APOOCADIISI 10 - Wanaadi A'deddu

Jajeeda’cä wei’jödö

¹ Yaawä weneeaqueene anejja amoode daja, jäduujato; caju ñanno cönä’taacä ca’dutu do’tai, jasuudi iju’jädö ejoodhe. Ijeedö weijotä cönä’jaacä, shii wa’cä. Ijoodedö cönä’jaacä wa’to emjannaajä nönge.

² Chänwawä cönä’jaacä jajeeda a’ducaajä’cä. Dama de’wä cönäätajai yaawä tu’judu ämu’demjönö que; ämu’dato que cönäätajai nono de’wä.

³ Töwö töcä’de cöncä’tömöi yaawä, mado we’douwödö töweiye naichö wa’cä. Chä’tönga’jäcä cöneetötöömai yaawä aaca amoojatoode.

⁴ Yeetötööma’jäcä imennä’se wä’jaaquene yaawä. A’deu wetaaquene yaawä caju ña; edääje cönäätaacä: —Tacaade’da mmaane nei’ñojo mädä yeetötöömadö wa’deuwö’jödö; mämmennäi; quee cönäätaacä.

⁵ Yaawä ñäädä amoode, dama de’wä jiidi weneeaquennö, nono de’wä ijaato yäätajaajä, tamäädö ämu’demjönö que cönänwojoi caju ñadäädä.

⁶ Töwö cöna’deuwöi yaawä ñäädä Yeichöödoto eetö joi, ñäädä caju tödöönei’jödö, nono mmaja, dama mmaja, tameedä dhacaiñe naatoodö tödöönei’jödö mmaja. Ñäädä eetö joi cöna’deuwöi näädä amoode; edääje cönä’döaacä: —Eduuwa mma yeeja’do’tojo na.

⁷ Yää anootoi’chädö awä dea, aacä amoojatooto amoode wwä waajänta’jäcä töjaanau’cwai etöödö, Wanaadi necamma’jödö owaanojöönö’jödö neja’dä’a’de, yää tanoonö wwäiñe cöneecammajäätöichö, ñanno ta’deddu ecammajä’nnamo; quee cönä’döaacä amoode.

⁸ Yaawä yää a’deu caju ña öwwä cönääta’dö dea cönäätai chea öwwä; cönä’döaacä: —Jajeeda’cä imomjacaajä eicha, mädä amoode dama de’wä yäätajaajä enwawä naadö, ñäädä nono de’wä ijaato yäätajaajä naadö; quee cönä’döaacä öwwä.

⁹ Weiyaqueene yaawä amoode döiña; yää jajeeda we’ca’ne chäwwä. Yaawä töwö cönä’döaacä: —Edä; täu’cwä. Awenwaca tutuune na’de, äntaca ta’cwötö’dhe yei’jödö weichaame, wanä weccudui wa’cä; quee cönä’döaacä.

¹⁰ Yaawä yää jajeeda’cä weiñe amoode enwawonno. Wäu’ne yaawä. Öntaca ta’cwötö’dhe cönä’jaacä, wanä weccudui wa’cä. Wenwaca yä’döa’jäcä mmaane tutuune cönä’jaacä.

¹¹ Edääje cönäätäcammai yaawä öwwä: —Jooje soto jäcäiñe ecammajo’tojo äwwä na, Wanaadi nutuudu woije, ñanno tameedä jata waadoinchomo’jödö, ñanno aata’deucwemjöncomo’jödö jäcäiñe, chaajichaanaichomo jäcäiñe mmaja; quee cönäätäcammai öwwä.