DUUCA 7 - Wanaadi A'deddu

Suddau edhaajotoncomo anoonö adonca’jödö

¹ Yää ’jeje, soto netaadöcomooje töwa’deuwödö töwä’ca’jäcä, Jesuuquidiito cöntämä Cajeedamu ña.

² Yäätä cönä’jaacä suddau edhaajotoncomo, domaano töwö. Töwö dhanoonö cädäije cönä’jaacä, wäämanääje. Imjummadö ñäädä cönä’jaacä.

³ Jesuuquidiito ecaadö eta’jäcä ñäädä suddau edhaajotoncomo wwä, töwö cönaanontoicho inchoncomo, ñanno judhío edhaajotoncomo, Jesuuquidiito a’dejja, tanoonö adoncajoodö wetä chäwwä.

⁴ Jesuuquidiito döiña töwä’döa’comjäcä, ñanno inchoncomo cöna’deuwa’to chäwwä, cönä’döa’to: —Ñaa anontänei’jödö nijummadö woije tödööjai ma, aashichaato töwö yeijäcä.

⁵ Judhíocoomo yaacö’je töwö, cöwe’jummato’como cönnöjoichö naane’; quee cönä’döa’to Jesuuquidiito wwä.

⁶ Yaawä Jesuuquidiito cöntämä chääjadäiñe. Amoinche’da yä’döa’comjäcä, suddau edhaajotoncomo töjimmä cönaanontoicho Jesuuquiidito wwä ecamma: —Mädääje nei’ñojo, Cajiichaana. Aashichaatojöönö öwö; ömmai chaca omomjai’cha ma; quee ecamma.

⁷ Edääje mmaja suddau edhaajotoncomo cöneecammaja’dea töjimmä wwäiñe: —Aashicha’da weijäcä öwö dea adöiña tä’da weiya. Töwa’deuwe mmaane adha’deucä, yaanonö aadoncaiye.

⁸ Tädhaajäcaato mmaja öwö dea. Yaanonö mmaja töweiye naicho dea, suddau. “Äjääne,” ca’jäcä öwwä anejja wwä, töötä yaawä ñäädä. “Ä’cäde,” ca’jäcä, töwe’e yaawä. “Mädä tödööcä,” ca’jäcä öwwä yaanonö wwä, tönnöe yaawä töwö; quee mmaja suddau edhaajotoncomo cöneecammaja’dea tanoonö wwäiñe.

⁹ Jesuuquidiito wacö’je cönäätaacä yääje ya’deuwö’jödö. Töwö cönä’jedennacai; cönä’döaacä ñanno töncäconcomo weejödö wwäiñe. —Chäänönge yääje wä’döa äwwäiñe, mädääjato ecaanö’nei aneene’da wäänene, iisadaaediitacoomo jadä’jödöödä; quee cönä’döaacä.

¹⁰ Cönennacaicho yaawä ñanno suddau edhaajotoncomo anoonö’jödö. Tadoiñe cöneedantoicho ñäädä cädäijato’jödö.

Iiño wääma’jödö nnedö adonca’jödö

¹¹ Yää ’jeje Jesuuquidiito Naín ña cöntaacä, tönoowanoomadö jadäiñe, jooje anejjacoomo soto jadäiñe mmaja.

¹² Jata jäcä amoinche’da töwä’döa’comjäcä, soto wötäädöcoomo Jesuuquidiito cöneeneaacä, yäämaajä dha’me, ewaaca iichädööcomo. Ñäädä yäämaajä cönä’jaacä ñäädä mma yeenö nnedö. Yeenömjödö cönä’jaacä iiño wääma’jödö. Jooje soto cönä’ja’to chääjadä, yää jataawoncomo.

¹³ Ñäädä wodi töwwä eneea’jäcä, Cajiichaana Jesuuquidiito wentumje cöneeneaacä; cönä’döaacä chäwwä: —Maamoi; quee.

¹⁴ Yaawä äqueejö ewöötö wwadäädä Jesuuquidiito cöntämä; cönaajojoi. Adännamo cöneedennaicho yaawä. Jesuuquidiito cönä’döaacä äqueejö wwä: —Dhanwa, edääje wä’doa äwwä, aanöncä; quee cönä’döaacä.

¹⁵ Yääje mma yaawä ñäädä yääma’jödö shuucu cönammöi; töwa’deuwödö cönaajäntäi. Jesuuquidiito cuntui yaawä yeenö wwä.

¹⁶ Yää eneea’jäcä tameedä soto cönääcatoncaicho yaawä; aashicha Wanaadi jäcä cöna’deuwa’to; cönä’döa’to: —Wanaadi wa’deuwödö ecammanei täneejucaato määdhä cantawäiñe naadö. Tösootoi töneene dämma töwö Wanaadi; quee cönä’döa’to.

¹⁷ Jesuuquidiito ecaadö cöneecatai yaawä Judheea ña, tameedä yää weichö wa’cä.

Juan Wautiita nanonto’jocoomo

¹⁸ Juan nowaanomaadö tameedä yää cöneecammajäätöicho tädhaajotoncomo wwä.

¹⁹ Juan cöna’dejjaicho yaawä aacä tönoowanoomadö; cönenno’jaicho Jesuuquidiito ecamma’jo: “ ¿Ñäädä ca amäädä Äwaanacaanei, töwe’emööje tacaade naadö, anejjaane ñaa niyoomo’canä?” quee ecamma’jo.

²⁰ Jesuuquidiito döiña ñanno cöntonto yaawä; cönä’döa’to chäwwä: —Juan Wautiita ñaa anontäne adheecamma’jo, ¿ñäädä ca amäädä Äwaanacaanei, töwe’emööje tacaade naadö, anejjaane ñaa niyoomo’canä? quee adheecamma’jo; quee cönä’döa’to.

²¹ Ñanno wä’dödaawäiñe ñeenedööcomooje Jesuuquidiito jooje cädäija’como cönaadoncaicho, jooje yäntunamjödööcomo mmaja, odo’sha ’ja’como mmaja. Jooje tänuuquemjöncomo cöneenu’täjä’a’to dea.

²² Yaawä Jesuuquidiito cönä’döaacä Juan anoonö wwäiñe: —Aneene’jocoomo ecammajä’tantäcä Juan wwä, aneeta’jocoomo mmaja. Chäwwä ecammajä’täcä’de tänuuquemjöncomo enu’tädööcomo, secumja’como sheecuncadööcomo mmaja, woi ’ja’como ejiichö’tädööcomo mmaja, töjaanaquemjöncomo ijaana’ducaadöcoomo mmaja, yäämaajä adoncadö mmaja, aashichaato wätunnä ecammajäätödö mmaja wentumja’como wwä.

²³ Ta’cwaiñe eijai ña ñäädä chäänöngeedä yeecanö’nei; quee cönä’döaacä Jesuuquidiito Juan nowaanomaadö wwäiñe.

²⁴ Juan anoonö wöta’comjäcä Jesuuquidiito cönaajäntäi Juan jäcä töwa’deuwödö ñanno soto wwäiñe. Töwö cönä’döaacä: —¿Ane’cäämö ene meiya’quene jata ’jemjönö aca? ¿Cudaata nönge yeiyatäi mecaanö’a’quene, jejeichä awä töwäätu’me?

²⁵ Yääje’da yeiya’jäcä, ¿ane’cä döe yöiña töötä mä’ja’quene? ¿Dhanwa täjeeto yoomö ene ’ja? Ñanno täje’como yoomö, aashicha’como yääwashinchädö mmaja, cajiichaana mmai chacaiñeene töweiye naato.

²⁶ ¿Ane’cä döe yöiña töötä mä’ja’quene? ¿Wanaadi wa’deuwödö ecammanei ene ’ja? Ee, Wanaadi wa’deuwödö ecammaneiñe yeiyajä. Wanaadi wa’deuwödö ecammanei mmajöönö töwö.

²⁷ Juan ñäädä chääjäcä Wanaadi a’deddu imennaajä naadö: Öwö, Wanaadi, yaanonö wanonta’de odhoowajo, adheemadö choonecaaneije; quee naadö.

²⁸ Chäänönge yääje wä’döa, Juan ñäädä tameedä Wanaadi wa’deuwödö ecammannamo e’jodha’como. Yääje yeichaame tameedä Wanaadi töcaajichaanaije tödöönei, mäccö mmädä mma yeichaame, Juan e’jodhe na; quee cönä’döaacä Jesuuquidiito.

²⁹ Yää eta’jäcä töwwäiñe tameedä soto Wanaadi chäänöngatooje cöne’toicho, acu’shänä jödaatai i’jummannamo jadä’jödöödä. Ñanno cönä’ja’to Juan wwä wautisaaje cönä’döjoichodö.

³⁰ Jaadiseeocoomo mmaane, judhío owaanomannamo mmaja, Juan wwä wautisaaje ä’döjo’jöncomo, Wanaadi wwä töwäätuujadööcomo cönquiiñemeecöicho.

³¹ Yaawä Cädhaajotoncomo cönä’döaacä: —¿Ane’cäämö yö’senno joi canno soto eduuwa naatoodö tacammamje naichö jääcä? ¿Änääcöömä nönge naicho?

³² Mudeeshi’chä töwä’shiquiija naichodö nönge naato, jödoodo annawä yaatajiima’como, jiichu etöödöje. Tönwanno ä’döjai ñaatoodö naane’ töjimmä wwäiñe: “Äwänwato’comooje jiichu etöötaame ñaa wwä, änwa’da maato. Wentumje ñaa wecanta’ñätaame, aamo’da maato;” queeto nönge naato.

³³ Ñäädä Juan cönä’ja’dö naane’, jooje ääwashinchä’da, jooje töwoocödö aneenö’da mmaja. Yääje yeichaame odo’sha ’je töne’tä mä’ja’quene.

³⁴ Yää ’jeje Soto nnedö cöneeja, öwö waadö. Öwö mmaane soto jadäiñe töwääwashinchä wäänene, woocödö tönenque mmaja. Ämiijatooje daja ye’tätä määnetääne, töwä’dau’cwatooje mmaja. “Conemjöncomo wacöötö mä’dä, acu’shänä jödaatai i’jummannamo wacöötö mmaja;” quee töwä’döe määnetääne jääcä.

³⁵ Yääje yeichaame wätunnä ecannö’nnamo aashicha yeiya’comjäcä owaanäcä yaawä yää wätunnä chäänönge yeichö; quee cönä’döaacä Jesuuquidiito.

Simón ñäädä jaadiseeo mmai chaca Jesuuquidiito wääwashinchä’jödö

³⁶ Yääje mma yaawä jaadiseeo Jesuuquidiito cöna’dejjai ewanshinchädö wetä. Ñäädä jaadiseeo mmai chaca töwoomonga’jäcä, Jesuuquidiito cönaatajiimai meesa dö’tä.

³⁷ Yaawä yää jataawono wodi cöneejä; masuudui töwö cönä’jaacä. Töwö cöneetai jaadiseeo mmai chaca Jesuuquidiito wääwashinchädö. Yääje yeijäcä juu shimi’jotoojo dha’me cönoomomöi, jeteiya tajääde’dato chääwötö’cä.

³⁸ Yaawä töwaamoancädä töwö cönä’döi Jesuuquidiito ncadheedä, i’judu dö’tä. Cönaajäntäi yaawä i’judu töjöödö tänaacudu que; tuju’jädö que cöncocaacä. Shuumajä’ancädä tönnejöödö juu shimi’jotoojo que i’judu cömjöi yaawä.

³⁹ Yää eneea’jäcä jaadiseeo wwä, ñäädä ääwashinchä Jesuuquidiito a’dejjanei’jödö wwä, töwö cöntö’tajä’acä: “Wanaadi wa’deuwödö ecammanei ñeeneje määdhä weiya’jäcä, dhowaanäcä eichö määdhä wodi tajoojonei masuuduije yeichö;” quee cöntö’tajä’acä.

⁴⁰ Yaawä Jesuuquidiito cönä’döaacä jaadiseeo wwä: —Simón, she’caasa wa’deuwö’se wa äwwä; quee cönä’döaacä. —Adha’deucä, Owaanomaanei; quee cönä’döaacä ñäädä jaadiseeo.

⁴¹ Jesuuquidiito cönä’döaacä: —Soto cönä’jaacä, tönwacaamaamöje jödaata u’nei. Aacä cönä’ja’to ñäädä ejeeque’nä’nnamo. Tooni cöneejeque’nä’acä tooni soto soto jödaata; yeichacoono cöneejeque’nä’acä aacä soto jödaata mma.

⁴² Täjeematoojo ’je’da yeijäcä chäwwäiñe, ñäädä täjeeque’nä’emö täjeeque’näjöödö cönencwanno’joi, a’nädäncädä. ¿Äshono ñäädä täjeeque’nä’emö jooje’cä ijummajai nichö’taanä äwwä? quee cönä’döaacä Jesuuquidiito Simón wwä.

⁴³ Simón cöneccujä’acä: —Ñäädä ’cännä, jooje’cä ñeejeque’näjöödö cönencwanno’joichö. Jesuuquidiito cönä’döaacä: —Chäänönge michö’tammecöi.

⁴⁴ Yaawä wodi wwadäädä töwä’jedennaca’jäcä Jesuuquidiito cönä’döaacä Simón wwä: —Määdhä wodi naadö naane’. Öwö yoomomöi ämmai chaca. Tuna äntu’da meiya u’judu coccatoojo. Määdhä mmaane, tänaacudu que töjöödö’jo, tuju’jädö que u’judu nichoccai.

⁴⁵ Suuma’da meiya amäädä. Määdhä mmaane, woomomöödö jonnoto’jödöödä u’judu shuumadööje nä’jaanä.

⁴⁶ Amäädä juu shimi’jotoojo que ju’jädö ämjö’da meiya. Määdhä mmaane u’judu nöjöi juu shimi’jotoojo que.

⁴⁷ Yääje yeijäcä edääje wä’döa äwwä, töwö choone’nadiiyö täncwanno’jo na, töwö chäwwä jooje jummadö weijäcä. Ñäädä she’caasa choone’nadiiyö encwanno’jaajä, jummatä’daiche; quee cönä’döaacä Jesuuquidiito.

⁴⁸ Yääwä wodi wwä Jesuuquidiito cönä’döaacä: —Ocoone’nadiiyö täncwanno’jo na; quee.

⁴⁹ Ñanno chääjadä cönääwashincha’todö tönwannoje dea cönä’döa’to: —¿Änääcööne mä’dä, mädä wa’cä conemjönö tönencwanno’jo nai? quee.

⁵⁰ Yaawä Jesuuquidiito cönä’döaacä wodi wwä: —Äwwä ecamjödö weijäcä määwanaacai. Täncanoode’da äjääne eduuwä; quee cönä’döaacä Jesuuquidiito.