Codinto 1 10 - El Nuevo Testamento en matsés

Isadaidbo chieshënnanec icsampicpadec tabadenda, quiaid

¹ Tantia, cun utsibo. Bëshunnushe, queshun nëid mibitedi chuinu. Nuquin tsusedpabo abu ushu ënapen iquec nidquid tëdion nidannequimbi abitedishumbi Acte Piu Mad caid potepampic.

² Aden potequido yec aido abitedi abu ushu ënapen icquidbëtan acte dapa mad caidën mentoacbimbuecquido Moises tsibanquido nepampic.

³ Adombuembidi abucshun Nuquin Papan nadatiambocquin pete chomiaid abitedishumbi pebededpampic.

⁴ Adembidi abëd nidquid cuënotebimbuecquid Esuquidistun aido acte bundoacsho issun cuënote dapa yacnoshon acte chomiaid abitedishumbi acbededpampic.

⁵ Aden acbuedombi dadpenshun Nuquin Papan Chiaid niacbededpampic. Adquido icsho matses nibëdacnombo nidannemiac capucuennequi dadpenquio uënësbudnepampic.

⁶ Nuquin tsusedpabo icsambuec tabadsho aden cuidpampic, quequin umbi chuibued tantiaquin: Aidon nabanampicpadombuen naic icsambuec tabadsho cuidtsiashi, quequin nuquitedi tantiamete chiec nebi.

⁷ Adquid icnuc tsusedpabo utsin utsinquien ambibi nacnenshun papa quequin tantiampicpaden matsesën ambibi nacnenshun papa caid tantienda. Aidon nampid chuiquin dada uamiampid nad iquec: Ambi nacnenaid tantiaquin petebëta actequid aquec matses shëcshëcquec bidiadtanec cuishonquec tabadec, quequin chuipampic.

⁸ Adembidi tsusedpabo utsin utsinquien ambi natemaidi piucquid bedec chudadquid chido chudampicpaden nainda. Adquido icsho Nuquin Papan abi uëshëmbi 23 midtedi uënësmepampic.

⁹ Nadembidi tantienda. ¿Ambi chiaid niacshoda ubi Esuquidistun cuidpatsiashba? quequin tantienda. Nuquin tsusedpabon abi chushcannesho Nuquin Papan cuidquin nisi pemiac dadpen uënësbudnepampic.

¹⁰ Adembidi tsusedpabo utsin utsinquien Nuquin Papa icsambuen chuishunec chushquecuededampicpadec chushquenda. Adquido icsho Nuquin Papabëd icquid uënësmianquid caidën cuessun secamepampic.

¹¹ Nuquin tsusedpabo icsambuec tabadsho aden cuidpampic, quequin umbi chuibued tantiaquin: Aidon nabanampicpadombuen icsambuen naic tabadsho Nuquin Papan abitedi cuidte uëshën cuidnushe, quiash: Ma bëdambuec tabadnu, quequin nuquitedi tantiamete icsho Nuquin Papan chuiquin dada uamiampid mibi chuibanombi.

¹² Aden icsambuen nainquio ictsiambi, quequin tantiaquidi abia icsatsiash, quiash chieshtoenquio icquin Esus tantiec bëdambuec tabadta.

¹³ Esus tantiaquidquiobida neque. Isnu, queshun mëmuntiapimbo icnuc utsibo natiamiampicpaden mibitedi tanquin natiamiambo iquec. Abi tantiaquid icsho Nuquin Papan mëmuntiapimbo icnuc tanmequin mëyadmetiapimbo iquec, quequin nuqui tantiec. Adec natiamiantequid icnuc chieshtonoshe, queshun Nuquin Papan mibitedi tantiaquin chieshtomenquiocquin dayacquio icmendac.

Esuquidistu uënësaid tantiaquin pebededte chiaid

¹⁴ Tantia, cun utsibo, umbi aden chuibued tantiashun ambi papa canun nacnenaid tantiec tabadacno nidenda.

¹⁵ Mibitedi tantiaquidombo nec, queshun mibi chiec nebi. Aidën chiaid abimbo iquec, quequin tantiec mibibi datantiadta.

¹⁶ Nuquin Icbo Esus abided cuidadec uënësaid tantiec iccuededquin actsëcnun Nuquin Papa chuishun Esuquidistun intac acacbimbuen nuquitedi acbededpec. Adembidi petempi cuësh cuështsëcshun pequin Esuquidistun dada piacbimbuen nuquitedi pebededpec.

¹⁷ Esuquidistubëd abentsëc yacbimbuecquido nebi, quequin tantiaquin pete cuësh cuështsëcshun menebanac abentsëcshun piacbimbuen abi tantiec iccuededquidon pebededec.

¹⁸ Aden pebedednubien isadaidbon Nuquin Papa cuidmenquiocnoen nëish iua cuessunneshun pichicatequid tëshë bedshun pichicaquidobëtambi nëish iua icbon pebededpec.

¹⁹ Aden chuiquin utsibon papa canun nacnenaid ambi tantiaid bëdambo iquec, quequin chiecpenquio nebi. Adembidi: Ambi nacnenaid ismete nëish iua pichicate bëdambo iquec, quequin chiecpenquio nebi.

²⁰ Aden chienquio icquin naden chiec nebi. Ambi nacnenaid tiboquesa icnuc Mayan Icsa Satanasën iua podobitsi icsa tantiaquin Esus tantiesabon Nuquin Papa tantienquio icquin nëish iua pichicamepec. Aden naquidobëd: Pambid penu, quiash Mayan Icsa Satanasën iua podobitsi icsabobëd tabadenda.

²¹ Nuquin Icbo abided cuidadec uënësec intac tantiaquin actequid acbededtsëcshumbi Mayan Icsa Satanasën iua podobitsi icsabo tantiaquin acac icsambo iquec. Adembidi Nuquin Icbo abided cuidadec uënësaid tantiaquin pete cuëshëmpi pebededtsëcshumbi Mayan Icsa Satanasën iua podobitsi icsabo tantiaquintsen petempi piac icsamboshë iquec.

²² ¿Adquido tantiaquin acshun pequin Nuquin Icbo nëishmeteda bune? Nuquin Icbo nadatiambocquid icnuc ¿Aidpadquidta nuquitedi ne?

Esuquidistu tantiaquid utsibo icsambuen namemane, quesho tantiashun nainquiocte chiaid

²³ Mibitedi utsi utsiec: Ubi bunacpadembi nabanembi, quepec. Ai, abimbo mimbi caic. Aden naic abitedi bëdambocquidpenquio nec. Aden mibi bunacpaden naquin Esus tantiaquid utsibo mimbi bëdambuen tantiametiapimbo iquec.

²⁴ Umbi tantiacpaden nabanec bëdambo iquebi, quenquio yec: Utsibo bëdambo icmequin nashunnu, quec bëdambuec tabadta.

²⁵ Piucquid menequin pambid tëshë bednu, quequin: ¿Matsesën ambibi nacnenshun papa caid ismequin pichicanuen cuessunniaid tëshëda nec? quenquio icquin bedshun peta.

²⁶ Abubëta nidaid uashun aidën icquidtedi ambi uaid abitedimbo Nuquin Icbona nec, quequin tantiaquin bedshun peta.

²⁷ Esus tantiesa abentsëcshun: Pec cho, quequin chiac nidacsho codocashun meniac: ¿Nëid tëshë pequindambi icsambuen napeba? quenquio icquin bedshun peta.

²⁸ Adnubien mibitedi puduedacsho issun abentsëcshun chuiquin: Ambibi nacnenshun papa caid ismequin pichicaid tëshë codocaid nëid nec, quequin chiac penda. Aden chiaqui mimbi pesho issun adembidi ambi: Icsambuen naid nec, caidi penushe, queshun aid pambid penda.

²⁹ Utsibon: ¿Bëdambuen nabanaidida nepeba? quequin icsambuen naid tantiaquid icquin aidon nabanaid chiec nebi. Mimbi naid tantiaquin chuibanecpenquio nebi. Pambid petequidquio nec, quequin mimbi tantianubi utsibon: Aid pequin icsambuen natsiambi, caidi pequin ismenda.

³⁰ Mimbi uaid pete bëdambo iquec, quequin Nuquin Papa chuishun peshobi ¿atotsi queshun: Icsambo iquec, ubi capec?

³¹ Nuquin Papa bëdamboshë iquec, ma utsibo quenu, queshun pete peshun acte acquin bëdambuen nabanec tabadtedneta.

³² Nëidtedi ismequin: Icsambo iquec, camenda. Nëidic isadaidbo. Nëidic matses utsibo. Nëidic Nuquin Papan tantiamiac Esus tantiaquido. Aidotedi: Icsambo iquec, camenda.

³³ Umbi nabanaidtedi isash ma utsibo abitedi bëdambuen tantiec cuishonquenu, queshun nabanembi. Umbibi tantiacpaden nabanec bëdambo iquebi, quenquio icquin utsibo tantiaquin bëdambuen nashunembi: Ma aido Nuquin Papa yacno puduedtequid icpanu, queshun.