EEWEDEO 13 - Wanaadi A'deddu

Wanaadi wacöötö tödöödö

¹ Äwä’jummadööcomo mane’nomjatäi’che, quedeiyentecoomo töweiye naichodööje deaane.

² Adhe’sacaiñe aneewa’tojo’da’da eichäcä aneiñajancomo we’a’como, aneewashinchäiñe’da’da mmaja. Mädääje anejjacoomo soto aashichaato cönnöicho amoode jäcäiñe, Wanaadi amoodedööje yeichöcoomo towaanäcäiñe’da yeichaame.

³ I’wa’tätääcä ñanno jedeesoja’como, amäädä chääjadäiñe jedeesoje eijai maadö wa’cä deaane. I’wa’tätääcäde ñanno töwäätä’maminchajo weneenetoodö, änwanno ätä’maminchajoojai mmaja aweichöcoomo chö’tamme’cancädä.

⁴ Tönoiñe jötaanä tödöötäcä. Masuuduije’da tö’dha’como nei’ña’to, töiñoca’como mmaja. Ñanno masuuduija’como nätä’maminchajaato’de Wanaadi wwä.

⁵ Jödaata jäcä äätätäädä’da eichäcä; äwwäiñe naadö mmaane ojoonaiñe nei’ñojo. Edääje Wanaadi wä’dö’jödö na: “Asancwa’da wa’de weichöje; adhe’nomja’da mmaja wa’dede;” quee.

⁶ Yääje yeijäcä Wanaadi ecaanö’ancädä edääje ä’döjai caato: Cajiichaana ö’wa’täneije na; tösaade eijai’cha wa. ¿Aaquene soto yöödödööto deeade’? quee ä’döjai caato.

⁷ Adhe’se’tännamo’jödö ijummatääcä, ñanno äwwäiñe Wanaadi a’deddu cöneecammajäätöichodö. Iiñö’jocoomo jäcä ätö’tatääcä; ñeecamjödööcomo nönge mmaja ecaanö’täcä änwanno.

⁸ Jesuuquidiito chäänöngeedä weneene; jenaadä cönä’ja’döje dea na eduuwa, yeichöödäje.

⁹ Anejja wätunnä que, chäänöngemjönö que mmaja mä’sadiijannä’cajootäi’che. Wanaadi nutuudu aashichaato queene cötö’tajäätödööcomo ijä’du’täjai caato, äwanshi amoi’chädö que’daane. Yää tödöödö que chäänönge ä’dö’da weneeneto ñanno tödönnamo.

¹⁰ Cönwanno quedeiyentecoomo wwä anejjejaato saaquidiijiisiyo tödöödö töweiye na. Cönwanno cönnödööcomo tänääjai’cha naato ñanno Wanaadi wwä töwa’deuwaamo jenaado’jä Wanaadi weichojo tacancomo wetaadawa’cajoodö.

¹¹ Wanaadi wwä töwa’deuwaamo edhaajotoncomo odoocoja’como aquiiyö tönaadä weneeneto Aashichaato Jaiñoone taca, saaquidiijiisiyo tödööemööje, conemjönö choccajootojooje. Odoocoja’como junu mmaane töiñau’cwa weneeneto jata tö’cäi.

¹² Mädääje mmaja Jesuuquidiito cönäämai, jata tö’cäi, soto coneecadööcomo wetä taquiiyöque.

¹³ Yääje yeijäcä Jesuuquidiito wwadäädä cöötätäiye cönwanno, jata tö’cäi; töshinchääne quiishinchätäiye Jesuuquidiito jo’tädööje cöquiiñemeecödööcomo.

¹⁴ Eetä cöjaatadööcomo yeichöödäje töweiyemö ’je’da na; ne’a’dedööne cöjaatadööcomooje quiiyomo’caato.

¹⁵ Yääje yeijäcä yeichöödäje Wanaadi quiiya’deme’täiye Jesuuquidiito eetö joi. Mädääjatoone saaquidiijiisiyo tödööjai caato cönwanno, yää aashicha Wanaadi jäcä cöwa’deuwödööcomo.

¹⁶ Aashichaato tödöödöje dea eichäcä; äwwäiñe naadö que anejjacoomo i’wa’tätääcä. Mädääjato saaquidiijiisiyo Wanaadi wacö’je na.

¹⁷ Adhe’se’tännamo waanontädööcomo tödöötäcä; yoijeiñe eichäcä, aweichöcoomo edai’chännamooje yeichomjäcä. Äcuude tönwanno Wanaadi wwä nätääcamma’jajaato’de adheedai’cho’jocoomo jäcä. Aashicha eichäcä, ta’cwaiñe tötaadawaajuichomo tödöiyeto, taquiiñuque’daane. Äwwäiñe aquiñu’taja’jäcä aashicha aweicho’como ’je’da eijai ña.

¹⁸ Wanaadi wwä adha’deutäcä ñaa joi; ñaa owaanäcä na chäänönge tötö’tajäätödö weichö. Chäänönge töwei’she ñaa weneene tameedä töweichö jäcä.

¹⁹ Jooje Wanaadi wwä öwö jääcä awa’deuwö’seiñe wa, eduuwaiche mma adöiñaiñe wennacaatojo jäcä.

Yä’ca’jödö

²⁰ Wanaadi ñäädä täncanoode’da weiñä edhaajä, yäämaajo jonno Cädhaajotoncomo Jesuuquidiito adoncanei’jödö mmaja. Jesuuquidiito ñäädä Cädai’chäneichomo jäduujato, oweeja edai’chäneichomo töweiye naichöjaato. Töwö Jesuuquidiito taquiiyö que chäänönge cönnöi eduuwaato weiñä ecammaajä, yää yeichöödotooje naadö.

²¹ Töwö Wanaadi chäänönge ayöödöaato, aashicha ayöödöaato dea tameedä aweichöcoomo jäcä, tumjummadö woije tödönnamooje aweichöcoomo wetä yaawä. Töwö Wanaadi Jesuuquidiito ni’wa’tädö que cödööato tumjummadö woije. Ñäädä Jesuuquidiito aashicha wa’deuto’me na yeichöödäje. Amén.

²² Änwanno jimmä, aashichaane etaatäcä edä äwäätuujadööcomo öwwä; tawe’daasa mma wimennäi äwwadäädäiñe.

²³ Edääje wä’dö’se wa äwwäiñe: Cöjimmotoncomo Tiimoteo tu’ca na eduuwa jedeesoje yeichö jonno. Eduuwa mma sadä yä’döa’jäcä a’nädä ñaa nöta’de adöiñaiñe.

²⁴ Ya’deujödö ecammatääcä tameedä adhe’se’tännamo wwäiñe, tameedä anejjacoomo quedeiyente wwäiñe mmaja. Itaadiya ñancomo ta’deujocoomo nadääjaato äwwadäädäiñe.

²⁵ Wanaadi nutuudu aashichaato äwwäiñe yei’she wa. Amén.