Uan 3 1 - El Nuevo Testamento en matsés

Mibi tantiembi, quequin chiaid

¹ Ubia Esus tantiaquido chuibanquid nebi. Adquid icquin umbi tantiaidquio icsho Cayo cuëmëdquid chuiquin dada uaic nebi.

Cayo bëdambocquid nec, quequin chiaid

² Tantia. Cun utsi, umbi tantiaidquio icsho mibi chuinu. Esuquidistu tantiec bëdambuec tabadquid nec, quequin mibi tantiembi. Adshun mibi tantiaquin naden Nuquin Papa chiembi. Mibi bunacpadec tabadec daicsainquio yec bëdambuec tabadmeta, quequin chiannembi.

³ Mibëd icquidon nëmbo choshon naden chioshi: Esuquidistun chiacpadombuen nabanec tabadquid Cayo nec, quequin chuibanoshi. Aden chuisho tantiabosh bëdambo iquec cuishonquec tsadebi.

⁴ Umbi Esusquio chuibanondaido yec cun bacuëbobimbuecquido nec. Adquido yec umbi chiondacpadquiec Esus tantiec bëdambuec tabadec, quiash cuishonquequiec bëdambo iquebi.

⁵ Mimbi bëdambuen naid chuisho tantiombi, cun utsi. Esuquidistu tantiaquid utsibo uannocquido chochosho issun iuedshun Cayon nashunosh, quequin chioshi.

⁶ Iuedshun mimbi bëdambuen nashunaidon mimbi naid Esus tantiaquido iccuededacnoshon chuibanosh. Cayon bëdambuen nashunoshi, quequin chuibanosh. Adembidi nabanquin mimbi iuedaido: Shubu dadpen icquid utsi yacno nidnu, quesho nashunquin meneta. Nuquin Papa: Aden mimbi bëdambuen naic, camenuen aido bëdambuen nashunta.

⁷ Adoac Esus tantiesabo yacno Esus chuibannuec bedanec nidnuen: Ubi nashun, quequin Esus tantiesabo chienquio iccondambi, queposh.

⁸ Adquid icshobi: Ma aidon Nuquin Papan Chiaid abimbo chuibannu, quequin piucquid menequin nuquitedi nashunnuna.

Diotedepesën icsambuen naidbëta Demetedion bëdambuen naid chiaid

⁹ Mibëd iccuededquido chuiquin dada uaondambi. Aden umbi dada uaid isash: Umbentsëqui namembi, quec Diotedepes chieshëmëmpondash. Aidi ubëd icquidon: Naden nata, quequin chiaid tantiate bunesa nec.

¹⁰ Mibi yacno nidshun ubitedi icsambuen chuishunquin muaquin chuibennequid icsho chomeshun Diotedepes chiendambi. Aidi Esuquidistu tantiaquid utsibo iuedesa nec. Utsi: Aido iuednu, quesho tantiash: Padi. Iuedenda, quec iuedmianesa Diotedepes nec. Adembidi: Iuednu, quequido icsho Esus tantiaquid utsi cuenmequin cuëshëdmequid aidi nec.

¹¹ Tantia. Cun utsi Cayo umbi tantiaidquio icsho mibi chuinu. Icsambuen naquidën nacpaden naic icsainda. Bëdambuen naquid Nuquin Papa tantiaquid neque. Bëdambuen nata. Icsambuen naquid: Nuquin Papa iquec, quequin tantiesa nec.

¹² Demetedio caidien bëdambuen nabanquid nec, quequin utsibon abimbo chiec. Aidi Nuquin Papan chiacpadombuen nabanec tabadquidquio nec, quequin muainquiocquin utsibon bëdambuen chuinubi adembidi ubëd icquidobëtan Demetedio chiaid tantiash: Muequi nec, quenquio mibi iquec.

Ënquin chiaid

¹³ Dadpen chuitiadquiocquimbi dada uaquin chienquio iquembi.

¹⁴ Nëbi mibi yacno nidshun mibi bëisquioquimbi dadpen chuibanendambi.

¹⁵ Ma Nuquin Papambi mibi bëdambuec tabadmepanu, quequin tantiaquin chiannembi. Nëmbocquidon naden chioshi. Mibi tantiec tabadebi, Cayo, quequin dada uata, caoshi. Cayo, mibëd icquido adembidi tantiembique. Chuita. Aidted chuiquin dada uaombi.