APOOCADIISI 5 - Wanaadi A'deddu

Jajeeda imongajä wei’jödö, Oweeja nnedö’cä wei’jödö mmaja

¹ Yaawä jajeeda imongajä weneeaqueene mude de’wä shuucu cönä’ja’dö enwawä, ämu’demjönö dö’se. Imennä’jödö cönä’jaacä dhaca, ye’wä mmaja. Tajoijo cönä’jaacä, aacä amoojatoode.

² Weneeaquennea yaawä amoode jäduujato; töcä’de cöneecamma’jaacä; cönä’döaacä: —¿Änääcö aashichaato töweiye nai, edä jajeeda a’ducaiye, ajoijo’jödö ajämjacaiye? quee cönä’döaacä.

³ A’que cönä’jaacä aashichaato caju ña, nono de’wä mmaja, nono nwacäi mmaja, yää jajeeda a’ducaanei, imennaajä eneedö wetä.

⁴ Öwö jooje waamoaaquene yaawä, aashichaato ’je’da yei’jödö weijäcä, yää jajeeda a’ducaanei, imennaajä eneedö wetä, a’de’tädö wetä mmaja.

⁵ Yaawä edääje ñanno inchoncomo jimmä cönä’döaacä öwwä: —Maamoi. Eneecä’ma, mä’dä Cawaadiimä, Judhá weichö, Dawí atöödö. Töwö cöne’jodheinchai jajeeda a’ducaadö wetä, aacä amoojatooto ajoijo’jödö ajämjacaadö wetä mmaja; quee cönä’döaacä.

⁶ Yaawä inchoncomo antawäiñe weneeaqueene Oweeja nnedö’cä, jiidi, amiiñä’caajä nönge. Cajiichaana mudei yö’tä töwö cönä’jaacä, ñanno aacäicheea’como amoode’na’como dö’täiñe mmaja. Yeetai cönä’jaacä aacä amoojato, aacä amoojato mmaja chäänudu. Yää chäänudu na aacä amoojato’como Epíiditu cu’tädö, tameedä nono weichö wa’cä Wanaadi nanontädö naatoodö.

⁷ Ñäädä Oweeja nnedö’cä cöntämä yaawä; jajeeda cönei ämu’demjönö dö’se mude de’wä cönä’ja’dö enwawonno.

⁸ Yaawä jajeeda eiya’jäcä chäwwä, ñanno aacäicheea’como amoode’na’como mmaja, ñanno tooni sotooto de’wä aacäicheea’como inchoncomo mmaja, tä’mudhe cönä’döicho Oweeja nnedö’cä je’taca. Ñanno inchoncomo waadäiñe cönä’jaacä jantuuda, cancudu mmaja, oodo döaajä, juu shimi’jotoojo tödau’cwaamö dhaca. Yää juu shimi’jotoojo na töwwä Wanaadi sotoi wa’deuwödööcomo cu’tädö.

⁹ Edääje cöneecanta’ña’to; eduuwaato wecanta’ñotoojo jäcä: Ñäädä mma amäädä aashichaato, jajeeda eijaicho, ajoijo’jödö ajämjacaajaicho mmaja. Mädä tödööjai ma äwääma’jödö weijäcä, adhaaquiyö que Wanaadi sotoije ñaa ejeema’jödö weijäcä mmaja, tameedä soto weichöcoomo wa’cä, tameedä aata’deucwemjöncomo’jödö, tameedä jata weichö waadoinchomo’jödö, tameedä nono weichö de’woncomo’jödö.

¹⁰ Cajiichaanaja’comooje ñaa mödööne, Wanaadi wwä töwa’deuwaamoje mmaja. Nono de’wä cajiichaanaje ñaa na’de; quee cöneecanta’ña’to.

¹¹ Wene’maaquene yaawä; jooja’como amoode a’dedducoomo wetaaquene, ñanno mude awoodhecääcä cönä’ja’todö, aacäicheea’como amoode’na’como awoodhecääcäiñe mmaja, inchoncomo awoodhecääcäiñe mmaja. Jooje cönä’ja’to ñanno amoode, wanna, ime’cu’tädööcomo cho’na’da.

¹² Töcä’de cöna’deuwa’to; edääje cönä’döa’to: Ñäädä mma mä’dä Aashichaato, Oweeja nnedö’cä, ñäädä cönäämajoichö. Töwö ñäädä jäduujatooje tä’täämö, tönsomaacatooje tä’täämö mmaja, töseedujä’natooje täcammaamö mmaja. Ñäädä mma töwö tameedä tödööjaicho. Töwö na aashicha tödööto’me, o’jodhaatoje tä’täämöje mmaja, aashicha wa’deutojooje mmaja; quee cönä’döa’to.

¹³ Yääje mma yaawä tameedä Wanaadi namoode’nädö wa’deuwödööcomo wetaaquennea, caju ñancomo mmaja, nono de’woncomo mmaja, co’dhejeiñancomo mmaja, dama ’cwaca naatoodö mmaja, tameedä. Tönwanno cönä’döa’to: Mä’dä mude de’wä shuucu naadö, mä’dä Oweeja nnedö’cä mmaja, aashicha wa’deutojooje naato, aashicha tödööto’me mmaja, o’jodhaatoje tä’täämöje mmaja, jäduujatooje täcammaamöje mmaja, yeichöödäje; quee cönä’döa’to.

¹⁴ Ñanno aacäicheea’como amoode’na’como cönä’döa’to yaawä: —Mädääje na; quee. Ñanno tooni sotooto de’wä aacäicheea’como inchoncomo tä’mudhe cönä’döicho yaawä; cönwa’deme’ca’to ñäädä Yeichöödoto.