1 CODINTIYO 9 - Wanaadi A'deddu

Anontaajä weichojo jäcä Paudo nimennä’jödö

¹ Anontaajä dajaane öwö, tameedä anonta’como tönnöe weneenetoodö tödööjaicho mmaja, öwwä mmajaane Cädhaajotoncomo Jesuuquidiito eneetö’da. Änwanno mmaja maatoodö naane’ taadawaajui’jödö, yää Cajiichaana wwonooje tönnöe wääneneedö.

² Anejja wwä anontaajäjemjönö wa’cä tö’ta’jäcä, änwanno mmaane yääje chö’tajä’jai’cha maato. Änwanno ñanno anontaajäje weichö yeene’ju’jonnamo, mädä Cajiichaana Jesuuquidiito ecaanö’nnamooje maatoodö.

³ Edääje wä’döa ñanno quimmajä’nnamo wwä:

⁴ Sa’donna dajaane noowanoomadö wwä ääwashinchäjoojai wa öwö;

⁵ jiiñamo quedeiyente jaadä emannä’jai mmaja, anejjacoomo anonta’como naatoodöje, Cajiichaana acontomo naatoodöje mmaja, Peedhodo mmaja.

⁶ ¿Ñaa mma ca mädääje ñaa nai Waanawé acä, etaadawa’cajo’da eijai’cha aashichaato wätunnä ecammajä’taame ñaa wwä?

⁷ ¿Änääcö ca suddauje töweiye nai töwö dea töwaichadö adöödö ejeemancädä? ¿Änääcö ca töwwä audaajä aichö’jödö weichaame yää ’jeje änäu’cwa’da töweiye nai? ¿Änääcö ca oweeja töneedai’chä nai imaanatöödö eccudu engancädä’da?

⁸ Öwö tö’tajäätödö woije mma’da yääje wä’döa; mädääje dea Moisé nimennä’jödö wä’dödö na.

⁹ Jenaado’jä waanontänä imennaajä jäcä yääje nä’döa: “Jaaca manincha’dutäi’che äiña acaadawä chäwwä;” quee. Jaacä jäcä tötö’tajä’e töweijäcä mma’da yääje Wanaadi nä’döa;

¹⁰ cöwwoncomooje mmajaane yääje tömennä na, cöwäätuujato’comooje, cöwoowanoomato’comooje mmaja. Ñäädä ñaatö’tänei, natö shoomanei mmaja, töweetadaawa’cajo weneeneto töwwäiñe täu’tojo towaanäcäiñe yeiyancädä.

¹¹ Mädääje mmaja ñaa na; Wanaadi a’deddu ñaa cöneecammajäätöi äwwäiñe, ñaatö’tänei tönnatö’tä töweiye naichö nönge. Yääje yeijäcä ¿chäänönge’da ca nichö’taanä äwwäiñe edä nono de’wono mmädä äwwäiñe utuudu ñaa wwä?

¹² Anejjacoomodä mädääje tönnöe määnetäänene’, töwaacö’je mma mädääje ñaa döjai maato. Yääje yeichaame yää ännöjo’da ñaa cönä’jaacä äwwäiñe. Töshinchä mmaane tameedä ñaa cönshinchäi, Jesuuquidiito wätunnäi aashichaato ecammajäätödö emu’däjoodö queiñe ñaa wwä.

¹³ Änwanno odhoowanääcäiñe na ñanno Wanaadi weichojo tacancomo wetaadawa’cajoodö Wanaadi weichojo taca dea töwääwashinchä yeichöcoomo. Tönwanno töweetadaawa’cajo weneeneto saaquidiijiisiyo tödöödöje, saaquidiijiisiyo tödöötojo de’wä. Ñäädä dea tönänque weneeneto, saaquidiijiisiyooje u’ajä dea.

¹⁴ Mädääje mmaja Cajiichaana Jesuuquidiito waanontädö na dea ñanno aashichaato wätunnä ecammajäätödö jäconcomo wetaadawa’cajoodö jäcäiñe; mädä tötaadawaajuichomo que dea töweicho’como chaana’cajai ñaato.

¹⁵ Yaawääne’, yääje eijai weichaame, yääje’daane wäänene öwö. Ane’cä’cä äntuiyeto öwwä, quee öucwadööje’da mmaja edä wimennäi. Wäämadööne awa’de’cä ijummajai wa mädä wa’deutojo que yenwajiiñadö owaajodä’cä.

¹⁶ Aashichaato wätunnä ecammajä’neije weichaame mädä jäcä ä’wa’demeejai’cha wa, taadawaajuiñe yeiyajä. Wentumje eijai wa yaawä aneecammajäätö’da weiya’jäcä.

¹⁷ Yääje yeijäcä tödö’se weichö que öwwä ecammajä’a’jäcä yeeje’jödö eneejai wa yaawä. Yaawääne’ öwö woije’daane mädääje wa, Wanaadi nödööjodö woijeene.

¹⁸ Yääje yeijäcä yeeje’jödööje weneene yää ejeemajancädä’da aashichaato wätunnä ecammajäätödö öwwä, ejeemojoojai weichaame, yää wäädai’chäjoodö que, wääwashinchäjoodö que mmaja.

¹⁹ Soto anoonöcoomoje’da weichaame öwö woije dea dhanoonöcoomoje töwä’döjo wäänene, jooje’cä jeene Quidiito sotoije töweiyaamo chaana’cadööcomo wetä öwwä.

²⁰ Judhío jadäiñe weichö ñöngeiñe wäänene, Quidiito sotoije chaana’cadööcomo wetä. Tönwanno Moisé nimennä’jödö waanontänä woije yeijäcäiñe öwö mmaja yää woijato nönge wäänene dea chääjadäiñe weichö, Quidiito sotoije chaana’cadööcomo wetä, yää jenaadö’jä waanontäna nanontädööje’da weichaame.

²¹ Ñanno Moisé nimennä’jödö waanontänä woijemjöncomo jadä weichö mmaane ñöngeiñe daja wäänene dea, tönwanno mmaja Quidiito sotoije chaana’cadööcomo wetä, Wanaadi waanontädö woije’da’da weichaame mmaja öwö, Quidiito waanontädö woije weichaame.

²² Jäduujemjöncomo jadä weichö ’quene jäduujemjönö nönge wäänene dea, i’wa’tädööcomo wetä. Mädääje na; tameedä soto weichöcoomo waadoinchomo nönge wäänene, dhantai ewaanacaadöcoomo wetä.

²³ Aashichaato wätunnä ecammajäätödö jäcäinchädä mädääje wäänene, öwwä aashichaato ä’tuiye yaawä, yää aashichaato wätunnä necammadö.

²⁴ ¿Yääje jönca töweiye nai wotoonejaanawä, tooni mma chaana’caneije, wanna yeichaameiñe töwootoneejaamo? Yääje yeijäcä chäänönge otoonejaatäcä, adheeje’jocoomo michaana’catäiye yaawä.

²⁵ Ñäädä töwootoneejaamö töwäädai’cha töweiye nai, töcoone’majaicho ännö’da. Yää tönnöe weneene canaanadi chuu adö döaajä mmädä cana’cadö wetä, töwaatameemö mma. Cönwanno mmaane cotoonejaato yeichöödoto cäje’jocoomo cana’cadö wetääne.

²⁶ Mädääje töwootoneeja wäänene öwö, iiña mmädä’da; wataiju’jä’nawä iiña mmädä waajämaanä töweiye naichöje’da mmaja wäänene dea.

²⁷ Edääjeene wä, öwwäädä töwäätä’mamincha wäänene, yeejö tömmamincha mmaja, woije yeichö wetä, chäänönge’da mma wei’ñö’de yaawä anejjacoomo soto tönoowanoomaiñe wei’jödö weichaame.