Codinto 1 5 - El Nuevo Testamento en matsés

III. ESUS TANTIAQUIDON NATEMAID CHIAID ( 5.1—6.20 ) Ambi chudtemaid chudquid cuenmete chiaid

¹ Mibëd Esus tantiec iccuededquid abentsëcshun aton papan chido aton titatsibi bedaccosh, quequin chiec onquesho tantiombi. Aden ambi natemaidi bedshun chudaid icsamboshëcquid nec. Nuquin Papa tantiesabombi aden nambo iquec.

² Adquid icnuc mibitedi: Ubiuidtsëqui bëdambocquid nebi, quenquio yec uënësquio yec tabadta. Aden icsambuen naquid icsho issun aid dada mibitedi iccuededacno tabadmenquio icquin uënësquio icquimbi ëndembi cuenmepatecnëdan, caimbi.

³ Mibëd tabadenquio yec uanno icquimbi mibitedi tantiec mibëd yacbimbuec iquebi. Ashunquiobi icsambuen naquid icsho: Aid dada cuenme, quequin chuitsenombi.

⁴ Mibitedi Esuquidistu tantiec iccuedednuc mibëd yacbimbuec iquebi. Adembidi Nuquin Icbo Esusën mibëd icquin ambi tantiacpadombuen namendac. Aden Nuquin Icbo Esusën namiaid icquin

⁵ aid dada icsambuen naquid nidme. Ma adoacsho ambi tantiacpadombuen Mayan Icsa Satanasën aton dada mëyanac icsambuen nate bunenquio yanacsho Nuquin Icbo chouashun abi yacno ma aton mayan iuedpanuna.

⁶ Adquid icnuc mibitedi: Ubitedtsëqui bëdambo icmiaido nec, quenda. Matsesën naden chiaid iquec: Pan bidiscamete aniactsëc cabiunac pan abichobi bidisquec, quequin chiaid mimbi tantiec.

⁷ Adoacbimbuen mibëd iccuededquid abentsëcshun icsambuen naquin ismequid icsho issun: Utsibo adquiobidi icsambuen naquido yannushe, queshun icsambuen naquid puduedmenquio icquin nidmeta. Adash mibitedi isadaidbon: Cun mado uënësmenushe, queshun obeca caniactsëc cuessunniampid tantiate uëshë tantiaquin pan bidiscamiabicquid pec tabadacbimbuecquido mibi iquendac. Aden chiaid obecabimbuecquid Esuquidistu nec. Aidi nuquitedi cuidmenquio icnuec abided cuidadec uënëspanëdash.

⁸ Adquid icnuc Esus tantiaquido icquin ambi icsambuen naid ënaid tantiamequin pan bidiscamiabicquid pec tabadquin nuquitedi: Icsambuen naquid iccondaidi nëbi bëdambuen naquin abimbo chuiquid icnuna. Adquid icquin icsamboshë icquido yec chieshëmënquido tabadacpaden nabanenquio icnuna.

⁹ Ambi natemaidi chudquidobëd iccuededenda, quequin chuiquin ënden dada uaondambi.

¹⁰ Adquidobëd iccuededenda, quequin chuiquin: Aidobëd iquenquio yec cuenta, quequin chiecpenquio niondabi. Ambi natemaid chudquido dadpen iquec. Adecbidi atona dadpen bunec chieshëmënquido dadpen iquec. Adecbidi ampequido dadpen iquec. Adecbidi ambibi nacnenshun papa caquin tantiaquido dadpen iquec. Adquid isec icsamane, quiash midambo mibitedi cuenendac.

¹¹ Esuquidistu tantiaquid nebi, queshumbi ambi icsambuen naid ënenquio icquin naden naquidobëd iccuededenda. Nëidic ambi natemaid chudquido. Nëidic atona dadpen bunec chieshëmënquido. Nëidic ambibi nacnenshun papa caquin tantiaquido. Nëidic icsambuec chuishumënquido. Nëidic tantiadennuen acte paë uaid acquido. Nëidic ampequido. Adquidobëtan pec tabadenda, quequin chiec niobi.

¹² Esus tantiesa ambi icsambuen naid chuiquin: Cuenmeta ¿quectabi nedi? Mibëtan Esus tantiaquidën icsambuen nadennequin ënenquiocsho issun ambi icsambuen naid chuiquin tantiamequin: Mimbi icsambuen naid ënta, quequin chuita.

¹³ Nuquin Papambien Esus tantiesa ambi icsambuen naid chuiquin cuidendac. Adquid icnuc mibëd iccuededquid: Esus tantiaquid nebi, quequidëmbi icsambuen naquidquio icsho cuenmeta, quequin chiec nebi.