DUUCA 5 - Wanaadi A'deddu

Jooja’como na’cwacancomo ajäi’jocoomo

¹ Jeneesade cu’jäi jawä Jesuuquidiito weichö, jooje soto cönä’döicho yöiña, Wanaadi a’deddu eta’se töweijäcäiñe. Tönwanno Jesuuquidiito cönanwacö’ja’to, yeichojo ’je’da tödööene.

² Yaawä Jesuuquidiito cöneedantäi aacä cudiiyada ije’waca, tasseiñe’da. Ñanno dhacancomo’jödö, na’cwacancomo i’yännamo, töwä’täjä’e cönä’ja’to; töjaajiyööcomo cöncoccajä’a’to.

³ Jesuuquidiito cönä’täi yää cudiiyada aca, Simón cudiiyadai aca. Simón wwä joojede’da’cä cudiiyada cönaadimaajoi annaca. Cönaatajiimai yaawä. Dhacanno soto cönoowanooma’to yaawä.

⁴ Yaawä töwa’deuwödö töwä’ca’jäcä töwö cönä’döaacä Simón wwä: —Annacaane adiimacä, ajaajiyööcomo memaatäiye, na’cwacancomo mani’yätäiye; quee cönä’döaacä Jesuuquidiito.

⁵ Simón cöneccujä’acä, cönä’döaacä: —Owaanomaanei, coijaicho wadaadä ñaa netaadawa’cajoi ajäiyeeje’da. Yääje yeichaame amäädä adha’deddu woije mma jaji wema’ñojo; quee.

⁶ Yääje chäwwäiñe tödööa’jäcä, na’cwacancomo cöni’yäicho jooje, ijaajiyööcomo töshiichajoone.

⁷ Yaawä töjimmotoncomo wwadäädä cönaata’shajäätöicho, ñanno yeichacoono cudiiyada awoncomo; tö’wa’tännamooje cöna’dejjaicho. Ñanno cöneejoto yaawä. A’nädäncädä cuntu’camöi cudiiyada, ñaadöjai tödööene.

⁸ Yää eneea’jäcä Simón Peedhodo wwä, töwö tä’mudhe cönä’döi Jesuuquidiito je’taca; cönä’döaacä: —Cösancwacä amäädä Cajiichaana, conemjönö öwö; quee cönä’döaacä.

⁹ Ñanno na’cwacancomo ajäi’jocoomo weijäcä jooje töwääcatonca Simón cönä’jaacä, tameedä chääjadoncomo mmaja.

¹⁰ Yääje mmaja cönä’ja’to dea Jacoowo, Juan, Seewedheeo nnacoomo, ñanno Peedhodo jimmä. Jesuuquidiito cönä’döaacä Peedhodo wwä: —Ääcatonca’da eichä. Eduuwa naadö jonno soto owaanomaaneichomooje ma’de; quee cönä’döaacä.

¹¹ Yaawä töwaajäiya’comjäcä, tönwanno tameedä tötaadawaajuichomo cöne’nomjaicho, Jesuuquidiito jadä töötädööcomo wetä.

Woi ’jano ejiichö’tä’jödö

¹² Anejja jataawä Jesuuquidiito weichö, dhanwa woi ’jano yäätä cönä’jaacä. Jesuuquidiito töwwä eneea’jäcä, tä’mudhe cönä’döi ije’taca; chäwwä cönääjichö’täjaacä; cönä’döaacä: —Cajiichaana, yeejichö’tä’se aweiya’jäcä, yeejichö’täjai ma; quee cönä’döaacä.

¹³ Yaawä Jesuuquidiito tamäädö que cönaajojoi; cönä’döaacä chäwwä: —Adheejichö’tä’se wa; nännamjö’ñojo mädä owoichö; quee cönä’döaacä. Yaawä dea mma yoichö cöne’jöi.

¹⁴ Jesuuquidiito cönwätuujai yaawä soto wwäiñe yää aneecammajäätö’da yeichö wetä. Töwö cönä’döaacä chäwwä: —Wanaadi wwono wa’deuwödö wwä mmaane äänejoota. Moisé necamma’jödö nönge Wanaadi wwä tu’emö änu’cä’de, töwääjichö’tä aweichö ene’ju’to’me, soto dhowaanäcäiñe yeichö wetä yaawä töwääjichö’tä aweichö; quee cönä’döaacä Jesuuquidiito.

¹⁵ Töwääcadeeme’jo’se’da Jesuuquidiito weichaame jooje’cä mma chääcadö cöneecatai. Jooje soto töwe’jumma cönä’ja’to ñeecammajäätödö etaadö wetä, töwääjichö’täjoodöcoomo wetä mmaja.

¹⁶ Töwö Jesuuquidiito töötä töweiye cönä’jaacä chö’cäi, soto ’jemjönö ña, Wanaadi wwä a’deuwe.

Secumjato adonca’jödö

¹⁷ Aneedawä anooto awä Jesuuquidiito cönä’jaacä owaanomaadöje. Yäätä cönä’ja’to jaadiseeo wataajima’como, judhío owaanomannamo mmaja, tameedä Caadideea ñano jataawoncomo we’a’como, Judheea ñano jataawoncomo we’a’como mmaja, Jeduusadén ñancomo we’a’como mmaja. Wanaadi jäduudu ’je Jesuuquidiito cönä’jaacä yaawä, soto adoncatoojo.

¹⁸ Yaawä anejjacoomo dhanwaacomo cönä’döicho, secumjato dha’me, ä’wato jo. Tönwanno ä’saca töwoomomö’seiñe cönä’ja’to Jesuuquidiito je’taca ñäädä cädäijato tödöödö wetä.

¹⁹ A’que cönoonejaicho amonno’jodö, jooje soto weijäcäiñe. Yääje yeijäcä maa de’cäi cönäncuicho yaawä. Maa inwa’tocaadö’jo ñäädä secumjato cöneenö’toicho yää ai, chä’wötö joodä. Soto antacaiñe cönnöicho yaawä, Jesuuquidiito ecaatajo.

²⁰ Chäwwäiñe täcamjödö eneea’jäcä, Jesuuquidiito cönä’döaacä cädäijato wwä: —Ocoone’nadiiyö täncwanno’jo na; quee cönä’döaacä.

²¹ Yääje mma yaawä ñanno judhío owaanomannamo, jaadiseeocoomo mmaja, cöntö’tajä’a’to: “ ¿Änääcöömä mä’dä, mädä wa’cä cone’da na’deuwanä Wanaadi jäcä? Anejja conemjönö encwanno’jojai’cha na, Wanaadi mmaane;” quee cöntö’tajä’a’to.

²² Jesuuquidiito dhowaanäcä cönä’jaacä yääje chö’tajäätödööcomo. Töwö cönä’döaacä chäwwäiñe: —¿Ane’que’nei mädääje ätö’tajä’ato dea?

²³ ¿Äshono ätääcammacoije nai: “Ocoone’nadiiyö täncwanno’jo na;” quee ’ja? ¿Edääjeene’: “Aanöncä, oojoimacä;” queene’ ?

²⁴ Edä wödööa odhoowanääcäiñe yeichö wetä Soto nnedö soto cone’nadiiyö encwanno’jojai yeichö edä nono de’wä; quee cönä’döaacä Jesuuquidiito. Yaawä töwö cönä’döaacä secumjato wwä: —Edääje wä’döa äwwä, aanöncä; adhe’wötö adääcä; ämmai chaca äjääne; quee cönä’döaacä.

²⁵ Yaawä dea mma ñäädä dhanwa cönammöi ñeenedööcomooje. Tä’wötö cömmomöi yaawä, yää choojo cönä’ja’dö. Tömmai chaca cöntämä yaawä, aashicha töwa’deuwancädä Wanaadi jäcä.

²⁶ Tameedä ñanno soto cönääcatoncaicho. Aashicha Wanaadi jäcä cöna’deuwa’to yaawä. Töwääcatoncadööcomooje cönä’döa’to: —Tönoiñato queeneto eduuwa; quee cönä’döa’to.

Dewí a’dejja’jödö

²⁷ Yää ’jeje Jesuuquidiito cöneeja’cai. Töötädaawä töwö cöneeneaacä acu’shänä jödaatai i’jummanei, chäätö Dewíije. Shuucu ñäädä cönä’jaacä acu’shänä jödaatai i’jummannamo weicho’como taca. Jesuuquidiito cönä’döaacä chäwwä: —Ma’che jaadä.

²⁸ Dewí cönammöi yaawä. Tameedä tötaadawaajui cöne’nomjai yaawä Jesuuquidiito jadä töötädööje mma.

²⁹ Yaawä Dewí soto cöneewashincha’to tömmai chaca. Jooje soto cönä’ja’to, acu’shänä jödaatai i’jummannamo mmaja, anejjacoomo mmaja. Jesuuquidiito jadä cönääwashincha’to.

³⁰ Yaawä jaadiseeocoomo, judhío owaanomannamo mmaja, ñanno jaadiseeoje mmaja cönä’ja’todö, Jesuuquidiito nowaanomaadö jäcäiñe cönenta’me’ca’to; cönä’döa’to: —¿Ane’que’nei mmaja määwashinchaato dea acu’shänä jödaatai i’jummannamo jadäiñe, conemjönö dönnamo jadäiñe mmaja? quee cönä’döa’to.

³¹ Jesuuquidiito cöneccujä’acä; cönä’döaacä chäwwäiñe: —Cädäijemjönö täjiichö’tänei ämjumma’da töweiye nai; cädäijato mmaane tumjumma.

³² Chäänönga’como a’dejja’da we’ne, conemjönö dönnamoone, tötö’tajäätödööcomo sha’duminchaiyeto; quee cönä’döaacä Jesuuquidiito.

Wäänemaanä jäcä Jesuuquidiito ecamma’jo’jödö

³³ Yaawä tönwanno cönä’döa’to Jesuuquidiito wwä: —Juan nowaanomaadö töwäänema weneeneto, Wanaadi wwä töwa’deuwe weneeneto dea; jaadiseeo nowaanomaadöcomo yääje mmaja. Amäädä onoowanoomadö mmaane äänema’da; töwääwashinchä dea weneeneto; quee.

³⁴ Jesuuquidiito cönä’döaacä chäwwäiñe: —¿Aaquene mmaja jötaanä enennamo maneenemaajodööto deeade’, töjöötaamö chääjadäiñe yeichaame?

³⁵ Aneedawä anooto na’de choojonnoiñe töjöötaamö wataadojootojo; yaawä näänemaato’de; quee cönä’döaacä Jesuuquidiito jaadiseeo wwäiñe.

³⁶ Edääje mmaja cönä’döa’dea Jesuuquidiito, yö’seeno joi: —Töwoomö eduuwaato änshiicha’da weiñä nai jenaado’jä töwoomö a’totoojoje. Mädääje tödööa’jäcä töwoomö eduuwaato nichoone’ma ñäädä. Jenaado’jä to’nase’ne’da eijai ña dea eduuwaato sedeimjödö que a’taajä.

³⁷ Eduuwaato chääjedöödö eccudu döaajä anacca’da weiñä nai jenaado’jä iji’jä döaajä aca. Mädääje tödööa’jäcä iji’jä neshiicha yaawä; chääjedöödö eccudu töweemacuudä yaawä, iji’jä mmaja.

³⁸ Eduuwaato iji’jä acaane chääjedöödö eccudu eduuwaato döaajä shoomadö. Mädääje a’nädä emaacudä’da eijai ña, chääjedöödö eccudu, iji’jä mmaja.

³⁹ Jenaado’jä chääjedöödö eccudu döaajä oneeja’jäcä, eduuwaato döaajä enö’se’da weiñä nai. Edääje soto ä’döjai ñaadö naane’ yaawä: “Chaasantadööne caado na;” quee ä’döjai ña; quee cönä’döaacä Jesuuquidiito.