2 PEEDHODO 1 - Wanaadi A'deddu

Yaajäntä’jödö

¹ Öwö, Simón Peedhodo, Jesuuquidiito anoonö, ñaanontädö mmaja, äwwadäädäiñe wimenna, änwanno ñaa necamjödö aashichaato nönge mmaja ecaanö’nnamo. Yää aneecamjödööcomo mejoodötääne aashicha Jesuuquidiito weichö woije, ñäädä Cäwaanacaaneichomo, Cöwaanadiiyöcoomo mmaja.

² Aashichaato, täncanoode’da aweicho’como mmaja, äwwäiñe yeejamö’sa wa, Wanaadi odhoowanääcäiñe tödöödö que, Cädhaajotoncomo Jesuuquidiito odhoowanääcäiñe tödöödö que mmaja.

Quedeiyente weichöcoomo

³ Töwö Wanaadi töjäädudu que cöwwäiñe cuntui tameedä aashicha cöweicho’comooje tujunnato, tameedä töwoije cöweicho’comooje mmaja. Töwö mädä cönnöi ca’dejjaneichomo’jödö cöwwäiñe ecaademeecödö que, ñäädä aashicha töweichö woije ca’dejjatäänedö, jäduuje töweichö woije mmaja.

⁴ Yääje yeijäcä töwö Jesuuquidiito cuntui cöwwäiñe aashichaato ecammaajä, chäänöngato mmaja. Yää ecammaajä que änwanno Wanaadi weichö ejoodöjai maato, edä nono de’wono conemjönö jonno määnejeetäiye yaawä, yää chäänöngemjönö ijummadö que naadö.

⁵ Yääje yeijäcä ä’jädu’tätääcä, aneecamjödööcomo jadä aashicha weiñä mejoodöjootäiye; yää aashicha weiñä jadä towaanojo’ne weiñä mmaja mejoodöjootäiyede;

⁶ towaanojo’ne weiñä jadä ’quene, wäädai’chänä; wäädai’chänä jadä ’quene, yäätäädä tö’tajä’nä; yääje weiñä jadä ’quene Wanaadi woije weiñä;

⁷ Wanaadi woije weiñä jadä ’quene, töweichacoono jäcä ta’cwaiñe weiñä daja mejoodöjootäiyede; töweichacoono jäcä ta’cwaiñe weiñä jadä ’quene wä’jummanä daja.

⁸ Tameedä mädoocomo äwwäiñe yeiya’jäcä, äjääcäiñe yeejanga’jäcä mmaja, töwäädämma’da aweichöcoomo na’de, aweicho’me’da’da mmaja na’dede mädä Jesuuquidiito odhoowanääcäiñe naadö.

⁹ Ñäädä mädoocomo ’jemjönö mmaane tänuuque’da na, amoinche aneene’da mmaja. Töwö tötö’taque’e na jenaado’jä töcoone’nadiiyö jonno töcocca töweichö.

¹⁰ Yääje yeijäcä jimmä, jooje’cä jeene ä’jädu’tätääcä, chäänönge odhoowanääcäiñe yeichö wetä Wanaadi na’dejjadööje aweichöcoomo, ñe’ta’jödööje aweichöcoomo mmaja. Yää tödööa’jäcä äwwäiñe shaadijaamö’da eijai maato yeichöje.

¹¹ Yaawä adheemu’däneichomo ’je’da Wanaadi aweichöcoomoje ayöödöaato’de Cädhaajotoncomo sotoije, ñäädä Cäwaanacaaneichomo Jesuuquidiito.

¹² Yääje yeijäcä weiñäje ätö’tamme’jodööcomooje dea wäänene mädä jäcä, odhoowanääcäiñe yeichaame, jäduujeedä aweichaameiñe mmaja mädä chäänöngato äwwäiñe naadö jäcä.

¹³ Chäänönge öwwä chö’tadö na nudä waadawäädä äwäätuujadööcomooje weichö, ätö’tamme’jodööcomo que,

¹⁴ yoowanääcä yeijäcä amoinche’da wäämatoojo yeichö, Cädhaajotoncomo Jesuuquidiito öwwä cöneecamma’döje dea.

¹⁵ Yääje yeijäcä öncäcäädä yeichöje ätö’tato’comooje mmaja wödööa dea.

Quidiito nnataadö enennamo’jödö

¹⁶ Wätunnä iiña mmädooto ñaa nejoodödö que’da äwwäiñe ñaa cöneecammajäätöi Cädhaajotoncomo Jesuuquidiito jäduudu jäcä, yeejö’jödö jäcä mmaja. Täneene ñaa cöneeneaacä iiñataadö.

¹⁷ Yää ñaa cöneeneaacä Cumöötoncomo Wanaadi aashicha chääjäcä cöna’deuwa’dawä, iiñataadö cöneenejoichawä. Yaawä Wanaadi wa’deuwödö cönäätaacä ñaa wwä, ñäädä Aashichaato: “Önnedö umjummadö mä’dä; ta’cwaiñe wa chääjäcä;” quee cönäätaacä.

¹⁸ Ñaa cöneetaacä yää a’deu caju ñano we’ajä, chääjadä ñaa weiyeetö’da yää jöö tönoiñato de’wä.

¹⁹ Yääje yeijäcä täcaanö’emje jeene na yää Wanaadi wa’deuwödö ecammannamo nimenno’jocoomo. Yää imennaajä na adhaawa tööjano’taca yeijoneije töweiye naichöje; yääje yeijäcä yoije eijai maato, yaawaanadö jonaane, shidiichä yaawaanadaawono adheewanööcomo weijoneije yä’dödö wa’cä.

²⁰ Odhoowanääcäiñe tödöötäcä Wanaadi a’deddu soto nichö’tammecöödö woije ätääcammajai’cha yeichö;

²¹ soto woije yoojodö’jödööjönö, Wanaadi woijeene ñanno dhanwaacomo aashicha’como cöneecamma’to, Epíiditu Santo ne’se’tädööje.