2 TIIMOTEO 3 - Wanaadi A'deddu

Anooto ataamejai yä’döa’jäcä soto weicho’como

¹ Edä mmaja odhoowanääcä tödööcä: Anooto ataamejai yä’döa’jäcä jooje conemjönö na’de.

² Yaawä soto naato’de töwwäädä mma yä’jummadööcomo, jödaata jäcä töwäätätäädä mmaja, o’jodhe tötö’tajä’e mmaja, töwäätuujacoone’da mmaja. Tönwanno cone’da na’deuwaato’de Wanaadi jäcä; tumö a’deddu aneeta’da naato’de, senö a’deddu aneeta’da mmaja. Tö’wa’tä’jödö änwa’demeecö’da mmaja naato’dede, Wanaadi onnontä’da mmaja.

³ Tumjunne’da mmaja naato’dede, wentumje äneetä’da mmaja, wätunnä dha’me mmaja, tujuunucoomo woije mmaja, tääde’cwadeiñe mmaja, aashichaato ämjumma’da mmaja.

⁴ Tönwanno yääjönö wa’co’como wätäncu’tädööje mmaja naato’dede, tönnecoone’da mmaja, töweewacööma mmaja. Tönwanno töshiiye weiñä nijummaato’de Wanaadi ämjumma’da tödööene.

⁵ Wanaadi weichö töne’tä’jödö mma naato’de, ijäädudu mmaane tömjome’dä. Tameedä yääja’como soto jadäiñe mma mei’che.

⁶ Ñanno yääja’como soto e’sacaiñe töwoomonge weneeneto wodiiñamo ta’seuda’como encu’tädööcomo wetä. Ñanno wodiiñamo jooja’como choone’nadiiyö; tönwanno tösaadijange naato änneene’jödöödä conemjönö ijummadö que.

⁷ Tönwanno töwoowanooma’se’jödö mma, yaawääne’ chäänöngato dhowaanäcäiñe ä’dö’daane’.

⁸ Yääja’como chäänöngato nichu’de’taato, jöwaiñamo Moisé cuntu’de’ta’todööje mmaja, ñanno Jaane, Jamjede mmaja. Tönwanno chö’tajäätödööcomo töweecone’ma na, chäänönge’da mmaja naato dea ecamjödö jäcä.

⁹ Yääje yeichöcoomo jooje ejaamö’da na, i’jedööcomo täne yeijäcä tameedä soto wwäiñe, ñanno Moisé cuntu’de’ta’todö cönä’ja’todööje mmaja.

Paudo wwä Tiimoteo wätuuja’jödö

^10-11 Amäädä mmaane öwö noowanoomadö odhoowanääcä na, öwö weichö mmaja, nencano’tädö mmaja, neecamjödö mmaja, aashicha tönshinchä weichö mmaja, wä’jummanä ’je weichö mmaja. Wäätä’maminchajoodö tönshinchä weichö mmaja odhoowanääcä na dea, wäntunamjödö mmaja. Amäädä odhoowanääcä na tameedä jääcä cöneeja’dätäichö Antiyooquía ña, Icooniyo ña mmaja, Diitada ña mmaja, yää iiña wäätä’maminchajo’jödö. Tameedä yää jonno Cajiichaana yeewanaacane.

¹² Tameedä Jesuuquidiito woije töwei’sha’como nätä’maminchajaato’de.

¹³ Ñanno conemjöncomo mmaane, äncu’tännamo mmaja, cone’da töweichöcoomo jonno jooje’cä mma necoone’maato’de; äncu’tännamo tönwanno, yäätäncu’täja’como mmaja.

¹⁴ Amäädä mmaane owoowanooma’jödö nöngeedä eichä, yää chäänönge mecaanö’nedö, odhoowanääcä yeijäcä odhoowanoomanei’jödö.

¹⁵ Mude’cä’cäje aweichö jonnoto’jödöödä Wanaadi a’deddu odhoowanääcä na. Yää Wanaadi a’deddu asejje’täjai ña, adhe’se’täjai ña dea äwääwanaacatoojo wwadäädä, Jesuuquidiito ecamjödö jadä tödööa’jäcä.

¹⁶ Tameedä Wanaadi a’deddu imennaajä Wanaadi woije tömennä na. Yää aashicha na woowanoomatoojoje, wä’wätuujatoojoje mmaja, wä’sa’duminchatoojoje mmaja, aashicha weiñä jäcä wäämu’catoojoje mmaja,

¹⁷ ñäädä Wanaadi anoonö chäänönge yeichö wetä, töweesomaajä’e yeichö wetä mmaja tameedä aashichaato dödö jäcä.