2 CODINTIYO 10 - Wanaadi A'deddu

Anontaajäje töweichö jäcä Paudo nimennä’jödö

¹ Öwö Paudo dea ya’deuwa äwwäiñe, Quidiito nutuudu ta’cwaiñe weichö que, tumjunne weichö que mmaja. Edääje dhantai jääcä töwä’döe määnetääne: “Cöjaadäiñe yeichawä jäduuje’da weneene; cöjääcäiñe amoinche töweichawä mmaane jäduuje weneene;” quee jääcä töwä’döe määnetääne.

² Edääje wä’döa äwwäiñe: Adöiñaiñe ööta’jäcä äjääcäiñe jäduuje mma cännöjootäi’che. Anejjacoomo jäcä mmaane yääje weichojo na, ñanno edä nono de’wono woije ñaa e’tätä weneenetoodö.

³ Edä nono de’wä ñaa weichaame edä nono de’woncomo nönge’da ñaa newäänä’ta.

⁴ Ñaa waichadö wewäänä’totoojo edä nono de’wonoojönö, Wanaadi jäduudu dö’sennotoone; jäduujato e’jodheinchajai yää.

⁵ Tameedä soto wätunnäichomo töne’jodheincha ñaa weneene, tameedä Wanaadi owaanäcä tödöödö emu’dänei mmaja. Tameedä tö’tajä’nä mmaja töncana’ca ñaa weneene dea, Quidiito woije yeichö wetä.

⁶ Chäänönge ñaa wwä äwäätuujadööcomo tödööa’jäcä äwwäiñe, tumjunne’da ñaa niyäätuuja’de yaawä tameedä chäänöngemjönö.

⁷ Änwanno ye’wono mma mene’maato. Anejja wwä Quidiito sotoije töwääcanö’a’jäcä, Quidiito sotoije ñaa weichö mmaja chö’tamme’jai ña dea, töwö naadöje mmaja.

⁸ Jooje deja adheedhajootoncomooje weichö jäcä wa’deutaame, mädä jäcä ejöichäjai’cha wa. Yääje ñaa weichojo Wanaadi cuntui äjäädu’toto’comooje, ocoone’mato’comooje’da.

⁹ Adheecatoncato’comooje’da äwwadäädäiñe tömmennä wäänene.

¹⁰ Edääje dhantai jääcä töwä’döe määnetääne: “Immennädö weneene cone’da döjootä, jäduuje mmaja. Töwö jaiñoone jäduuje’da, dötä’da mmaja ñeecammajäätödö;” quee.

¹¹ Edääje wä’döa yääja’como wä’dödö wwäiñe: Jajeeda jäcä ta’deddu tömmennä ñaa weneenedööje mmaja ñaa na’de adöiñaiñe ñaa wöta’jäcä.

¹² Anejjacoomo töjääconcomo wääcammadö wei’yejeiñe ääcamma’da ñaa na. Tönwanno towaanojöncomo nödööaato; tönwannoje dea töwäätäne’mancädäiñe töwäätämmenca weneeneto.

¹³ Ñaa mmaane töweichojo e’jodhe ääcammajai’cha ñaa na. Wanaadi chea cuncu’nä’täi ñaa wetaadawa’cajootojo; töwö dea ñaa adoojone adöiñaiñe, änwanno Codinto ñancomo.

¹⁴ Yääje yeijäcä mänseedä deja’da ñaa na’deuwa, adöiñaiñe tä’da ñaa wei’jödööjönö. Ñaa dajaane awa’deene ñaa cönä’döi adöiñaiñe Quidiito wätunnäi aashichaato dha’me.

¹⁵ Mänseedä deja’da mmaja ñaa nääcamma dea, anejja tadaawaajui’jödö ecammadööjönö ñaa wwä. Jooje’cä jeene aneecamjödööcomo yä’dö’se ñaa na, jooje’cä jeene adhantawäiñe ñaa etaadawa’cajoiyede yaawä, ñaa wwä tödöötojo Wanaadi necamma’jödö ija’dä’jancädä’daane.

¹⁶ Yaawä aashichaato wätunnä ecammajä’jai ñaa na ajaatadööcomo mänseedä’cä jeene, anejja tadaawaajui’jödö jäcä töwä’wa’deme’cancädä’da.

¹⁷ Ñäädä o’jodhe töwa’deuwö’sato Cajiichaana Jesuuquidiito jäcääne o’jodhe na’deuwö’ñojo.

¹⁸ Ñäädäjöönööne chäänönge na, töwö deaato wääcammadööjönööne; ñäädääne chäänönge na, Cajiichaana necammadööne.