2 CODINTIYO 11 - Wanaadi A'deddu

Anonta’como chäänöngemjöncomo jäcä Paudo nimennä’jödö

¹ Aashichaane etaatäcä mädä tö’jecaato nönge ya’deuwaadö äwwäiñe.

² Öwö Wanaadi nutuudu que mani’ñeimmaato. Quidiito wwä maneecammatääne chääjadoonoje aweichöcoomo wetä, tooniño dhanwa wwä ajei’choto’jaato ecammadö töweiye naichöje.

³ Öwö tösaade wa äjääcäiñe; ñäädä äcääyu, äncu’tätä töweichö que Eewa cönencu’täichö wwä mmaja ätö’tajäätödööcomo shaadijannä’cajoojai ätö’taato öwwä, chäänöngato que Quidiito tumjumma aweichöcoomo jonno.

⁴ Anejja adöiñaiñe iicha’jäcä aashicha mma ñeecammajäätödö töneetajä’e määnetääne, anejjeja Jesuuquidiito weichö töneecammajä’e yeichaameiñe, ñaa necammajäätödö nönge’da. Aashicha mmaja töneetajä’e määnetääne dea anejja woowanoomanä, anejja wätunnä mmaja, awa’de metaatäneedö nöngemjönö.

⁵ Ñanno anonta’comooje tönwacööma määnetäänedö o’näiñe’da wa öwö.

⁶ A’deu edhaajäje’da weichaame, sejjedö mmaane töweiye na. Mädääje töweichö äwwäiñe töwäänejo töweiye ñaa cönä’jaacä weiñäje.

⁷ ¿Chäänöngemjönö ja ca’ yää cönä’jaacä täje’da aashichaato wätunnä äwwäiñe wecammajä’aquennö? Öwö odho’näiñato nönge töweiye wä’jaaquene, ye’jodhe aweichöcoomo wetä.

⁸ Anejjacoomo quedeiyentecoomo wwä töneiye wä’jaaquene jödaata inchuduucomo, adhantawäiñe weetadaawa’cajootojooje.

⁹ Yaawä ajaadäiñe weichö öwwä a’que yeichaame adhaateme’täiñe’da töweiye wä’jaaquene; ñanno quedeiyente Maasedooniya ñancomo we’a’como öwwä a’cato cuntuicho. Mädääje adhaateme’täiñe’da töweiye wä’jaaquene; mädääje dea wa’de eduuwa.

¹⁰ Quidiito a’deddu chäänöngato öwwä naadö wa’cä mmaja chäänönge yääje wä’döa, mädä chääjäcä wä’wa’deme’caadö ijo’quejö’da na’de tameedä Acaaya weichö wa’cäädä.

¹¹ ¿Ane’que’nei, quee ’ja? ¿Ajummatäiñe’da weijäcä ’ja? Ng’jn, Wanaadi dhowaanäcä na ajummatäiñe weichö.

¹² Mädä tönnöe wääneneedö tödöödöje dea wa’de ñanno tötaadawaajuichomo jäconcomo wä’wa’demeecödö wa’deuto’como ’je’da yeichö wetä, ñanno ñaa wetaadawa’cajoodö nönge mmaja tötaadawaajuichomo e’tännamo.

¹³ Anontaajäja’como wätä’tädö mma tönwanno; äncu’tännamo mmaja. Quidiito nanontädö wa’cä yäänejoodöcoomo.

¹⁴ Cone’da tödööemje’da ’cännä yääje yeichöcoomo, Caajuushawa mmajaane amoode tawaanatooje töwäänejo yeiyajä.

¹⁵ Yääje yeijäcä ñanno Caajuushawa anoonö wwäiñe ämu’de’da na aashicha’como wa’cä yäänejoodöcoomo. Tönwanno yaatameedöcoomo na’de tönnö’jocoomo woije dea.

Paudo wäntunamjö’jödö

¹⁶ Edääje wä’döa dea äwwäiñe, tö’jeque mma caneecanö’täi’che. Yaawääne’, tö’jeque yeecanö’a’jäcä, yääje yeichaame cätaatäcä wä’wa’demeecödö jäcä.

¹⁷ Cajiichaana a’deddujöönö mma wecammajä’e eduuwa äwwäiñe, öwö tö’tajäätödö mma. I’jeta’jödö nönge ya’deuwa, o’jodhaato tö’tajäätödö nönge.

¹⁸ Jooje anejjacoomo soto edä nono de’wono jäcä towä’wa’deme’que weneeneto; yääje yeijäcä öwö mmaja wä’wa’deme’ca dea eduuwa.

¹⁹ Towaanojo’ne jaiño maatoode; ¿aashicha mma jönca i’jeta’jödö töneeta määnetääne?

²⁰ ¿Aashicha mmaja jönca tönshinchä määnetääne dea anejja wwä tanoonöje ayöödöa’comjäcä, ännödööcomo acoicha’jäcä mmaja, adhencu’ta’comjäcä mmaja, adhe’jodheiñe töwei’she yeiya’comjäcä mmaja, ojoojeta’mojä’a’comjäcä mmaja?

²¹ Ñaa mmaane jäduujemjönö nönge ñaa cönä’jaacä mädä tödöödö jäcä; jöichöje na eduuwa yääje wei’jödö. Tö’jecaato wa’deuwödö nönge ya’deuwa eduuwa; anejja yä’wa’deme’tojo töweiye yeiya’jäcä töwaacö’je öwö.

²² ¿Eewedeeo ca tönwanno? Öwö mmaja Eewedeeoje wa dea. ¿Iisadaaeedä weichö ca tönwanno dea? Öwö mmaja. ¿Aawadán atö’jödö ca tönwanno? Öwö mmaja Aawadán atöödöje wa dea.

²³ Tö’jecaato wa’deuwödö nönge ya’deuwa. ¿Jesuuquidiito anoonö ca tönwanno? Öwö cho’jodheiñe’cä, cho’jodheiñe weetadaawa’cajo’jödö weijäcä, cho’jodheiñe mmaja waataiju’jojäätö’jödö, cho’jodheiñe mmaja jedeesoje wä’döjoojätö’jödö; aneedawä töwäämaichajo wäänene dea.

²⁴ Ijaatoodeeade judhíocoomo yaiju’jä’neto cudaawa que, tooni mmädä aacä sotooto aneejodö’da yaajäma’jocoomo.

²⁵ Aaduwaawäde chäwwäiñe wataiju’jojo’ne dee que; tooniye täju que yeewojoojo’ne. Aaduwaawäde önnadööne; aneedawä na’cwaca wä’jaaquene tooni anooto, tooni coijaicho mmaja, tuna de’wä wötäänäje, tucuudiyaadaiche’da, nono ejoodöjai’cha mmaja.

²⁶ Weiñäje töwäämannä’e wäänene dea; jooje töwäämaichajä’e wäänene, tuna wwä, tämeena’como wwä mmaja, jimmä mmädä wwä mmaja, anejjacoomo wwä mmaja. Jataawä weichawä mmaja töwäämaichajo wäänene, jata ’jemjönö aca weichawä mmaja, dama ’cwai öötädaawä mmaja. Quedeiyenteja’como wätä’tädööcomo wwä mmaja töwäätä’maminchajo wäänene dea.

²⁷ Jooje töweetadaawa’cajo wäänene, töwäntunaanö’e mmaja. Aneedawä öncö’da coijaicho tömja’do’jo wäänene wetaadawa’cajoonäje. Ämi töiñetunca wäänene dea, emjätö’se weiñä mmaja; töwäänema mmaja wäänene dea, cämöi töiñetunca mmaja, töwonque’da weiña mmaja.

²⁸ Tameedä mädoocomo de’wä mmaja jeene anooto waadäi tö’tajäätödö töweiye weneene, yää tameedä quedeiyentecoomo encano’tädööcomo.

²⁹ ¿Wentumje jönca ijääduque’ajä töneene wäänene? ¿Cone’da jönca töwä’döjo wäänene shaadijannä’caajä töweiye yeichawä?

³⁰ Wä’wa’demeecö’se weiya’jäcä, jäduuje’da yeenejoonei jäcääne ä’wa’deme’jai wa.

³¹ Cädhaajotoncomo Jesuuquidiito Wanaadiyö, ñäädä Yuumö, dhowaanäcä na wäätäncu’tädööje’da yeichö mädääje wä’dödö; ñäädä Wanaadi ña yeichöödäje aashicha wa’deutojooje.

³² Damaacu ña weichö ñäädä acu’shänä, Cajiichaana Adeeta anoonöje cönä’ja’dö, tösootoi cönaanontoicho önnoshinchädö wetä, jedeesoje yöödödö wetä yaawä;

³³ töwäädä wöwa aca anejjacoomo yeenö’täneetone’ mentaana tai, jata cudaadai’chädö jäcä cönä’ja’dö tai. Mädääje acu’shänä jonno wäänejeene.