2 CODINTIYO 8 - Wanaadi A'deddu

Tamääne’da weiñä

¹ Jimmä, äwwäiñe ecammajäätö’se wa Wanaadi nutuudu aashichaato quedeiyentecoomo Maasedooniya ñancomo wwä.

² Tönwanno jooje toneejato’como que töwäntunaanö’taameiñe, jooje ta’cwäiñe weneeneto. Töjöödataicheiñe’da töweichaameiñe mmaja tamääne töweiyancädäiñe’da jooje tunu’e weneeneto, töjöödataicha’como wa’cä.

³ Tönwanno utu’se töweiyancädäiñe cuntuicho töwwäiñe cönä’ja’dö ’cäwa’cä, cho’jodhe’cä mmaja. Öwö yoowanääcä na yääje yeichö.

⁴ Tönwanno jooje cönäätä’catoicho ñaa wwä quedeiyentecoomo i’wa’tädööcomo jäcä.

⁵ Ñaa nichö’tammecöödö e’jodhe’cä mmaja cönnöicho yaawä. Awa’de Wanaadi woije cönä’tuicho Cajiichaana Jesuuquidiito wwä, yää ’jeje ñaa wwä mmaja.

⁶ Yääje yeijäcä ñaa cöna’deuwöi Tiito wwä töwwä acoichajoodö wetä ajaadäiñe töweichö aashichaato tönaajäntä’jödö, yää jödaata i’jummadö.

⁷ Änwanno anejja jäcä a’que’da’da maato: ecamjödö jäcä, ecammajäätödö jäcä mmaja, sejje jäcä mmaja, chäänönge tödööjätö’se weiñä jäcä mmaja, ñaa jummadö jäcä mmaja. Yääje yeijäcä yää aashichaato tödöödö wecammaadö jäcä mmaja a’que’da’da eijai maato dea.

⁸ Adhaanontädööcomooje’da yääje wä’döa. Chaanönge anejja quedeiyentecoomo weichö wecammajä’a äwwäiñe, wä’jummanä chäänöngato äwwäiñe töweiye yeichö eneedö wetä.

⁹ Odhoowanääcäiñe aashicha Cädhaajotoncomo Jesuuquidiito nödö’jödö. Tameedä töwwä yei’jödö weichaame töwö äjääcäinchädäiñe a’cato nönge cönä’döjoi, tameedä äwwäiñe töweiye yeichö wetä yaawä töwö a’cato nönge yä’döjo’jödö que.

¹⁰ Edääje öwö tö’tajäätödö na mädä jäcä; aashicha aweicho’comooje edääje wä’döa. Awa’de wedu cönä’ja’dawä änwanno tödö’se aweichöcoomo que maajäntätääne mädä tödöödö.

¹¹ Yääje yeijäcä eduuwa acoichajoojai maato mädä tödöödö, awa’deene maajäntätäänedaawä tödö’se mä’ja’quennö wa’cä mmaja. Awaadäiñe töweiye aweichöcoomo woije u’jai maato.

¹² Utu’se töweichö que u’a’jäcä, töwö Wanaadi yaacö’je na yääje utuudu. Töwwä töweiye yeichö woije mma tunu’jo töwö Wanaadi; töwwä töweiye yeichö e’jodhe änu’jo’da.

¹³ Mädä anejjacoomo mi’wa’taatoodö änwanno äwäntunaanö’to’comooje yei’she’da wa.

¹⁴ Äänönge awei’sheiñe weijäcä mmädääne yääje wä’döa. Eduuwa jooje äwwäiñe yeijäcä i’wa’täjai maato a’que yeichöcoomo. Aneedawä chäwwäiñe jooje töweiye yeichawä tönwanno daja ä’wa’täjaiñe naato a’que aweiya’comjäca. Mädääje äänöngeiñe eijai maato,

¹⁵ Wanaadi a’deddu imennaajä nä’döaadöje: “Ñäädä joojato’jödö wwä äädetö’da cöneiyacä; ñäädä joojemjönö wwä mmaane a’que’da’da cöneiyacä;” quee imennaajä wä’dödö.

Codinto ña Tiito wötooto’como jäcä Paudo nimennä’jödö

¹⁶ Wanaadi cuntui Tiito wwä ajummato’como, öwö mämjummaatoodö wa’cä dea. Yääje yeijäcä Wanaadi jäcä ta’cwaiñe wäänene.

¹⁷ Töwö Tiito cöneetai töwwä wa’deuwö’jödö; yääje yeijäcä töwoije adheeneiñe nöta, töwö mmädääne töötä’se töweijäcä.

¹⁸ Tiito jadä ñaa nenno’ja anejja quedeiyente mmaja, tameedä quedeiyentecoomo wwä tacaadato, chäänönge yeetadaawa’cajoodö weijäcä aashichaato wätunnä ecammajäätödö jäcä.

¹⁹ Quedeiyentecoomo dea ñäädä cönaanontoicho ñaa jadä töwaademaamöje, ñaa ’wa’täneije mmaja edä tadaawaaju aashichaato ñaa nödööaadö jäcä. Yää ñaa nödööa Cajiichaana Jesuuquidiito aashicha yeichö ecaademeecödö wetä, mädä tödö’se aweichöcoomo ecaademeecödö wetä mmaja.

²⁰ Anejja wwä töwäämentäjo’se’da ñaa na mädä jödaata täjemjönö i’jummaajä jäcä, ñaa ni’jummajaadö.

²¹ Chäänönge töweichö ñaa nencano’ta, Cajiichaana Jesuuquidiito owaadäädä mma’da, soto owaadäädäiñe mmajaane.

²² Anejja quedeiyente mmaja ñaa nanonta dea canno Tiito jadäiñe. Chäänönge yeichö ñaa cöneedantäi tameedä iweichö jäcä. Jooje adöiñaiñe töötä’se na, jooje adhencano’tätäiñe töweijäcä.

²³ Anejjacoomo wwä adheecamma’ja’comjäcä, öwö weichacoonoje Tiito weichö ecammatääcä’de, äjääcäiñe weetadaawa’cajoodö jäcä ö’wa’täneije. Tiito jadä nötaatoodö jäcä adheecamma’ja’comjäcä jeiñe mma, quedeiyentecoomo nanontädööje yeichöcoomo ecammatääcä’de. Tönwanno aashicha Quidiito weichö neneejaato.

²⁴ Yääje yeijäcä chäwwäiñe eneejotääcä’de tumjummaiñe aweichöcoomo, tameedä quedeiyentecoomo dhowaanäcäiñe yeichö wetä yaawä; chäänönge äänejootäcä, äjääcäiñe töwa’deuwe ñaa weneenedööje dea.