1 PEEDHODO 1 - Wanaadi A'deddu

Yaajäntä’jödö

¹ Öwö Peedhodo, Jesuuquidiito nanontädö, äwwadäädäiñe wimenna, änwanno yäämecanta’como, töjaatawoncomoojönö, änwanno Ponto ña maatodö, Cadaasiya ña mmaja, Caapadoosiya ña mmaja, Aasiya ña mmaja, Witiiniya ña mmaja.

² Jenaadä töntö’tammecöödö woije Cumöötoncomo Wanaadi tösootoije adhe’tätääne. Epíiditu Santo ocoonecaatäne Wanaadi woije aweichöcoomo wetä, Jesuuquidiito aquiiyö que töcocca aweichöcoomo wetä mmaja. Aashichaato, täncanoode’da aweicho’como mmaja, äwwäiñe yeejamö’se wa.

Cöwo’womoocödööcomo töweiye yeichö

³ Aashicha wa’deutojooje na Cädhaajotoncomo Jesuuquidiito Wanaadiyö, ñäädä Yuumö. Töwö Wanaadi wentumje äneetä töweichö woije eduuwaatoje cännuichatääne töwäämaajo jonno Jesuuquidiito waadoncadö que. Yääje yeijäcä cöwo’womoocödööcomo töwaatamemjönö cöwwäiñe töweiye na.

⁴ Eduuwaatoje töwennue cöweijäcäiñe cöwwäiñe töweiyemööje na Wanaadi nutuudu töwaatamemjönö, töweecone’mamjönö mmaja, jemi yu’tacoi töweiye naichö nönge’da. Yää cöwwoncomooje tösooma na caju ña.

⁵ Änwanno Wanaadi töneecanö’e aweichomjäcä töwö töjäädudu que adheedai’chätäiñe weneene, äwääwanaacato’como ejoodödö wetä äwwäiñe, yää yaatameedawä täneejoomöje naadö.

⁶ Yääje yeijäcä ta’cwaiñe eijai maato, a’dhe aneejejaiñeñe’jödöödä äwäntunaanö’taameiñe.

⁷ Yää wäntunaanö’nä aneecamjödööcomo noneeja, chäänönge yeichö eneejodö wetä. Oodo töweiye naichö naane’, töwaatameemöje yeichaame wa’to que choonecaadö. Töwaacö’je aneecamjödööcomo, oodo e’jodhe’cä täje yeiyajä. Chäänönge aneecamjödööcomo wääneja’jäcä Wanaadi äjääcäiñe aashicha na’deuwa’de yaawä, awa’deme’cato’dede, aashicha ayöödöaato’dede, Jesuuquidiito wääneja’jäcä.

⁸ Ñäädä Jesuuquidiito mijummaato eneedö’jo’da; eduuwa aneene’da aweichaameiñe mmaja mecaanö’ato, ta’cwaiñe aweiyancädäiñe, yää ecammadö e’jodhaato a’cwani aashichaato que.

⁹ Yää ecamjödö ’je aweichomjäcä odo’tadööcomo wääwanaacatoojo mejoodöaato.

¹⁰ Jenaadä Wanaadi wa’deuwödö ecammannamo towaanäcäiñe yei’she cönä’ja’to mädä wääwanaacatoojo jäcä; a’que töntö’tamme’que töweiye cönä’ja’to dea. Tönwanno töneecammajä’e cönä’ja’to Wanaadi nutuudu äwwäiñe töweiyemö jäcä.

¹¹ Yeeja’dätäädö owaajodä Epíiditu Santo chäwwäiñe töneecammajä’e cönä’jaacä Quidiito wäntunaanö’tojo, aashicha weiñä yää ’jeje töweiyemö jäcä mmaja. Ñanno Wanaadi wa’deuwödö ecammannamo a’que töntö’tamme’que töweiye cönä’ja’to ñäädä Epíiditu Santo tötaacaiñe cönä’ja’dö necammadö, ñeecammadö we’tojo cu’nädö mmaja a’que töntö’tamme’que töweiye cönä’ja’to dea.

¹² Wanaadi chäwwäiñe cöneecammai yää chäwwoncomooje’da yeichö, cöwwoncomoojeene. Yää äwwäiñe täcamma na eduuwa aashichaato wätunnä ecammajä’nnamo wwäiñe, ñäädä Epíiditu Santo caju ñanno anontaajä jäduudu que. Wanaadi amoodedö mmaja towaanäcäiñe yei’she naato dea yää.

Aashicha cöweicho’comooje ta’dejja cöweichöcoomo

¹³ Yääje yeijäcä ätö’tajäätödööcomo ijäädu’tätääcä; odhoowadäädäiñe eichäcä. Chäänönge yoomo’täcä Wanaadi nutuudu aashichaato, yää Jesuuquidiito wäänejoodawä äwwäiñe töwä’tueemö.

¹⁴ Mude’cä’cä tumö woijato töweiye naichöje eichäcä. Conemjönö ämjummadööcomo woije mma meichäi, jenaadä Wanaadi odhoowanääcäine’da yeichö töweiye mä’ja’quennöje’daane.

¹⁵ Ñäädä adha’dejjaneichomo’jödö aashicha yeijäcä änwanno mmaja aashicha eichäcä, tameedä aweichöcoomo jäcä.

¹⁶ Edääje Wanaadi wä’dö’jödö imennaajä nä’döa: “Aashicha eichäcä, öwö aashicha weijäcä;” quee imennaajä nä’döa.

¹⁷ Ñäädä Wanaadi äänöngeiñe soto tönemmenca weneene, iiñö’jocoomo woije mma. Yääje yeijäcä ñäädä Wanaadi oomotoncomooje e’ta’jäcä äwwäiñe, töwö ñontätääcä edä nono de’wä aweichöcoomo wadaadäädä.

¹⁸ Änwanno odhoowanääcäiñe Wanaadi wwä täwaanaca aweichöcoomo töwäädämmato weiñä aca aweichöcoomo jonno, yää oomotoncomo’jödö odhoowanoomatäänedö. Yää adheewanaacato’como cönääjemai töwaatameemö que’da, oodo, jödaata nöngato que’da.

¹⁹ Quidiito aquiiyö aashichaato queene töwääwanaaca maato, oweeja nnedö’cä aashichaato yäätunui’chä’jödö ’jemjönö aquiiyö töweiye naichöjaato que.

²⁰ Edä nono tödöödö owaajodä mädääje töweiyemööje Quidiito cönäätä’täjoichö’je; yaawääne’ eduuwa jeene cönäänejoi, anooto ataamejai yä’döa’jäcä jeene, änwanno äjääcäinchädäiñe.

²¹ Jesuuquidiito ni’wa’tädö que Wanaadi mecaanö’ato, ñäädä yäämaajo jonno Jesuuquidiito adoncanei’jödö, chäwwä aashichaato u’nei’jödö mmaja. Yääje yeijäcä Wanaadi mecaanö’ato, miyoomo’cato dea.

²² Änwanno chäänöngato wätunnä mecaanö’täne Epíiditu Santo ni’wa’tädö que. Mädääje adheewanööcomo michoccajootäne, wätäncu’tänä que’da quedeiyentecoomo ijummadööcomo wetä äwwäiñe. Yääje yeijäcä joojeene ä’jummatääcä, adheewanööcomo jadäädääne.

²³ Änwanno töwennue maato eduuwatoje, soto weichö töwaatameemö que’da, Wanaadi a’deddu yeichöödäjaato queene, yää töwaatamemjönö.

²⁴ Edääje Wanaadi a’deddu imennaajä nä’döa: Tameedä soto naato jämjätääcä töweiye naichöje; tameedä soto nnataadö chääjödö töweiye naichöje na dea. Jämjätääcä tuyu’ta töweiye nai, chääjödö töwä’me mmaja;

²⁵ Wanaadi a’deddu mmaane yeichöödäje na; quee imennaajä nä’döa. Wanaadi a’deddu yää aashichaato wätunnä, äwwäiñe täcamma naadö.