Mateo 22 - El Nuevo Testamento en matsés

Utsi chiacbimbuen chido bedquin pete pebededaid chiaid

¹ Adshumbic padpiden Esusën utsi chiacbimbuembidi naden chuipondash:

² Nuquin Papan namiacno tabadte tantiamenuen isadaidbon nacpadombuen aton mado: Chido bednu, quesho tantiashun aton papa chuiquid tapa icquin matses dadpen chuiquin: Pec cho, cauidaid mibi chuinu. Tantia.

³ Chuiquid tapan aton iuabo chuiquin: Cun icbon madon chido bedeque. Aidbëd cuishonquequin penu. Cho, quequin umbi tantiaidotedi chuitan, cac iuabon chuituidaqui: Nidenquio iquebi, quequiduidquio icposh.

⁴ Adsho issumbien chuiquid tapan aton iua utsibotsen nidmiac chuituidec: Nëish iua nua bëchichoquidquio dadpen cuessunemeshun codocaccoshe. Pec cho, quequin chuituiduaqui:

⁵ Nidenquio iquebi, queposh. Adash abentsëc aton tied nantan nidnubi utsi: Piucquid bednu, quequin ambi atona menebante shubuno nidposh.

⁶ Utsibombic abi: Pec cho, cashobi iuabo bedshun mëyanquioquin cuessun secaposh.

⁷ Adoshobien chuiquid tapan nëishtanquin shëpi caposh. Uesquin cuessun secatan, cac aton sondado chedon aton iuabo cuessun secaquido uesquin cuessun secatanquin aton shubutsen uesquin nëdëncaposh.

⁸ Adometanquimbic chuiquid tapan: Abi pete codocaid dadpen iqueque. Pec nidta, cac chochoenquio iccoshe.

⁹ Ma utsibobi pec chochono. Chuitan. Umbi: Pemenu, cacmaidobi chuibennetan. Podquiedën nidquin mimbi istuidaidtedi: Pec nidta, cabennetan, cac nidshun

¹⁰ ambi istuidaidtedi chuibennetanac matses dadpenquio pec chochoposh. Icsambo icquidobëdi bëdambocquido chochoash chuiquid tapan shubun puduedash pec tabadte quënë dapan tsucus tsucustsëcquio yec tabadcuededposh.

¹¹ Adec tabadnubi chuiquid tapatsen puduedshun isaquien dashcute bëdaidquio dasiuidabi icquid abentsëc tsadposh.

¹² Adshobien chuiquid tapan: ¿Atotsi quiash dashcute bëdaidquio dasiuidambobi cho, buchi? caqui ëcbedanenquio yec tsadposh.

¹³ Adshobien chuiquid tapan: Chido bedacno isnuec dashcute bëdaidquio dasiuidquid, quepadennec. Mibi icsambo iqueque. Mibi cuidnu, queshun aton iuabo chiec: Mëtanetanquin tataneshun buanshun inchëshquio yacno netan, cac netanac mëyadec natiaquiec shëta chëquëdëshquec shubiquioposh.

¹⁴ Nuquin Papan ambi bëdambuen iste matses dadpenquio tantiamiaqui daëdpactsëc abi tantiaquid yec abi yacno puduedtequid iquendac, quequin Esusën chuipondash.

Chuiquid tapambo piucquid menete chiaid

¹⁵ Adsho tantianec nidash padiseobo: Esus icsambuen chuimenuna. Icsambuen chuisho bedshun: Icsambocquid nec, cabedednuna, quepanëdash.

¹⁶ Adshumbic: Icsambuen chuimetan, quequin chuiquid tapa Edodesbëd icquidobëta padiseobobëd icquido nidmiac icsambuen chuimenuec chochoshon chuituidpondash: Bëdambuen chuiquid mibi neque. En ubi chui. Tantianu. Muesambo icquin Nuquin Papan chiacpadec bëdambuec tabadte mimbi abimbo chuipoc. Matses dacuëdënenquio icquin Nuquin Papan Chiaidquio mimbi chuipoc.

¹⁷ Adquid icquin ¿atotsi mimbi chuipe? Tantianu. Chui. Nuquin matses iuaquid chuiquid tapa Sesad caidën: Piucquid shocosh tsasi icquid dadpen bec cho, quesho ¿ada aid meniac bëdambo icpatsiash? capondash.

¹⁸ Aden chuisho tantiashun chobuedën: Icsambuen chuimenu, quequin tantiaid tantiaquid icquin Esusën nadopondash: Bëdambo icquid danmianquido yec mibi muambo nec. ¿Atotsi queshun ubi icsambuen chuimetiadquio ique?

¹⁹ quetanquin chuiuaquin: Chuiquid tapa menetequid piucquid shocosh tsasicquid isnu. Bec cho, cac

²⁰ bësho bedshun Esusën: ¿Tsutsibimbuecnuc andada uaid nëidën iquec? ¿Tsutsi cuëmëdquid dada uac? En chui. Tantianu, capondash.

²¹ Adoaquien: Ma nuqui iuaquid chuiquid tapambo Sesad neyoc, quepondash. Adsho tantiashumbien Esusën: Ai, aidëna neque. Aid: Bec cho, quesho meneta. Adembidi Nuquin Papa Nuquin Icbombo icquin: Naden nata, cacpadombuen nabanta, quequin Esusën chuipondash.

²² Adsho tantiash icsambuen chuimetiadquio icbuedi tantiadempambo yec tabadec: Bëdambuembien chuipec, quetanec nidannepondash.

Matses uincuenmete Esus chuimiaid

²³ Adnubien aid uëshëmbi saduseobo: Matses uënësaid uincuentiapimbocquid nec, quequidotsen Esus isec choshon naden chuituidpondash:

²⁴ Chuibanquin tantiamequid icquin ¿Mitsi paden mimbi chuipatsia? Chuinu. Tantia. Nuquin tsusedpa Moisesën naden chuiquin dada uapampic: Aton chido bedash bacuë tishmiabi uënësacsho aton utsin aid chidobidi bedshun: Cun buchi padon bacuëbo nibëdeque. Cun buchin madobimbuecnuc tishmenu, quequin tishmequid, quequin chuipampic.

²⁵ Aden chiampid icnuc abëta tishaido dada 7ted icquid nëmbo icpanëdash. Bëyucquid aton chido bedashi bacuë tishmiabi uënëspanëdash. Adsho issun abi tsibanquidën aidën chido bedash

²⁶ bacuë tishmiambobidi uënëspanëdash. Adsho issun aid tsibanquidën aid chidobidi beduashic bacuë tishmiambobidi uënëspanëdash. Adenuidi abi tsibanquidën abi tsibanquidënquien aton buchi uënësan uënësanquien aid chidouidi beduid beduidpanëdash. Bacuë tishmiambobidi abitedi uënësbudnepanëdash.

²⁷ Adec abitedi uënësbudnian chidotsen uënëspanëdash.

²⁸ Adec uënësacsho Nuquin Papan uënësaido uincuenmete uëshën uincuenmiac ¿Aid dada 7ted icquidën chido ictenned mitsicquidën chido aid icpatsiash? capondash.

²⁹ Adoaquien Esusën: Mibitedishun icsambuen tantiec. Nuquin Papan Chiaidquio tantienquio icquin Nuquin Papan nadatiambo icquin nabanquin uincuenmete mimbi tantienquio iqueque. Tantia. Chuinu.

³⁰ Uincuenmiac dadan aton chido bedtiapimbo iquendac. Adembidi chidon dada bedmetiapimbo iquendac. Adquid icnuc Nuquin Papabëd icquidobimbuec matses uincuenmiaido iquendac, quepondash Esus.

³¹ Adshumbic padpiden chuipondash: Ambi uënësaid uincuenmete chuiquin Nuquin Papan Moises dada uamiampid ¿isbanamboda ictio?

³² Naden dada uapampic: Abadauan yec Acobo yec Isac yec quec icquidon Papa nebi, quepampic Nuquin Papa. Adquid icnuc uënësaidon Papa caidpenquio yec abi icquidon Papa caid Nuquin Papa nec, quepondash Esus.

³³ Adsho tantiash abi datsidadquido tantiadempambo yec tabadec: ¿Mitsi padquid nepec? Bëdambuembien chuibampec, quecuededpondash.

Moisesën dada uampid chiaid

³⁴ Aden uënësaid uincuenmete chuisho tantiashumbien Saduseobon padpiden: En chui, cainquio icpondash. Adsho isashien Esus chieshënquid utsibo padiseobo

³⁵ chochoshon abentsëcshun Moisesën chiampid tantiamequidquio icquin Esus icsambuen chuimenuen naden chuituidpondash:

³⁶ Chuibanquidquio mibi neque. En ubi chui. Tantianu. Nuquin tsusedpa Moises Nuquin Papan: Naden nata, quequin chuiquin dada uamiampid dadpen icnuc ¿mitsicquid abentsëc tantiaquin nasho Nuquin Papan: Mimbi bëdambuenshë naic, capatsiash? capondash.

³⁷ Adoaquien Esusën: Min Icbombo Nuquin Papa neque. Aid tantiaquiec cuishonquec dayacquio icquin aidën chiacpadec tabadte bunquiota, quequin

³⁸ chiampidba naic Nuquin Papan chiacpadec mibi bëdambuec tabadtsiandac.

³⁹ Adembidi aidpadquid utsi Moisesën chiampid utsi naic matses bëdambuec tabadtsiash: Min dada mibibi datantiadquin utsibotsen tantiaquiota, quequin chiampicpadombuen nasho Nuquin Papan: Bëdambo iquec, catsiash.

⁴⁰ Aden Nuquin Papa tantiaquioquin utsibo tantiaquiembi, quequin chiaid matses bëdambuen namenuen Nuquin Papan Ambi Chiaid utsi abitedi Moisesba chuishun nuquin tsusedpa Nuquin Papan oncamiaido chuiquin dada uamepampic, quequin Esusën bëdambuen chuipondash.

¿Tsuntsin Mado Quidistu nepec? quequin Chiaid

⁴¹ Adshumbic Esusëntsen abi icsambuen chuimete bunquido iccuededsho padiseobo naden chuipondash:

⁴² Umbitsen mibitedi chuinu. Tantia. Nuquin Papan Chomiaid Quidistu Mesias caid ¿Mitsi padquid nepec? ¿Matsesën madouidtsëquida nepec? capondash Esusën. Adoaquien badedi: Tsusedpa yampid Dabidën tsiuecquid nec, quequin Dabidën mado caimbi, capondash padiseobon.

⁴³ Adsho tantiashumbien Esusën: ¿Bëdambuenda chuidio? Mimbi chiacpadquid aton mado icshobi ¿atotsi queshun Nuquin Papan Mayanën tantiamiac Dabidën Cun Icbo capampic? Naden chuiquin Dabidën dada uapampic:

⁴⁴ Icbo Dapan cun Icbo Mesias caid naden chuiposh: Cun abiuc tsadec abitedishun Icbombo iquec nëmbo cho. Mibi chieshënquido dëniacmeshun cun Icbo mibi camenu, quequin Cun Icbo chiendac, quequin Dabidën chuipampic.

⁴⁵ Cun mado cainquio icquimbi Dabidën cun Icbo capampic. Aden chiampid icnuc ¿Atotsi queshun mimbi: Dabidën mado nec, quequin tantiape? caquien

⁴⁶ ëcbedenquio yec otacquio abitedi tabadpondash. Aden Esusën bëdambuen chuisho tantiash: Icsambuen chienquien icchitec. Umbi padpiden: Icsambuen chuimenu, cac bëdambuembidi chuiuatsiash, queshun abi chieshënquidon Esus padpiden chuimenquio icpondash.