2 CODINTIYO 12 - Wanaadi A'deddu

Töwäänemjönö töneene’jödö jäcä Paudo nimennä’jödö

¹ Dötä’da yeichaame mädääje wä’wa’deme’ca. Eduuwa äwwäiñe wecammajäätö’ñojo Cajiichaana Jesuuquidiito niyääne’cajo’jödö jäcä, öwwä ñeenejo’jödö jäcä mmaja.

² Amoojadooto de’wä aacäichea wedu na eduuwa dhanwa ene’jödö öwwä, quedeiyente töwö. Ñäädä cönaatadoojoi aaduwaawoto caju de’cäi tödööene. ¿Aaquene ca cöntännö jääcä, yä’jödöödä jeiñe mma’da ca’dö jääcä, yäänetöödö ai jeiñe mma? Wanaadi mma dhowaanäcä na yääje yeichö.

^3-4 Yoowanääcä na Aashichaato ña yaatadoojo’jödö; yaawääne’, yoowanääcä’da na chääjö neene wataadojo’jödö jeiñe mma, yäänetöödö mma jeiñe mma; Wanaadi mma dhowaanäcä na yääje yeichö. Iiña, Aashichaato ña, ñäädä dhanwa cöneetai a’deu owaanojöönö, soto ecammajä’jaichojöönö.

⁵ Ñäädä dhanwa nöngato jäcäinchädääne ä’wa’deme’jai wa; öwö weichö mmaane ya’deme’jai’cha wa; jäduuje’da weichö mmaane ya’deme’jai wa.

⁶ Yaawääne’, wä’wa’demeecö’se weiya’jäcä iiña mmädä’da ä’wa’deme’jai wa, chäänöngeene wa’deuwajä. Yääje yeichaame ä’wa’demeecö’da wa, anejja soto mma wäänedö e’jodhe yöödö’no yaawä, töwwä yeetadö e’jodhe mmaja.

⁷ Yää Aashichato ña neene’jödö aashicha cönä’jaacä, jooje; yääje yeijäcä jooje deja yää jäcä o’jodhe tö’tajäätödö queiñe se’nato öwwä cönä’tui, wesooca’jä töweiye naichö nöngato. Yää cönä’jaacä Caajuushawa woijato, yuunacaaneije.

⁸ Yää shancwajootojo aaduwaawäde Cajiichaana wwä we’ca’nedö’je,

⁹ edääje mma töwö cönä’döaacä öwwä: “Öwwä ä’wa’tädö mma chääwa’cä äwwä na; untudu soto jäduudu jooje’cä nääneja jäduuje’da soto weichawä;” quee mma Cajiichaana Jesuuquidiito cönä’döaacä öwwä. Yääje yeijäcä waacö’je mma na jäduuje’da weichö, Quidiito jäduudu jääcä yeejamö’se weijäcä.

¹⁰ Yääje yeijäcä mädä Quidiito jäcäinchädä töiñetunca wääneneedö waacö’je mma weneene, yää jäduuje’da weichö, anejja wwä yeuwödö jeiñe mma, wäntunamjödö jeiñe mma, wäätä’maminchajoodö jeiñe mma, wä’yunaacajoodö jeiñe mma. Jäduujemjönö nönge tö’tadaawä yaawääne jäduuje wäänene.

Codinto ñancomo quedeiyente jäcäiñe Paudo tö’tajäätö’jödö

¹¹ Cujeeje mädääje ya’deuwöi, mädä wä’wa’demeecödö jäcä; änwanno owoija’como mädä. Änwannoone jääcä aashicha a’deujai aweichaameiñe. Öwö a’que weichaame ñanno o’näiñe’da wa, ñanno anonta’como aashicha’como wa’cä äwwäiñe chö’tadö weneenetoodö.

¹² Wä’shinchancädä adhantawäiñe yeetadaawa’cajoone; yaawä anontaajäje chäänöngatooje weichö cönääne’ju’joi öwwä täneemö tödöödö que, ene’ju’tojo tödöödö que mmaja, aashichaato tödöödö que mmaja.

¹³ Anejjacoomo quedeiyentecoomo o’näiñe ayöödötäiñe’da wä’jaaquene. Yää mma äwwäiñe ännöjo’da weiyaqueene, äwwäiñe wäädai’chojoodö mma. Yääje yeijäcä encwanno’jotääcä yää chäänöngemjönö nönge wei’jödö.

¹⁴ Aaduwaawädeeto mädä eduuwa adöiñaiñe wöta’dedö. Äwwäiñe ätäädai’chojo’da dea wa’de eduuwa. Änsomaadöcoomojöönööne wencano’ta, aweichöcoomoone. Inchoncomo tönnacoomo nsomaadö chaana’cannamooje töweiye naicho; mude’cä’cä mmaane tumö inshoma’täneije etaadawa’cajoojai’cha na.

¹⁵ Öwwä tujunne aweichaameiñe jääcä chö’tajäätö’da ätö’taato. Yääje yeichaame ajummatäiñe dea wäänene. Tameedä öwwä naadö acoichajoojai tö’ta äjääcäinchädäiñe, weichö jadä’jödöödä.

¹⁶ Änwanno odhoowanääcäiñe äwwäiñe ätäädai’chojo’da wei’jödö; yääje yeichaame dhantai änwanno adheemu’nä’ancädäiñe öwwä adhencu’to’jocoomo töne’tä määnetääne.

¹⁷ Ñanno adöiñaiñe wanontäneetodö adhencu’tätäiñe’da cönä’ja’to dea.

¹⁸ Tiito wanontäne adöiñaiñe; chääjadä anejjacoomo quedeiyente wanontäneeto dea. ¿Tiito ca adhencu’tätääne? Ng’jn. Äänönge ñaa tö’tajäätödö cönä’jaacä, äänönge mmaja ñaa wei’jödö.

¹⁹ Ñaa woowontädö atäi’cha ca mädä mecaanö’atoodö jääcä. Ng’jn, Wanaadi owaadäädä dajaane ñaa na’deuwa Quidiito woije. Aashicha awa’tö’näjöödöcoomo jäcäinchädä mädääje ya’deuwa.

²⁰ Öwö cone’daiche tötö’tajä’e wäänene, adöiñaiñe wä’döa’jäcä umjummadö nönge’da adheedantäjaiñe tö’tadö weijäcä, öwö ämjummadööcomo nönge’da mmaja yeedantäjai maato dea. Wätäccujä’nä ’je adheedantäjaiñe tö’ta, we’neimmanä ’je mmaja, wäätömaajä’nä ’je mmaja, töwö mma töwei’she weiñä ’je mmaja, cone’da wa’deunä ’je mmaja, wenta’me’nä ’je mmaja, o’jodhe tö’tajä’nä ’je mmaja, töwaatashiichuudä weiñä ’je mmaja adheedantäjaiñe tö’ta.

²¹ Adöiñaiñe ööta’jäcä Wanaadi odhoowadäädäiñe cone’da yöödöjoojai chö’tadö na, aamojai tö’ta yaawä ñanno jenaadä conemjönö tödöödö jäcä cönaajäntoichodö jäcä, töcoone’nadiiyöcoomo ane’nomja’da yeichomjäcä, yää masuuduije yeichöcoomo.