DOMAANO 11 - Wanaadi A'deddu

Iisadaaediita quedeiyentecoomo

¹ ¿Yääje yeiya’jäcä ca Wanaadi iisadaaediitacoomo cöneetömaicho? Ng’jn, aneetöma’daane. Öwö waadö naane’, iisadaaediita, Aawadán atöödö, Wemjamín weichö.

² Ng’jn, Wanaadi tösootoi aneetöma’da naato, ñanno jenaadä töwwoncomooje cöne’toichodö. ¿Odhoowanääcäiñe jönca nai Edía wei’jödö jäcä Wanaadi a’deddu imennaajä ecammajäätödö, ñäädä Wanaadi wa’deuwödö ecammanei’jödö? Wanaadi wwä töwa’deuwödaawä töwö Edía cöna’deuwöi iisadaaediitacoomo jäcä.

³ Edääje töwö cönä’döaacä: “Cajiichaana, canno cöneemaicho awa’deuwödö ecammannamo; saaquidiijiisiyo dötoojo cöncadaacaicho dea. Öwö mma jääcäjeene wa eduuwa; yeema’se naato dea;” quee Edía cönä’döaacä iisadaaediitacoomo jäcä.

⁴ ¿Aaquene Wanaadi cönä’döaacä yaawä, quee ’ja? Edääje cönä’döaacä: “Töweiye dea naato öwö neichö aacä amoojato miide, Waada cu’taajä je’taca tä’mudhe ä’döjöncomo;” quee Wanaadi cönä’döaacä yaawä Edía wwä.

⁵ Mädääje mmaja eduuwa, töweiye dea naato yäädetö’jocoomo, Wanaadi aashicha töweichö woije ñeichö.

⁶ Aashicha Wanaadi weichö jäcäinchädä mädääje na, tödöödö jäcäinchädä’da. Tödöödö jäcäinchädä ei’jo mmaane aashicha Wanaadi weichö woijatooje ätä’täjai’cha eichö.

⁷ ¿Aaquene yaawä, quee ’ja? Ñanno iisadaaediitacoomo aneejodö’da cöneiya’to yää cunuujiya’todö; Wanaadi neichö mmaane yää cöneejodöicho. Anejjacoomo mmaane cönä’täijannä’cajoicho,

⁸ Wanaadi a’deddu imennaajä wä’dödö naichöje. Edääje nä’döa yää imennaajä: “Wanaadi cönencudiijannä’caicho; tänuuque’da cönnöicho, töjaanaque’da mmaja. Yääje yeijäcä eduuwa naadö jona tödööene mädääje naato;” quee imennaajä nä’döa.

⁹ Dawí mmaja yääje cönä’döa’dea: Yääwashinchädööcomo jadä’jödöödä yaatashiichuudoto’comooje nei’ñojo, cadancwani aca we’duccanä töweiye naichöje; encudiijamöiyeto yaawä, ä’cuseijaiyetoode.

¹⁰ Tänuuque’da mmaja nä’dö’ña’tode, aneene’da eiyeto yaawä. Yeichöje töweedamiyo nei’ña’to’dede; quee Dawí wä’dö’jödö na.

Judhíojöncomo wääwanaacadööcomo

¹¹ ¿Töweichöcoomoodäje ca judhío cöneeju’cätoicho, yääje yeiya’jäcä? Ng’jn, yääje’da na. Yää chäänönge’da iisadaaediita wei’jocoomo judhíojöncomo wääwanaacato’como cöneejodööjoi, ñanno iisadaaediitacoomo cone’da yä’döjoodöcoomo wetä, judhíojöncomo wei’yejeiñe mmaja tödö’se yeichöcoomo wetä yaawä.

¹² Yää chäänönge’da iisadaaediita wei’jocoomo aashichaatoje cönä’dhe’maichö naane’ tameedä soto jäcäiñe; yeejucca’jocoomo aashichaatoje cönä’dhe’mai chea judhíojöncomo jäcäiñe. Töwaacö’je mma yeeconeeca’comjäcä.

¹³ Edääje wä’dö’se wa äwwäiñe, änwanno judhíojöncomo. Judhíojöncomo wwadäädäiñe anontaajäje weijäcä aashicha mädä taadawaajui tödö’se wäänene.

¹⁴ Mädääje wäänene ñanno jimmä judhíocoomo i’ñeimmajoodöcoomo wetä äjääcäiñe, awei’yejeiñe mmaja yeichöcoomo wetä yaawä, dhantai ääwanaacaiyeto yaawä.

¹⁵ Wanaadi wwä judhíocoomo wo’joomaja’comjäcä tameedä soto ääweichacoonoje cönä’döicho Wanaadi jadä. Töwaacö’je aashichaato eja’cajai ña ñanno judhío wecooneca’comjäcä. Yää yeeconeecadööcomo ä’dhe’majai ña yä’ja’a’como waadoncato’comooje.

¹⁶ Aashicha tönö’nä yeiya’jäcä, uu ecauwajä mmaja aashicha na dea. Dee michö aashicha yeiya’jäcä, dhajäädö mmaja aashicha na dea.

¹⁷ Dhantai judhío cönä’sancwajoicho, dee ajääcadö töweiye naichöje. Amäädä inwacaanoje määwaacajoone ijaata’jödö awä, dee jönaawono ajäädö yaatajääcajo’jödö aca töwaatöta töweiye naichöje. Mädääje aweichojo mejoodöne, dhajäädö neene wei’jödö nönge mmaja dee watö’taajä sheene töwä’döe töweiye naichöje, yää dea imiichöje yeijäcä.

¹⁸ Yääje yeichaame dhajäädö neene e’jodhe ä’canö’jai’cha ma. Chö’tamme’cä imiichö iiñejencaneije’da aweichö; töwööne ännejencaneije na.

¹⁹ Edääje ä’döjai maadö naane’: “Dhajäädö neene dajaane cönaatajääcajoi öwö waatötaadö wetä ijaata’jödö aca;” quee.

²⁰ Yääje mma’ne; tönwanno cönaataco’joicho aneecamjö’da töweichöcoomo jo’tädööje. Amäädä mmaane ecamjödö que mma adhaatötaane, mädä eduuwa maadö. Yääje yeijäcä o’jodhe chö’tajä’jai’cha ma; tönontä mmaane ñontäjai ma.

²¹ Wanaadi dhajäädö neene änshinchä’da cöneiya’dö naane’; töwaacö’je amäädä, yaatötaajä mma.

²² Eneecä’ma aashicha Wanaadi weichö, tumjunne’da yeichö mmaja. Ñanno cönsadiijamöichodö jäcä tumjunne’da töwö cönä’jaacä; äjääcä mmaane aashicha töwö na. Aashicha Wanaadi weichö woije dea aweiya’jäcä chäänönge eijai ma. Yääje’da aweiya’jäcä mmaane amäädä mmaja mataacä’ja’dede.

²³ Ñanno judhío wwäiñe mmaja ecaanö’a’jäcä ääwaacajoojai ñaato dea yaawä töwei’jocoomo aca mmaja. Wanaadi jäduuje na; töwö yei’jocoomo aca mmaja tödööjai ñaato dea.

²⁴ Amäädä maadö naane’, judhíoje’da aweichaame jönaawono dee ajäädöje aweichö jonno mataaco’jone, ñeene aca awaatötaajodö wetä. Töwaacö’je mma ñanno judhío, dhajäädö neene, täjööcomo neene aca ääwaacajoojai ñaato.

Iisadaaediita wääwanaacato’como

²⁵ Änwanno jimmä, edä owaanojöönö’jödö odhoowanääcäiñe yei’she wa, o’jodhe ätö’tajäätödööcomo queiñe: Ñanno iisadaaediitacoomo dhantai cöntäijamöicho, ñanno judhíojöncomo Wanaadi sotoije töwä’döaamo yääwanaacadööcomo wa’cä mma.

²⁶ Yaawäjeene tameedä iisadaaediitacoomo nääwanaacaato’de, Wanaadi a’deddu imennaajä wä’dödö naadöje. Edääje nä’döa yää imennaajä: Siyon ñanno Äwaanacaanei ne’a’de. Töwö Jacoowo weichö cone’nadiiyöcoomo nichocca’de.

²⁷ Mädääje chäwwäiñe neecammadö na’de, choone’nadiiyöcoomo chocca’jäcä öwwä; quee imennaajä nä’döa.

²⁸ Aashichaato wätunnä tömjo’ma töweichomjäcä Wanaadi tu’de’tännamooje iisadaaediita naato, änwanno awaacömaadöcoomoje. Yääje yeichaame Wanaadi ijummadööcomooje dea na, dhadai’choncomo jäcäinchädäiñe, töjaadonooje ñanno tödö’jocoomo weijäcä töwwä.

²⁹ Wanaadi tuntudu aniiñaca’da na, töna’dejja’jödö omjo’ma’da mmaja.

³⁰ Änwanno judhíojöncomo, jenaadä Wanaadi woije ei’cha mä’ja’quene; eduuwa judhíocoomo daja Wanaadi woije ei’cha naato. Wanaadi wentumje adheeneaato eduuwa.

³¹ Tönwanno judhíocoomo Wanaadi woije ei’cha naato eduuwa, äcuude wentumje töwäädantäjoodöcoomo wetä, eduuwa Wanaadi wentumje adheeneaatoodöje mmaja.

³² Wanaadi tameedä soto töwoijemjöncomooje cöne’toicho, tameedä wentumje eneedöcoomo wetä töwwä.

³³ Mädä wa’cä sö’je Wanaadi a’deddu nai, shejjedö mmaja, towaanojo’ne yeichö mmaja. Mädä wa’cä chö’tajäätödö nai, owaanäcä’da; iiñödö mmaja chö’tamme’que’jönö.

³⁴ ¿Änääcö dhowaanäcä nai Cajiichaana tö’tajäätödö? ¿Änääcö Cajiichaana onoowanoomadö’de?

³⁵ ¿Änääcö chäwwä u’jai ñai täjeemadö wetä yaawä?

³⁶ Wanaadi jonnoto we’ajä mädä tameedä naadö. Töwö dea cönnöi; chäwwonooje na dea. Aashicha wa’deutojooje Wanaadi ña yeichöödäje. Amén.