1 TEESADOONISENSE 2 - Wanaadi A'deddu

Teesadoonica ña Paudo wetaadawa’cajo’jödö

¹ Änwanno jimmä, odhoowanääcäiñe na töwäädämma’da yeichö adöiñaiñe ñaa wötä’jödö.

² Äwwäiñe tacaade na Jidiipo ña ñaa wätä’maminchajo’jödö, ñaa wäntunamjö’jödö mmaja. Yääje yeichaame Wanaadi ñaa ’wa’täne tösaade’da ñaa wwä ecammajäätödö wetä äwwäiñe Wanaadi wätunnäi aashichaato, jooje ñaa tu’de’tätaame anejjacoomo wwä.

³ Yää ñaa töneecammajä’e cönä’ja’dö äwwäiñe, ñaa wätäncu’tojo’jödööjönö cönä’jaacä. Conemjönö jäcä tötö’tajä’ancädä’da mmaja ñaa odhoowanoomatääne, adhencu’tädööcomooje’da mmaja.

⁴ Wanaadi chea chäänönge ñaa edantäne, ñaa anontäne yaawä aashichaato wätunnä ecammajä’e. Yääje yeijäcä mädääje töneecammajä’e ñaa weneene. Sotoojönööne a’cwaima’se ñaa na, Wanaadiiñe, näädä cötö’tajäätödööcomo emmencanei.

⁵ Änwanno odhoowanääcäiñe na adheemu’näjöödöcoomo que’da ñaa necammajäätö’jödö; adhencu’tätäiñe’da ñaa cönä’ja’dea jödaata chaana’cadö wetä. Wanaadi mmaja dhowaanäcä na yääje yeichö.

⁶ Töjääcä aashicha soto wa’deuwödööcomo ñaa encanoodöje’da cönä’jaacä. Änwanno awa’deuwödööcomo mmaja, anejjacoomo soto wa’deuwödööcomo mmaja, ämjumma’da ñaa cönä’ja’dea. Jesuuquidiito nanontädööje töweichö jäcäinchädä adhaanontäjaiñe ñaa wei’jödö weichaame, yääje’daane ñaa cönä’jaacä.

⁷ Äjääjännä ayöödötäiñe ñaa cönä’jaacä, wodi tönnedö’cä töniiñejenca töweiye naichöje.

⁸ Ñaa ajummatääne jooje; yääje yeijäcä Wanaadi wätunnäi aashichaato mmajöönö ñaa cuntui äwwäiñe, töweichö jadä’jödöödä, ñaa wwä tujunne aweijäcäiñe.

⁹ Änwanno jimmä, odhoowanääcäiñe na jooje töwäntunamjödö que töweetadaawa’cajo ñaa wei’jödö, täwanshiñö cana’catoojo ejoodödö jäcä. Töweetadaawa’cajo ñaa cönä’jaacä ano, coijai’jödöödä, ännödööcomo anaatameecö’da ñaa weichö wetä, ñaa wwä Wanaadi wätunnäi aashichaato ecammajäätödaawä äwwäiñe.

¹⁰ Änwanno odhoowanääcäiñe na, Wanaadi dhowaanäcä mmaja, adhantawäiñe aashicha ñaa wei’jödö, chäänönge ñaa wei’jödö mmaja, änwanno quedeiyentecoomo. Anejja ñaa jäcä cone’da a’deujai’cha cönä’jaacä.

¹¹ Odhoowanääcäiñe mmaja awaadäiñe äwäätuujatäiñe ñaa wei’jödö, dhanwa tönnedö tönwätuuja töweiye naichöje. Awa’dätäiñe mmaja töweiye ñaa cönä’ja’dea.

¹² Edääje äwäätuujatäiñe ñaa cönä’jaacä: “Wanaadi sotoi weichö nönge deaane eichäcä, ñäädä tösootoije adhe’täneichomo’jödö, aashicha töweichö enennamooje adhe’täneichomo’jödö mmaja;” quee töwä’döe ñaa cönä’jaacä äwwäiñe.

¹³ Ñaa wwä Wanaadi a’deddu ecammajäätödö eta’jäcä äwwäiñe soto wätunnäije ane’tä’da mä’ja’quene; Wanaadi a’deddujeene me’tätääne. Chäänönge me’tätääne, Wanaadi a’dedduune yeiyajä. Yää, Wanaadi a’deddu, aashicha ayöödöaato, änwanno ecaanö’nnamo. Yääje yeijäcä yeichöje aashicha töwa’deuwe ñaa weneene Wanaadi wwä.

¹⁴ Änwanno jimmä, ajimmotoncomo wwä äwäätä’maminchajoodawäiñe änwanno mä’ja’quene anejjacoomo Wanaadi ecaanö’nnamo wei’jocoomo nönge mmaja, ñanno Judheea ñancomo, Jesuuquidiito sotoi. Tönwanno mmaja cönäätä’maminchajoicho dea töjimmotoncomo judhío wwäiñe.

¹⁵ Ñanno judhíocoomo Cädhaajotoncomo Jesuuquidiito cöneemaicho, ñanno töjimmotoncomo Wanaadi wa’deuwödö ecammannamo cömjajoichodööje dea. Ñaa mmaja ñaa ja’canö’joneeto dea. Tönwanno Wanaadi woije’da weneeneto; tameedä soto tu’de’tännamooje naato.

¹⁶ Tönwanno ñaa wwä aneecammajoojätö’da weneeneto judhíojöncomo wwä, yääwanaacadööcomo queiñe. Mädääje jooje’cä mma töcoone’nadiiyöcoomo nejannä’caato. Eduuwa Wanaadi wwä töwäätä’maminchajoomöje naato.

Teesadoonica ñancomo ene’se Paudo wei’jödö

¹⁷ Jimmä, ojonnoiñe ñaa we’a’jäcä, äjääcäiñe tötö’tajä’e dea ñaa cönä’jaacä, ääne’da cöweichaameiñe. Jooje adöiñaiñe töötä’se ñaa cönä’jaacä, adheeneiñe.

¹⁸ Adöiñaiñe töötaamo ñaa cönä’ja’dö’je, öwö Paudo wannade wäämu’däjä’ne, öötä’sato’jödö; töwäädä Caajuushawa ñaa adoojo’da cöneiya’ne’.

¹⁹ Änwanno maato ñaa tö’tajo’tojooje, ñaa a’cwaniiyöje mmaja. Äjääcäinchädäiñe ta’cwaiñe ñaa na’de Cädhaajotoncomo Jesuuquidiito we’a’jäcä.

²⁰ Änwanno maato aashicha ñaa wa’deutojooje, ñaa a’cwaniiyöje mmaja.