2 PEEDHODO 3 - Wanaadi A'deddu

Cajiichaana Jesuuquidiito we’tojo

¹ Jimmä umjummadö, edä aacädeeto jajeeda wimenna äwwadäädäiñe. A’nädä ömmennädö aca ätö’tajäätödööcomo wemjaca ätö’tamme’jodööcomo que.

² Ätö’tajä’täcä ñanno Wanaadi wa’deuwödö ecammannamo aashicha’como necammajäätö’jocoomo jäcä, Cajiichaana waanontädö jäcä mmaja, ñäädä Cäwaanacaaneichomo. Ñanno anonta’como odhoowanoomatääne yää Cajiichaana waanontädö jäcä.

³ Edääje äwwäiñe wä’dö’se wa awa’deene: Anooto ataamejai yä’döa’jäcä anejjacoomo soto naato’de Wanaadi enno’jä’nnamooje; conemjönö tumjummadööcomo woije mma naato’de.

⁴ Edääje nä’döaato’de: “¿Äsha’cä Quidiito nä’döi, ñäädä yeejödö cönäätäcamma’dö? Chäänönge dea dajaane weiñä weneene, cadai’choncomo’jödö wä’jajo’jocoomo jonnoto’jödöödä, edä nono tödö’jödö jonnoto’jödöödä töweiye cönä’ja’döje dea;” quee nä’döaato’de.

⁵ Tönwanno töwoijeiñe dea äntö’tammecö’da naato jenaadä Wanaadi a’deddu woije caju wamoodeta’jödö tuna que, nono wamoodeta’jödö mmaja na’cwacanno.

⁶ Tuna que mmaja tameedä jenaado’jocoomo cönännamjöicho, yää tunaamä cönä’ja’dö canaadöje.

⁷ Wanaadi a’deddu woije mmaja edä caju eduuwa naadö tödhau’cwaamöje tösooma na, edä nono mmaja. Yaawä nä’dhau’cwaja’de, wätä’maminchajootojo anootoi’chädö awä, Wanaadi woijemjöncomo nä’ja’aato’dedö awä.

⁸ Jimmä umjummadö, odhoowanääcäiñe tödöötäcä tooni anooto Cajiichaana wwä miide weduuto nönge yeichö; miide weduuto ’quene tooni anoototo nönge na chäwwä.

⁹ Töwö Cajiichaana encwainchejö’da na töwääcamma’jödö jäcä, anejjacoomo yencwainchejöödö töneecamma weneenetoodöje’da. Wentumje cäne’madööcomo mädä chäwwä, tooni’chä yännamjö’se’da töweijäcä, tameedäädääne tötö’tajäätödööcomo sha’dumincha’se.

¹⁰ Cajiichaana we’tojo anooto ne’a’de yoomocöödö ’nawä, coijai tämeenato weejödö töweiye naichöje. Yaawä caju nataamea’de shoodö töwääta naichö wa’cä. Tameedä caju ña naadö niyaatua’de; nono mmaja niyaatua’dede, tameedä ye’wä naatoodö mmaja.

¹¹ Tameedä edä naadö töwaatameemöje mma na. Yääje yeijäcä aashichaane eichäcä, Wanaadi woijeene.

¹² Wanaadi we’tojo anootoi’chädö womo’cancädä eichäcä, ene’jancädä mmaja. Yää anooto awä caju nemjanga’de, töwaatameedöje mma; tameedä caju ña naadö mmaja nichuunata’de tödhaatudu que.

¹³ Cönwanno mmaane Wanaadi necamma’jödö nönge dea anejjaane quiiyomo’cato, caju eduuwaatoone, nono eduuwaato mmaja, yää chäänönge weiñä ’jano, aashichaato ’jano mmaja.

¹⁴ Yääje yeijäcä jimmä umjummadö, yää tönwomo’que aweichomjäcä, täncanoode’da owoojodööjoto’como encano’tätääcä, conemjönö ’je’da mmaja, töjöiye’da mmaja.

¹⁵ Odhoowanääcäiñe tödöötäcä cöwääwanaacato’comooje yeichö mädä Cädhaajotoncomo Jesuuquidiito wwä cönshinchädööcomo. Mädääje dea cöjimmotoncomo tujunnato Paudo cömmennäi äwwadäädäiñe, Wanaadi nutuudu tösejjedö woije.

¹⁶ Mädääje dea töjaajedai tömmennä weneene töwö, mädä jäcä imennädö waadäi. Aneetaja äätaque’jönö immennä’jödö weneene. Ñanno towaanojo’nemjöncomo, jäduujemjöncomo mmaja, yää immennädö äätaque’jönö tönaashichuudäiñe weneeneto töwännanö’to’comooje mma, anejja Wanaadi a’deddu imennaajä tönnöe weneenetoodöje dea.

¹⁷ Dhowaajodä äwwäiñe täcamma na, jimmä umjummadö. Yääje yeijäcä äädai’chätääcä, conemjöncomo nencu’tädö que mma mä’sadiijannä’cajooto’no, jäduuje aweichöcoomo jonno äjääduque’to’node.

¹⁸ Töwaatö’nä’eene aatö’nä’täcä Cädhaajotoncomo Jesuuquidiito nutuudu aashichaato que, ñäädä Cäwaanacaaneichomo, töwö odhoowanääcäiñe tödöödö que mmaja. Aashicha wa’deutojooje töwö na, eduuwa yeichö jonno yeichöödäje. Amén.