Josué 10 - Sharanahua: Diospan Tsain

Israelifoan Amorreofo rutuqui cuyonifo

¹ Josué Jericó anoa aton niaifo rutufain ahuun yorafoya non nan aton inafoya ato rutuquin cuyocoinni cuscan nanscari huaquin nan Hai pushu rasi anoa icafo aton niaifo ahuun yorafoya ato rutuqui futsanifo. Nantianri Gabaonitafoan Israelifo yoini isca huaquin, —Non rutunonanonma. Non mato fu isharaino marifi man noco fucash huanonma, —icashu yoinonansharanifo Gabaonitafo Israeli chaimashta icafo ini. Nan pushu rasi ahuun anu Jerusalén anoa aton niaifoan Adonisedec nafohuunoa nicani.

² Ascano nan niaifo futan ahuun yorafoanri nicacani fasi ratucoinnifo. Gabaonitafoan aton pushu rasi anunifo Gabaon. Nanno niaifo patasharinnoafo ichaparasi ini. Nannori yora ichapacoin. Hai anoafocai ichapa inima. Gabaón ano fasi paratama yora ichapacoin ini. Aton ranushumuafo fasi mutsisipacoin yora rutuqui tapicoianfo ini.

³ Ascano Jerusalén anoa aton niaifoan Adonisedec niaifo futsafo cunu fomani. Hebrón icanoafo aton niaifo Hohan fomafain Jarmut icanoafo aton niaifo Piream fomafain Laquis icanoafo aton niaifo Jafía fomafain Eglón icanoafori aton niaifo Debir cunu fomani.

⁴ Niaifo Adonisedec ato cunu fomani isca huaquin, —Gabaonitafoan Josué yafi ahuun caifo Israelifo yoinonansharafo rutunanshcaquima. Ascacun uqui fucahuun non nocon ranushumuafo futan Gabaonitafo non rutui fonon, —ishon Adonisedec ato yoimani.

⁵ Ascano nan mucu fustiti Amorreo aton niaifofoan ichanan huanifo. Jerusalén anoa niaifo non Hebrón anoa niaifo non Jarmut anoa niaifo non Laquis anoa niaifo non Eglón anoa niaifo ichanan huani aton ranushumuafo fu Gabón ano noconannifo ato rutushcaquin.

⁶ Ascan nan Gabaonitafoan Josué Gilgal anoa cunu fomani isca huaquin yoini, —Nonfin maton oinmatifoquin. Noco potayamacahuun. Amorreo niafofoan aton ranushumuaya machifo anoashu nocoqui fucani noco rutushcaquin. Ascacun oriscahuun noco numashquin, —ishon cunu fomani.

⁷ Nan cunu ointan Josué nantifi ahuun ranushumuafo nan rutumitsaqui tapisharafo fu Gilgal anoashu Gabaón ano fonifo.

⁸ Foaifotian nocon Ifo Diosin Josué yoini isca huaquin, —Atoqui ratuyamacahuun. Un yonoa cuscan mato tsoan ahuusca huatiroma. Manfin ato rutuquin futsaicain, —ishon nocon Ifo Diosin Josué yoini.

⁹ Ascano nan yamutishon foshinifo Gabaón ano nocoshcaquin. Amorreofoancai tapinima Josué fu Israelifo atoqui nocoai cuscacai tapinifoma.

¹⁰ Nantian mustairitanifo nocon Ifo Diosin ato shinanchacamanaino ahuuscamain acanicain tsoacain tapinima. Ascashon Israelifoan Gabaón anoa ato ichapacoin rutunifo. Atirifi ichoaifoan Israelifoan fai Bet-horón anoshon ato mufainifo ato rutushcaquin. Gabaón anoashu chai Azeca yafi Maceda anoshon ato mufain rutunifo.

¹¹ Nan mucu fustiti Amorreo niaifofo futan aton ranushumuafoya ichoaifoanno nocon Ifo Diosin nai muranshon unu matsi tocoro uhuapacoin atoqui potaino ichapacoin nai futsunifo. Israelifoan ato nopun rutua finonmacaifain nocon Ifo Diosin unu matsi tocoronun uhuapacointon fasi ichapacoin ato rutuni.

¹² Ascano nan shafata nocon Ifo Diosin yonoa cuscan Israelifoan Amorreofo rutuqui cuyonifo ato mai fianshcaquin. Ato mufaintan Josué Israelifoan aton ointaifi Ifo Diosi cufinquin isca huani, —Farin, Gabaón amanaonri nitunhuun. Oshun machi rafu nushmancayan ahuun anu Aialón amanaonri nitunhuun, —ishon nannori Josué yononi.

¹³ Nannori yoiaino fari yafi oshu nanno nituyoni Israelifo ato noicasmaifo rutuqui cuyoaifotian. Nannori Justopan libroqui cununi isca huaquin, —Fari masafinin ano fari nituyoni shafa fusticai cayonima, —ishon cununi.

¹⁴ Tsoancai ascara oinyomisima. Afananricai ascamisima. Rato nocofunucai Ifo Diosi cufianno fari yafi oshu nitumanima. Icon nocon Ifo Diosin Israelifo noicasmaifo ato rutumaqui cuyoni.

¹⁵ Ascatan Josué Israelifo fu Gilgal ano nasonifo.