DOMAANO 13 - Wanaadi A'deddu

¹ Tameedä eijai maato acu’shänä woije. Acu’shänä ’je’da na Wanaadi woijatoojemjönö. Canno acu’shänääje naatoodö Wanaadi woije mädääje naato.

² Yääje yeijäcä ñäädä acu’shänä woijemjönö Wanaadi woijato jäcä nä’jädu’ta. Ñäädä yääjato töwoije nätä’maminchaja.

³ Ñanno cajiichaanaje naatoodö aashicha’como ecaatoncannamooje’da naato, conemjönö tödönnamoone. Acu’shänä ñontä’se’da aweiya’comjäcä aashicha eichäcä, ta’cwaiñe äjääcäiñe eiye yaawä.

⁴ Töwö na Wanaadi anoonöje, äjääcäinchädäiñe. Yaawääne’ cone’da aweiya’comjäcä ñontäjai maato; töwäädämma’da cajiichaanaje na. Töwö na Wanaadi anoonöje chäänönge töwwä imaaminchadö wetä ñäädä conemjönö tödöönei.

⁵ Yääje yeijäcä acu’shänä woije eijai maato, wätä’maminchajoonä nontädö jäcäinchädä mma’da, aashicha ätö’tajäätödööcomo yeichö wetä mmädääne.

⁶ Mädääje yeijäcä dea acu’shänä jödaata töneejemaajo weneene äwwäiñe, jata cone’catoojoje. Ñanno acu’shänä naato Wanaadi anoonöje; tönwanno tötaadawaajuichomo jäcä töwoowoincha weneeneto.

⁷ Tameedä aneejeque’näjöödöcoomo ejeematääcä. Audaajä jäcä ejeeque’nä’a’jäcä äwwä, ejeemacä, acu’shänä nejeemajoodö mmaja. Ñontätääcä ñäädä tönontäämö; o’jodhe ene’matääcä ñäädä o’jodhaato.

⁸ Töneejeque’nä’e dea meichäi’che; yää que mma soto ejeeque’nä’täcä, wä’jummanä que mma. Ñäädä wä’jummanä dönei tameedä waanontänä nödööa.

⁹ Edääje waanontänä imennaajä nä’döa: “Aweichacoono ijummacä amäädä äwä’jummadö nönge dea;” quee. Yää tödööa’jäcä äwwäiñe tameedä anejja waanontänä mödööato yaawä, yää edääje yä’dödö naadö: “Amaasuduichai; soto maneemai; maneememmecöi; anejja mma maneementäi; anejja nödöödö mani’ñeimmai;” quee naadö.

¹⁰ Ñäädä wä’jummanä ’jano conemjönö ännö’da na töweichacoono jäcä; yääje yeijäcä wä’jummanä yää waanontänä wä’dödö woije weiñä.

¹¹ Mädä tödööjai maato mädä weiñä caatoodö chö’tamme’cancädä; cöwo’joto’como cu’nädö aca yä’döaajä mädä eduuwa. Eduuwa cöwääwanaacato’como amoinche’da na, queecanö’taneedawä cönä’ja’dö o’näde.

¹² Coijaicho ejä’dä’jai nä’döi eduuwa, awaanajai nä’döi. Yääje yeijäcä yää tööjano’taca tödööemö e’nomjajai caato eduuwa; cöwoowontoto’como cöödötäiye, suddau tawaanato aca töweewänä’täämö töweiye naichöje.

¹³ Chäänönge queichäiye, tawaanato acancomo eijai ñaatoodöje dea. Wä’dau’nä jäcä’da queichäiye, wänwanä jäcä’da mmaja, imaasuduicha’da mmaja, anejja conemjönö jäcä’da mmaja, ätäccujäätö’da mmaja, e’neimma’da mmaja.

¹⁴ Cajiichaana Jesuuquidiito owoowontoto’comooje tödöötäcä. Ajuunucoomo nijummadö mma männötäi’che.