DOSECHO 9 - Wanaadi A'deddu

Saudo quedeiyenteje yä’dö’jödö

¹ Yaawä Saudo quedeiyente maminchadööcomooje dea cönä’jaacä, tämaane’jödöödä. Töwö cöntämä Wanaadi wwä töwa’deuwaamo edhaajotoncomo döiña.

² Jajeeda imennaajä cöne’catäi chäwwä Damaacu ña töötotoojo quedeiyente ujiiyeiñe, Jeduusadén ña jedeesoje eneejödööcomo wetä yaawä, dhanwaacomo, wodiiñamo mmaja.

³ Yaawä ääma tai töötädaawä, Damaacu ña ä’döjai töwä’döa’jäcä, jadheedä tawaanato cönäänejoi dhawoodhecääcä.

⁴ Yaawä Saudo cöne’duccai nono jo; a’deu cönäätaacä chäwwä: —Saudo, Saudo, ¿ane’cotoojo cuyuunacaanä? quee cönäätaacä.

⁵ Yaawä Saudo cönä’döaacä: —¿Änääcö amäädä Cajiichaana? quee. Yää a’deu cönääta’dea yaawä: —Jesuuquidiito öwö, ñäädä miyuunacaadö dea. Amäädä dea adheecone’ma, jaaca tuju’yu’motoojo töjoosa’dato etaaja’jäcä chäwwä töwoije dea töwäätunui’chä töweiye naichöje mmaja; quee cönä’döaacä.

⁶ Saudo cöntätä’nöngacä yaawä tösaccomje. Töwö cönä’döaacä: —Cajiichaana, ¿ane’cäämö tödööjo’se manä öwwä? quee. Yaawä Cajiichaana cönä’döaacä chäwwä: —Aanöncä; jataaca äjääne. Yäätä töweiye na äwwä ecammanei; quee.

⁷ Ñanno Saudo jadoncomo jooje cönääcatoncaicho. Wa’deunä mmä cönäätaacä chäwwäiñe, soto ääne’da yeichaame.

⁸ Yaawä Saudo cönammöi; töwäänushiicha’jäcä ääne’da cönä’jaacä chämjataawä. Damaacu ña cönaadoicho yaawä töjämjäcäiñe.

⁹ Yäätä Saudo cönä’jaacä aaduwaawä anooto, tänuuque’da. Ääwashinchä’da cönä’jaacä, töwoocödö aneenö’da mmaja.

¹⁰ Yäätä Damaacu ña cönä’jaacä quedeiyente, Aananía täätö. Ñäädä wwä Cajiichaana cönäänejoi iwäänetöödö ai; cönä’döaacä chäwwä: —Aananía; quee. Ñäädä cöneccujä’acä: —Eetä wa, Cajiichaana; quee.

¹¹ Yaawä Cajiichaana cönä’döaacä chäwwä: —Ääma’täcä; äjääne Juudha mmai chaca, yää Sa’donnato Ääma taawä naichö. Ecamma’jocä Saudo Taadoso ñano jäcä; töwö Wanaadi wwä wa’deunäje na.

¹² Töwö Saudo töwäänetöödö ai cöneeneaacä dhanwa tödöiña yeejödö, Aananíaje chäätö; cöneenea’dea Aananía wwä tamäädö tödöödö töde’cäcä, töneene töwä’dödö wetä; quee cönä’döaacä Cajiichaana Aananía wwä.

¹³ Yää eta’jäcä Aananía cönä’döaacä: —Cajiichaana, ñäädä ecaadö töneeta wäänene Jeduusadén ña conemjönö iiñödö adheecanö’nnamo jäcä.

¹⁴ Eduuwa sadä ye’ajä na jajeeda imennaajä dha’me, Wanaadi wwä töwa’deuwaamo nutuudu chäwwä, tameedä adheecanö’nnamo jedeesoje adooto’como; quee cönä’döaacä Aananía.

¹⁵ Yaawä Cajiichaana cönä’döaacä: —Äjääneene; öwö weiñä ñäädä ya’deddu ecammaneije töweiyemööje tameedä soto wwäiñe, cajiichaanacoomo wwä, iisadaaediitacoomo wwä mmaja.

¹⁶ Chäwwä weneeja’de jääcäinchädä yäntunaanö’tojo; quee cönä’döaacä Cajiichaana Jesuuquidiito Aananía wwä.

¹⁷ Yääje mma yaawä Aananía cöntämä yaawä Saudo e’saca. Töwoomonga’jäcä tamäädö cönnöi Saudo de’wä; cönä’döaacä chäwwä: —Weichacoono Saudo, Cajiichaana Jesuuquidiito yaanontäi sadä adöiña, ñäädä ääma tai aweejödaawä äwwä cönäänejoichö. Töwö yaanontäi töneene äwä’dödö wetä, Epíiditu Santo jäduudu ’je äwä’dödö wetä mmaja; quee cönä’döaacä Aananía Saudo wwä.

¹⁸ Yaawä dea mma na’cwacaano cädääji’jä nönge cöne’duccai Saudo enuudu jäconno; töneene cönä’döi yaawä. Wautisaaje cönä’döjoi yaawä.

¹⁹ Yää ’jeje töwääwashincha’jäcä cönaadoncai yaawä. Töwö äächädä anooto mma Damaacu ña cönä’jaacä yaawä quedeiyentecoomo jadäiñe.

Damaacu ña Saudo necammajäätö’jödö

²⁰ Yaawä we’jummatoojo waadäi Saudo cönaajäntäi Wanaadi nnedööje Jesuuquidiito weichö ecammajäätödö.

²¹ Tameedä etannamo’jödö cöneeta’jöjäätöicho; cönä’döa’to: —¿Ñäädäjöönö ca määdhä ecaanö’nnamo Quidiito tömmaminchäiñe cönä’ja’dö Jeduusadén ña? ¿Mädääjatooje dea jönca sadä cöneejä Quidiito sotoi jedeesoje adääneichomooje Wanaadi wwä töwa’deuwaamo edhaajotoncomo döiñaiñe? quee cönä’döa’to ñanno soto Saudo jäcä.

²² Yääje yeichaame Saudo jooje’cä mma töneecammajä’e cönä’jaacä Jesuuquidiito Äwaanacaaneije yeichö. Töwö judhío Damaacu ñancomo töneeta’jöichajoojä’eiñe cönä’jaacä.

Judhío jonnoiñe Saudo wääneje’jödö

²³ Yääje mma yaawä jooje anooto yä’döa’jäcä judhío cöna’deuwöicho Saudo emaadö a’de’tädö wetä.

²⁴ Yaawä Saudo cöneetaacä täma’se yeichöcoomo. Tönwanno judhíocoomo Saudo cöniiñoshincha’to jata nata’tajo ano, coijai’jödöödä, yeeja’cadö womoocödööje, emaadö wetä yaawä.

²⁵ Yaawä quedeiyentecoomo coijai Saudo cöneenö’toicho wöwa aca, jata cudaadai ejoodhacääcä. Mädääje Saudo cönäänejei judhío jonnoiñe.

Jeduusadén ña Saudo wei’jödö

²⁶ Yaawä Jeduusadén ña töwä’döa’jäcä Saudo töwoojodö’se cönä’jaacä quedeiyente jadäiñe. Ñanno mmaane tösaade cönä’ja’to; aneecamjö’da cönä’ja’to quedeiyenteje yeichö.

²⁷ Yaawä Waanawé cönaadäi anonta’como döiñaiñe. Töwö cöneecammajäätöi chäwwäiñe ääma tai yeejödaawä Jesuuquidiito ene’jödö Saudo wwä, chäwwä Jesuuquidiito wa’deuwö’jödö mmaja. Damaacu ña tösaade’da Saudo necammajäätö’jödö mmaja Waanawé cöneecammajäätöi chea anonta’como wwä.

²⁸ Yaawä Saudo cöno’nomjoi Jeduusadén ña; chääjadäiñe töwäämannä’e töweiye cönä’jaacä.

²⁹ Töwö jäduuje töneecammajä’e cönä’jaacä Jesuuquidiito jäcä. Töwö töwa’deujä’e cönä’jaacä judhío jadäiñe, ñanno quidiiyeeco a’deucwa’como; töwäätäccujä’e mmaja cönä’ja’dea chääjadäiñe. Saudo ema’se mma ñanno cönä’ja’to yaawä.

³⁰ Yaawä Saudo ema’se yeichöcoomo eta’jäcä quedeiyentecoomo cönaadoicho Seesadeea ña; yäätonno Taadoso ña cönenno’jaicho.

³¹ Yaawä tameedä Quidiito sotoi täncanoode’da cönä’ja’to; jäduujeiñe cönä’ja’to dea, ñanno Judheea ñancomo, Caadideea ñancomo mmaja, Samaadiya ñancomo mmaja. Tönwanno tönoiñe Cajiichaana Jesuuquidiito töneene cönä’ja’to. Epíiditu Santo ni’wa’tädö que jooje cöneejanga’to.

Eneea adonca’jödö

³² Yaawä Peedhodo cönäämannä’acä quedeiyentecoomo emmencancädäiñe; cönä’döi yaawä Diida ña.

³³ Yäätä dhanwa cöneedantäi, Eneea täätö. Tä’wötö jo dea mma ñäädä töweiye cönä’jaacä secumje töweijäcä; aaduwaawä amoojato wedu chäädäicha’jödö cönä’jaacä.

³⁴ Yaawä Peedhodo cönä’döaacä chäwwä: —Eneea, Jesuuquidiito adhaadonca. Aanöncä; adhe’wötö imoncä; quee cönä’döaacä. Yaawä dea mma ñäädä cönammöi.

³⁵ Tameedä Diida ñancomo, Sadón ñancomo mmaja cöneenea’to. Tönwanno töwäätunnäichomo cöne’nomjaicho yaawä Cajiichaana Jesuuquidiito ecamjödö wetä.

Töwäämaajo jonno Doodaca waadonca’jödö

³⁶ Yaawä Joope ña cönä’jaacä wodi. Quedeiyenteje töwö cönä’jaacä, Tawiitaje chäätö; Doodacaaje mmaja chäätö cönä’ja’dea, quidiiyeeco a’deucwe. Ñäädä Doodaca jooje aashichaato tönnöe cönä’jaacä; weiñäje wentumja’como töni’wa’täiñe töwö cönä’jaacä.

³⁷ Yaawä Doodaca cöncädäichai; cönäämai yaawä. Chääquejöödö töjöödö’jo ijimmä’jödö acä’jaajä taca cönnöicho yaawä, taawa de’wä.

³⁸ Yää Joope ñano cönä’jaacä amoinche’da Diida ñano jäcä, Peedhodo cönä’ja’dö döiña; yääje yeijäcä Diida ña Peedhodo weichö eta’jäcä ñanno quedeiyentecoomo aacä dhanwaacomo cönaanontoicho Peedhodo döiña. Ñanno cönä’döa’to Peedhodo wwä: —Ma’da’cä Joope ña ma’chomo; quee.

³⁹ Yaawä Peedhodo cöntämä chääjadäiñe. Iiña töwä’döa’jäcä ñanno quedeiyente cönaamonno’joicho chääquejöödö döiña. Yäätä cönä’ja’to wodiiñamo, iiño wä’jajo’jödö. Tönwanno cönaamoa’to; cöneenejoojä’a’to tameedä nudä töweichö Doodaca nishoocajäätö’jödö.

⁴⁰ Yaawä Peedhodo cömja’canö’jojäätöicho jödo’na. Tä’mudhe töwö cönä’döi; Wanaadi wwä cöna’deuwöi. Yaawä yäämaajä ene’mancädä cönä’döaacä: —Aanöncä, Tawiita; quee. Ñäädä wodi cönäänushiichai yaawä; Peedhodo eneea’jäcä cönä’jäi yaawä.

⁴¹ Peedhodo cönaajäi yaawä dhamäädö jäcä. Yaawä Peedhodo quedeiyentecoomo cöna’dejjaicho, iiño wä’jajo’jödö mmaja; nudä cöneenejoi chäwwäiñe.

⁴² Yää cöneecatai yaawä tameedä Joope ñano weichö wa’cä. Jooje soto Cajiichaana cöneecamjöicho yaawä.

⁴³ Yäätä Joope ña Peedhodo cönä’jaacä äächädä anooto mma, Simón mmai chaca, ñäädä iji’jä choonecaanei mmai chaca.