Uanën dada uaid 4 - El Nuevo Testamento en matsés

3. Esusën chuisho utsin utsinquien tantiaid ( 4.1—6.71 ) Samadia yacnocquid chido Esusën chiaid

¹ Adnubien cun matsesën chuiquido padiseobon: Uan acten mentoanquidën naid dëniacquin Esusën abi tsibanquid dadpen icsho acten mentobanosh, quequin chuisho tantiapanëdash.

² Esusën nainquio icnubien abëd icquidonuidtsëqui matses acten mentobampondash.

³ Padiseobon mibi adosh, cac: Cun nidaidën nidnu, quianec nidaid Udea caid yacnouësh puduanec nidec nidaid Cadidea caid yacnobidi niduapondash.

⁴ Aid podquiedën nidequi nidaid utsi Samadia caid matambidanec nidpondash.

⁵ Adec nidquimbi shubu dadpen icquid Sicad cain cuënaid yacno chopondash. Aid anoentsëqui cun tsusedpa Acobon tied uampid icpondash. Aid tied caic: Ubi uënësan nëid tied bedta, mado, quequin aton mado Ose chiampid tied nepondash.

⁶ Ambobi Acobon uëdëshcampid acte uete icpondash. Uëshë cuembo icnuc aid dayunquiobi: Uinmabudash tiboquenu, quec Esus tsadtuidpondash.

^7-8 Adec tsadtuidnubini abëd icquidobëd: Pete bedtannu, quianec shubu dadpen yacno nidannepondac. Esus abentsëqui nianec nidanniambien Samadia yacnocquid chido acte uec choquin Esus tsadsho istuidpanëdash. Abi istuidshobien Esusën: Acte bec cho. Acnu, champi, caquien:

⁹ Acte bec cho ¿quecta ique? Ma mibi isadaidbo nepayoc. ¿Adquid icquimbida: Acte bec cho, ubi cai? capanëdash chidon. Samadia yacnocquidbëd onquesambo isadaidbo nec, quequin tantiec adpanëdash chido.

¹⁰ Adshobien Esusën naden chuipanëdash: Nuquin Papan bëdambuen isquin natebëta ubi tantiaquid icquin: Acte bec cho, mimbi ubi catsiac. Adsho acte bëdambo icmianquid mibi acmetsiambi, capanëdash.

¹¹ Adoaquien chidon actembo danquin: ¿Mitsipaden acte ueshun ubi menetsia? Ma min tëchu nibëdpayoc. Mimbi uetiapimboen acte ëquëducquio iquec. ¿Mitsimbo acte bëdambo icmianquid ueshun ubi acmetsia?

¹² Nëid acte nuquin tsusedpa Acobon uëdëshcampid nec. Aton bacuëbobëtan Acobon acampid nec. Adembidi aton nëish iuabon acampid neuaic. ¿Nuquin tsusedpan aden nampid icnuc aid dëniacquin naquidquioda mibi ne? capanëdash chidon.

¹³ Adoaquien Esusën: Nëid acte acquidtedi padpidembuec acte bundouaic.

¹⁴ Padnuen umbi acte acmiac acquidtedi padpidec bundoenquio ictsiash. Umbi acte ushumbo pududquequid acmiac ënëdenquio yec ubëd tabadtequid mibi yantsiandac, quepanëdash Esus.

¹⁵ Adsho tantiashumbien chidon: Aid acte ubi acme. Padpidec acte bundoash nëmbo acte uec choenquio ictsiabique, capanëdash.

¹⁶ Adoaquien Esusën: Min bënë bedtan, capanëdash.

¹⁷ Adoac chidon: Cun bënë nibëdec, caquien Esusën: Abimbo mimbi caic. Min bënë nibëdec.

¹⁸ Min bënë 5ted icpadennec. Aidon mibi niambudnian nëbi mibëd icquid min bënëpenquio nec. Abimbo mimbi caic, quepanëdash Esus.

¹⁹ Adsho tantiashumbien chidon: Nuquin Papan oncamiaidien nec, quequin mibi tantiembi.

²⁰ Cun tsusedpabon: Nëmbuen Nuquin Papa iquec. Nëid macuësh tapa yacnoshonuidtsëqui Nuquin Papa tantiac bëdambo ictsiash, quequin chiacpadombuen cun matsesën naic. Min matsesëmbien: Edusaden yacnoshonuidtsëqui Nuquin Papa tantiac bëdambo ictsiash, capec, quepanëdash chido.

²¹ Adsho tantiashumbien Esusën: Tantia. Mibi abimbo chuinu. Nëbi nëid macuësh tapanshunuidtsëqui Nuquin Papa tantiec. Adembidi Edusaden yacnoshonuidtsëqui tantiec, quenquio icquin mibitedishun Nuquin Papambo tantiabenendac.

²² Min matsesën: Nuquin Papa iquec, quequin tantienquio iquec. Cun matses isadaidbombien: Nuquin Papa iquec, quequin tantiashun: Nuquin Papan Chomiaid icquin Nuquin Papa matses bëdambuen ismequid nuquin matsesën tishendac, quequin chiampid tantiaquin bëdambuen tantiec.

²³ Nëbien aton Mayanën tantiamiac utsin utsinquien muainquio icquin: Cun Icbo nec, quequin Nuquin Papa tantiendac. Ambi chiacpadec bëdambuec tabadsho isash: Adquid ubi tantiaquidquio nec, quendac Nuquin Papa.

²⁴ Nuquin Papapadquidquiobidi aton Mayan nec. Aidën tantiamiacpadombuen Nuquin Papa tantiaquin aidën chiacpadombuen naquido nendac, quepanëdash Esus chido chiec.

²⁵ Adsho tantiashun chidon: Nuquin Papan Chomiaid Mesias Quidistu caid choendac, quequin chuisho tantiondambi. Aid choshon nuqui tantienquio yaidtedi chuibanquin tantiametsiash, capanëdash.

²⁶ Adoaquien Esus: Mimbi chiaidquiobi nebi, quepanëdash chido chiec.

Esusën Samadia yacnocquido chiaid

²⁷ Adnubini pete bedtanec abëd icquidobëd chopondac. Adshun isaquien chidobëd Esus onquepec. Adsho isash tantiadempambo icquin: ¿Atotsi quiash chidobëd onquio? ¿Atotsi chiec chidobëd onquec nio? quequin Esus chienquio icpondambi.

²⁸ Adnubi aton tëchu nianec chido nidpondash aton matses naden chiec:

²⁹ Isec cho. Umbi isacmaidëmbi dadan umbi naid abitedi chioshe. ¿Nuquin Papan Chomiaid Quidistu Mesias caidta nioshe? En isec cho, quequin chuituidac:

³⁰ Aidi niash icnushe. Isnunid, quianec matses dadpen Esus yacno chochopondash.

³¹ Aido choabi icnubi abëd icquidon: Pete bëombique. Pe, Icbo, caquien:

³² Padi. Mibitedishun isambo yaid cun pete utsi iquec, quepondash Esus.

³³ Adsho tantiashini ubitedi petembo danec: ¿Utsibon pete meneuanacta nepec? quecuededpondabi.

³⁴ Adsho tantiash Esus: Ubi cuishoncamete petebimbuecquid utsi iquec. Ubi chomiondaid Nuquin Papan chiacpadombuen naic bëdambo iquebi. Ambi chiaidtedi chonoadquin nainnuec nebi, quepondash.

³⁵ Adashic padpidec: Uëshë 4ted nidmeshun adosbiecquid tidico caid siaid ëshëacsho bedembi, quepec mibitedi. Adosbiecquid bednuen cainacpaden ¿iuecshunda nëmbo icquidon ubi tantiabempec? Padenquio. Nëbien nëidon tantiabentsiash, mimbi cacmaidobi chochoeque. Is.

³⁶ Umbi chuibued chidon chiac matses dadpen chochoeque. Chuibannuna. Aido ubi tantiabenash Nuquin Papabëd ënëdenquio yec tabadtequido yanendac. Adsho isash nuqui cuishonquendac. Adembidi ubi chuibennequidon chuibanac tantienquio icbuedobi utsin chuibanac ubi tantiabensho isash chuibanquid abidaëdi cuishonquendac piucquid bedacbimbuec.

³⁷ Naden nuquin matsesën chuinëdaid abimbo iquec. Tied icbon: Umbi nitsimbued bedta, cac ambi nitsinacmaidi matsesën bedec.

³⁸ Aden ambi nitsinacmaidi bedacbimbuen mimbi naic. Utsibomba Nuquin Papan Chiaid chuibannëdaido nëmbo icquido neque. Mimbitsen chuiban. Adoac Cun Pabëta ubi tantiabenendac, quepondash Esus abëd icquido chiec.

Samadia yacnocquid dadpenshun Esus tantiabenaid

³⁹ Adnubien Esusbëd onquebued chidon: Cumapenen tantiaquin umbi naid abitedi chuibanosh, quequin chuisho tantiashun Esus tantiabenec Samadia yacnocquido Esus isec chochopondash.

⁴⁰ Chochoshon: Ubi yacno ushquin chuibanec cho, quequin beduanac Samadia yacno tabadquin Esusën chuibampondash. Ambobi abentsec ushpondash.

⁴¹ Aden Esusën chuisho tantiash: Nuquin Papan Chomiaidquio Esus nec, quequin ambocquido dadpenshun tantiabempondash.

⁴² Adshumbic chido chiec: Mimbiuidtsëqui chuisho tantiabuedëmbi nëbi aidënquio chuisho bëdambuen tantiembi. Aidi Nuquin Papa yacno matses tabadmequid nec, quequin tantiembi, quecuededpondash Samadia yacnocquido dadpen.

Chuiquid tapan mado Esusën bëdanmiaid

⁴³ Abentsec ushanec Samadia yacnouësh puduanec nidec nidaid Cadidea yacno Esus nidpondash.

⁴⁴ Umbi chiacpaden abi caninëdacnoshon Nuquin Papan oncamiaidën chuisho aton matsesëmbi tantienquio iquendac, quebuedi aton nidaidën nidpondash.

⁴⁵ Nidaid Cadidea yacno chosho issun ambocquidon: ¿Choecta icco? Tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshë icnuc Edusaden yacno nidshun mimbi nadatiambo icquin nabansho isondambi, quepondash Esus chiec.

⁴⁶ Adec aton nidaid yacno nidequi ambi tauambuen actembobi uba ënë actequid yanmiondacno shubu dadpen icquid Cana caid yacno Esus nidpondash. Adnubien shubu dadpen icquid utsi Capednaun caid yacno chuiquid tapan chuiquid icmiaid icpanëdash. Aidën mado nënquid icpanëdash.

⁴⁷ Adashic: Esus Udea yacnouësh nidaid Cadidea yacno choaccosh, quesho tantiash: Istannu, quianec nënquidën papa chopanëdash. Adec Esus yacno choshombien: Cun mado uënëstiadtsëcquio iccoshe. ¿Ada aid bëdanmec nidtsia? capondash.

⁴⁸ Adoaqui badedi nidenquio yec abi datsidadquido chiec: Ubimbo mibitedishun tantienquio iquec. Umbi nadatiambocquin nabansho issunuidtsëqui: Nuquin Papan Chomiaidien nechitec, quequin mimbi tantiec, quepondash Esus.

⁴⁹ Adec onqueshobien padpidembuen: Baded cho. Cun mado uënësnushe, capondash.

⁵⁰ Adoaquien Esusën: Min mado chumbo icbuedi uënësambo iqueque. Min shubuno nidec nid, quesho tantiash: Abimbo caic, quianec nidpondash.

⁵¹ Adec nidquimbi abi chuinuec aton iuabo chochosho bëquedpanëdash. Aden bëquedaqui aton iuan: Min mado bëdanosh, quesho tantiashun:

⁵² ¿Mitsimbo uëshë icnuc cun mado bëdanosh? cac: Ënden uëshë utsin uëshë budec una yannubi chumbo icbuedi dauebudec bëdanosh, capanëdash aton iuabon.

⁵³ Adsho tantiash: Adënquioshendabi: Min mado uënësambo iqueque. Min shubuno nidec nid, caposh Esusën, quepanëdash uënëstsembuedën papa. Adshun: Nuquin Papan Chomiaidquio yec nadatiambocquin nabanquidquio nec, quequin aton shubun icquidobëtambi Esus tantiabempanëdash.

⁵⁴ Adec Udea yacnouësh choash nidaid Cadidea yacnobidi tabadquin ambi actembobi uba ënë actequid yanmequin ismequin tauaondacnoshombidi bëdanmequintsen Esusën ismepondash.