Mateo 26 - El Nuevo Testamento en matsés

XII. ABIDED CUIDADEC UËNËSASH ESUS UINCUENAID ( 26.1—28.20 ) Esus bedshun uënës uamenuna, quequin chiaid

¹ Aden abi chote ënquin chuitanquimbic abi uënës uate abëd icquido Esusën naden chuipondash:

² Daëdec ushshun nuquin tsusedpabon: Ma cun mado uënësmenquio icnu, queshun obeca caniactsëc cuessunniampid tantiaquin penun obeca caniactsëc cuessunnec, quequin mibitedishun tantiec. Aid uëshëmbi Matsesën Tishaid icshobi cueste napotiaidën dectanmenun ubi bedendac, quepondash Esus.

³ Adnubien isadaidbon chuiquidobëd Nuquin Papa ismequin nëish iua cuessunneshun pichicaquidon chuiquido aton chuiquid tapambo Caipas cuëmëdquidën shubu dapan iccuededec pudued puduedpanëdash.

⁴ Adashic: Nëbien utsibo ismenquio icquin Esus bedmeshun uënës uametiadpa, quenubien utsibo:

⁵ Nuquin matses obeca pec tabadnuc bedmenquien ictiad. Esus bëdambocquidi bedec, queshun obeca pec chochoaidon nuqui cuestsiash, quecuededpanëdash.

Chidon bëdambo nuadquidën Esus machiuinaid

⁶ Adnubien Esus shubu daëdpactsëcquid Betania caid yacno choash Simonën shubun puduedshun pec tabadpondash. Simon aton dada daush daushpambo yec daicsaidquio icsho bëdanmiaid nepondash.

⁷ Puduedshun pec tabadshobien chido choquin ambi piucquid dadpenquio menequin bedaid sedunte postichoquidën icquid danoshquete bëdambo nuadquidën Esus machiuimpondash.

⁸ Aden nasho issumbien nëishtanquin abëd icquidon: ¿Adenda mimbi bëdambuen nape? Ma mimbi icsambuen naiyoc.

⁹ Utsibo menequin dadpen piucquid bedshun piucquid nibëdquido aid piucquid menetiadquidi mimbi naic, quequin chido chushcapondash.

¹⁰ Adsho tantiashumbien Esusën: ¿Atotsi quequin chido chushcai? Ubi tantiaquin ubi ismequin bëdambuen nashunoshibique. Chushcainda.

¹¹ Piucquid nibëdquido dadpen mibëd tabadec nibëdenquio iquendac. Ubien mibëd icbuedi nëbi nibëdquio yanendac.

¹² Nëid chidon ubi uënës uacsho chococate tantiaquin machiuinoshibique. Chushcainda.

¹³ Abimbo chiembique. Tantia. Nidaid utsi utsiec yacno Nuquin Papan Chiaid Bëda Umbi naid chuibenniacnoshombi nëid chidon ubi machiuinquin nabued tantiaquin chuibanendac. Aden aidën naid bëshunenquiocquin tantiendac, quepondash Esus ubitedi chiec.

Udasën Esus bedmenun piucquid bedaid

¹⁴ Adnubien abëd icquid abentsëc Udas Iscadiote cuëmëdquid nëish iua cuessunneshun pichicaquidon chuiquido yacno isec nidpanëdash.

¹⁵ Nidshumbic chuituidpanëdash: Utsibo ismenquio icquin mibiuidtsëqui Esus bedmenu. ¿Tedtsi piucquid ubi menetsia? caquien badedi bedtanquin shocosh ushu nacnenaid piucquid 30ted menepanëdash.

¹⁶ Aden piucquid meniac nidquimbi: ¿Mitsishunquiembi utsibo ismenquio icquin Esus bedmepeba? quequin tantiapanëdash Udasën.

Abi uënës uate anuenannuc abëd icquidobëd Esus pec tabadaid

¹⁷ Adnubien abëd icquidon: Equipito yacnouësh puduanec niquenun pan bidiscamiabi piampid 6tedec ushquin tantiaquin tauaid uëshë nëbi nec, queshun Esus naden chuipondash: Nuquin Papan nampid tantiaquin nuqui nëish iua obeca caniactsëc penun ¿mitsishumbimbi nacnempe? caquien Esusën:

¹⁸ Edusaden yacno nidshun nuqui isondaid dada chiec nid. Nuquin Icbo nadosh: Nëbi Nuquin Papan chiacpadombuen naimbudembi, quiosh. Min shubumbo caic: Aidën shubun puduedshun Nuquin Papan nampid tantiaquin ubëd icquidobëtan obeca caniactsëc pec tabadcuedednu, quiosh, quequin chuita,

¹⁹ cac nidquimbi shubu icbo chuituidpanëdash. Adoac: Ai, ma chonona, quesho tantiashumbien abia nidbuedon aidën shubun puduedshun penun nëish iua caniactsëc shuishun Esusën chiacpadombuen nacnempanëdash.

²⁰ Aid inchëshbudtsëqui abëd icquidobëd choash tabadquin Esusën pepondash.

²¹ Aden pec tabadquimbien Esusën naden chuipondash: Abimbo chiembique. Tantia. Ubi chieshënquin isadaidbon chuiquid tapabo ubi bedmequid abentsëc nëmbobi iquec, quepondash.

²² Adsho tantiash uënësquio yanquin abentsëcshun abentsëcshunquien ubitedishun naden Esus chuipondambi: ¿Ubida cai, Icbo? cabededpondambi.

²³ Adoaquien Esus: Ubëtambi pan cuëshën ënë punshun pequidën ubi chieshënquin isadaidbon chuiquido ubi bedmendac.

²⁴ Nuquin Papan ubi bedmete chuiquin dada uamiampicpadombuen Matsesën Tishaid icshobini bedmendac. Aden ubi chieshënquin bedmequid cumapenen cuidtequidquio nendac. Aidi aton titan tishenquio icpatecnëdan, quepondash.

²⁵ Adoaquien Udasën abi bedmequidënquio: ¿Ubida cai, Icbo? caquien: Ai, mibibi caimbi, capondash.

²⁶ Aden pec tabadquimbi Esusën pan sananquin: Mimbi uaid nëid pete bëdambo iquec, Papa, quequin Nuquin Papa chuitanquin cuëshcuëshshun abëd icquido menebannun naden chuipondash: Ubi uënës uate tantiaquin nëid cun dadabimbuecquid neque. Pe, cac pebededpondambi.

²⁷ Adoshombic uba chinaid ënë actequid cushtoaid dëshote sananquin: Mimbi uaid nëid actequid bëdambo iquec, Papa, quequin Nuquin Papa chuitanquin: Nëid mibitedishun acbeded, quequin meniac aniactse aniactsen acbededpondambi.

²⁸ Aid actequid acshobien Esusën: Nëid cun intacbimbuecquid acquin: Ubi cuidmenquiocnoen Esusded Nuquin Papan cuidmiac aton intac siquebudpambuec uënësposh. Adsho issun Esus tantiaquid icsho Nuquin Papan aid matses icsaid tantienquio yec bëshunquin cuidenquio iquendac, quequin tantiata, quepondash Esus.

²⁹ Adashic: Nadquid uba chinaid ënë nidaidënshun padpiden aquenquiocquimbi Cun Pan namiacnoshon actequid chucambo padpiden mibëtambi aquendambi, quepondash Esus ubitedi chiec.

Petedo muate Esusën chiaid

³⁰ Adashic Nuquin Papan naid chiec cuëdënte cuëdënanec macuësh Odibos caid yacno Esusbëd nidannepondabi.

³¹ Ambo nidash tabadquimbi Esusën naden ubitedi chuipondash: Nëid inchëshëmbi Nuquin Papan chiampicpadec ubi nianec mibitedi niquendac. Nuquin Papan Chiampid nad iquec: Icbo cuessunnesho istanec ambi iuaid obeca niquendac, quequin chuipampic.

³² Aden uënësuac uincuenash nidaid Cadidea yacno ubia nidendabi. Ambo mibitsen ubëd icnuec tsiuec nidta, quepondash Esus ubitedi chiec.

³³ Adoaquien Petedon: Mibi cuesnuec chochosho isash utsibo dacuëdec niquenubi umbien mibi nianenquio ictsiandac, capondash.

³⁴ Adshobien Esusën: Tantia. Mibi chuinu, Petedo. Nëid inchëshëmbi cachina 3tedec cuëdabi icnuc: Umbi isacmaidquio aid nec, mimbi ubi caindac, capondash.

³⁵ Adoaquien Petedo: Pada. Adtiapimbueni iquec. Chieshëmënquidon: Esusbëd icquid mibi neque. Mibi cuessunnenu, caqui: Umbi isacmaid neque. Padi, quenquio iquendabi. Mibëdquiobi uënëstsiandabi, Petedo quenubini: Ai, ubibic adecbidi ictsiac, quecuededpondabi ubitedi.

Quetsemani yacnoshon Esusën Nuquin Papa chianniaid

³⁶ Adanec abëd icquidobëd nidequi cute dadpen nitsinaid Quetsemani caid yacno nidpondash. Auëshquio Esus nadpondash: Nëmbobi tabadta. Udictsëc nidshun Nuquin Papa chuitannu, quepondash.

³⁷ Adashic Petedobëta Sebedeon mado daëd Uambëta Santiaco buanec nidequi natiaquiec uënësquioshë yampanëdash.

³⁸ Adshumbic: Ubibi uënëstiadquio yec uënësquimboshë iquec. Udictsëc nidebique. Chieshtomane, queshun nëmbobi tabadquin ushenquio icquin Nuquin Papa chuita, quepanëdash Esus ambi abëd icquid 3ted buambued chiec.

³⁹ Aden chianec udictsëc nidash dannëshën tinquebudec nidaidën bëccuësquebudquin Nuquin Papa chiec: ¿Ada ubi natiamequin mëyadmenquio ictsia, Papa? Ubi bunacpaden namenquiocquimbi mibi bunacpadombuen nata, Papa, quepanëdash Esus.

⁴⁰ Adtanec choshon isaquien ambi 3ted buambued ushec samëdsho istuidpanëdash. Adsho issun Esusën Petedo chuiquin: ¿Iuec iuecpactsec ushenquio icquin ubëtambi istiapimboda ique?

⁴¹ Ushenquio icquin Nuquin Papa chuita. Nuquin Papan Chiaid niacmequid Mayan Icsa Satanasën: Icsambuen namequin tannu, cac: Chieshtoenquio iquebi, quebuedi min dada uidëmpentsëcquio icsho badedquio mibi chieshtomendac, quepanëdash Esus.

⁴² Aden chuitanec ambi Nuquin Papa chuibocno padpidec niduashun Nuquin Papa chuiuaic: ¿Ada ubi natiamequin mëyadmenquio ictsia, Papa? Ubi bunacpaden namenquiocquimbi mibi bunacpadombuen nameta, quetanec

⁴³ padpidec chouaquin isaquien Petedo chedo ushuaic ushcas mëmuntiapimbo yec.

⁴⁴ Adsho istanec padpidembuec niduashun ambi chuibocpadombuembidi Esusën Nuquin Papa chuiuapanëdash.

⁴⁵ Adtanec choquin ushec samëdsho istuiduashumbien: ¿Ushcas mëmuntiapimbo yecta ushec mibitedi samëdec ne? Nëbimbobi Matsesën Tishaid icshobi icsambuen naquido ubi bedmeque.

⁴⁶ Baded nidnu. Isucun. Ubi chieshënquin bedmequid choeque. Is, quepondash Esus Udas chosho isash.

Abi chieshënquidon Esus bedmiaid

⁴⁷ Aden chuinubien Esusbëd icbued Udasbëd matses dadpen chochopondash. Aido utsi utsiec chështe sanambededtsëquiec chonobi utsibo cueste sanambededtsëcquiec chochopondash. Nuquin Papa ismequin nëish iua cuessunneshun pichicaquidon chuiquidobëtan cun matses tsësiobon: Bedtan, cac chochopondash.

⁴⁸ Esus bednu, quequido tantiamequin chuiquin Udasën: Umbi tanchoccaid mimbi bedtequid neque. Aidquiobi bedshun buanta, queshun

⁴⁹ Udasën Esus tanchoccatuidpondash: Chobi, Icbo, quequin.

⁵⁰ Adoaquien Esusën: Umbi tantiabuedquio mibi nec. Adquid icquimbi mimbi tantiacpadombuen ubi bedmeta, queshobien chochoquidon Esus bedpondash.

⁵¹ Aden Esus bedshobien abëd icquid abentsëcshun abi tsiusudaid chështe chictanquin nëish iua cuessunneshun pichicaquidon chuiquid tapan iua pabiate auc abentsëc pateshunnepondash.

⁵² Adoshobien Esusën: Padi. Chën. Min chështe aucbidi tsiusud. Chështen sianquid icsho adembidi seshunniac uënësendac.

⁵³ ¿Tantienquioda ique? Umbi chiac cun Pan abëd icquido sondadobimbuecquido dadpenquioshë 72mid ubi cudasmenuen chometsiash.

⁵⁴ Nuquin Papan aden ubi cudasmiac bedtiapimbo icsho ¿Mitsi paden Nuquin Papan Chiaid chuiquin dada uamiampicpadombuen ubi aden bedpatsiash? capondash pateshunnianquid chuiquin.

⁵⁵ Adshumbic abi bedquido chiec: ¿Ampec cuesanquid Esus nec, queshunda cuestebëta chështe sanambededtsëquiec ubi bedec chocho? Mambi badiadquidën badiadquidënquien Nuquin Papa tabadte shubu dapa daquënë uaidën tabadquin matses tantiamenuen chuibampaboc mibitedi tabadnubi. Aden chuibanshobi ma mimbi ubi bedenquio icpaboc.

⁵⁶ Bedenquio icbuedëmbi Nuquin Papan tantiacpadënquiobi mimbi ubi bedec. Aden ubi bedshun mëyante chuiquin Nuquin Papan oncamiaidon dada uampicpadombuembi mimbi ubi bedec, quequin chuinubini Esus abentsëqui nianec ubitedi niquepondac.

Isadaidbon chuiquido iccuededacno Esus buanaid

⁵⁷ Aden Esus bedshun nëish iua cuessunneshun pichicaquidon chuiquid tapambo Caipas cuëmëdquidën shubuno Esus buampanëdash. Ambobi Moisesën chiampid tantiamequidobëd isadaidbo tsësio utsibo chochoash tabadpanëdash.

⁵⁸ Adnubien Petedo uannoshon isbëec tsiuec chopanëdash. Adanec Nëish iua cuessunneshun pichicaquidon chuiquid tapan shubu yacno choash tsicatiaid shëcuën puduedpanëdash. Adec puduedash Nuquin Papa tabadte shubu isquido sondado tabadacno Petedo tsadtuidpanëdash. Chuiquidon Esus ¿mitsipadoeque? Isnu, quec adec tsadpanëdash.

⁵⁹ Adnubien abëtan chuiquidobëtan Nuquin Papa ismequin nëish iua cuessunneshun pichicaquidon chuiquid tapan Esus cuessunnemete bunquin: Esusën icsambuen nasho isombi, quequin muaquin chuisho tantianuna, queshun chochomiac muaquimbi dadpenshun: Esusën icsambuen nasho isombi, quequin chuibededpanëdash.

⁶⁰ Aden dadpenshun muaquin chuiquin Esus uënës uametequid chiambo icpanëdash. Adnubien utsi daëdshun naden chuituidpanëdash:

⁶¹ Nuquin Papa tabadte shubu dapa caic: Uesquin chic chictanquin padpiden nacnenquin daëdec ushquin nainendambi, ma Esus quepondac, quepanëdash.

⁶² Aden chuisho tantiash nëish iua cuessunneshun pichicaquidon chuiquid tapa nidtotanquin chiec: ¿Mimbi chiaid chiecquiobida nec? ¿Abimbo chuiquimbida nëid daëdshun chieque? Tantianu. Chui, capanëdash Esus chuiquin.

⁶³ Adoac ëcbedenquio yec otacquio icpanëdash. Adshobien nëish iua cuessunneshun pichicaquidon chuiquid tapan: Nuquin Papa uënëstiapimbocquidën cuidnushe, queshun abimbo chuita. ¿Nuquin Papan Chomiaidquio Quidistu caid yec aidën Madombobida mibi nepe? caquien

⁶⁴ Esusën: Ai, mimbi chiaidquiobi nebi. Tantia. Mibitedi chuinu. Matsesën Tishaid yec abuc niduash Nadatiambocquidën dayun abiucquio tsadsho mimbi isendac. Adembidi abucuësh abu ushu yacno ubi chouasho mibitedishun isendac, quepanëdash Esus.

⁶⁵ Adsho tantiash Nuquin Papa ismequin nëish iua cuessunneshun pichicaquidon chuiquid tapambo: Icsambuen chiec, quec nëishtanquin aton dashcute bëntsecquid dached dachedquepanëdash. ¿Ada mibitedishun tantio? Nuquin Papan Madombobi nebi, quequin Nuquin Papa icsambuen chuishunec muapayoc. Ambi icsambuen naid utsi chuisho tantiatiapimbo iquebi. Ambibi Nuquin Papa mua uasho tantiashun

⁶⁶ ¿atotsi catiad? caquien abëtan chuiquid utsibo: Adquid cuidquin cuessunnequid, quedenneque. Uënës uamequimbien ictiad, quecuededpanëdash.

⁶⁷ Adshumbien Esus chieshënquin bëpishtucatanquin mëshëbudtanquin mëdanten bëse bësepanëdash. Bëse bësesho istanquin utsibontsen istiapimbo icnuc Esus dashcuten bëpuctanquin mëdanten tancues tancuespanëdash.

⁶⁸ Aden tancuestanquin: Nuquin Papan Chomiaid Quidistu nec, canu. ¿Tsundan mibi cuesoshe? En chui. Tantianu, cabededquin Esus mamënshumbededpanëdash.

Umbi isacmaid Esus nec, quequin Petedon chiaid

⁶⁹ Adnubien aid shubu daquënë uaid nuntan Petedo tsadacno choquin chido iuan naden chuituidpanëdash: Nidaid Cadidea yacnocquid Esus caidbëd icbuedien mibi nec, caquien:

⁷⁰ Tantiadenquiocnoc mimbi chiec. Umbi isacmaidquio mimbi chiec, quec Petedo muaic taëpanëdash utsibo dadpenshun tantianubi.

⁷¹ Adanec daquënë uaid puduedte shëcuë dayun nidash nidtuidpanëdash. Adshobien chido iua utsin: Nasaded yacnocquid Esusbëd ma nëid icpaboc, capanëdash, ambo tabadquido chuiquin.

⁷² Adoaquien Petedo padpiden muaquin chiec: Ma umbi isacmaidquio Esus neyoc. Nuquin Papan isquin tantianubi mibi abimbo chiec nebi, queuapanëdash.

⁷³ Adshumbic iuec iuecpactsëcshun ambo tabadquidontsen Petedo chuipanëdash: Aidbëd icquidien mibi nec. Ma mibi nidaid Cadidea yacnocquid onquiacbimbuec onquepayoc, capanëdash.

⁷⁴ Adoaquien Petedo: Umbi isacmaidquio nec, quequin mibi abimbo chiombi. Umbi abimbo chienquio icsho ma ubi chian annëdënquequid Nuquin Papan nënepanuna, quepanëdash Petedo cumapenec cuëdec. Adec 3tedec muanubien cachina cuëdpanëdash.

⁷⁵ Adsho tantiashumbien Petedon Esusën chuibuedquio tantiactampanëdash. Cachina cuëdabi icnuc ubi caic: Umbi isacmaid nec, quequin 3teden mimbi chiendac, quequin Esusën chuibuedquio tantiatanec umanuc puduenanec nidec uënësquioshë yec natiaquiec shubiquiopanëdash.