Uanën dada uaid 3 - El Nuevo Testamento en matsés

Esusën Nicodemo chiaid

¹ Adnubien Edusaden yacnobidi Nicodemo cuëmëdquid icpondash. Aidi padiseobo yec abëtan chuiquid utsibobëd isadaidbon chuiquid tapa nepondash.

² Aidi inchëshën Esusbëd onquenuec chopanëdash. Adec choshon: Nuquin Papan namiaid icquimbien bëdambuen chuibanquin naic, quequin mibi tantiombi. Mimbi nadatiambocquin nabansho issun: Nuquin Papan namiaidënuidtsëquien aden nabantsiash, mibi caombi, quepanëdash Nicodemo.

³ Adsho tantiashumbien Esusën naden chuipanëdash: Tantia. Mibi chuinu. Chuca uabi icquid yec Nuquin Papan namiacno mibi tabadtiapimbo iquendac.

⁴ Adsho tantiashien: ¿Mitsipadec tsësiobi chuca uadpatsiash? Chidon padpiden usundoshon tishtiapimbuen iquec, quepanëdash Nicodemo.

⁵ Adsho tantiashumbien Esusën: Mibi abimbo chuinu. Tantia. Nuquin Papan Mayanën tantiamiac chuca uadec acten mentoadabicquid yec Nuquin Papan namiacno puduedtiapimbo iquendac.

⁶ Chidon tishaiduidtsëqui yec matsesën dadauidtsëqui nendac. Nuquin Papan Mayanën chuca uaquin tantiamiaidien Nuquin Papabëd tabadtequid nendac.

⁷ Chuca uaquin padpiden tishacbimbuecquid Nuquin Papabëd tabadendac, ubi quesho tantiash: ¿Mitsipaden chuipec? ¿quequinda tantie?

⁸ Tantia. Mibi chuinu. Cunquequid isadenquio icquid nec. Isadenquio icquimbi cute ishcunsho isash: Cunquequidën nac nec, mibi quepec. Adquiobidi isadenquio Nuquin Papan Mayan iquec. Isadenquio icquimbi aidën chuca uaid yec bëdambuec tabadsho issun: Nuquin Papan Mayanën chuca uaid nec, quequin mimbi tantiendac, quepanëdash Esus.

⁹ Adsho tantiash: ¿Mitsipaden capec? queuapanëdash Nicodemo.

¹⁰ Adoaquien Esusën: Isadaidbo Nuquin Papan Chiaid tantiamequin ¿chuibanquid icquimbida tantienquio ique?

¹¹ Tantia. Mibi abimbo chuinu. Umbi isondaidbëta umbi tantiondaidquio chuibanaqui ma mibitedishun tantienquio icpaboc.

¹² Umbi nidaidënshun naid chuibued tantienquio icquin ¿Mitsipaden Nuquin Papan abucshun nate umbi chuisho mimbi tantiape?

¹³ Nuquin Papa yacno abuc nidec matses nidtanambo iquec. Nadquio iccosh, quequin matsesën chuitiapimbo iquec. Umbien Matsesën Tishaid icquimbi abucuësh chondaid icquin tantiendac.

¹⁴ Nuquin Papan chiacpaden shubu nibëdacnoshon: Ma nëid isec nisin piaid bëdannu, queshun nisibimbuecnuc shocosh nacnenaid Moisesën cuesten dectampampic. Adecbidi Matsesën Tishaid yec matses cuidmenquio icnuec ubided cuidadec abuc cueste napotiaidën dectamëdendabi.

¹⁵ Ma ubi tantiaquido uënësacsho cuidenquio icquin Nuquin Papan ënëdenquiocnoc abi yacno tabadmenu, quiash adendabi, quepanëdash Esus Nicodemo chiec.

Nuquin Papan matses abitedi tantiaquin naid

¹⁶ Adashic Esus: Matses abitedimbo tantiaquidquio icquin Nuquin Papan aton Mado abentsëqui abided cuidmequin uënës uasho ubi tantiaquid cuidenquiocquin abi yacno ubëd ënëdenquiocnoc tabadmendac.

¹⁷ ¿Matses cuidnuenda Nuquin Papan aton Mado chomepanëdash? Padenquio. Aton Mado tantiasho matses cuidenquio icquin abëdi tabadmenuen chomepanëdash.

¹⁸ Nuquin Papan Aton Mado tantiaquido cuidenquio icquimbi Aton Mado abentsëcquid tantiesa icsho cuidendac.

¹⁹ Nuquin Papan matsesmiaid icquin ambi icsambuen naid umbi chuibansho tantiashumbi matses icsambo icquidon ambi icsambuen naid ëntiapimbo icquin ubi tantiatiapimbo iquec.

²⁰ Adquidon: Uëshën chëncaquin tantiamiacbimbuen umbi icsambuen naid utsibo tantiamenushe, queshun ubi chieshëmpec.

²¹ Nuquin Papan chiacpadec tabadquidombien ubi chieshënenquio iquendac. Adquidon Nuquin Papan namiacpadec bëdambuec tabadquin ismiac: Ma utsibon umbi bëdambuen naid tantiapanu, quiash ubi tantiate bunendac, quepanëdash Esus.

Uan acten mentoanquidën padpiden Esus chuiuaid

²² Aden chiashic Esus abëd icquidobëd Edusaden yacnouësh nidec aid nidaid cuëshë Udea caidëmbidi nidpondash. Ambo iuec tabadquin Nuquin Papa tantiabenquido icsho acten mentobampondambi.

²³ Adembidi Uanën acten mentobampanëdash. Aden mentobanquin shubu daëdpactsëcquid Enon caid yacnoshon shubu daëdpactsëcquid utsi Sadin caid anoentsëqui acte nua yacnoshon matses dadpen acten mentobampanëdash.

²⁴ Chieshënquin quënën tsadunmiabi yac Uanën adopanëdash.

²⁵ Adnubien Uambëd icquido cun matses isadaidbo utsibëd: Mimbi icsambuen chiec, quec chushcananec: Uanëmbien Nuquin Papa tantiabenquido bëdambuen acten mentobanosh, quesho tantienquio yec Moisesën acten mëpamëdte chiampiduidi tantiec chushcanampanëdash.

²⁶ Adshumbien Uambëd icquidon: Nuquin chuiquid chiec nidnunid, quianec nidshun Uan chuituidpanëdash: Acte Odan caid ëquëmatsiucshun ¿mitsicquid: Nuquin Papan Chomiaid nec, mimbi cadio? Aidën matses dadpenquio acten mentobanac caosh. Adoac matses dadpenshun tsibanampac caosh,

²⁷ caquien Uanën: Nuquin Papan namiabicquidën aden natiapimbo iquec.

²⁸ Nuquin Papan Chomiaid Quidistu Mesias caidpenquio nebi, quequin mibitedi cuembo chiondambi. Nuquin Papan aidën bëyuc chomiaid icquin aid chote chuibanquidquio nebi, quequin umbi chuibansho mibitedishun tantiondac.

²⁹ Aden umbi chuibuedquio nec, quiash Esus chosho istanec cuishonquepobi. Cun matses aton chido bedmiombi, quiash cuishonquiacbimbuec cuishonquepobi. ¿Aden chido bedmequidën: Min bënëbëd nidenda, caquinda ictiosh? Padenquio. Bënëbëd nidmiash bëdambo yacbimbuec Esusbëd matses dadpen nidanniosh, quesho tantiash bëdambo iquebi.

³⁰ Umbi Nuquin Papan chiacpadombuen tantiamequin ënquin chuiquin tantiamiac umbi acten mentoaido daëdpactsëc yanendac. Padnuen umbi chuibuedën tantiamiac abi tantiaquido dadpenquio yanendac, quepanëdash Uan abëd icquido chiec.

Nuquin Papa yacnouësh choquid chiaid

³¹ Adshumbic Uanën naden chuiuapanëdash: Esusquio bëdamboshëcquid nec. Aidi Nuquin Papa yacnouësh choquid yec abitedishun Icbombo nec. Padnueni nidaidën tabadquid matses yec: Nuquin Papa isondambi. Nadquio iccondash, quequin chuitiapimbo iquec.

³² Esusëmbien ambi Nuquin Papa yacnoshon isnëdaidbëta ambi tantianëdaid chuibampec. Aden chiaqui matses dadpenshun: Abimbo caic, quequin tantiate bunenquio iquec.

³³ Aden aidën chiac tantiaquidombien: Nuquin Papa muesambo nec, quequin tantiendac.

³⁴ Nuquin Papan Chomiaidquio icquin Aidën Chiaidquio chuibanec. Nuquin Papan aton Mayan abëd tabadmiaid icquin nadatiambocquin nabanquin abimbo chuibanec.

³⁵ Ambi tantiaidquio icsho Nuquin Papan Aton Mado abentsëcquiobi abitedishun Icbombo icmiac.

³⁶ Adoaid Aton Mado tantiaquido icsho Nuquin Papan abi yacno tabadmendac. Padnuen aton mado tantiesabo icsho Nuquin Papan abi yacno tabadmenquio icquin mëyadtequid yacno nidmequin cuidquiendac, quequin Uanën chuipanëdash.