Uanën dada uaid 9 - El Nuevo Testamento en matsés

Esusën bëshuaid bëdanmiaid

¹ Adec cuenash capuquimbi Esusën dada bëshuaid istuidpondash. Aidi anin bëshuacchobi tishnëdaid nepondash.

² Aid istuidshumbimbi ubitedishun: En chui, Icbo. Tantianu. ¿Atotsi queshun nëid dada bëshuacchobi tishpanëdash? ¿Aton papabëtan anin icsambuen nabansho issunda Nuquin Papan cuidquin bëshu uanëdaid nepec? ¿Tishabi icshobi: Abibi icsatequid nec, quequin tantiaquinda Nuquin Papan bëshu uanëdaid nepec? capondambi.

³ Adoaquien Esus: Padenquio. Aton papabëtan anin icsambuen nasho issun Nuquin Papan cuidquin bëshu uambo iquec. Adecbidi abibi icsatequid nec, quequin tantiaquin Nuquin Papan bëshu uambo icpanëdash. Nadatiambocquin nabanquin bëdanmesho issun: Ma matsesën: Nuquin Papa nadatiambocquin naquid nec, quequin tantianu, queshumbien Nuquin Papan napanëdash.

⁴ Nëbi ubi chomiondaid Cun Pan chiacpadombuen naic chonoadnuna. Ubi Nuquin Papa yacno nidabi icnuc aden nanuna. Inchëshnuc chonoadtiapimbo yacbimbuec ubi nidan ubëd mibitedi chonoadtiapimbo iquendac.

⁵ Aden chiashic: Matsesbëd tabadquin chëncaquin ismiacbimbuen matses Nuquin Papa bëdambuen tantiamequidquio nebi,

⁶ quequin chuitanquin nidaidën uicchun pidtanquin nidaidbëta uicchun cabiuntsëcshun bëshuaid Esusën bëbitaccapondash.

⁷ Adotanquimbic: Acte uëdëshcaid tiquidimbo icquid Sidoe caidën bëpamëdec nid, cac nidash bëpamëdtanec bëdambuen isec chopanëdash. Aid acte cun onqueten chomiaid quequin Sidoe capondash.

⁸ Adec bëdanash aton shubuno nidacsho issun aton shubu anoentsëc icquidobëtan isenquio tsadec: Piucquid bec cho, quesho isbued utsibon istuidpanëdash. Aden istuidash: Podquied cuëman tsadec: Piucquid bec cho, quesho nuqui isbuedquiobien niacbipec, cabededpanëdash.

⁹ Utsi utsiec: Ai, aidquiobi nec, quenubi utsibo: Padenquio. Aidbimbuecquidien nechitec, quesho tantiashien: Aidi nebi, quepanëdash bëshuacbued.

¹⁰ Adsho tantiashun: ¿Mitsipaden isbeno? caquien:

¹¹ Esus cuëmëdquidën uicchun pidtanquin nidaidbëta uicchun cabiunshun bëbitaccashun: Acte tiquidimbo icquid Sidoe caidën bëpamëdec nid, cac nidash bëpamëdequi bëdanobi. Nëbi bëdambuen isembi, quepanëdash bëshuacbued.

¹² Adsho tantiashun: Mibi bëdanmequid ¿mitsimbo icpec? caquien: Tsaun, capanëdash.

Padiseobon bëshuacbued chuimiaid

¹³ Chonoadtemaid uëshën bëdanmioshi, quesho tantiashun: ¿Abimboda capec? quetanquin: Ma cun chuiquidon mibi chuimenu, queshun padiseobo yacno bëshuacbued buampanëdash.

¹⁴ Buanacshobien padiseobon: Chonoadtemaid uëshëmbi Esusën bëdanmiac caosh, quequin tantiaquin:

¹⁵ ¿Mitsipadec bëdano? caquien: Esusën nidaidbëta uicchun cabiunshun bëbitaccac acten bëpamëdec bëdanshun nëbi bëdambuen isembi, quepanëdash bëshuacbued.

¹⁶ Adec: Bëpamëdec bëdanobi, quesho tantiashien padiseobo utsi utsiec nadec onquecuededpanëdash: Nuquin Papan Chomiaid icquin Aidën Chiaid niaquenquio ictsiash. Ma chonoadtemaid uëshën nëid bëdanmequin Nuquin Papan Chiaid niacpayoc, quenubien utsibo: ¿Nuquin Papa tantiesanda aden bëdanmepatsiash? Ma nadatiambocquin nabampaboc, quepanëdash. Adshumbic abitedishun: Esus icsambo iquec, cainquio icquin

¹⁷ bëshuacbued chuiuapanëdash. Mibi bëdanmequid icsho: ¿Mitsi paden aid mimbi tantie? caquien: Nuquin Papan oncamiaid nec, quequin tantiembi, capanëdash bëshuacbuedën.

¹⁸ Adoaquien cun matses isadaidbon chuiquido: Bëshuaidpenquien niash. Muequien neque. Anibëta amë chuimenun chomenuna, quetanquin

^19-20 chomeshun bëshuacbued ismequin: ¿Min madobida nec? capanëdash. Adoac: Ai, cun mado nec, quesho tantiashun anitsen chuiquin: ¿Bëshuacchobida tishonda? capanëdash. Adoaquien: Ai, bëshuacchobi tishondambi, capanëdash anin. Adshobien: Bëshuaid ¿mitsipadec bëdanosh? capanëdash.

²¹ Adoaquien: Tsaun. ¿Tsundambien bëdanmechitash? Bëdanmesho isambo iccombi. Dada ënden caniaid neque. Aidi chuime, capanëdash bëshuacbuedën titan amëbëtambi.

²² Nuquin Papan Chomiaid Quidistu caid Mesias Esus nec, quequido icsho Nuquin Papan Chiaid chuibante shubun puduedmenquien ictiad, quequin cun matses isadaidbon chuiquidon chiaid tantiash dacuëdquin:

²³ Dada ënden caniaid neque. Aidi chuime, capanëdash anin amëbëtan.

²⁴ Adoac cun matses isadaidbon chuiquidon padpiden bëshuacbued chomeuashun naden chuiuapanëdash: Nuquin Papan isquin tantianubi abimbo chuita. Esusën bëdanmioshi ¿quecta icco? Esus Nuquin Papan Chiaid niacquid yec icsambocquid nec, quequin tantiembi, quepanëdash.

²⁵ Adsho tantiashumbien bëshuacbuedën: Icsambuen naquid Esus nec, quequin tantienquio iquembi. Mabi bëdanmeboc. Isenquio icbuedëmbi mambi nëbi bëdambuen iseyoc, quequinuidtsëqui tantiembi, quepanëdash.

²⁶ Adsho tantiashumbien padpiden chuiuaquin: ¿Mitsipaden mibi bëdanmenuen naosh? caquien:

²⁷ Mambi mibi chuipaboc. Aden chiaqui ma mimbi tantienquio icpayoc. ¿Atotsi quiash padpidec: Ubi chui, mibi quepe? ¿Mibitedida Esus tantiaquido icte bune? capanëdash bëshuacbuedën.

²⁸ Adsho tantiash nëishtanquin: Mibien Esus tantiaquid nec. Mibi icsambo iquec. Ubitedien nuquin tsusedpa Moisesën chiampid tantiaquido nec.

²⁹ Moisesien Nuquin Papan chuiquin namepampic, quequin tantiembi. ¿Tsuntsin chiac mibi bëdanmequidën napash? Ma mibi bëdanmequid ¿mitsiuëshquio chopash? Umbi tantiacmaidquio neyoc, quequin chushcapanëdash chuiquidon.

³⁰ Adoaquien bëshuacbuedën: ¿Abimboda cai? Dadpenquio tantiembi, ma mibi quepaboc. ¿Adbuedida: Umbi tantiacmaidquio nec, mibitedi quepe? Mimbi tantiacmaidëmbini bëdanmiosh.

³¹ Ambi icsambuen naid ënabi icquidën Abi chiannesho Nuquin Papan tantiashunenquio ictsiash. Abi tantiaquioquin Ambi chiacpadombuen naquidën Abi chiannesho Nuquin Papan nashuntsiash, quequin nuqui tantiec.

³² Anin bëshuacchobi tishaid bëdanmiac caosh, quesho tantiambo iccondambi. Adquid bëdanmequid nibëdpadennec.

³³ Nuquin Papan chomiacmaid icquin Esusën ubi aden bëdanmenquio ictsenosh, quepanëdash bëshuacbued.

³⁴ Adsho tantiash nëishtanquin: Bëshuacchobi tishaid yec mibi icsambuen naquid nec. ¿Adquid icquimbida mimbi ubitedi chuipe? Nëmbo Nuquin Papan Chiaid chuibante shubun padpidec pudueduainda, quequin cuenmepanëdash.

Ambi bëdanmebued istuidshun Esusën chiaid

³⁵ Adnubien: Mimbi bëdanmebued cuenmiac caosh, quesho tantiashun Esusën ambi bëdanmebued istuidpondash. Istuidshumbic: Matsesën Tishaid yec Nuquin Papan Chomiaid nec ¿quequinda tantie? capondash Esusën ambi bëdanmebued chuiquin.

³⁶ Adoaquien: Icbo ¿Tsutsi caic nec? Umbitsen aid tantianu. Ubi chui, capondash.

³⁷ Adoac Esus: Ubibi nebi. Mimbi isbued yec mibëd onquequidi nebi, caquien:

³⁸ Ai, Nuquin Papan Chomiaid Quidistu caid mibi nec, quequin tantiembi, quetanec Esus ismec dannëshën tinquebudpondash.

³⁹ Adshumbic Esusën naden chuipondash: Matses cuidquid nebi, quiash matsesbëd tabadec Nuquin Papa yacnouësh chondabi. Umbi bëshuaid bëdanmiac tantiesa icbuedëmbi ubi tantiabensho Nuquin Papan bëdambuen isec. Utsiboen: Nuquin Papa tantiaquiembi, quebuedombi bëshuacbimbuen ubi tantiatiapimbo icquin Nuquin Papa tantienquio iquec, quepondash Esus.

⁴⁰ Adsho tantiash ambo tabadquid padiseobo utsi utsiec: ¿Bëshuacbimbuen Nuquin Papa tantiesabodabi ne? quepondash.

⁴¹ Adsho tantiashien: Bëshuacbimbuen Nuquin Papa tantiesabo icsho umbi tantiamiac Nuquin Papabëta ubi tantiasho Nuquin Papan mibi bëdambuen istsiash. Padnuen: Nuquin Papa tantiembi, quec muaquin Ambi Chiaid bëdambuen tantienquiocquid icsho Nuquin Papan cuidtequido mibi nec, quepondash Esus padiseobo chiec.