Uanën dada uaid 16 - El Nuevo Testamento en matsés

¹ Chieshtoshon ubi tantienquio yannushe, queshun mibi aden chiombique. Chieshënac chieshtoenda.

² Mibi chieshënquidon: Nuquin Papan Chiaid chuibante shubun puduedenda, quequin shubu dadpen icquid utsi utsiec yacnoshon mibi cuenmendac. Adombuembidi mibi chieshënquin utsi utsien cuessun secash: Nuquin Papa nashunquin Esus tantiaquido cuessun secaombi, quependac.

³ Aden Nuquin Papabëta ubi tantiesabon ubi tantiaquido chieshënquiendac.

⁴ Aden chieshënte uëshë yannuc: Ai, aden chieshënteshenda Esusën chuipondash, quequin tantiata. Adashic Esus: Bedanec ubëd mibitedi yansho aden chienquio iccondambi.

Nuquin Papan Mayan Bëdan nate chiaid

⁵ Adashic: Nëbi ubi chomiondaidbëd tabadec nidendabi, quepondash Esus. Adsho tantiash padequimbo tabadpondabi. Adec tabadsho issun Esusën: ¿Mitsimbo nide? quequin ¿ubi chienquioda ique? quetanequien:

⁶ Umbi chuibued tantiash uënësquio icquimbien mimbi ubi chienquio iquec.

⁷ Tantia. Mibitedi abimbo chuinu. Ubi nidnuc mibi bëdambo iquendac. Ubi nidenquio icnuc Cun Mayan bëdambo icmianquid mibi dayun uaquid choenquio ictsiash. Nidshumbimbi mibëdi tabadmenuen chomendac.

⁸ Adoac matses ambi icsambuen naid tantiamendac. Adembidi: Bëdambuen naquid nec, quequin tantiamendac. Adombuembidi Nuquin Papan cuidtequidtsen tantiamendac.

⁹ Adoac Esus tantienquio yec icsambuen naquid nec, quequin matsesën tantiendac.

¹⁰ Adembidi: Esus bëdambuen naquid nec, quequin tantiamendac. Adquid yec ubi Cun Pa yacno nidacsho mimbi ubi isenquio iquendac.

¹¹ Adembidi tantiamiac: Matses dadpenquio iuaquid Mayan Icsa Satanas Nuquin Papan cuidendac, quequin matsesën tantiendac, quepondash Esus.

¹² Adashic Esus padpiden chiec: Mibi dadpenquio chuitiadquio icquimbi nëbi dadpen mibitedi chienquio iquembi. Nëbi umbi aden chuisho mimbi tantiatiapimbo ictsiac.

¹³ Nuquin Papan Mayan Bëda abimbo tantiamequid choshombien mibi abimbo chuiquin tantiamendac. Ambi tantiacpaden chienquio icquin Nuquin Papan Chiaiduidtsëqui chuiquin: Nadquio iquendac. Nadquid choendac, quequin mibi dadpen tantiamendac.

¹⁴ Adembidi umbi naidbëta umbi chiaidtedi tantiashun mibitedi tantiamequin: Esus bëdamboshë iquec, mibi camendac.

¹⁵ Umbi tantiacpaden chuibanambo iccombi. Mambi Nuquin Papan chiacpadombuenuidi naquin aidën chiaiduidtsëqui chuibandedneboc. Aden umbi naidbëta Umbi Chiaid Cun Mayanën tantiamendac, quequin tantiec: Umbi naidbëta Umbi Chiaidtedi tantiamendac, quequin mibitedi chiombi, quepondash Esus.

Abi nidte Esusën chiaid

¹⁶ Adashic padpidec: Nëbi iuecpactsëcshun mimbi ubi isenquio iquendac. Adshumbic iuecpactsëcshun mimbi ubi padpiden isuaindac, quepondash Esus.

Shubibuedi mibitedi cuishonquendac, quequin chiaid

¹⁷ Adsho tantiash ubitedi chuinanec: ¿Atotsi chiec: Cun Pa yacno nidacsho mimbi ubi isenquio iquendac, queposh? Adecbidi ¿Atotsi chiec: Nëbi iuecpactsëcshun mimbi ubi isenquio iquendac. Adshumbic iuecpactsëcshun mimbi ubi padpiden isuaindac, queuaposh?

¹⁸ ¿Atotsi chiec: Iuecpactsëc, quepec? Ma tantiadenquio icnuc chuipayoc, quecuededpondabi, Esus tantiamenquio yec.

¹⁹ Adsho ambibi tantiashien Esus: Nëbi iuecpactsëcshun mimbi ubi isenquio iquendac. Adshumbic iuecpactsëcshun mimbi ubi padpiden isuaindac, quequin umbi chuibued tantiashun ¿ubi chuimetiadquioda ique?

²⁰ Tantia. Mibitedi abimbo chuinu. Ubi uënës uasho isash mibitedi uënësquio icnuc shubicuedednubi ubi tantiesabo cuishonquendac. Adec uënësquio icnuc shubibuedobi mibitedi cuishonquianendac.

²¹ ¿Mitsipadquio bacuë nëncuenash chido icpec? Bacuë nito nitoec natiamboshë icbuedi aton bacuë tishtanec chido cuishonquequid nec.

²² Adquiecbidi nëbimbobi ubi uënës uasho isash mibitedi natiaquiendac. Adbuedi iuecpactsëcshun ubi padpiden istanec mibi cuishonquendac utsibon ënmetiapimbo yec.

²³ Adnubini Cun Pa yacno nidendac. Adec ubi nidacsho: ¿Atotsi quiash ne? ubi catiapimbo icquimbi Nuquin Papa mimbi chiannendac: Min Mado tantiaquid nebique. Ubi nashunta, Papa, cac ubi tantiaquin Cun Pan mibi nashunendac.

²⁴ Ënden: Min Mado Esus tantiaquid icsho ubi nashunta, papa, quequin mibitedishun Nuquin Papa chiannenquio iccoc. Adbuedi nëbi: Min Mado Esus tantiaquid icsho ubi nashunta, Papa, quequin chuita. Mimbi adoac mimbi chiacpadombuen mibi nashunquin Nuquin Papan mibi cuishoncamendac, quepondash Esus abëd icquido chiec.

Mayan Icsa Satanas aton iuabobëta dëniacquidquio nebi, Esus quiaid

²⁵ Adshumbic padpiden chuiuaic: Utsi chiacbimbuen chuiquin mibitedi dadpen tantiamiombi. Nëbi aden chienquio icquin iuecpactsëcshun: Cun Pa nadquio iquec, quequin mibitedi cuembo chiendambi, quepondash Esus.

²⁶ Adashic padpidec: Cun Pa yacno ubi nidan mimbi: Min Mado Esus tantiaquid nebique. Ubi nashunta, Papa, quequin Nuquin Papa mibitedishun chiannendac. Umbiuidtsëqui: Ubi tantiaquid nashunta, Papa, quequin Nuquin Papa chiembi ¿quectabi ique? Padenquio.

²⁷ Nuquin Papan mibitedi tantiaquin Abi chiannesho mibi nashunendac. Nuquin Papa yacnouësh chondaid Esus nec, quequin Ubi tantiaquidquio mibitedi icsho Cun Pan mibi tantiaquioquin nashunendac.

²⁸ Cun Pa yacnouësh matsesbëd tabadec chondashic nëbi matses nianec Cun Pa yacnobidi niduaindabi, quepondash Esus.

²⁹ Adsho tantiashini ubitedi: Nëbi utsi chiacbimbuen chienquio icquin mimbi cuembo chioc.

³⁰ Nëbi abitedimbo tantiaquid nec, quequin mibi tantiembi. Adquid icquin umbi chiambobi mimbi abitedimbo tantioc. Aden tantiaquid icsho: Nuquin Papa yacnouësh choquidquio nec, quequin mibi tantiembi.

³¹ Adsho tantiashun Esusën: ¿Nëbida mimbi ubi tantiaquie?

³² Aden ubi tantiaquidombo iquequi ubi chieshënquin bedsho istanec ubi nianec abimaisi mibitedi niquendac. Aden mimbi ubi niannubi Cun Pan ubi nianenquio iquendac.

³³ Ubi tantiaquin umbi chiacpadombuen naic ubëd abentsëc yacbimbuec natienquio yec tabadec ma bëdambo icnu, quequin tantiaquin dadpen mibi chuibanombi. Nidaidënuësh mibitedi natiec shubitequid iquendac. Adquid icnuc natienda. Chieshëmënquid dacuëdënenda. Mayan Icsa Satanas dëniacquidquio icquin mibi aid iuametiapimbo icquid nebique. Dacuëdenda, quepondash Esus abëd icquido chiec.