EEWEDEO 6 - Wanaadi A'deddu

¹ Yääje yeijäcä tooniye quiija’dä’täiye yää awa’deene Quidiito jäcä woowanoomanä; sö’jato jona tödööene cöötätäiye. Awa’deene woowanooma’jä jona mmaja ennaca’da queichäiye, yää weicho’jönö weiñä jonno tötö’tajäätödö sha’duminchadö jäcä ecammajäätödö, Wanaadi ecamjödö jäcä ecammajäätödö mmaja,

² wautisaaje wä’döjoonä jäcä mmaja, quedeiyente de’wä tamäädö tödöödö jäcä mmaja, yä’ja’a’como waadoncato’como jäcä mmaja, yeichöödoto wätä’maminchajootojo jäcä ecammajäätödö mmaja.

³ Chäänöngato tojoodöeene cöötaato, Wanaadi yääje yei’she yeiya’jäcä.

⁴ Chaanongato que soto wä’weijäja’jäcä, Wanaadi nutuudu oneeja’jäcä mmaja chäwwä, Epíiditu Santo ’je yä’döa’jäcä mmaja,

⁵ aashicha Wanaadi a’deddu yeichö oneeja’jäcä mmaja, weiñä na’dedö jäduudu oneeja’jäcä mmaja,

⁶ yäätonno shaadijanga’jäcä, chö’tajäätödö sha’duminchajoojai’cha caato yaawä chäwwä, awa’deene cönsa’duminchaichöje mmaja, dhai mmaja Wanaadi nnedö cuduusa jäcä ajoijaajä töwwä, töquimmajä’e mma Jesuuquidiito wääma’jödö chimmajä’ajä mmaja.

⁷ Yääja’como naato nono töweiye naichöje täcammajä’aamoje. Yää nono conoojo tunsuuma weneene, töde’wä yiiñadö waadäi. Yaawä natö töna’tanö’jo nono weiya’jäcä, Wanaadi dö’sennoto aashichaato chääjäcä töweiye na.

⁸ Dha’da ’quene wesooca mma nono wwä a’tanö’ja’jäcä, wääjucu mmaja, Wanaadi wacö’je’da na yaawä; tuccaamöje mma na yaawä.

Cöwo’womoocödööcomo ejääduqueejö’da cödöötäiñe yeichö

⁹ Yääje ñaa nä’döaadö’je äwwäiñe, änwanno jimmä umjummadö, yaawääne’ yääje’daane ätö’taato; yääwanaaca’como weichö nöngeene ätö’taato.

¹⁰ Chäänöngato ñäädä Wanaadi; ataadawaajuichomo’jödö aneenejäätö’da’da töwö na. Äwwäiñe tujummadö jäcäinchädä quedeiyentecoomo ’wa’to’jocoomo mmaja aneenejäätö’da’da na dea töwö, mädä tönnöe määnetäänedö.

¹¹ Mädääje dea tameedä aweichonse ñaa na, yaatameedö jonaane, chäänönge äwwäiñe yä’dödö wa’cä yää onwomoocödööcomooje naadö.

¹² Töquiiñe aweichonse’da ñaa na. Ñanno wei’yejeiñeene aweichonse ñaa na, ecamjödö que mmaja, aaquiñu’tä’da töweichöcoomo que mmaja Wanaadi necamma’jödö ejoodönnamo wei’yejeiñeene.

¹³ Aawadán wwä aashichaato ecammadaawä Wanaadi wwä, to’jodhaato ’je’da yeijäcä choojoi tacammaamö, töwö Wanaadi töjoi cheä cönääcammaacä.

¹⁴ Edääje Wanaadi cönä’döaacä Aawadán wwä: “Wödööa’de jaiñoone aashichaato äjääcä; adhaatödö wejannä’caato’de;” quee cönä’döaacä.

¹⁵ Yaawä aaquiñu’tä’da yoomocö’jödö weijäcä Aawadán wwä, töwö cöneeneaacä töwwä Wanaadi necamma’jödö.

¹⁶ Soto wääcammadö töweiye nai to’jodhaato joi. Töwa’deujätöödawäiñe to’jodha’como töne’tä weneeneto, ta’deddu ecamjödö wetä töweichacoono wwä.

¹⁷ Yääje yeijäcä Wanaadi chäänönge cönääcammai yaawä, töneecamma’jödö enennamo wwäiñe eneejodö wetä tötö’tajäätödö yäätonno eseecajai’cha töweichö.

¹⁸ Mädääje na; aacä enwacaamajaichojöönö töweiye na, yää Wanaadi necamma’jödö, töjoi yääcamma’jödö mmaja. Yääje töwääcamma’jödö weijäcä Wanaadi ätäncu’täjai’cha na. Yääje yeijäcä cönwanno, Wanaadi wwä yoowontäja’como, yää jäcä ä’wadi’ñäjai caato, chäänönge ecaanö’jai caato dea cöwo’womoocödööcomo, yää cöwwäiñe u’ajä naadö.

¹⁹ Yää cöwo’womoocödööcomo yäätäädä cötö’tajäätödööcomo nödööa, cudiiyada ’wadöötö a’täi töweiye naichöje. Yää shö’maajä na täije, caju ñano nejoonö ncadheedä.

²⁰ Iiña Jesuuquidiito womongajä na, cäämadööcomo a’ducaaneije. Mädääje soto jäcäinchädäiñe Wanaadi wwä töwa’deuwemööje töwö cönä’döi, yeichöödäje töweiyemööje, Mequiisedeeque cönä’ja’döje mmaja.