EUJEESIYO 1 - Wanaadi A'deddu

Yaajäntä’jödö

¹ Öwö Paudo, Wanaadi woije Jesuuquidiito nanontädö, äwwadäädäiñe wimenna, änwanno Wanaadi sotoi Eujeeso ñancomo, Jesuuquidiito ecaanö’nnamo.

² Aashichaato, täncanoode’da aweicho’como mmaja, äwwäiñe yei’she wa, Cumöötoncomo Wanaadi nutuudu, Cajiichaana Jesuuquidiito nutuudu mmaja.

Quidiito nutuudu aashichaato

³ Aashicha wa’deutojooje na Cädhaajotoncomo Jesuuquidiito Wanaadiyö, ñäädä Yuumö. Töwö Wanaadi Quidiito jadä cöweichomjäcä tameedä aashichaato caju ñano cöwwäiñe cuntui.

⁴ Quidiito jäcäinchädä mmaja Wanaadi cä’tätääne edä nono wamoodetaadö owaajodä, tösooma chämjataawä cöweichöcoomo wetä, conemjönö ’je’da cöweichöcoomo wetä mmaja.

⁵ Cujummatäiñe töweijäcä jenaadä töwö Wanaadi Jesuuquidiito jäcäinchädä tönnacoomoje töweiyaamoje cä’tätääne; yääje cödööto’como töwö cöntö’tammecöi tumjummadö woije.

⁶ Yääje yeijäcä aashicha ca’deuto’ñojo Wanaadi jäcä, joojato iiñödö’jödö jäcäinchädä; yää aashichaato cöjääcäiñe Wanaadi cönnöi Tönnedö tumjummadö jadä cöweichomjäcä.

⁷ Aashicha Wanaadi weichö woije Iiñedö cäwaanacaatäne töwäämadö que, cöcoone’nadiiyöcoomo encwanno’jodö’jo.

⁸ Töwö Wanaadi cöwwäiñe cöneenejoi aashicha töweichö; ewontancädä’da cösejjedööcomo cuntui, towaanojo’ne cöweicho’como mmaja.

⁹ Töwö cöwwäiñe cöneenejoi chea töwwä töntö’tammecö’jödö tödöötojo, yää owaanojöönö’jödö, tumjummadö woije cöntö’tammecöichö.

¹⁰ Edääje na yää inchö’tammecöödö: Chu’nä’taajä aca yä’döa’jäcä töwö Wanaadi tameedä nejoodöjaato’de, caju ña naatoodö, nono de’wä naatoodö mmaja, Quidiito iju’jocoomoje.

¹¹ Quidiito jadä cöweichomjäcä jenaadä töwö Wanaadi cä’tätääne yää cöwwäiñe tuntudu eiñamooje. Tameedä mädä na Wanaadi nijummadö woije; töwö tameedä tönnöe weneene töntö’tammecöödö woije.

¹² Töwö mädääje cödöötäne aashicha töweichö jäcä töwa’deuwaamoje cöweichöcoomo wetä. Awa’deene ñaa dea Quidiito ñaa cöneecamjöi.

¹³ Yaawä äcuude änwanno mmaja chäänöngato wätunnä metaatäne dea, yää aashichaato wätunnä eduuwa äwääwanaacato’comooje naadö. Yää etaadö’jo Quidiito mecaanö’täne, chääjadoonoje mä’dötääne dea. Yaawä Wanaadi sotoije aweichöcoomo adheene’ju’to’comooje Epíiditu Santo que mä’madaaca’ñojootäne, ñäädä Wanaadi necamma’jödö.

¹⁴ Ñäädä Epíiditu Santo na cöwwäiñe utuudu töweiyemö waajäntädööje; yää cöwwäiñe nä’tua’de tameedä tösootoi ewaanacaadöcoomo jäcä Wanaadi wä’ca’jäcä. Yääje yeijäcä mädä jäcäinchädä aashicha Wanaadi weichö ya’deme’jai caato.

Tosejjeque yeicho’como Wanaadi wwä Paudo ne’catä’jödö

¹⁵ Yääje yeijäcä, Cajiichaana Jesuuquidiito töneecanö’e aweichöcoomo öwwä eta’jödö jonnoto’jödöödä, tameedä Wanaadi sotoi tumjumma aweichöcoomo eta’jödö jonnoto’jödöödä mmaja,

¹⁶ äjääcäinchädäiñe aashicha Wanaadi wwä wa’deuwödö ane’nomja’da wa, chäwwä äjääcäiñe wa’deuwödö waadäi.

¹⁷ Wanaadi nödöödö jäcä asejjetaato’como töne’ca’e wäänene Cädhaajotoncomo Jesuuquidiito wwä. Tameedä Wanaadi nödöödö tö’tamme’tojo töne’ca’e wäänene dea; yaawä aashicha’cä jeene Wanaadi odhoowanääcäiñe eijai ña.

¹⁸ Wanaadi wwä ätö’tajäätödööcomo weijotoojo töne’ca’e wäänene dea, odhoowanääcäiñe yeichö wetä yaawä onwomoocödööcomo, yää äwwäiñe yeichö wetä adha’dejjatäänedö. Töne’ca’e wäänene dea odhoowanääcäiñe yeichojo joojato aashichaato Wanaadi nutuudu tösootoi wwäiñe.

¹⁹ Odhoowanääcäiñe mmaja yei’she wa dea töwö ijäädudu chääwa’coto ’jemjönö, yää cönwanno ecaanö’nnamo jäcäiñe weneenedö. Töwö Wanaadi töjäädudu cöneenejoi, jäduuje töweichö mmaja,

²⁰ töwäämaajo jonno Quidiito adoncadö que, töjääcä ämu’demjönö dö’se caju ña ajiimajoodö que mmaja.

²¹ Töwö Wanaadi Quidiito cönnöi tameedä jäduuja’como e’jodhe, cajiichaanacoomo e’jodhe mmaja, o’jodha’como e’jodhe mmaja, acu’shänääcomo e’jodhe mmaja, tameedä anejjacoomo soto e’jodheiñe mmaja, eduuwa weiñä naadawä mma’da, äcuude weiñä na’dedö awä mmajaane.

²² Töwö Wanaadi Quidiito cönnöi chea tameedä Cajiichaanaje, tameedä quedeiyentecoomo ju’jäje mmaja.

²³ Ñanno quedeiyentecoomo Quidiito ejööje naato; tönwanno naato Quidiito weichö ’je, ñäädä tameedä yeichö wa’cä naadö.