Yää täncanoode’da aweicho’como adheewanööcomo nedai’cha’de, ätö’tajäätödööcomo mmaja, Jesuuquidiito woije.

Aashicha chö’tajä’jai cöweichöcoomo

⁸ Jimmä, edääje wä’cadööje wä’dö’se wa äwwäiñe: Tameedä sa’donnato jäcä ätö’tajä’täcä, tameedä tujummamjato jäcä mmaja, tameedä chäänöngato jäcä mmaja, tameedä nossajemjönö jäcä mmaja, tameedä aashichaato jäcä mmaja, tameedä töwa’deme’quemjato jäcä mmaja. Aashichaato töweiye yeiya’jäcä, aashicha wa’de’to’mato töweiye yeiya’jäcä mmaja, yää jäcääne ätö’tajä’täcä.

⁹ Yää tödöötäcä’de änwanno, monoowanoomatäänedö, äwwäiñe mödöötäneedö mmaja, metaatäneedö mmaja, tödöödöje cäneea’quennö. Yaawä Wanaadi ajaadäiñe na’de, ñäädä täncanoode’da weiñä edhaajä.

Quedeiyente wwäiñe Paudo i’wa’tä’jödö

¹⁰ Eduuwa jooje ta’cwaiñe wa jääcä deja mmaja ätö’tajäätödööcomo weijäcä. Jääcä tötö’ta dea awei’jocoomo weichaame, yaawäne’ yöödötoojo ’je’daane cönä’jaacä äwwäiñe.

¹¹ Ane’cä’cä öwwä tujunne yeiyancädä’da yääje wä’döa äwwäiñe. Öwö töwäämu’ca wa öwwä naadö mma joona.

¹² Yoowanääcä na wäntunaanö’nä; yoowanääcä mmaja jooje töwwä yeichawä weiña. Tameedä weiñä yoowanääcä na, töwensu’de weiñä, ämiije weiñä mmaja, jooje töwwä töweiye weiñä, a’que töwwä töweiye weiñä mmaja.

¹³ Tameedä tödööjai wa ñäädä jäädu’tänei Quidiito ni’wa’tädö que.

¹⁴ Yääje yeichaame aashichaato öwö jääcä mödöötäne yää wäntunamjödö jäcä cö’wa’tätäänedö que.

¹⁵ Odhoowanääcäiñe na änwanno Jidiipo ñancomo, Maasedooniya ñanno wääma’tädaawä, aashichaato wätunnä ecammajäätödö waajäntädaawä, anejjacoomo quedeiyentecoomo ö’wa’tä’da yei’jocoomo. Änwanno mmaane cö’wa’tätääne Wanaadi nödöödö jäcä öwwä ä’wa’to’jocoomo emeetacaamadööje.

¹⁶ Teesadoonica ña weichö mmaja änwanno jödaata madoojotääne öwwadäädä, tooniye mma’da.

¹⁷ Jödaata äntuiyeto eduuwa öwwä, quee öucwadööje’da yääje wä’döa, ännö’jocoomo eje’jödö ’je yei’she weijäcääne.

¹⁸ Chääwa’cä öwwä na yää änne’jo’jocoomo, ye’jodhe deja. Tameedä öwwä tujunnato töweiye na Epaujodiito wwä mene’jotäänedö que. Yää na juu shimi’jotoojo yau’cwaajä jodö töweiye naichö wa’cä, caado, saaquidiijiisiyo Wanaadi wacöötö töweiye naichöje mmaja.

¹⁹ Öwö Waanadiiyö Jesuuquidiito ai nu’a’de tameedä äwwäiñe a’cato, caju ña tönsomaadö aashichaato naadö ’cäwa’cä mmaja.

²⁰ Cumöötoncomo Wanaadi aashicha wa’deutojooje na yeichöödäje. Amén.

Yä’ca’jödö

²¹ Jesuuquidiito eetö joi ya’deujödö ecammatääcä’de tameedä yäätoncomo Wanaadi sotoi wwäiñe. Quedeiyentecoomo öwö jaadä naatoodö ta’deujocoomo äwwadäädäiñe nadääjaato.

²² Tameedä eetoncomo Wanaadi sotoi, acu’shäna mmai chacancomo mmaja, ta’deujocoomo nadääjaato dea äwwadäädäiñe.

²³ Cädhaajotoncomo Jesuuquidiito nutuudu aashichaato äwwäiñe yei’she wa. Amén.