1 CODINTIYO 11 - Wanaadi A'deddu

¹ Yääje yeijäcä öwö nönge mmaja eichäcä, Jesuuquidiito nönge wääneneedöje mmaja.

Wecanta’ñänaawä wodiiñamo weicho’como

² Jimmä, äjääcäiñe ta’cwaiñe wäänene öwö jääcä tötö’tajä’e aweichomjäcä, chäänönge tönnöe aweichomjäcä mmaja äwwäiñe neecammajäätödö’jödö.

³ Odhoowanääcäiñe yei’she wa Quidiito dhanwa ju’jäje yeichö; dhanwa ’quene wodi ju’jäje; Wanaadi ’chene Quidiito ju’jäje.

⁴ Wecanta’ñänaawä tuju’jä ta’duque Wanaadi wwä dhanwa ya’deuwa’jäcä, Wanaadi nutuudu woije ecammajä’a’jäcä jeiñe mma, chäänönge’da tuju’jä nödööa.

⁵ Wodi tuju’jä ta’duque’da Wanaadi wwä ya’deuwa’jäcä, Wanaadi nutuudu woije ecammajä’a’jäcä jeiñe mma, töwö mmaja tuju’jä chäänönge’da nödööa; töde’caiche weiñä nönge dea yää tuju’jä ta’duque’da weiñä.

⁶ Tuju’jä ta’duque töwei’she’da wodi weiya’jäcä töde’caicheene nei’ñojo. ¿Cone’da jönca wodi töweiye nai tuju’jädö töca’jäcä, töde’caiche töweiya’jäcä jeiñe mma? Yääje yeijäcä tuju’jä ta’dueene wodi eijai ña.

⁷ Dhanwa mmaane tuju’jä a’dujai’cha na, Wanaadi cu’taajäje yeijäcä; aashicha Wanaadi weichö eneejonei töwö. Wodi mmaane aashicha dhanwa weichö eneejoneije daja.

⁸ Dhanwa amoode’nädaawä Wanaadi wwä, töwö wodi sudaadö que anaamode’nä’da cöneiyacä. Wodi mmaane Wanaadi cönnöi dhanwa sudaadö que.

⁹ Wodi jäcäinchädä’da dhanwa tödööajä na; wodi mmaane dhanwa jäcäinchädä tödööajä na.

¹⁰ Yääje yeijäcä wodi tuju’jä a’dujai ña, töiño woije töweichö cu’tädööje, amoode neneedöcoomoje.

¹¹ Yääje yeichaame quedeiyente weiñä jäcä mmaane äänönge weiñä nai. Wodi ’je’da yeiya’jäcä dhanwa a’que eichö; dhanwa ’je’da yeiya’jäcä wodi a’que mmaja eijai ña dea.

¹² Dhanwa sudaadöje wodi weichaame dhanwa nennua wodi ai. Tameedä mädä na Wanaadi woije.

¹³ Änwanno dea chö’tamme’täcä’ma; ¿aashicha ca töweiye nai Wanaadi wwä wodi wa’deuwödö tuju’jä ta’duque’da?

¹⁴ ¿Dhanwa jöichöje jönca töweiye nai töwaasaque töweiya’jäcä?

¹⁵ Wodi mmaane yaacö’je mma na töwaasaque töweichö; yää iju’jädö u’ajä na iju’jä a’dutuuje.

¹⁶ Anejja mädä jäcä töwenta’mecö’se töweiya’jäcä towaanäcä nödö’ñojo anejjeja ännö’da ñaa weichö, tameedä quedeiyentecoomo jataadöcoomo waadäi.

Chäänönge’da Santa Seena Codinto ñancomo tönnöe yei’jocoomo

¹⁷ Eduuwa edä äwwadäädäiñe wimennaadö jäcä mmaane awa’deme’jaiñe’da wa. Aashichaatoje’da töwe’jumma määnetääne, aweecone’mato’comooje mma.

¹⁸ Adheecadööcomo töneeta wäänene aashicha oojodö’da aweichöcoomo wecanta’ñänä wetä awe’jummadaawäiñe. Chäänöngeiche neeta’jödö öwwä nichö’ta.

¹⁹ ¿Aashicha jönca mädääje ätö’taato, töwä’tu’de’tä? ¿Mädääje ca chäänöngato quedeiyente töweichö töneenejo nai, töjimmä jadäiñe aashicha oojodö’da töweichö que?

²⁰ Yää yääje töwe’jumma määnetäänedö Jesuuquidiito woijato Santa Seena enöödöjöönö yää.

²¹ Yää Santa Seena tödöödawä o’womoocö’da määnetääne; tooni nshai töwaajäntä määnetääne. Anejja miyooato, anejja ’quene töwä’dau’cwene’jödöödä.

²² ¿Aaquene äwä’dö’se aweichöcoomo mädä? ¿Adhe’sadööcomo ’je’da ca’ nai äwääwashinchoto’como? Quedeiyentecoomo dajaane michiiñeme’cato mädä ännödööcomo que; ñanno wentumja’como mmaja cone’da mödööjaato dea. ¿Aaquene ä’döjai wanä äwwäiñe, “Ta’cwaiñe wa äjääcäiñe,” quee ’ja? Ng’jn, yääje ä’döjai’cha wa.

Santa Seena woojodö’jödö

²³ Cajiichaana Jesuuquidiito dea yoowanoomane yää äwwäiñe wecammajä’aaquennö. Tu’tojo coijaichawä dea Cädhaajotoncomo Jesuuquidiito uu cönannäjöi.

²⁴ Yaawä Wanaadi wwä töwa’deuwö’jeje yää uu cöni’yajäätöi; cönä’döaacä yaawä: “Täu’täcä; edä yää yeejö äjääcäinchädäiñe tö’dajä’e naadö. Edä tödöötäcä’de jääcä ätö’tato’comooje;” quee cönä’döaacä Jesuuquidiito.

²⁵ Yaawä töwääwashinchä’jejeiñe cancudu daja cönannäjöi; cönä’döaacä: “Edä tängemö Wanaadi necamma’jödö cu’tädö, yää yaaquiyö que chäänönge yeichö wene’ju’jaadö. Edä enöödö waadäi jääcä ätö’tato’comooje tödöötäcä’de;” quee cönä’döaacä Jesuuquidiito.

²⁶ Yääje yeijäcä Jesuuquidiito weejödö wa’cä töwö yääma’jödö meneejaato yää uu täcuudu waadäi, tängemö enöödö waadäi mmaja.

Chäänönge Santa Seena tödöötojo ecamma’jödö

²⁷ Yääje yeijäcä ñäädä Wanaadi owaadäädä chäänönge’da töweiyancädä Santa Seena ennei, conemjönö nödööa Cajiichaana Jesuuquidiito ejö jäcä, dhaquiiyö jäcä mmaja.

²⁸ Töwäätämmencaane ätämmencajai caato awa’de, cöwaadäiñe yää uu täu’cweeje, tängemö engeeje mmaja.

²⁹ Ñäädä Cajiichaana Jesuuquidiito ejööje yeichö chö’tamme’cancädä’da täu’nei, ennei mmaja, töwö töwoije töjoona conemjönö nene’ja yää täcuudu que, enöödö que mmaja.

³⁰ Aneene’jutu’da Santa Seena tönenque aweijäcäiñe dhantai jäduuje’da määnetääne, cädäijeiñe mmaja, dhantai töwä’ja’e mmaja.

³¹ Yaawääne’ cöwoijeiñe chäänönge cöwäätämmenca’comjäcä mädääje cödöötäiñe’da Cajiichaana Jesuuquidiito eijai ña.

³² Yaawääne’ chäwwä cämmenca’comjäcä mmaane, töwö cöwäätuujaato yaawä, edä nono de’woncomo jadä mmaja cöwännamjödööcomo queiñe.

³³ Yääje yeijäcä jimmä, Santa Seena enöödö wetä awe’jumma’comjäcä töwo’womo’queene o’womo’täcä’de.

³⁴ Anejja ämiije töweiya’jäcä tä’sacaane nääwashincho’ñojo, yää awe’jummadööcomo Wanaadi wwä äwäätä’maminchajooto’comooje mma ei’ño. Mädääje mma wä’dö’se wä’jaanä mädä jäcä. Yaawä adöiñaiñe ööta’jäcä anejja weiñä daja wisha’dumincha’de äwwäiñe.