2 CODINTIYO 9 - Wanaadi A'deddu

Quedeiyente i’wa’toto’como i’jummadö jäcä Paudo nimennä’jödö

¹ Äwwadäädäiñe imennäjai’cha weichaame yää quedeiyente i’wa’toto’como i’jummadö jäcä,

² yoowanääcä yeijäcä änwanno deaane tödö’se aweichöcoomo. Mädääje dea aashicha adheecammajä’täiñe wäänene Maasedooniya ñancomo wwä. Edääje töwä’döe wäänene chäwwäiñe: “Ñanno Acaaya ñancomo awa’de wedu cönä’ja’dö awooto’jödöödä chäänönge naato mädä tödöödö jäcä;” quee töwä’döe wäänene äjääcäiñe. Yää tödö’se aweichöcoomo eta’jäcä canno Maasedooniya ñancomo mmaja tödö’se naato dea eduuwa.

³ Yääje yeichaame, yää tödö’se aweichöcoomo yoowanääcä yeichaame, canno quedeiyentecoomo wecammaatoodö wanontaato adöiñaiñe, töwäädämma yeichö queiñe yää aashicha äjääcäiñe wa’deuwö’jödö, chäänöngeene meichäiye yää jäcä, maneecammajä’täneedöje deaane.

⁴ Anejjacoomo Maasedooniya ñancomo eetonno jaadä adöiñaiñe iicha’comjäcä naadö naane’, chäänönge’da adheedanta’comjäcä töjöiye eijai ñaa na yaawä töwäädämma chäänönge aweiyaatäiñe ecamjö’jödö weijäcä ñaa wwä. Änwanno mmaja töjöiye eijai maato dea yaawä.

⁵ Yääje yeijäcä canno quedeiyentecoomo wwä ya’deune yoowajo adöiñaiñe iichädööcomo wetä, yää täjemjönööje tu’emö aneecamma’jocoomo choonecaadö wetä yoowajo. Yaawä ööta’jäcä tösoomajä’e ani’jumma’jocoomo eijai ña; ämjummadööcomo woijatooje eijai ña yaawä, anontaajäje’daane.

⁶ Edääje wä’döa äwwäiñe jimmä, ñäädä äächädämma ñaatö’tänei äächädä mmaja namu’ca’dede; jooje ñaatö’tänei mmaane jooje namu’ca’dede.

⁷ Awaadäiñe u’jai maato äntö’tammecöödöcoomo woije, utu’se’da töweichö que’daane, anontaajäje’da mmaja. Wanaadi wacö’je ñäädä ta’cwaiñe töweiyancädä u’nei.

⁸ Wanaadi tameedä aashichaato u’jai ña äwwäiñe, ewontancädä’da; yaawä chääwa’cä äwwäiñe na’de äwwäiñe tujunnato; chääwa’cä mmaja na’dede aashichaato tödööemööje.

⁹ Edääje Wanaadi a’deddu imennaajä nä’döa: Töwö ewontancädä’da tunu’e weneene a’ca’como wwä; yeichöödä töweiyemööje na yää aashichaato iiñö’jödö; quee imennaajä nä’döa.

¹⁰ Wanaadi ñäädä dhadöödö tönaatö’täämö u’nei, äwanshi u’nei mmaja; töwö tameedä anaatödööcomo nu’a’de, natö’nä’ja’dede. Töwö aashichaato ännödööcomo nejannä’ca’dede.

¹¹ Yaawä tameedä aashichaato äwwäiñe na’de, ewontancädä’da äwwäiñe utuudu wetä anejjacoomo wwä. Yaawä ñaa wwä ani’jumma’jocoomo adääja’jäcä äwwäiñe, ñanno quedeiyentecoomo aashicha na’deuwaato’de Wanaadi wwä.

¹² Mädä aashichaato cöödöaatoodö quedeiyentecoomo wäntunamjödööcomo i’wa’tädö mmajöönö mädä; yää jäcäinchädä aashicha Wanaadi wwä soto wa’deuto’como queejodööjaato dea.

¹³ Tönwanno aashicha Wanaadi jäcä na’deuwaato’de chäänönge Quidiito a’deddu tönnöe aweichöcoomo äwäänejo’jocoomo weijäcä. Wanaadi jäcä aashicha na’deuwaato’dede töwwäiñe äntuduucomo jäcäinchädä, anejjacoomo wwä äntuduucomo jäcäinchädä mmaja.

¹⁴ Tönwanno ajummaato’de yaawä, äjääcäiñe Wanaadi wwä na’deuwaato’dede Wanaadi nutuudu aashichaato jaiñoone äwwäiñe yeijäcä.

¹⁵ Aashicha wa’deutojooje Wanaadi ña, cöwwäiñe ecammatoojo ’jemjönö inchudu naadö jäcäinchädä.