2 JUAN 1 - Wanaadi A'deddu

Wä’jummanä eneejodö

¹ Öwö, ansiyaano, wimenna äwwadäädä, amäädä jaaduichö, Wanaadi neichö, ännacoomo wwadäädäiñe mmaja. Öwö mämjummaato chäänöngato que, öwö mmajöönö, tameedä chäänöngato dhowaanoco’como mmajaane.

² Mämjummaato chäänöngato cöwwäiñe naadö woije, yää yeichöödäje cöwwäiñe naadö.

³ Cumöötoncomo Wanaadi, Cajiichaana Jesuuquidiito mmaja, ñäädä Cumöötoncomo nnedö, aashichaato nödööaato äjääcäiñe, wentumje mmaja adheeneaato dea, täncanoode’da aweicho’como mmaja nu’aato dea, chäänöngato jadä, wä’jummanä jadä mmaja.

⁴ Jooje ta’cwaiñe wä’jaaquene dhantai ännacoomo chäänöngato wätunnä woije yeichöcoomo edanta’comjäcä öwwä, Cumöötoncomo Wanaadi canontätäänedööje dea.

⁵ Edääje wä’döa äwwä, amäädä jaaduichö: Cä’jummatäiye cönwannoje dea. Eduuwaato waanontänääjönö mädä äwwadäädä wimennaadö, yaajäntä’jödö jonnoto’jödöödä cöwwäiñe naadö deaane.

⁶ Wä’jummanä eneejodö nai Wanaadi waanontädö tödöödö que. Edä yää ñaanontä’jödö, yaajäntä’jödö jonnoto’jödöödä metaatäneedö dea: Wä’jummanä ’je eichäcä; quee naadö.

Ñanno äncu’tännamo

⁷ Jooje äncu’tännamo naato edä nono de’wä, Jesuuquidiito sotooje yeejö’jödö ijoome’dännamo. Ñäädä yääjato wä’dödö äncu’tänei ñäädä, Quidiito tu’de’tänei.

⁸ Äädai’chätääcä, äncana’cadööcomo mma manennanö’cato’no, yä’jödöödääne adheeje’jocoomo eiye.

⁹ Ñäädä shaadijangajä, Quidiito wätunnäi ija’do’jonei, Wanaadi ’je’da na ñäädä. Ñäädä Quidiito wätunnäi chäänönge tödöönei mmaane, ñäädä Wanaadi ’je na, Iiñedö ’je mmaja.

¹⁰ Adöiñaiñe anejja wöta’jäcä, edä wätunnä nönge’da ñeecammajäätödö yeiya’jäcä, manaamonno’jotäi’che ämmaichomo taca; ta’cwaiñe meichäi’che chääjäcä.

¹¹ Ñäädä chääjäcä ta’cwaiñato choone’nadiiyö jäcä i’wa’täneije na.

Yä’ca’jödö

¹² Jooje äwwäiñe täcammajä’emö naadö’je öwwä, yaawääne’ jajeeda jäcä ämmennä’da wa. Öwö jaiñoone adöiñaiñe öötä’se wa adheeneiñe, ääje’tacaane ca’deujä’täiye, chääwa’cä jeene ca’cwaniiyöcoomo eiye yaawä.

¹³ Ajiishö nnacoomo ta’deujocoomo nadääjaato äwwadäädä, ñäädä Wanaadi neichö. Amén.